Read Jula Zaburuw kitabu 144 Bible Online

Zaburuw kitabu 144 - Jula bible

Zaburuw kitabu 144

¹Dawuda ta Zaburu. Matigi Ala, ne ta barakatigi Ala, i baraka! Ele le bɛ ne boro degi kɛrɛkɛcogo ra, ka ne borokandenw degi kɛrɛkɛminanw minacogo ra.

²Ele le ye ne ta kow ɲabaga ye, ani ne tangabaga, ne ta karifayɔrɔba, ani ne bɔsibaga; ne tangabaga lo, ne bɛ ne yɛrɛ karifa min ma, min bɛ ne ta mɔgɔw majigi ne ye!

³Matigi Ala, adamaden ye mun le ye k’a fɔ ko ele b’a jate? Mɔgɔ ye mun ye ka n’a fɔ ko ele bɛ miiri a ma?

⁴Adamaden bɛ i ko fɔɲɔ, a si teredaw bɛ i ko suma min bɛ tunu.

⁵Matigi Ala, i ta sankolo jɛngɛ ka jigi, ka maga kuruw ra fɔ o ye sisi bɔ.

⁶Sanmanamana bɔ ka ne juguw janjan; o bon ni i ta biɲɛw ye, fɔ ka o yɛrɛgɛ!

⁷To san fɛ, ka i boro foni ka ne kisi, ka ne sama ka bɔ jiba jukɔrɔ, ka ne bɔsi ka bɔ siya wɛrɛ mɔgɔw boro,

⁸minw da bɛ faninyakumaw fɔ, o bɛ o kininboro kɔrɔta ka kari faninya kan.

⁹E, Ala, ne bɛna dɔnkirikura la i ye, ne bɛna dɔnkiri la, ka i tando ni gɔni juru tan ye;

¹⁰ele le bɛ masacɛw kisi, ka i ta jɔncɛ Dawuda kisi fagarimuru ma.

¹¹Ne kisi, i ye ne bɔsi siya wɛrɛ mɔgɔw boro, minw da bɛ faninyakumaw fɔ, o bɛ o kininboro kɔrɔta ka kari faninya kan.

¹²An dencɛw bɛna kɛ o ta denmisɛnya ra i ko yiri minw bɛ wuri ni baraka ye. An denmusow bɛna kɛ i ko samasen minw lɛsɛra k’a bla masaso kɔnɔ ka masaso cɛ ɲa.

¹³An ta bondow bɛna fa siman na, siman suguya bɛɛ bɛna sɔrɔ o kɔnɔ. An ta sagaw, ani an ta baw bɛna bugu ka kɛ fɔ waga caman, ka kɛ fɔ waga tan sigiyɔrɔma caman.

¹⁴An ta misiw bɛna bonya fɔ ka tɔrɔ. An juguw tɛna se ka ben an kan, ka an mina fanga ra ka taga ni an ye; mɔgɔ si tɛna degu fɔ ka kule tuun an ta dugu siradaw ra.

¹⁵Ni siya min ta kɛra nin cogo ra, o siya ta ɲana; ni Matigi Ala ye siya min ta Ala ye, o siya ta ɲana.