Read Jula Zaburuw kitabu 147 Bible Online

Zaburuw kitabu 147 - Jula bible

Zaburuw kitabu 147

¹Aw ye Matigi Ala tando! Sabu ka dɔnkiri la ka an ta Ala tando, o ka ɲi, o ka di, o bɛnnin lo!

²Matigi Ala bɛna Zeruzalɛmu lɔ kokura; Izirayɛlimɔgɔ minw tun minana ka taga jamana wɛrɛ ra, a bɛna olugu lajɛn tuun.

³A bɛna mɔgɔ jusukasininw jusu saaro, ka o ta dimiw suma.

⁴A ka sankolo lolow da latigɛ; a ka tɔgɔ la o bɛɛ ra.

⁵An Matigi ka bon, a ta sebagaya ka bon, dan tɛ a ta faamuri ra.

⁶Matigi Ala bɛ baraka don mɔgɔ majigininw na; nka a bɛ mɔgɔjuguw majigi fɔ dugu ma.

⁷Aw ye dɔnkiri la Matigi Ala ye k’a fo k’a waleɲumanlɔn; aw ye dɔnkiri la ni kora ye ka an ta Ala tando!

⁸Ale le bɛ sankabaw lajɛn, ka san fin; a bɛ sanji labɛn, k’a ben dugukolo kan, ka binw falen kongoriw kan.

⁹A bɛ bɛganw ta domuni di o ma; ni kankan [1] ta denw bɛ kasi, a bɛ olugu fana ta domuni di o ma.

¹⁰Matigi Ala mako tɛ so ta baraka ra, a tɛ adamaden ta tofanga jate.

¹¹Nka Matigi Ala b’a ɲasiranbagaw le fɛ, minw bɛɛ kɔni jigi bɛ a ta ɲumanya kan.

¹²Ele Zeruzalɛmu, Matigi Ala bonya! Siyɔn dugu, i ta Ala tando!

¹³Sabu a bɛ aw ta dugu donda sɔgɔnanw baraka bonya, a bɛ baraka don aw ta denw na aw ta sow kɔnɔ.

¹⁴A bɛ hɛra ladon aw ta jamana kɔnɔ, a bɛ aw fa ni siman bɛɛ ra ɲumanman ye.

¹⁵A b’a darakuma lase dugukolo kan, a kumakan bɛ se yɔrɔ bɛɛ ra yɔrɔnin kelen na.

¹⁶A bɛ bugun lajigi ka yɔrɔ bɛɛ gbɛ i ko sagasiw, a bɛ gɔmiji kɛ yɔrɔ bɛɛ i ko bugurigbɛ.

¹⁷A bɛ a ta sanbɛrɛ lajigi i ko kabakuru. Jɔn bɛ se ka lɔ k’a ta nɛnɛba kɔnɔ?

¹⁸Nka ni a kumana, o fɛnw bɛɛ bɛ yeele, a bɛ a ta fɔɲɔ fiyɛ, jiw bɛ woyo ka taga.

¹⁹A k’a ta kumaw lase Yakuba ma, k’a ta cifɔninw, ani a ta kolatigɛninw yira Izirayɛli ra.

²⁰A ma o ɲɔgɔn kɛ siya si ye; olugu ma a ta kolatigɛninw lɔn. Aw ye Matigi Ala tando!