Read Jula Zaburuw kitabu 148 Bible Online

Zaburuw kitabu 148 - Jula bible

Zaburuw kitabu 148

¹Aw ye Matigi Ala tando! Aw sankolokɔnɔfɛnw, aw ye Matigi Ala tando! Aw y’a tando sanfɛyɔrɔw ra!

²A ta mɛlɛkɛw bɛɛ, aw y’a tando! A ta danfɛn fangatigiw bɛɛ, aw y’a tando!

³Tere ni karo, aw y’a tando! Lolow bɛɛ ye manamana k’a tando!

⁴Sankolow ta sankolo, aw y’a tando! Ji minw bɛ sankolo kunna, aw y’a tando!

⁵O fɛnw bɛɛ ye Matigi Ala tando, sabu ale kumakan le sababu ra, o danna.

⁶A ka o sigi yɔrɔ min na, o bɛ to yi wagati bɛɛ, ani tuma bɛɛ; a ka sariya min sigi o kan, o tɛ yɛlɛma ka ye.

⁷Aw dugukolokanfɛnw, aw ye Matigi Ala tando! Kɔgɔji danfɛn barakamanw, ani jidunbaw,

⁸sanpɛrɛn ni sanbɛrɛ, bugun ni sankaba finmanw, ani sanfɔɲɔ min bɛ a ta ciw kɛ,

⁹kuruw, ani kongoriw bɛɛ, yiridentaw, ani sɛdiriyiriw bɛɛ,

¹⁰kongosogow, ani bɛganw bɛɛ, fɛnɲanaman fofotaw, ani kɔnɔw,

¹¹dunuɲa masaw, ani siyaw bɛɛ, fagamaw, ani dunuɲa kititigɛbagaw bɛɛ,

¹²kanbelenw, ani sunguruw, cɛkɔrɔbaw, ani denmisɛnw!

¹³O bɛɛ ye Matigi Ala tɔgɔ tando, sabu ale kelen tɔgɔ le kɔrɔtanin lo, a nɔɔrɔ ka bon ka tɛmɛ dugukolo ni sankolo bɛɛ lajɛnnin nɔɔrɔ kan.

¹⁴A k’a ta mɔgɔw ta fanga kɔrɔta; ka o kɛ a ɲasiranbagaw bɛɛ ta tandori kun ye, ani Izirayɛlimɔgɔw, o siya min ko ka gbɛlɛn a ma. Aw ye Matigi Ala tando!