Read Jula Zaburuw kitabu 46 Bible Online

Zaburuw kitabu 46 - Jula bible

Zaburuw kitabu 46

¹Dɔnkirilabagaw kuntigi. Kore dencɛw ta dɔnkiri.

²Ala le ye an karifayɔrɔ ye, ani an ta baraka sɔrɔyɔrɔ. Ni degu ka an sɔrɔ tuma o tuma, a bɛ kɛ an kɔrɔ ka an dɛmɛ.

³O kosɔn an tɛ siran, hali ni dugukolo bɛ yɛrɛyɛrɛ, hali ni kuruw bɛ bɔ o nɔ ra ka yɛlɛma ka ben kɔgɔji kɔnɔ,

⁴hali ni a jikurubaw bɛ mankanbaw bɔ, ka kanga, ka wuri san fɛ fɔ ka kuruw yuguyugu. [1]

⁵Kɔ dɔ bɛ yi, min jiwoyo bɛ Ala ta duguba ninsɔndiya, dugu min ye Ala kɔrɔtaninba ta sigiyɔrɔ saninmanba ye.

⁶Ala yɛrɛ siginin bɛ o dugu kɔnɔ, o dugu tɛna bɔ a nɔ ra ka ye; sabu ni dugugbɛda sera dɔrɔn, a bɛ na o fɛ ka na o dɛmɛ.

⁷Siya dɔw bɛ mankanw cira, masa dɔw ta masaya bɛ benna; nka ni ale Ala k’a kan bɔ dɔrɔn, dugukolo bɛ yeele.

⁸Fangatigi Ala bɛ ni an ye; an tangabaga ye Yakuba ta Ala le ye. [2]

⁹Aw ye na Matigi Ala ta kabakow flɛ, a ka cɛnriba min kɛ dugukolo kan, aw ye na o flɛ!

¹⁰Ale le bɛ kɛrɛw lalɔ dunuɲa fan bɛɛ ra; a bɛ kalanw karikari, ka tamanw tigɛtigɛ, ka kɛrɛkɛwotorow jɛni tasuma ra!

¹¹«Aw ye nin kow bɛɛ dabla, k’a lɔn ko ne le Ala ye; ne le bɛ siyaw bɛɛ kunna, ne le bɛ dunuɲa bɛɛ kunna.»

¹²Fangatigi Ala bɛ ni an ye; an tangabaga ye Yakuba ta Ala le ye. [3]