Read Jula Zaburuw kitabu 78 Bible Online

Zaburuw kitabu 78 - Jula bible

Zaburuw kitabu 78

¹Asafu ta karan. Ne ta mɔgɔw, aw ye aw toro malɔ ne ta karan na, aw ye aw toro sigi ka ne darakuma lamɛn.

²Ne bɛna ne da yɛlɛ ka talenw le fɔ, ne bɛna gundokɔrɔ dɔw le lakari aw ye.

³An ka min mɛn, ani an ka min lɔn, an bɛmaw ka min lakari an ye,

⁴anw tɛna o dogo o denw na, an bɛna o fɔ duruja nataw ye; an bɛna Matigi Ala ta bonya ni a ta sebagaya ko fɔ o ye, ani a ka kabako minw kɛ.

⁵Ala tun ka ci dɔw fɔ Yakuba ta mɔgɔw ye, a tun ka sariya di Izirayɛlimɔgɔw ma; a k’a fɔ an bɛmaw ye ko o ye o denw karan o ra,

⁶janko duruja nataw, den minw bɛna woro kɔ fɛ, olugu fana ye o lɔn, ka a lakari o yɛrɛ ta denw ye.

⁷Ni o kɛra, o bɛna o boromala Ala ma, o tɛna ɲina Ala ta kokɛninw kɔ; o bɛna a ta kumaw lamɛn k’a sira tagama.

⁸O tɛna kɛ o bɛmaw bɔɲɔgɔnko ye, ka kɛ mɔgɔ kanminabariw, ani mɔgɔ murutininw ye, minw jusukun tun ma teren Ala ye, ani minw ta miiriyaw tun ma to Ala kan.

⁹Efirayimu ta mɔgɔw borira ka kalan to o boro; o borira kɛrɛkɛlon na.

¹⁰O ma Ala ta jɛnɲɔgɔnya sira tagama, o banna ka a ta sariya sira tagama.

¹¹O ɲinana Ala ta kobaw kɔ; a tun ka kabakoba minw kɛ o ɲana, o ɲinana o kɔ.

¹²A tun ka kabakow kɛ o bɛmaw ɲa na, Misiran jamana ra, Sohan mara ra.

¹³A tun ka kɔgɔji cɛtigɛ fla ye ka o latɛmɛ a cɛ ma, ka ji mina k’a lɔ i ko kogo.

¹⁴Tere fɛ a tun bɛ sankaba jamijan dɔ bla o ɲa, ka sira yira o ra, su bɛɛ a tun bɛ tasumamana dɔ bla o ɲa fana.

¹⁵A ka fara dɔw dayɛlɛ kongokolon kɔnɔ, ka ji camanba di o ma, o k’a min.

¹⁶A ka ji seri ka bɔ fara ra, k’a woyo i ko baji.

¹⁷Nka o belen ka dɔ fara o ta jurumunw kan ka Ala hakɛ ta; o murutira Ala kɔrɔtaninba ma kongokolon kɔnɔ.

¹⁸O k’a lawuri a kama ko o bɛ Ala kɔrɔbɔ; o ka domuni daari a fɛ nege dɔrɔn kosɔn.

¹⁹O ka kumajuguw fɔ Ala ma, ko: «Yala can ra, Ala bɛ se ka domuni di an ma kongokolon kɔnɔ yan wa?

²⁰A kɔni ka fara gbasi, ji serira ka bɔ, fɔ ka woyo caman. Nka yala can ra, a bɛ se ka domuni fana di, walama ka sogo di a ta mɔgɔw ma wa?»

²¹Ayiwa, Matigi Ala ka o mɛn, a jusu bɔra o kɔrɔ; a ka tasuma mana Yakuba ta mɔgɔw kama, a ta dimi wurira Izirayɛli kama;

²²sabu o tun ma la Ala ra, o tun ma o jigi la a kan, ko a bɛ se ka olugu kisi.

²³O bɛɛ n’a ta, a kumana sankabaw fɛ san fɛ, a ka sankolo dayɛlɛ.

²⁴A ka mane* lajigi i ko sanji, k’a di o ma o k’a domu; a ka sankolo ta domuni di o ma.

²⁵O bɛɛ ka Ala ta danfɛn barakamanw ta domuni le kɛ; a ka domuni caman di o ma, o ka o domu fɔ ka fa.

²⁶O kɔ, a ka terebɔyanfan fɔɲɔ fiyɛ san fɛ, ka woroduguyanfan fɔɲɔ lana a ta sebagaya baraka ra.

²⁷A ka sogo lajigi o kan caman i ko buguri, a ka kɔnɔw lajigi caman i ko kɔgɔjida kɛnkɛn,

²⁸ka na o bɔn o sigiyɔrɔw ra, ka o ta sow lamini.

²⁹O k’a domu ka fa kosɛbɛ; fɛn min nege tun bɛ o ra, a ka o di o ma.

³⁰Nka hali bi, o belen tun ma wasa; ka domuni to o da kɔnɔ,

³¹Ala ta dimi wurira o kama. A ka o bɛɛ ra cɛ barakamanw faga, a ka Izirayɛli kanbelenw ben dugu ma.

³²Nka o bɛɛ n’a ta, o ka jurumun kɛ tuun, o ma la a ta kabakow ra.

³³O kosɔn a ka o ta dunuɲalatigɛ kɛ gbansan ye, ka o si laban jatigɛ ra.

³⁴Nka ni Ala tun ka dɔw halaki, o wagati le ra, tɔw tun bɛ a ta jɛnɲɔgɔnya ɲini, o tun bɛ nimisa ka Ala ta jɛnɲɔgɔnya ɲini.

³⁵O tuma ra o hakiri tun bɛ jigi a ra ko Ala le ye olugu ta barakatigi Ala ye, ko Ala kɔrɔtaninba le ye o kunmabɔbaga ye.

³⁶Nka o tun bɛ o bɛɛ kɛ ka Ala janfa ni o da ye le, o tun bɛ faninyaw le fɔ Ala ye ni o nɛnkunw ye.

³⁷O jusukun tun ma teren Ala ye, o tun tɛ to Ala ta jɛnɲɔgɔnya kan.

³⁸K’a sɔrɔ Ala bɛ hina, o kosɔn a tun bɛ o ta terenbariyakow yafa o ma, a tun tɛ o halaki. Wagati caman, a k’a ta dimi mala, a ma sɔn k’a ta jusugban bɛɛ ben o kan.

³⁹A b’a hakiri to o ra, ko adamadenw lo, ko o bɛ i ko fɔɲɔ min bɛ tɛmɛ, ni a tɛ sekɔ tuun.

⁴⁰O murutira a kama tuma caman kongokolon kɔnɔ; o k’a jusu kasi kongo kɔnɔ tuma caman.

⁴¹Tuma bɛɛ o tun bɛ Ala dakɔrɔbɔ, tuma bɛɛ o tun bɛ Izirayɛli ta Ala saninman le dɔgɔya.

⁴²O hakiri ma to Ala ta sebagaya ra; lon min na a tun ka o bɔsi ka bɔ o juguw boro,

⁴³ani a k’a ta tagamasiyɛn kabakomanw yira Misiran jamana ra cogo min na, ani a ka kabako minw kɛ Sohan mara ra, o hakiri ma to o ra.

⁴⁴A ka Misirankaw ta bajiw yɛlɛma ka o kɛ jori ye, o ma se k’a ji min tuun.

⁴⁵A ka limɔgɔjuguw caman lana o kama, ka na o kin, ka tɔrisenjanw lana o kama ka na o tɔɔrɔ.

⁴⁶A ka o ta simanw labla tɔnwulenninw ye, ka o ta sɛnɛ sɛgɛ tɔnɔ di ɲɔdomutɔnw ma.

⁴⁷A k’a to sanbɛrɛ ka o ta rɛzɛnforow cɛn, k’a to nɛnɛ ka o ta torosunw faga.

⁴⁸A k’a to sanbɛrɛ ka o ta bɛganw halaki, sanpɛrɛn ka o ta misiw ni o ta sagaw ni o ta baw halaki.

⁴⁹A k’a ta dimiba ben o kan, ani a ta jusugban ni a ta fariya, fɔ ka o degu; a ka cɛnrikɛmɛlɛkɛ camanba ci o kama.

⁵⁰Foyi ma a ta dimi bari tuun; a ma sɔn ka o bɔsi saya ma, nka a ka banajuguw ben o kan.

⁵¹A ka Misirankaw den fɔlɔw bɛɛ faga, Kamu ta durujaw ta den fɔlɔw, minw ye o ta baraka nɔ fɔlɔ ye.

⁵²O kɔ, a k’a ta mɔgɔw labɔ i ko sagakuru; a ka o gbɛngbɛn kongokolon kɔnɔ i ko sagagbɛnbaga.

⁵³A blara o ɲa, k’a janto o ra, foyi ma o lasiran; kɔgɔji ka o juguw le datugu.

⁵⁴A tagara ni o ye fɔ a ta jamana saninman donda ra, ka taga se fɔ kuru kan, a yɛrɛ boro barakaman ka kuru min mina.

⁵⁵A ka siya dɔw gbɛn ka bɔ o ɲa, ka o siyaw ta jamana tarantaran k’a di Izirayɛlimɔgɔw ma k’a kɛ o ta ye; a ka Izirayɛli ta mɔgɔw sigi o siyaw ta sow kɔnɔ.

⁵⁶Nka o bɛɛ n’a ta, o ka Ala kɔrɔtaninba kɔrɔbɔ, o murutira a ma, o ma a ta ciw kɛ.

⁵⁷O ka o yɛrɛ mabɔ Ala ra ka kɛ janfamɔgɔw ye i ko o bɛmaw; kalan min man ɲi o biɲɛ bɛ jɛngɛ ka sira bla cogo min na, o kɛra ten le.

⁵⁸O ka o ta sɔnnikɛyɔrɔw caya kongoriw kan k’a kɛ fɔ Ala dimina o kɔrɔ; o ka Ala ni batofɛn wɛrɛw jɛn ka o bato, k’a jusu bɔ.

⁵⁹Ayiwa, Ala k’a ye ten minkɛ, a jusu bɔra kosɛbɛ, a banna Izirayɛli ra pewu!

⁶⁰A sigiyɔrɔ min tun bɛ Silo, a banna o yɔrɔ ra, o yɔrɔ min tun ye a sigiyɔrɔ ye adamadenw cɛ ra.

⁶¹A ta jɛnɲɔgɔnya kɛsu* min ye a ta baraka tagamasiyɛn ye, a k’a to o ka o ta; a k’a ta nɔɔrɔ labla a juguw boro.

⁶²A k’a to o k’a ta mɔgɔw faga ni kɛrɛkɛmuru ye; sabu a jusu gbanna a yɛrɛ ta mɔgɔw kɔrɔ.

⁶³Tasuma ka o ta kanbelenw jɛni; dɔnkiri ma se ka la o ta sungurudenw ye [1].

⁶⁴O ka o ta sarakalasebagaw faga ni kɛrɛkɛmuru ye, hali o ta firiyamusow ma se ka o su kasi.

⁶⁵Nka o bɛɛ kɔ, Matigi wurira i ko mɔgɔ min kununa sunɔgɔ ra, i ko duvɛn ka kɛrɛkɛcɛ min mina k’a fariya!

⁶⁶A k’a juguw gbɛn ka o lasegi ni o kɔ ye, a ka o lebu, dan tɛ lebu min na.

⁶⁷Nka a banna Yusufu ta somɔgɔw ra; a ma ɲabɔ Efirayimu [2] ta mɔgɔw fɛ tuun.

⁶⁸A ka Zuda ta mɔgɔw le ɲanawoloma; Siyɔn kuru [3] ko le diyara a ye.

⁶⁹A k’a ta yɔrɔ saninman lɔ k’a kɔrɔta san fɛ, k’a ju sigi i ko dugukolo; a tɛ bɔ a nɔ ra tuun fiyewu.

⁷⁰A ka Dawuda le mina ka bɔ a ta sagabonw kɔrɔ, k’a ɲanawoloma k’a kɛ a ta baaraden ye.

⁷¹A k’a mina ka bɔ saga denbatigiw kɔrɔ, janko a ye na a janto ale ta mɔgɔw ra, minw ye Yakuba ta mɔgɔw ye, k’a janto Izirayɛlimɔgɔw ra, minw ye ale yɛrɛ ta mɔgɔw ye.

⁷²Dawuda k’a janto o ra ni jusukun gbɛnin ye, a ka o kɔrɔsi ni hakiri ye.