Read Jula Waajurikɛbaga ta kitabu 1 Bible Online

Waajurikɛbaga ta kitabu 1 - Jula bible

Waajurikɛbaga ta kitabu 1

¹Nin ye Waajurikɛbaga ta kuma ye, masacɛ Dawuda dencɛ, min tun siginin bɛ Zeruzalɛmu:

²Gbansan, ani gbansan, ne Waajurikɛbaga ko ten! Gbansan, ani gbansan, fɛn bɛɛ ye gbansan le ye!

³Adamaden bɛ ɲagban min bɛɛ la a yɛrɛ kan dugukolo kan yan, a bɛ mun nafa le sɔrɔ o ra sa?

⁴Duruja dɔw bɛ taga, dɔw bɛ na olugu kɔ, nka dugukolo b’a nɔ ra tuma bɛɛ.

⁵Tere bɛ bɔ, tere bɛ ben; o kɔ, a bɛ teliya ka sekɔ ka taga a bɔyɔrɔ ra tuun.

⁶Fɔɲɔ bɛ fiyɛ ka taga woroduguyanfan na, ka yɛlɛma ka taga sahiliyanfan na. A bɛ munumunu, ka munumunu, ka kɔsegi ka tɛmɛ a tɛmɛsirakɔrɔw fɛ tuun.

⁷Bajiw bɛɛ bɛ woyo ka taga kɛ kɔgɔji ra, nka kɔgɔji tɛ fa ka ye. Bajiw bɛ deri ka woyo ka taga fan min na, o bɛ woyo ka taga o fan kelen le ra tuma bɛɛ.

⁸Sɛgɛ min bɛ danfɛnw bɛɛ kan, mɔgɔ da tɛ se ka o bɛɛ ɲafɔ. Ɲaden tɛ fa flɛri ra, toro fana tɛ wasa lamɛnni na.

⁹Ko minw tɛmɛna kakɔrɔ, o ko kelenw le bɛ nana tuun, ko minw kɛra kakɔrɔ, o ko kelenw le bɛ kɛra tuun, ko si le tɛ kokura ye dugukolo kan yan.

¹⁰Hali ni mɔgɔ ka ko dɔ ye, k’a fɔ ko: «A flɛ, nin ko ye kokura ye!», i bɛna taga a sɔrɔ ko o ko tun bɛ kɛra kakɔrɔ kabini wagatijan tɛmɛninw na.

¹¹Ko minw tɛmɛna ka ban, an hakiri tɛ to o ra tuun. Ko minw fana bɛna kɛ tuun, kɔfɛmɔgɔw hakiri tɛna to o kow ra.

¹²Ne Waajurikɛbaga, ne kɛra Izirayɛli masacɛ ye; ne siginin tun bɛ Zeruzalɛmu.

¹³Ko o ko bɛ kɛ dunuɲa kɔnɔ, ne ka ne yɛrɛ timinadiya ka ɲininkari kɛ o kow bɛɛ ra kelen kelen, k’a sɛgɛsɛgɛ ni hakiritigiya ye. O ye sɛgɛba dɔ le ye, Ala ka min doni la adamadenw kan.

¹⁴Ayiwa, ne k’a kɔrɔsi k’a ye ko baara o baara bɛ kɛ dugukolo kan yan, ko o bɛɛ ye gbansan le ye; a bɛ i ko mɔgɔ min bɛ borira fɔɲɔ kɔ, ko a b’a mina.

¹⁵Fɛn min kuturunin lo kakɔrɔ, o tɛ se ka lateren. Fɛn min tɛ yi, o tɛ se ka jate.

¹⁶Ne k’a fɔ ne yɛrɛ kɔnɔ ko: «A flɛ, minw sigira masaya ra ne ɲa Zeruzalɛmu, ne ka ne ta hakiritigiya bonya, k’a caya ka tɛmɛ olugu bɛɛ ta kan. Ne ka hakiritigiya ni lɔnniya caman sɔrɔ.»

¹⁷Ne ka ne yɛrɛ timinadiya, janko k’a lɔn fɛn min ye hakiritigiya ye, ani k’a lɔn fɛn min ye fatɔya ni nalomanya ye. Nka ne nana a ye ko o kow bɛɛ fana bɛ i ko mɔgɔ min bɛ borira fɔɲɔ kɔ, ko a b’a mina. Sabu,

¹⁸Hakiritigiyaba, jusukasiba! Lɔnniya caman, sɛgɛ caman!