Read Jula Waajurikɛbaga ta kitabu 10 Bible Online

Waajurikɛbaga ta kitabu 10 - Jula bible

Waajurikɛbaga ta kitabu 10

¹Limɔgɔsuw bɛ turutigi ta turu cɛn k’a kasa gboya cogo min na, o cogo ra nalomanya dɔɔnin dɔrɔn bɛ hakiritigiya cɛn; a bɛ bonya bɔ mɔgɔ kan.

²Mɔgɔ hakiritigi ta hakiri b’a lataga a boroɲuman fɛ, nka hakirintan ta hakiri b’a lataga a borojugu le fɛ.

³Hali ni hakirintan bɛ tagama sira kan, hakiri t’a fɛ; a b’a yira bɛɛ ra ko ale ye hakirintan le ye [1].

⁴Ni fagama ka dimi i kɔrɔ, i ye to i sigiyɔrɔ ra; sabu sabari bɛ kojuguba caman bari.

⁵Ne ka ko bɛnbari dɔ ye dugukolo kan, k’a kɛ i n’a fɔ jamana ɲamɔgɔ yɛrɛ le firira o yɔrɔ ra:

⁶Lɔyɔrɔw bɛɛ ra ɲumanmanw bɛ di hakirintan ma, ka mɔgɔsɔbɛw sigi olugu kɔ fɛ.

⁷Ne ka jɔnw yɛlɛnnin ye sow kan, k’a sɔrɔ fagamadenw bɛ tagamana o sen na i ko jɔnw.

⁸Mɔgɔ min bɛ dinga sogi, o tigi bɛna ben a kɔnɔ; mɔgɔ min bɛ kogo ci, sa bɛna o tigi kin.

⁹Mɔgɔ min bɛ kabakuruw lawuri, kabakuruw bɛna o tigi mandimi, mɔgɔ min bɛ lɔgɔ ci, o tigi bɛ farati ra.

¹⁰Ni jende da gboyara, ni mɔgɔ m’a da diya, o tuma baarakɛbaga le ka kan ka dɔ fara a baraka kan; nka hakiritigiya b’a to baara bɛ ɲa.

¹¹Ni sa ka mɔgɔ kin, sani sanɛgɛbaga ye na sa nɛgɛ, o tuma kun tɛ sanɛgɛbaga ta baara ra tuun.

¹²Kuma min bɛ bɔ hakiritigi da ra, o ye nɛɛma le ye; nka hakirintan da le bɛ a yɛrɛ halaki.

¹³A bɛ kuma damina nalomanya ra, ka taga a laban fatɔya juguman na.

¹⁴O bɛɛ n’a ta, hakirintan ta kuma tɛ ban ka ye. Adamaden tɛ ko nataw lɔn; min fana bɛna kɛ ale kɔ fɛ, jɔn le bɛ se ka o fɔ a ye fana?

¹⁵Hakirintan ta baara b’a sɛgɛ gbansan; a tɛ hali a ta dugu yɛrɛ sira lɔn.

¹⁶Jamana min ta masacɛ ye denmisɛn ye, jamana min ta kuntigiw bɛ domunibaw damina kabini sɔgɔma, bɔnɔ bɛna o jamana sɔrɔ.

¹⁷Nka jamana min ta masacɛ ye hɔrɔn ye, min ta kuntigiw bɛ domuni kɛ a wagati ra ka fanga sɔrɔ, nka o tɛ min ka fa, o jamana kɔni ta ɲana.

¹⁸Salibagatɔya le b’a to mɔgɔ ta bon sanfɛyɔrɔ bɛ ben; ni i boro banna baara ma, sanji bɛ don i ta bon na.

¹⁹Mɔgɔw bɛ domunibaw labɛn ka o yɛrɛ ɲanagbɛ, ka duvɛn kɛ ka o yɛrɛ ninsɔndiya, wari fana bɛ o ta kow bɛɛ ɲanabɔ!

²⁰I kana masacɛ danga hali i jusukun na. I kana fangatigiw danga hali i sibon kɔnɔ; sabu kɔnɔ dɔ bɛ se ka i kumakan ta ka taga ni a ye, danfɛn kamantigi bɛ se ka taga o ko lakari yɔrɔ bɛɛ.