Read Jula Waajurikɛbaga ta kitabu 12 Bible Online

Waajurikɛbaga ta kitabu 12 - Jula bible

Waajurikɛbaga ta kitabu 12

¹O kosɔn i hakiri to i danbaga ra i ta kanbelenya wagati ra, sani k’a to lonjuguw ye se, sani k’a to sanw ye se, san minw na i yɛrɛ bɛna a fɔ ko: «Dunuɲa lɔgɔ si tɛ ne ra tuun!»

²I hakiri to i danbaga ra sani tere ye don dibi ra, sani yeelen ye kɛ dibi ye, sani karo ni lolow ye don dibi ra, sani sankaba wɛrɛw ye wuri ka na tuun sanji bennin kɔ fɛ [1].

³O wagati le ra, bon kɔrɔsibagaw bɛ yɛrɛyɛrɛ, cɛ barakamanw bɛ kuturu, mugusibagaw bɛ mugusi lalɔ, sabu dɔ bɔra o ra; minw tun bɛ flɛri kɛ finɛtiri fɛ, olugu ɲa bɛ fin [2].

⁴Da minw tun yɛlɛnin bɛ ka bla sira kan, o daw bɛ datugu, mugusikan bɛ dɔgɔya, mɔgɔ bɛ kunu kɔnɔkasituma ra, dɔnkirilabagaw kan bɛ dɔgɔya [3].

⁵O wagati le ra, mɔgɔ bɛ siran fɛn kɔrɔtaninw ɲa, siraratagama jatigɛ bɛ i sɔrɔ. Amandesun bɛ fiyeren bɔ, tɔn tɛ se ka pan kosɛbɛ tuun [4], diya tɛ kɛ foyi si ra tuun; sabu lon dɔ adamaden bɛ taga a ta so kɔnɔ, a bɛna to so min kɔnɔ wagati bɛɛ. Ni o kɛra, kasibagaw bɛ to ka kasi siradaw ra.

⁶I hakiri to i danbaga ra, sani warigbɛjuru ye tigɛ, sani sanindaga ye ci, sani jurufiyɛ ye ci kɔlɔnda ra, sani jibinɛgɛ ye kari ka ben kɔlɔn kɔnɔ.

⁷I hakiri to i danbaga ra, sani bɔgɔ ye sekɔ dugukolo ra, i n’a fɔ a bɔra dugukolo ra cogo min na, ani sani adamaden nin ye sekɔ a dibaga Ala fɛ.

⁸Gbansan, ani gbansan, ne Waajurikɛbaga ko ten! Fɛn bɛɛ ye gbansan le ye!

⁹Ayiwa, Waajurikɛbaga tun ye hakiritigi ye; ka fara o kan, a ka mɔgɔw karan a ta lɔnniya ra. A ka zana caman lamɛn, ka o sɛgɛsɛgɛ, ka o labɛn ka ɲa, ka o sɛbɛ.

¹⁰Waajurikɛbaga jijara ka kumaɲumanw le fɔ; a ka o kumaw sɛbɛ ka ɲa, ka kaɲa ni can yɛrɛ ye.

¹¹Hakiritigiw ta kuma bɛ i ko nɛgɛbere nunbɔnin; o bɛ o ta hakiritigiyakuma minw labɛn ka o sɛbɛ, o bɛ i ko nɛgɛ min gbengbenna dugukolo ra. O kumaw bɛɛ bɔra kuntigi kelen le fɛ.

¹²I yɛrɛ kɔrɔsi, ne dencɛ, i kana foyi fara a kan. Mɔgɔ bɛ se ka kitabu minw sɛbɛ, dan tɛ o ra; nka karan cayakojugu bɛ mɔgɔ sɛgɛ.

¹³Ayiwa, min bɛɛ fɔra, o kumaw laban ye nin ye: Siran Ala ɲa, k’a ta kumakanw sira tagama. Adamaden ta ko bɛɛ bɛ bɔ o le ra.

¹⁴Sabu Ala bɛna adamadenw ta kɛwalew bɛɛ kiti tigɛ, hali minw kɛra dogo ra, koɲuman fara kojugu kan.