Read Jula Waajurikɛbaga ta kitabu 3 Bible Online

Waajurikɛbaga ta kitabu 3 - Jula bible

Waajurikɛbaga ta kitabu 3

¹Ko bɛɛ ni a kɛwagati lo, kɛtuma le bɛ ko bɛɛ ra dunuɲa kɔnɔ:

²Worowagati bɛ yi, sawagati bɛ yi. Yiri turuwagati bɛ yi, yiri bɔnwagati bɛ yi.

³Fagari wagati bɛ yi, flakɛri wagati bɛ yi. Bon ciwagati bɛ yi, bon lɔwagati bɛ yi.

⁴Kasi wagati bɛ yi, yɛrɛko wagati bɛ yi. Sangakasi wagati bɛ yi, dɔnkɛ wagati bɛ yi.

⁵Kabakuruw firiwagati bɛ yi, kabakuruw cɛwagati bɛ yi. Ka boro mini ɲɔgɔn ma, o wagati bɛ yi, ka boro bɔ ɲɔgɔn na, o wagati bɛ yi.

⁶Fɛn ɲiniwagati bɛ yi, a tunuwagati bɛ yi. Fɛn marawagati bɛ yi, a firiwagati bɛ yi.

⁷Fani karanwagati bɛ yi, a faranwagati bɛ yi. Mɔgɔ jewagati bɛ yi, a kumawagati bɛ yi.

⁸Kanuya wagati bɛ yi, kɔninya wagati bɛ yi. Kɛrɛ wagati bɛ yi, hɛra wagati bɛ yi.

⁹Baarakɛbaga bɛ sɛgɛ min kɛ, a bɛ mun nafa le sɔrɔ o bɛɛ ra sa?

¹⁰Ala ka baara min la adamadenw kan janko ka o sɛgɛ, ne ka o ko jate mina.

¹¹Ala bɛ fɛn bɛɛ kɛ k’a bɛn a wagati ma. A ka hali ko tɛmɛninw, ani ko nataw miiriya don adamaden jusukun na, k’a sɔrɔ adamaden tɛ se ka Ala ta baara cogo bɛɛ faamu, k’a ta a damina ra ka taga a bla a laban na.

¹²O kosɔn ne k’a ye ko foyi man fisa adamaden ma, fɔ ka ɲagari ani k’a yɛrɛ ɲanagbɛ dɔrɔn, k’a ta dunuɲalatigɛ diyabɔ.

¹³Ni mɔgɔ o mɔgɔ bɛ domuni kɛ ka min, k’a ta baara tɔnɔ diyabɔ, o tigi ka kan k’a lɔn ko Ala le fana ka o di a ma.

¹⁴Ne nana a faamu ko Ala bɛ fɛn o fɛn kɛ, o bɛ to a cogo ra tuma bɛɛ; foyi tɛ se ka fara a kan, foyi fana tɛ se ka bɔ a ra. Ala bɛ o kɛ janko adamadenw ye siran ale ɲa.

¹⁵Ko o ko bɛ kɛra bi, i b’a sɔrɔ o tun kɛra kakɔrɔ; fɛn o fɛn bɛna kɛ kɔ fɛ, i b’a sɔrɔ o tun bɛ kɛra ka ban fɔlɔfɔlɔ. Ala bɛ ko tɛmɛninw lasekɔ tuun.

¹⁶Ne ka ko wɛrɛ kɔrɔsi tuun dugukolo kan yan; ne k’a ye ko can tun ka kan ka fɔ yɔrɔ min na, terenbariyakow le bɛ kɛra o yɔrɔ ra. Terenninya tun ka kan ka kɛ yɔrɔ min na, terenbariyakow le bɛ kɛra o yɔrɔ ra.

¹⁷O ra, ne k’a fɔ ne yɛrɛ kɔnɔ ko: Mɔgɔ terennin fara mɔgɔjugu kan, Ala le bɛna bɛɛ ta kiti tigɛ. Sabu fɛn bɛɛ ni a kɛwagati lo, ko bɛɛ ni a kɛtuma lo.

¹⁸Ne k’a fɔ ne yɛrɛ kɔnɔ ko min ye adamadenw ye, ko Ala bɛ o kɔrɔbɔ le, janko k’a yira o ra ko olugu ni bɛganw bɛɛ ka kan.

¹⁹Sabu adamaden laban ni bɛgan laban bɛɛ ye kelen ye. Adamaden bɛ sa, bɛgan fana bɛ sa. Nin kelen le bɛ o bɛɛ ra. Adamaden man fisa ni bɛgan ye foyi le ra, sabu fɛn bɛɛ ye gbansan le ye.

²⁰O bɛɛ bɛ taga yɔrɔ kelen le ra. O bɛɛ bɔra bɔgɔ le ra, o bɛɛ bɛ sekɔ o bɔgɔ kelen le ra fana.

²¹Jɔn le k’a lɔn ni adamaden nin bɛ yɛlɛn ka taga san fɛ le, walama ni bɛgan nin bɛ jigi dugukolo jukɔrɔ le?

²²O ra, ne k’a ye ko foyi man fisa adamaden ma, fɔ k’a ta baara tɔnɔ diyabɔ dɔrɔn. A ninyɔrɔ ye o le ye, sabu jɔn le bɛna ale lasekɔ dunuɲa ra yan tuun, janko a ye na a flɛ min bɛ kɛra a kɔ fɛ yan?