Read Jula Waajurikɛbaga ta kitabu 8 Bible Online

Waajurikɛbaga ta kitabu 8 - Jula bible

Waajurikɛbaga ta kitabu 8

¹Jɔntigi le ye hakiritigi ye? Jɔntigi le bɛ se ka kow kɔrɔ lɔn k’a fɔ? Hakiritigiya bɛ mɔgɔ ɲada manamana, a bɛ mɔgɔ ta ɲanasisi yɛlɛma k’a kɛ ninsɔndiya ye.

²Ne ko: Masacɛ ta kumakan lamɛn, sabu i yɛrɛ karira ka o le fɔ Ala ɲa kɔrɔ.

³I kana kɔrɔtɔ k’a fɔ ko i bɛ bɔ masacɛ kɔrɔ. Ko min tɛ koɲuman ye, i kana i kun gbɛlɛya ka don o ra, sabu ni fɛn o fɛn ka masacɛ diya, a bɛ o le kɛ.

⁴Mɔgɔ tɛ masacɛ ta kuma sɔsɔ. Jɔntigi le bɛ se k’a fɔ a ma ko: «Mun na i ka nin kɛ?»

⁵Ni mɔgɔ min bɛ a ta kuma lamɛn, a ta kojugu tɛna se o tigi ma. Mɔgɔ hakiritigi le ka ko kɛtuma ni a kɛcogo lɔn.

⁶Sabu kɛtuma ni kɛcogo le bɛ ko bɛɛ ra. Nka kojuguba dɔ le bɛ adamaden kan:

⁷ko min bɛna kɛ kɔ fɛ, ale tɛ se ka o lɔn. Ko nataw bɛna kɛ cogo min na, jɔn le bɛ se ka o fɔ a ye?

⁸Adamaden si ta nin tɛ a yɛrɛ ta ye, ko a b’a mara, janko lon dɔ ale kana sa. Mɔgɔ si tɛ se k’a salon bari. Kɛrɛ min lo, mɔgɔ tɛ se ka bɔsi ka bɔ a ra. Kojugukɛbaga ta kojugu fana tɛ se k’a bɔsi.

⁹Ne ka nin bɛɛ kɔrɔsi. Fɛn o fɛn bɛ kɛ dugukolo kan, ne ka o bɛɛ jate mina. Wagati dɔw ra, mɔgɔ dɔw bɛ o fanga digi dɔw kan ka kojugu kɛ o ra.

¹⁰Ne k’a ye fana ko mɔgɔjuguw suw bɛ donna ka ɲa. O kɔ, mɔgɔw bɛ to ka don ka bɔ yɔrɔ saninman kɔnɔ, ka o tando dugu kɔnɔ, o tun ka o ta kojuguw kɛ dugu min yɛrɛ kɔnɔ. O fana ye kogbansan dɔ le ye.

¹¹I n’a fɔ kojugu juru tɛ sara kojugukɛbaga ra joona, o kosɔn adamaden jusukun fanin lo kojugu nege ra.

¹²O bɛɛ n’a ta, hali ni kojugukɛbaga ka kojugu kɛ siɲaga kɛmɛ, ka sijan sɔrɔ cogo o cogo, ne kɔni k’a lɔn ko Alaɲasiranbagaw ta le ka di, sabu Alaɲasiran bɛ olugu jusukun na.

¹³Nka mɔgɔjugu ta tɛna diya, a fana tɛna sijan sɔrɔ; a bɛna tɛmɛ i ko suma bɛ tunu cogo min na, sabu Alaɲasiran tɛ a jusukun na.

¹⁴Kogbansan dɔ wɛrɛ bɛ kɛra dunuɲa kɔnɔ tuun: tuma dɔw, i b’a ye ko mɔgɔjugu ka kan ni ko min ye, o ko bɛ taga kɛ mɔgɔ terennin le ra; mɔgɔ terennin fana ka kan ni min ye, mɔgɔjugu bɛ o sɔrɔ. Ne ko, ko nin fana ye kogbansan dɔ le ye.

¹⁵O kosɔn ne ko, ko ninsɔndiya le ɲɔgɔn tɛ, sabu foyi man fisa adamaden ma dugukolo kan yan, fɔ ka domuni kɛ, ka min, ani k’a yɛrɛ ninsɔndiya. A ka kan ka o le kɛ k’a to a ta baara ra a ta dunuɲalatigɛ wagati kɔnɔ; Ala ka o wagati le di a ma ko a y’a kɛ dugukolo kan.

¹⁶Ne ka ne yɛrɛ timinadiya ka hakiritigiya sɔrɔ minkɛ, ani adamaden bɛ sɛgɛba min na dunuɲa ra, k’a yɛrɛ bari sunɔgɔ ra su ni tere, ne ka o jate mina minkɛ,

¹⁷o tuma ne ka Ala ta baara bɛɛ lajɛnnin flɛ; ko minw bɛ kɛ dugukolo kan, mɔgɔ si tɛ se ka o faamu. Hali ni mɔgɔ ka jija k’a kɔrɔ ɲini cogo o cogo, a tɛna se k’a kɔrɔ faamu. Hali ni mɔgɔ hakiritigi dɔ le k’a fɔ ko ale k’a lɔn, i b’a sɔrɔ ko a tɛ se k’a faamu.