Read Jula Dɔnkiriw ta dɔnkiri kitabu 1 Bible Online

Dɔnkiriw ta dɔnkiri kitabu 1 - Jula bible

Dɔnkiriw ta dɔnkiri kitabu 1

¹Dɔnkiriw bɛɛ ta dɔnkiri. Sulemani ka min sɛbɛ.

²Ne mɔmɔ! Ne fari yɔrɔ bɛɛ saaro! Sabu i ta kanuya ka di ka tɛmɛ duvɛn kan.

³I munturu kasa ka di. I tɔgɔ bɛ i ko turu kasadiman min kasa bɛ yɔrɔ bɛɛ labɔ. O kosɔn, i ko ka di sungurudenw ye.

⁴Ne mina, ka gban i kɔ, an ye bori! Masacɛ, ne ladon i ta bon kɔnɔ! An ye ɲagari ka ninsɔndiya ɲɔgɔn fɛ! An ye kanuya diyabɔ ka tɛmɛ hali duvɛn kan. Sunguruw jo lo ka ɲabɔ i fɛ.

⁵Zeruzalɛmu sunguruw, ne finnin lo, nka ne cɛ ka ɲi, i ko Kedari ta fanibonw, i ko Sulemani ta masaso bondarafaniw.

⁶Aw kana ne ta finya flɛ, tere le ka ne fin. Ne balemacɛw le dimina ne kɔrɔ, ka ne bla ko ne ye rɛzɛnforow kɔrɔsi. O ra, ne ma ne yɛrɛ ta foro kɔrɔsi.

⁷E, ne jusukun bɛ ele min kanu, a fɔ ne ye: ele bɛ taga ni i ta bɛganw ye min, o ye taga bin ɲimi? Aw bɛ sigi yɔrɔ juman ka nɛnɛkiri tere fɛ? Ni ne ka o lɔn, ne tɛna to ka yaalayaala tuun ka lamini i tɔɲɔgɔnw ta bɛganw kɔ gbansan.

⁸E, musow bɛɛ ra cɛɲuman, ni ele ma o lɔn, bɔ ka tugu bɛganw nɔ fɛ, ka taga ni i ta badenninw ye, o ye taga bin ɲimi sagagbɛnbagaw ta fanibonw kɛrɛ fɛ.

⁹E, ne kanuɲɔgɔn, ne bɛ i ta cɛɲa suma ni masacɛ Farawona ta wotorosamasow le ye.

¹⁰I dafuruw cɛ ka ɲi i ta tororanɛgɛ fla cɛ ma, i kankala cɛ ka ɲi i ta kannanɛgɛ cɛ ma!

¹¹An bɛna tororanɛgɛ saninlamanw le gbasi i ye, ka o ɲɛgɛn ni warigbɛ ye.

¹²Ka ne ta masacɛ ni a jɛnɲɔgɔnw siginin to, ne ta turu ka yɔrɔ bɛɛ kasa diya.

¹³Ne jarabi bɛ i ko kasadiyanan, min bɛ bɔrɔnin kɔnɔ. A lanin bɛ ne sin fla cɛ ma.

¹⁴Ne jarabi bɛ i ko jabifiyeren, min bɛ Ɛni Gedi rɛzɛnforow cɛ ra.

¹⁵E, i cɛ ka ɲi sa, ne kanuɲɔgɔn, i cɛ ka ɲi! I ɲakisɛw cɛ ka ɲi i ko tugani!

¹⁶I cɛ ka ɲi, ne jarabi, i ko ka di ne ye; an ta lanan bɛ i ko binkɛnɛ.

¹⁷An ta bon yiriw ye sɛdiriyiri cɛɲuman le ye, a kogow ye sipɛrɛsi yiriɲumanw le ye.