Read Jula Dɔnkiriw ta dɔnkiri kitabu 2 Bible Online

Dɔnkiriw ta dɔnkiri kitabu 2 - Jula bible

Dɔnkiriw ta dɔnkiri kitabu 2

¹Ne bɛ i ko yirifiyeren min bɛ falen Sarɔn kɛnɛgbɛ ra, i ko yirifiyeren min bɛ falen kuruw furancɛ ra.

²Ne kanuɲɔgɔn bɛ sunguru tɔw cɛ ra i ko yirifiyeren cɛɲuman falennin ŋaniyiriw cɛ ra.

³Ne jarabi bɛ kanbelen tɔw cɛ ra i ko pɔmusun bɛ yiri tɔw cɛ ra tu kɔnɔ cogo min na. Ne jusu diyaninba bɛ sigi a suma kɔrɔ, a den fana ka di ne da ra!

⁴A ka ne ladon ɲanagbɛyɔrɔ ra, so kɔnɔ; ka kanu kɛ ka ne datugu.

⁵Aw ye rɛzɛn mɔnin di ne ma ka baraka don ne ra, aw ye pɔmu di ne ma ka dɔ fara ne fanga kan, sabu kanu kɛra ne ra bana ye.

⁶A numanboro ye to ne kun kɔrɔ, a kininboro ye ne mɔmɔ.

⁷E, Zeruzalɛmu sunguruw, ne bɛ aw daari, aw y’a kɛ minanw, ani mankalaninw kosɔn, aw kana kanu lawuri, aw kana a lakunu k’a sɔrɔ a wagati ma se.

⁸Ne toro bɛ ne jarabi kumakan na! A flɛ nin ye, a bɛ nana! A bɛ panpanna kuruw kan, a bɛ borira kongoriw kunna!

⁹Ne jarabi bɛ i ko minan, i ko mankalanin den; a lɔnin flɛ kɛnɛ ma an ta kogo kɔ fɛ. A bɛ flɛri kɛra finɛtiri fɛ, a ɲaw bɛ finɛtiri sansanw na.

¹⁰Ne jarabi kumana ne fɛ; a ko: «I wuri, ne kanuɲɔgɔn! Ne ta cɛɲumanin, na yan!

¹¹A flɛ, nɛnɛwagati banna, sanji tigɛra, sanji lɔra.

¹²Yiriw bɛ fiyerenna jamana kɔnɔ; dɔnkirilawagati le sera [1]; tuganiw kasikan bɛ bɔra an ta kongow kɔnɔ.

¹³Toroden fɔlɔw bɛ mɔna, rɛzɛnsunw fiyerenna, ka yɔrɔ kasa diya. I wuri, ne kanuɲɔgɔn! Ne ta cɛɲumanin, na yan!

¹⁴«E, ne ta tugani birinin bɛ farawow le ra, a dogonin bɛ fɔ kuruwow le cɛ ra. A to ne ye i ɲada flɛ sa! A to ne ye i kumakan mɛn, sabu i kumakan ka di, i ɲada cɛ ka ɲi.»

¹⁵Aw ye kongowuru mina an ye, kongowurunin minw bɛ an ta rɛzɛnforow cɛn, tuma min na o bɛ fiyeren bɔ!

¹⁶Ne jarabi ye ne ta ye, ne fana ye a ta ye. A bɛ ni a ta bɛganw ye, o bɛ bin ɲimina yirifiyerenw cɛ ra.

¹⁷Sani tere ye suma, sani yirisuma ye tunu, i ye kɔsegi ka na, ne jarabi; bori ka na i ko minan, walama mankalaninden min bɛ panpan kuru walonwalonninw kan.