Read Jula Dɔnkiriw ta dɔnkiri kitabu 7 Bible Online

Dɔnkiriw ta dɔnkiri kitabu 7 - Jula bible

Dɔnkiriw ta dɔnkiri kitabu 7

¹Na, na, Sulamiti sunguru! Na, na janko an ye i ɲada flɛ! Mun na aw bɛ Sulamiti sunguru flɛra i ko mɔgɔ minw bɛ dɔnkɛbagaw flɛra?

²E, fagamadennin, i senw cɛ ka ɲi i ta sanbaraw kɔnɔ! I soro koorinin bɛ ka ɲa i ko kannakɔnɔn; baarakɛbaga hakiriman dɔ boro nɔ le bɛ o ye.

³I cɛmancɛyɔrɔ bɛ i ko minan koorinin, duvɛn kasadiman tɛ fɔn min kɔnɔ. I kɔnɔbara bɛ i ko siman min lajɛnna ɲɔgɔn kan, k’a lamini ni yiri fiyerenw ye.

⁴I sinbara fla bɛ i ko mankalaninden fla, o bɛ i ko minanmuso ta flaninw.

⁵I kankala bɛ i ko sankaso min lɔra ni samaɲin ye. I ɲadenw bɛ manamana i ko Hɛsibɔn kɔ ji, min bɛ Bati Rabimu donda kɛrɛ fɛ. I nunkala bɛ i ko Liban sankaso, min lɔnin bɛ k’a ɲasin Damasi dugu ma.

⁶I kunkolo cɛ ka ɲi i ko Karimɛli kuru. I kunsigi danna k’a cɛɲa i ko danfani dawulaman. I kunsigi bɛ se ka masacɛ sen fereke k’a laben.

⁷E, i cɛ ka ɲi dɛ! I ko ka di ne ye! Ne ta kanunin, ne diyanyamɔgɔ.

⁸I lɔcogo bɛ i ko tamarosun. I sin bɛ i ko tamaro tizanw.

⁹Ne bɛ yɛlɛn tamarosun na k’a tizan dɔ tigɛ! I sinw bɛ i ko rɛzɛn mɔnin. I da kasa ka di i ko yiriden mɔkoɲuman.

¹⁰I da ka timi i ko duvɛndiman. Can lo, o duvɛn ye ne ni ne jarabi ta le ye, a bɛ woyo an dagbolo kan fɔ ka taga an sunɔgɔ.

¹¹Ne ye ne jarabi ta le ye, a ta miiriya bɛɛ bɛ ne le kan.

¹²Na, ne jarabi, an ye taga kongo kɔnɔ, an bɛna si togoda dɔ ra,

¹³sɔgɔmada joona fɛ, an bɛ taga rɛzɛnforo ra, k’a flɛ ni rɛzɛnsun nugura, ni a bɛ fiyerenna, ni gerenadisunw fiyerenna. O yɔrɔ le ra, ne bɛna a yira i ra ko i ko ka di ne ye.

¹⁴Mandaragɔriw [1] kasadiman ka yɔrɔ bɛɛ labɔ. Yiridenɲuman suguya bɛɛ bɛ an ta bonda ra; yiriden tigɛninkuraw, ani a kɔrɔninw. Ne jarabi, ne ka o bɛɛ mara ele le ye.