Read Jula Oze ta kitabu 12 Bible Online

Oze ta kitabu 12 - Jula bible

Oze ta kitabu 12

¹«Efirayimu ka ne lamini ni faninya le ye, Izirayɛli ka ne lamini ni janfa le ye. Hali bi Zuda murutira Ala ma; o murutira Ala saninman cantigi ma.

²Efirayimu b’a yɛrɛ barora ni fɔɲɔ le ye; a bɛ bori terebɔyanfan ta fɔɲɔ le kɔ. Lon o lon a bɛ dɔ fara a ta nanbara kan, ka dɔ fara a ta kojuguw kan. A ka jɛnɲɔgɔnya don ni Asiri jamana ye; a bɛ oliviye turu bla ka taga Misiran.

³Matigi Ala bɛ kiti le ra ni Zuda ye; a bɛna Yakuba ta mɔgɔw sara ka kaɲa ni o tagamacogo ye, ka o ta kɛwalejuguw sara di o ma.

⁴Ka Yakuba [1] to a bamuso kɔnɔbara ra, a k’a flaninɲɔgɔn sen mina; a kɔrɔyara minkɛ, a ka siyɛn ta ni Ala ye.

⁵A ka siyɛn ta ni mɛlɛkɛ ye ka se sɔrɔ. A kasira ka Ala daari ko Ala ye baraka don ale ra. A ka Ala ye Betɛli; Ala kumana ni a ye o yɔrɔ ra.

⁶«Matigi Ala, Fangatigi! Matigi Ala, o le ye a tɔgɔ ye.

⁷O kosɔn ele kɔni ka kan ka sekɔ ka na i ta Ala fɛ, ka ɲumanya ni terenninya sira tagama, ka i jigi la i ta Ala kan tuma bɛɛ!

⁸«Nin mɔgɔw bɛ o ta sumanikɛnanw yɛlɛma i ko Kanaanakaw, sabu tɔɲɔri le ka di o ye.

⁹Efirayimu ko: ‹Ne ka fɛn caman sɔrɔ, ne ka naforoba sɔrɔ! Nka mɔgɔ tɛna foyi sɔrɔ ne ta kokɛtaw ra min ye jurumun ye!›

¹⁰«Kabini aw bɔra Misiran jamana ra, ne le ye Matigi Ala ye, aw ta Ala. Ne bɛna fanibonw le kɛ aw siyɔrɔw ye tuun, i n’a fɔ aw b’a kɛ cogo min na aw ta gbatakɔrɔsigi ɲanagbɛ [2] lonw na.

¹¹«Ne kumana ciraw fɛ; ne yɛrɛ ka fɛn caman yira o ra. Ne ka kuma kɔrɔmanw don ciraw da ra ko o y’a fɔ mɔgɔw ye.

¹²«Kojugu bɛ Galadi, o kosɔn olugu tɛna kɛ foyi ye. O bɛ misitoranw kɛ saraka ye Giligali, o kosɔn o ta sarakabɔnanw bɛna benben ka kɛ kabakurutonw ye forow kɔnɔ, walanw cɛ ra.

¹³«Yakuba tun borira ka taga Aramu mara kongoyɔrɔw ra, Izirayɛli ka baara kɛ ka muso dɔ mamina; a ka saga gbɛn janko ka muso sɔrɔ k’a furu. [3]

¹⁴«Matigi Ala ka Izirayɛli labɔ Misiran cira dɔ le sababu ra; a k’a janto o ra, cira [4] dɔ le sababu ra.

¹⁵«Efirayimu ka Ala jusu bɔ kosɛbɛ; o kosɔn a Matigi bɛna a ta kojugu ben a yɛrɛ kun na, k’a ta mafiyɛnyariw sekɔ k’a ben a yɛrɛ kan.»