Read Jula Yowɛli ta kitabu 1 Bible Online

Yowɛli ta kitabu 1 - Jula bible

Yowɛli ta kitabu 1

¹Matigi Ala k’a ta kuma min lase Petuwɛli dencɛ Yowɛli ma, o le ye nin ye. A ko:

²Aw cɛkɔrɔbaw, aw ye nin lamɛn! Aw jamana mɔgɔw, aw bɛɛ ye aw toro malɔ! Yala nin ɲɔgɔn kɛra aw ta wagati ra wa, walama a kɛra aw bɛmaw ta wagati ra wa?

³Aw ye nin lakari aw dencɛw ye, aw dencɛw fana y’a lakari o dencɛw ye, olugu fana y’a lakari o ta durujaw ye.

⁴Situmuw ka siman tɔ min to, ɲɔdomutɔnw ka o domu. Ɲɔdomutɔnw k’a tɔ min to, tɔnbaw ka o domu. Tɔnbaw k’a tɔ min to, tumuwulenninw ka o domu.

⁵Aw dɔrɔtɔw, aw ye kunu sunɔgɔ ra ka kasi! Aw duvɛnminbagaw bɛɛ, aw ye maɲumankokanw fɔ! Aw ye maɲumankokanw fɔ duvɛnkura kosɔn, sabu duvɛnji tigɛra ka bɔ aw da ra!

⁶Siya dɔ benna ne ta jamana kan; o baraka ka bon, o tɛ se ka jate ka o da lɔn. O ɲinw bɛ i ko jara ɲinw, o dagbagaw bɛ i ko jaramuso dagbagaw.

⁷O ka ne ta rɛzɛnforo cɛn, o ka ne ta torosunw karikari; o k’a faraw bɛɛ bɔ k’a bɔn dugu ma. A yiriborow jajara.

⁸Aw ye kasi i ko sunguru min ka bɔrɔfaniw don, k’a maminacɛ su kasi.

⁹Siman sarakaw* ni rɛzɛnji sarakaw* dablara Matigi Ala ta so kɔnɔ. Sarakalasebaga minw bɛ Matigi Ala ta baara kɛ olugu bɛ maɲumankokanw fɔra.

¹⁰Forow cɛnna; dugukolo lakolon tora, sabu o ka simanw cɛn; rɛzɛnjikura banna, turu fana jara pewu.

¹¹Aw sɛnɛkɛbagaw, aw jigi tigɛra! Aw rɛzɛnsɛnɛbagaw, aw ye maɲumankokanw fɔ! Sabu alikama* ni ɔrize cɛnna; forow ta simanw bɛɛ halakira.

¹²Rɛzɛnsunw jara, torosunw fɔsɔnfɔsɔnna. Gerenadisunw o, tamarosunw o, pɔmusunw o, forow ta yiriw bɛɛ le jajara. Adamadenw ta ɲagari bɛɛ banna pewu!

¹³Aw sarakalasebagaw, aw ye bɔrɔfaniw don, ka maɲumankokanw fɔ! Aw minw bɛ sarakaw bɔ sarakajɛnifɛn* kan, aw ye kasi! Aw minw bɛ ne ta Ala ta baarakɛbagaw ye, aw ye su bɛɛ kɛ ni bɔrɔfaniw ye aw yɛrɛ ra, sabu siman sarakaw* ni rɛzɛnji sarakaw* dɛsɛra aw ta Ala ta batoso kɔnɔ.

¹⁴Aw ye lon dɔ bla ka sun don, ka jamalajɛnba kɛ ka Ala bato. Aw ye cɛkɔrɔbaw lajɛn, ani jamana mɔgɔw bɛɛ, o ye na Matigi Ala, aw ta Ala ta batoso kɔnɔ; aw ye Matigi Ala wele ko a ye aw dɛmɛ.

¹⁵E, lonjugu le ye nin ye dɛ! Matigi Ala ta lon surunyara; Sebɛɛtigi Ala ta cɛnrilonba, o lon le bɛ nana yi.

¹⁶Yala a ma domuni dɛsɛ jamana kɔnɔ an yɛrɛ ɲa na wa? Ɲagari ni jusudiya ma ban an ta Ala ta batoso kɔnɔ wa?

¹⁷Siman danninw torira dugukolo jukɔrɔ; bondow lakolon lo, simanmarayɔrɔw benbenna, alikama* tɛ yera tuun!

¹⁸E! Aw ye bɛganw sɛgɛnin ŋunatɔ flɛ! Misikuruw bɛ yaalara o yɛrɛ ma, sabu domunikɛyɔrɔ tɛ o fɛ tuun. Hali sagaw ni baw, olugu bɛɛ sɛgɛra.

¹⁹E, Matigi Ala, ne bɛ kulera ele le nɔ fɛ, sabu tasuma ka bɛganw ta domunikɛyɔrɔw bɛɛ jɛni kongo kɔnɔ; tasumamana ka forow ta yiriw bɛɛ jɛnijɛni.

²⁰Kongosogow fana bɛ kasira ele le nɔ fɛ, sabu kɔjiw bɛɛ jara; tasuma ka o ta domunikɛyɔrɔw jɛni kongo kɔnɔ.