Read Jula Amɔsi ta kitabu 1 Bible Online

Amɔsi ta kitabu 1 - Jula bible

Amɔsi ta kitabu 1

¹Nin ye Amɔsi ta kumaw le ye. Ale tun ye Tekoha dugu bɛgantigi dɔ le ye. Ala ka nin kow yira a ra Izirayɛli jamana ko ra, Zuda masacɛ Oziyasi ta wagati ra, ani Izirayɛli masacɛ Yerobohamu min tun ye Yohasi dencɛ ye, o ta wagati ra. San fla le tɛmɛna o kɔ fɛ, dugukoloyɛrɛyɛrɛ sɔrɔra ka kɛ.

²Amɔsi ko: «Matigi Ala pɛrɛnkan bɔra Siyɔn, i ko waraba mankan. A kan bɔra Zeruzalɛmu minkɛ, bɛgantigiw ta bɛganw ta domuniyɔrɔw binw fagara, Karimɛli kuru sanfɛyɔrɔw jara.»

³Matigi Ala ko: «Damasikaw ta kojugu saba kosɔn, a fɔ kojugu naani yɛrɛ, ne ka min latigɛ o kama, ne tɛna o to kɛbari ye; sabu o ka Galadikaw sɛnɛ ni misidaba nɛgɛraman ta ɲinw le ye.

⁴O ra, ne bɛna tasuma lajigi Hazahɛli ta masabonw kan, ka Bɛni Hadadi ta masabonbaw jɛni pewu.

⁵Ne bɛna Damasi dugu donda ta sɔgɔnanw kari, ka Bikati Avɛni [1] mɔgɔw halaki; masacɛbere bɛ min boro, ne bɛna o halaki ka bɔ Bɛti Edɛni [2]. O bɛna Sirikaw mina ka taga ni o ye Kiri jamana ra. Matigi Ala ko ten.»

⁶Matigi Ala ko: «Gazakaw ta kojugu saba kosɔn, a fɔ kojugu naani yɛrɛ, ne ka min latigɛ o kama, ne tɛna o to kɛbari ye; sabu o ka jamana mɔgɔw bɛɛ cɛ, ka taga o don Edɔmukaw boro.

⁷O ra ne bɛna tasuma lajigi Gaza dugu kogo kan, ka o ta masabonbaw jɛni pewu.

⁸Ne bɛna Azidɔdi dugutigi halaki. Masacɛbere bɛ min boro, ne bɛna o halaki ka bɔ Asikalɔn. Ne bɛna wuri Ekurɔnkaw kama; ni o kɛra, Filisika tɔw bɛɛ bɛna halaki.» Dunuɲatigi Ala ko ten.

⁹Matigi Ala ko: «Tirikaw ta kojugu saba kosɔn, a fɔ kojugu naani yɛrɛ, ne ka min latigɛ o kama, ne tɛna o to kɛbari ye; sabu o ka mɔgɔ caman mina ka o don Edɔmukaw boro; balemaya min tun bɛ o cɛ, o ma o hakiri to o ra.

¹⁰O ra ne bɛna tasuma lajigi Tiri dugu kogo kan ka o ta masabonbaw jɛni pewu.»

¹¹Matigi Ala ko: «Edɔmukaw ta kojugu saba kosɔn, a fɔ kojugu naani yɛrɛ, ne ka min latigɛ o kama, ne tɛna o to kɛbari ye; sabu o ka kɛrɛkɛmuru ta ka o balemaw nɔgbɛn; o ma sɔn ka hina o ra fiyewu. O dimina, ka to ka cɛnri kɛ wagati bɛɛ; o ta dimiba ma mala ka ye.

¹²O ra, ne bɛna tasuma lajigi Teman dugu kan, ka Bɔsira ta masabonbaw jɛni pewu.»

¹³Matigi Ala ko: «Amɔnkaw ta kojugu saba kosɔn, a fɔ kojugu naani yɛrɛ, ne ka min latigɛ o kama, ne tɛna o to kɛbari ye; sabu ka o to kɛrɛ ra ko o bɛ dɔ fara o ta jamana kan, o ka Galadi dugu musokɔnɔmanw kɔnɔw faran.

¹⁴O ra, ne bɛna tasuma mana Raba dugu kogo kan ka o ta masabonbaw jɛni pewu. O mankan bɛna kɛ i ko kɛrɛkɛlon ta kulekanbaw, ka kɛ i ko sanfɔɲɔba, sanjiba nalon na.

¹⁵O bɛna o ta masacɛ mina ka taga ni a ye; ale ni a ta jamana kuntigiw bɛɛ. Matigi Ala ko ten.»