Read Jula Abidiyasi ta kitabu 1 Bible Online

Abidiyasi ta kitabu 1 - Jula bible

Abidiyasi ta kitabu 1

¹Ala ka ko minw yira Abidiyasi ra: Dunuɲatigi Ala ka kuma min fɔ Edɔmukaw kama, o le ye nin ye: An ka kibaroya dɔ mɛn ka bɔ Matigi Ala fɛ; ciraden dɔ cira ka taga siyaw fɛ. A ko: «Aw ye wuri, an ye taga Edɔmukaw kama, ka taga o kɛrɛ.»

²«A flɛ, aw Edɔmukaw, ne bɛna aw baraka dɔgɔya ka tɛmɛ siya tɔw bɛɛ ta kan. O bɛna aw mafiyɛnya kosɛbɛ.

³Yɛrɛyira min tun bɛ aw jusu ra, o le ka aw lafiri; aw sigiyɔrɔ dogonin bɛ faraw cɛ ra, yɔrɔ kɔrɔtaninw na minkɛ, o kosɔn aw tun b’a fɔra ko: ‹Jɔn le bɛna se ka anw lajigi dugu ma?›

⁴Ayiwa, hali ni aw ka yɛlɛn ka taga fɔ sankolo ra i ko bɔn, hali ni aw ka aw ta ɲaga la fɔ lolow cɛ ra, ne bɛna aw lajigi! Matigi Ala ko ten.

⁵«Ayiwa, ni sonw nana aw fɛ su fɛ, walama ni benkannikɛbagaw nana, o bɛna cɛnri kɛ aw fɛ dɛ! Ni fɛn o fɛn ka o diya, o bɛ o bɛɛ ta. Ni o nana aw ta rɛzɛnw sonya, o bɛna rɛzɛnden dama dama le to aw ye.

⁶O kɔni ka Esawu ta mɔgɔw ta fɛnw bɛɛ le cɛ; o ka o ta fɛnmarayɔrɔw bɛɛ dayɛlɛ.

⁷Aw jɛnɲɔgɔnw bɛɛ bɛna aw gbɛn ka taga se fɔ jamana dan le ra. Aw teriw bɛna aw janfa, ka o fanga sigi aw kan. Minw tun bɛ aw ta domuni kɛra, olugu bɛna jan la aw sen kɔrɔ, nka aw tɛna se ka bɔ o kow kala ma.

⁸Sigiya t’a ra, ne bɛna mɔgɔ hakirimanw halaki o lon le ra, ka bɔ Edɔmu; ka faamurikɛbagaw halaki ka bɔ Esawu ta kuru kan. Matigi Ala ko ten!

⁹E! Teman, aw ta kɛrɛkɛcɛw ja bɛna tigɛ fɔ ka Esawu ta kuruyɔrɔ mɔgɔw bɛɛ faga ka ban.»

¹⁰«Aw juguyara aw balemaw ma, minw ye Yakuba ta mɔgɔw ye. O kosɔn maroyaba bɛna ben aw kan; aw bɛna halaki ka ban pewu;

¹¹sabu lon min na siya wɛrɛ mɔgɔw tun tagara Yakuba ta mɔgɔw ta naforow cɛ, lon min na mɔgɔ wɛrɛw tagara don o ta dugu kɔnɔ ka kara la janko ka Zeruzalɛmukaw ta borofɛnw taran ɲɔgɔn cɛ, o lon na aw tun bɛ yi; aw ni o siya wɛrɛ mɔgɔw bɛɛ le tun kɛra kelen ye.

¹²Aw tun man kan ka lɔ ka aw balemaw flɛ o ta bɔnɔ lon na; Zuda ta mɔgɔw halaki lon na aw tun man kan ka ɲagari. Aw tun man kan ka o dabayakumaw fɔ aw balemaw ta degu lon na.

¹³Aw kɔni tun man kan ka don ne ta mɔgɔw ta dugu donda fɛ o ta cɛnri lon na. Aw fana tun man kan ka lɔ ka kojugu bentɔ flɛ Zuda ta mɔgɔw kan o ta ɲani lon na. Aw tun man kan ka o ta naforow cɛ o ta cɛnri lon na.

¹⁴Aw tun man kan ka taga lɔ sirafaran na ka o ta mɔgɔ boribagaw faga. O ta mɔgɔ minw bɔsira, aw tun man kan ka olugu mina ka o di o juguw ma, o ta ɲani lon na.

¹⁵Sabu Matigi Ala ta lon surunyara; a bɛna wuri siyaw bɛɛ le kama. Aw ka min kɛ, o ɲɔgɔn le bɛna kɛ aw ra. Aw ta kojuguw sara bɛna sekɔ ka na ben aw yɛrɛ le kunna.

¹⁶Ayiwa, aw ka minni kɛ ne ta kuru saninman kan cogo min na, ne ta dimi kosɔn, siya tɔw bɛɛ bɛna minni kɛ ten le, dan tɛ minni min na; o bɛna min fɔ ka ɲanamini, fɔ ka na o bɛɛ latunu.

¹⁷«Nka minw bɛ Siyɔn kuru kan, olugu bɛna kisi. O yɔrɔ bɛna kɛ yɔrɔ saninman le ye. Yakuba ta mɔgɔw bɛna sekɔ ka na sigi o ta sigiyɔrɔ ra.

¹⁸Yakuba ta somɔgɔw bɛna kɛ tasuma le ye, Yusufu ta somɔgɔw bɛna kɛ tasumamana le ye; nka Esawu ta somɔgɔw bɛna kɛ bin le ye. O bɛna o bin jɛni k’a ban. Mɔgɔ si tɛna bɔsi Esawu ta somɔgɔw ra, sabu Matigi Ala kumana.

¹⁹Jamana woroduguyanfan mɔgɔw bɛna na sigi Esawu ta kuruyɔrɔw ra. Jamana dugumayanfan mɔgɔw, olugu bɛna sigi Filisikaw ta mara ra. O bɛna sigi Efirayimu jamana ra, ani Samari jamana ra. Boniyaminu ta mɔgɔw, olugu bɛna sigi Galadi mara ra.

²⁰Izirayɛlimɔgɔw ta mɔgɔ minaninw ta jɛnkuru min bɛ Kanaana, olugu bɛna sigi o yɔrɔ mara ra ka taga se fɔ Sarɛpita. Zeruzalɛmu ta mɔgɔ minanin minw bɛ Sefaradi, olugu bɛna sigi jamana woroduguyanfan duguw kɔnɔ.

²¹Olugu le bɛna se sɔrɔ, ka sigi Siyɔn kuru kan, ka o ta fanga sigi Edɔmukaw kan. O tuma masaya bɛna kɛ Ala ta ye.»