Read Jula Jateri kitabu 24 Bible Online

Jateri kitabu 24 - Jula bible

Jateri kitabu 24

¹Ayiwa, Balamu k’a ye ko Matigi Ala b’a fɛ ka baraka le don Izirayɛlimɔgɔw ra. O ra, a m’a kɛ i n’a fɔ siɲaga tɔw ta, ko a bɛ taga kuma dɔ ɲini ka bɔ Matigi Ala fɛ. A k’a ɲasin kongokolon ma.

²A k’a ɲa kɔrɔta ka Izirayɛlimɔgɔw ye, gba bɛɛ siginin bɛ a ta yɔrɔ ra. O wagati ra Ala Nin nana Balamu kan.

³Balamu k’a ta cirayakuma fɔ; a ko: «Nin ye ne Balamu, Behɔri dencɛ kan ye. Cɛ yerikɛbaga kan lo;

⁴Cɛ min bɛ Ala kumakan mɛn, o kan lo, cɛ min bɛ Sebɛɛtigi Ala ta fɛn yiraninw ye, cɛ min bɛ a ɲa biri dugu ma Ala ɲa kɔrɔ, ni Ala bɛ a ɲaw yɛlɛ.

⁵«E, Yakuba ta mɔgɔw, aw sigiyɔrɔ cɛ ka ɲi dɛ! E, Izirayɛlimɔgɔw, aw ta sow cɛ ka ɲi dɛ!

⁶O janjannin flɛ ka taga i ko kɔji, i ko nankɔ min bɛ bada ra, i ko Matigi Ala yɛrɛ ka alowɛsisun minw turu, i ko sɛdirisun minw bɛ ji da ra.

⁷O ta jibiminan fanin lo ji ra fɔ ka bɔn, ji caman bɛ woyo o ta simanw kɔrɔ, ka o falen. O ta masacɛ ka bon ka tɛmɛ masacɛ Agagi kan, o ta masaya bɛna to ka bonya ka taga a fɛ.

⁸Ala le ka o labɔ Misiran; a bɛ o ta baraka kɛ i ko sigin ta baraka. Siya minw bɛ wuri o kama, o bɛ olugu domu; o bɛ o kolow bɛɛ karikari, ka o sɔgɔ ni o ta biɲɛw ye.

⁹O kɔ, o bɛ o kinbiri turu, ka la i ko jara, i ko jaraba; jɔn le bɛ sɔn ka o lawuri? Izirayɛli, ni mɔgɔ min ka dugawu kɛ aw ye, Ala ye baraka don o tigi ra; ni mɔgɔ min ka aw danga, Ala ye o tigi danga.»

¹⁰Balaki dimina Balamu kɔrɔ kosɛbɛ. A k’a boro fla gbasi ɲɔgɔn na, k’a fɔ Balamu ye ko: «Ne ka i wele ko i ye na ne juguw danga le; nka i ka dugawu caman le kɛ o ye fɔ siɲaga saba.

¹¹Ni o lo, tɛmɛ ka bɔ yan sisan! Taga i ta so! Ne tun ko ne bɛna i bonya kosɛbɛ, nka Matigi Ala ma sɔn k’a to i ye o bonya sɔrɔ.»

¹²Balamu ka Balaki jaabi ko: «O tuma i ka ciraden minw ci ne fɛ, yala ne tun ma nin kuma fɔ olugu ye wa?

¹³Ne ko: ‹Hali ni Balaki k’a ta masabon fa warigbɛ ni sanin le ra k’a di ne ma, ko ne tɛna foyi kɛ ne yɛrɛ ma, koɲuman, walama kojugu, ni min tɛ bɛn ni Matigi Ala ta kuma ye; ko ni Matigi Ala ka min fɔ ne ye, ne fana bɛ o le fɔ!›

¹⁴Ayiwa, ne bɛ taga ne ta mɔgɔw fɛ; nka nin mɔgɔw bɛna min kɛ i ta mɔgɔw ra wagati nata ra, na ne bɛ o fɔ i ye.»

¹⁵O tuma, Balamu ka cirayakuma dɔ wɛrɛ fɔ; a ko: «Nin ye ne Balamu, Behɔri dencɛ kan ye. Cɛ yerikɛbaga kan lo;

¹⁶Cɛ min bɛ Ala kumakan mɛn, o kan lo, cɛ min bɛ Ala kɔrɔtaninba ta kolatigɛninw lɔn, cɛ min bɛ Sebɛɛtigi Ala ta fɛn yiraninw ye, cɛ min bɛ a ɲa biri dugu ma Ala ɲa kɔrɔ, ni Ala bɛ a ɲaw yɛlɛ.

¹⁷«Ne ɲa b’a ra, nka sisan ko tɛ; ne b’a flɛra, nka a yɔrɔ belen ka jan ne ra. Lolo dɔ bɛ bɔra Yakuba ta mɔgɔw cɛ ra; masacɛbere dɔ bɛ wurira Izirayɛli jamana ra. A bɛ Mohabukaw bugɔ o kun na, ka Sɛti ta mɔgɔw bɛɛ bugɔ ka o ben.

¹⁸A b’a fanga sigi Edɔmukaw kan, a b’a fanga sigi Seyirikaw kan, a juguw. Izirayɛlimɔgɔw baraka bɛna bonya.

¹⁹Kuntigi min bɛna bɔ Yakuba ta mɔgɔw ra, o le bɛna sigi masaya ra. Minw bɛ bɔsi ka bori ka bɔ duguw kɔnɔ, a bɛ olugu halaki.»

²⁰Ayiwa, Balamu ka Amalɛkikaw ta yɔrɔ ye minkɛ, a ka cirayakuma dɔ wɛrɛ fɔ tuun, ko: «Amalɛkikaw ta siya le tun ka bon ni siyaw bɛɛ ye; nka a laban, o bɛna halaki.»

²¹Balamu ka Kenikaw ta yɔrɔ ye minkɛ, a ka cirayakuma dɔ wɛrɛ fɔ tuun, ko: «Kenikaw, aw ta sigiyɔrɔ dogora ka ɲa; a bɛ i ko ɲaga min dogonin bɛ farakuru kan.

²²Nka Kenikaw bɛna halaki, tuma min na Asirikaw bɛna o mina ka taga ni o ye.»

²³Balamu ka cirayakuma dɔ wɛrɛ fɔ tuun, ko: «E, Ala bɛna nin kow kɛ wagati min na, jɔn le bɛna to si ra fɔ ka taga se o wagati ma?

²⁴Kurunbatigi dɔw bɛna na ka bɔ Kitimu. O bɛna o ta fanga sigi Asirikaw kan, k’a sigi Heburuw kan; nka olugu yɛrɛ bɛna halaki.»

²⁵Ayiwa, o kɔ, Balamu wurira ka taga a ta so. Balaki fana tagara a ta yɔrɔ ra.