Read Jula Jateri kitabu 26 Bible Online

Jateri kitabu 26 - Jula bible

Jateri kitabu 26

¹Ayiwa, o banajugu tɛmɛnin kɔ, Matigi Ala k’a fɔ Musa ni sarakalasebaga Haruna dencɛ Elehazari ye ko:

²«Aw ye Izirayɛlimɔgɔw bɛɛ jate, o bɛɛ ni o ta somɔgɔw; cɛ minw ka san mugan sɔrɔ, ani minw tɛmɛna o kan, ni o bɛ se ka taga kɛrɛ ra, aw ye olugu bɛɛ jate.»

³Musa ni sarakalasebaga Elehazari ka o kuma fɔ Izirayɛlimɔgɔw ye Mohabu jamana kɛnɛgbɛw yɔrɔ ra, Zuridɛn ba kɛrɛ fɛ, Zeriko dugu ɲa fɛ. O k’a fɔ o ye ko:

⁴«Cɛ minw ka san mugan sɔrɔ, ani minw tɛmɛna o kan, an bɛna olugu jate i n’a fɔ Matigi Ala tun k’a fɔ Musa ye cogo min na.» Izirayɛlimɔgɔ minw tun bɔra Misiran jamana ra, olugu ta durujaw le ye nin ye:

⁵Ayiwa, Rubɛn le tun ye Izirayɛli dencɛ fɔlɔ ye; Rubɛn ta durujaw ye nin ye: Hanɔkikaw buruju bɔra Henɔki le ra. Palukaw buruju bɔra Palu le ra.

⁶Hɛsirɔnkaw buruju bɔra Hɛsirɔn le ra. Karimikaw buruju bɔra Karimi le ra.

⁷Rubɛn ta durujaw bɔra o gbaw le ra. O minw jatera, o kɛra cɛ waga binaani ni saba ni cɛ kɛmɛ wolonfla ni cɛ bisaba (43 730).

⁸Ayiwa, Palu dencɛ le tun ye Eliyabu ye.

⁹Eliyabu dencɛw tun ye Nemuwɛli ni Datan ni Abiramu ye. O Datan tɔgɔ ni o Abiramu tɔgɔ le tun kɛra Izirayɛli jama ɲamɔgɔ dɔw ye. Olugu le tun farara Kore ta mɔgɔw kan, ka wuri Musa ni Haruna kama, wagati min Izirayɛlimɔgɔw tun murutira Matigi Ala ma.

¹⁰Dugukolo dayɛlɛra ka olugu ni Kore bɛɛ kunu. Kore nɔfɛmɔgɔ minw tun lajɛnna, olugu sara o lon na; tasuma ka mɔgɔ kɛmɛ ni bilooru fana jɛni. Ala tun ka o kɛ ka kankari le la Izirayɛlimɔgɔw ye.

¹¹O bɛɛ n’a ta, Kore yɛrɛ dencɛw tun ma faga.

¹²Simeyɔn ta durujaw ye nin ye, o ni o ta somɔgɔw: Nemuwɛlikaw buruju bɔra Nemuwɛli le ra. Yaminikaw buruju bɔra Yamini le ra. Yakinikaw buruju bɔra Yakini le ra.

¹³Zerakikaw buruju bɔra Zeraki le ra. Sawuli ta mɔgɔw buruju bɔra Sawuli le ra.

¹⁴Simeyɔn ta durujaw le ye olugu ye. O kɛra cɛ waga mugan ni fla ni cɛ kɛmɛ fla (22 200).

¹⁵Gadi ta durujaw ye nin ye, o ni o ta somɔgɔw: Sefɔnkaw buruju bɔra Sefɔn le ra. Hagikaw buruju bɔra Hagi le ra. Sunikaw buruju bɔra Suni le ra.

¹⁶Ozinikaw buruju bɔra Ozini le ra. Ɛrikaw buruju bɔra Ɛri le ra.

¹⁷Arɔdikaw buruju bɔra Arɔdi le ra. Arɛlikaw buruju bɔra Arɛli le ra.

¹⁸Gadi ta durujaw le ye olugu ye. O minw jatera, o kɛra cɛ waga binaani ni cɛ kɛmɛ looru (40 500).

¹⁹Zuda dencɛ dɔw tun ye Ɛri ni Onan ye, nka olugu cɛ fla sara Kanaana jamana ra.

²⁰Zuda ta durujaw ye nin ye, o ni o ta somɔgɔw: Selakaw buruju bɔra Sela le ra. Perɛsikaw buruju bɔra Perɛsi le ra. Zerakaw buruju bɔra Zera le ra.

²¹Perɛsi ta durujaw ye nin ye: Hɛsirɔnkaw buruju bɔra Hɛsirɔn le ra. Hamulikaw buruju bɔra Hamuli le ra.

²²Zuda ta durujaw le ye olugu ye. O minw jatera, o kɛra cɛ waga biwolonfla ni wɔɔrɔ, ani cɛ kɛmɛ looru (76 500).

²³Isakari ta durujaw ye nin ye, o ni o ta somɔgɔw: Tolakaw buruju bɔra Tola le ra. Puvakaw buruju bɔra Puva le ra.

²⁴Yasubukaw buruju bɔra Yasubu le ra. Simirɔnkaw buruju bɔra Simirɔn le ra.

²⁵Isakari ta durujaw le ye olugu ye. O minw jatera o kɛra cɛ waga biwɔɔrɔ ni naani ni cɛ kɛmɛ saba (64 300).

²⁶Zabulɔn ta durujaw ye nin ye, o ni o ta somɔgɔw: Serɛdikaw buruju bɔra a dencɛ Serɛdi le ra. Elɔnkaw buruju bɔra Elɔn le ra. Yalɛlikaw buruju bɔra Yalɛli le ra.

²⁷Zabulɔn ta durujaw le ye olugu ye. O minw jatera, o kɛra cɛ waga biwɔɔrɔ, ani cɛ kɛmɛ looru (60 500).

²⁸Yusufu dencɛw tun kɛra Manase ni Efirayimu ye.

²⁹Manase ta duruja ye nin ye: Makirikaw buruju bɔra Makiri le ra. Galadikaw buruju bɔra Makiri dencɛ Galadi le ra.

³⁰Galadi ta durujaw ye nin ye: Yezɛrikaw buruju bɔra Yezɛri le ra. Helɛkikaw buruju bɔra Helɛki le ra.

³¹Asiriyɛlikaw buruju bɔra Asiriyɛli le ra. Sikɛmukaw buruju bɔra Sikɛmu le ra.

³²Semidakaw buruju bɔra Semida le ra. Hefɛrikaw buruju bɔra Hefɛri le ra.

³³Hefɛri dencɛ Selofadi, ale tun ma dencɛ sɔrɔ. A tun ka denmusow le sɔrɔ. A denmusow tɔgɔw tun ye ko Mala, ani Nowa, ani Hogila, ani Milika, ani Tirisa.

³⁴Manase ta durujaw le ye olugu ye. O minw jatera, o kɛra cɛ waga bilooru ni fla ni cɛ kɛmɛ wolonfla (52 700).

³⁵Efirayimu ta durujaw ye nin ye, o ni o ta somɔgɔw: Sutelakaw buruju bɔra Sutela le ra. Bekɛrikaw buruju bɔra Bekɛri le ra. Tahankaw buruju bɔra Tahan le ra.

³⁶Sutela ta durujaw kɛra Erankaw ye; olugu bɔra Eran le ra.

³⁷Efirayimu ta durujaw le ye olugu ye. O minw jatera, o kɛra cɛ waga bisaba ni fla ani cɛ kɛmɛ looru (32 500). Olugu bɛɛ le kɛra Yusufu ta durujaw ye, o ni o ta somɔgɔw.

³⁸Boniyaminu ta durujaw ye nin ye, o ni o ta somɔgɔw: Belakaw buruju bɔra Bela le ra. Asibɛlikaw buruju bɔra Asibɛli le ra. Ahiramukaw buruju bɔra Ahiramu le ra.

³⁹Sufamukaw buruju bɔra Sufamu le ra. Hufamukaw buruju bɔra Hufamu le ra.

⁴⁰Aridikaw buruju bɔra Bela dencɛ Aridi le ra. Nahamankaw buruju bɔra Bela dencɛ Nahaman le ra.

⁴¹Boniyaminu ta durujaw le ye olugu ye, o ni o ta somɔgɔw. O minw jatera, o kɛra cɛ waga binaani ni looru ni cɛ kɛmɛ wɔɔrɔ (45 600).

⁴²Dan ta durujaw ye nin ye, o ni o ta somɔgɔw: Suhamukaw buruju bɔra Suhamu le ra. Olugu le kɛra Dan ta durujaw ye, o ni o ta somɔgɔw.

⁴³Minw jatera Suhamukaw ta gbaw ra, o bɛɛ lajɛnnin kɛra cɛ waga biwɔɔrɔ ni naani ani cɛ kɛmɛ naani (64 400).

⁴⁴Asɛri ta durujaw ye nin ye, o ni o ta somɔgɔw: Iminakaw buruju bɔra Imina le ra. Isivikaw buruju bɔra Isivi le ra. Beriyakaw buruju bɔra Beriya le ra.

⁴⁵Hebɛrikaw buruju bɔra Hebɛri le ra; o tun ye Beriya ta mɔgɔ dɔ ye. Malikiyɛlikaw buruju bɔra Malikiyɛli le ra; o tun ye Beriya ta mɔgɔ dɔ fana ye.

⁴⁶Asɛri denmuso tɔgɔ tun ye ko Sera.

⁴⁷Asɛri ta durujaw le ye olugu ye. O minw jatera, o kɛra cɛ waga bilooru ni saba ni cɛ kɛmɛ naani (53 400).

⁴⁸Nɛfitali ta durujaw ye nin ye, o ni o ta somɔgɔw: Yasɛlikaw buruju bɔra Yasɛli le ra. Gunikaw buruju bɔra Guni le ra.

⁴⁹Yesɛrikaw buruju bɔra Yesɛri le ra. Silɛmukaw buruju bɔra Silɛmu le ra.

⁵⁰Nɛfitali ta durujaw le ye olugu ye, o ni o ta somɔgɔw. O minw jatera, o kɛra cɛ waga binaani ni looru ni cɛ kɛmɛ naani (45 400).

⁵¹Izirayɛlimɔgɔ minw jatera, olugu le ye nin ye. O bɛɛ kɛra cɛ waga kɛmɛ wɔɔrɔ ni kelen ani cɛ kɛmɛ wolonfla ni cɛ bisaba (601 730).

⁵²Matigi Ala kumana Musa fɛ tuun, k’a fɔ a ye ko:

⁵³«I bɛna jamana taran mɔgɔw cɛ, k’a kɛ o sigiyɔrɔw ye, ka kaɲa ni o ta mɔgɔw hakɛya le ye.

⁵⁴Minw ka ca, i bɛ olugu ta yɔrɔ bonya; minw ka dɔgɔ, i bɛ olugu ta yɔrɔ dɔgɔya. Bɛɛ ta yɔrɔ bɛ di a ma, ka kaɲa ni a ta mɔgɔw hakɛya le ye.

⁵⁵Nka ni ne ka yɔrɔ min yira, ko a ye di gba min ma, i jija k’a to o yɔrɔ ye di o gba ma. Jamana bɛna taran o cogo le ra, ka kaɲa ni o bɛmaw ta gbaw tɔgɔw ye.

⁵⁶Ni ne ka yɔrɔ min yira ko a ye di gba min ma, o bɛ di o gba ma. Minw ka ca, olugu ta bɛ di o ma; minw ka dɔgɔ, olugu fana ta bɛ di o ma.»

⁵⁷Ayiwa, Levi ta duruja minw tun jatera, o ni o ta somɔgɔw, olugu ye nin ye: Gɛrisɔnkaw buruju bɔra Gɛrisɔn le ra. Kehatikaw buruju bɔra Kehati le ra. Merarikaw buruju bɔra Merari le ra.

⁵⁸Levi ta gba dɔw fana ye nin ye: Libinikaw ta gba, ani Heburɔnkaw ta gba, ani Malikaw ta gba, ani Musikaw ta gba, ani Korekaw ta gba. Kehati le ka Amuramu woro.

⁵⁹Amuramu ta muso tɔgɔ tun ye ko Yokebɛdi. Ale tun ye Levi denmuso ye; a tun worora Misiran le. Yokebɛdi ka Haruna ni Musa ni o balemamuso Mariyamu woro Amuramu fɛ.

⁶⁰Haruna ka dencɛ minw sɔrɔ, o kɛra Nadabu ni Abihu ni Elehazari ni Itamari ye.

⁶¹Nka Nadabu ni Abihu sara, sabu lon dɔ, o tun ka wusunan don Matigi Ala ɲa kɔrɔ ni tasuma dɔ ye, min tun bɔra yɔrɔ wɛrɛ ra.

⁶²Ayiwa, Levi ta mɔgɔ minw jatera, cɛden minw ka karo kelen sɔrɔ, ani minw tɛmɛna o kan, o kɛra cɛ waga mugan ni saba (23 000). Olugu ma jate ni Izirayɛlimɔgɔ tɔw ye, sabu olugu tun man kan ka yɔrɔ dɔ sɔrɔ min bɛ kɛ o yɛrɛ ta yɔrɔ ye, i n’a fɔ Izirayɛlimɔgɔ tɔw.

⁶³Ayiwa, Musa ni sarakalasebaga Elehazari ka Izirayɛlimɔgɔ minw jate Mohabu jamana kɛnɛgbɛw yɔrɔ ra, Zuridɛn ba kɛrɛ fɛ, Zeriko dugu ɲa fɛ, olugu le kɛra nin ye.

⁶⁴Musa ni sarakalasebaga Haruna tun ka Izirayɛlimɔgɔ minw jate fɔlɔfɔlɔ, Sinayi kongokolon kɔnɔ, olugu si tun tɛ nin mɔgɔw ra;

⁶⁵sabu Matigi Ala tun k’a fɔ ko olugu bɛɛ le bɛna sa kongokolon kɔnɔ. O kosɔn o si ma to, fɔ Yefune dencɛ Kalɛbu, ani Nuni dencɛ Yosuwe.