Read Jula Jateri kitabu 34 Bible Online

Jateri kitabu 34 - Jula bible

Jateri kitabu 34

¹Matigi Ala kumana Musa fɛ k’a fɔ a ye ko:

²«Kuma Izirayɛlimɔgɔw fɛ, k’a fɔ o ye ko: ‹Ni aw nana taga don Kanaana jamana ra, o jamana yɔrɔ minw bɛna di aw ma, k’a kɛ aw ta ye, o danw flɛ nin ye:

³« ‹Woroduguyanfan na, aw ta jamana dan bɛna kɛ Zini kongokolon ni Edɔmu jamana ye; a bɛ damina terebɔyanfan na, Kɔgɔji sanin woroduguyanfan na,

⁴ka taga tɛmɛ Akirabimu woroduguyanfan na, ka taga Zini fan fɛ, ka taga tɛmɛ Kadɛsi Barineya woroduguyanfan na, ka taga Hasari Adari ni Asimɔn,

⁵ka bɔ Asimɔn ka munu ka taga Misiran kɔ ra, ka bɔ yi ka taga laban Kɔgɔjiba ra.

⁶« ‹Terebenyanfan na aw ta jamana dan bɛna kɛ Kɔgɔjiba le ye.

⁷« ‹Sahiliyanfan na, aw bɛna a dan bɔ k’a ta Kɔgɔjiba ra ka taga a bla fɔ Hɔri kuru ra;

⁸k’a ta Hɔri kuru ra, aw bɛ a dan bɔ tuun ka taga tɛmɛ Lebo Hamati, ka taga se fɔ Sedadi;

⁹ka bɔ yi, ka taga tɛmɛ Zifirɔn, ka taga laban Hasari Enan. O le bɛna kɛ jamana dan ye sahiliyanfan na.

¹⁰« ‹Terebɔyanfan na, aw ye a dan bɔ k’a damina Hasari Enan ka taga se Sefamu;

¹¹ka bɔ yi, ka taga a bla Ribila, Ayini terebɔyanfan na; ka bɔ yi, ka taga fɔ Kinerɛti ba terebɔyanfan jigijigi yɔrɔw ra;

¹²ka bɔ yi, ka taga se Zuridɛn ba ma, ka sɔrɔ ka taga laban Kɔgɔji sanin na. « ‹Ayiwa, aw ta jamana danw bɛna kɛ o le ye, a fanw bɛɛ ra.› »

¹³Ayiwa, Musa k’a fɔ Izirayɛlimɔgɔw ye ko: «Aw bɛna nin jamana le taran Izirayɛli gbaw ra; Matigi Ala le bɛna bɛɛ ta sigiyɔrɔ yira. Matigi Ala k’a latigɛ ko a bɛ nin jamana le di Izirayɛli ta gba kɔnɔntɔn tɔw ma, ani Manase ta gba tarancɛ tɔ kelen ma;

¹⁴sabu Rubɛn ta mɔgɔw, ani Gadi ta mɔgɔw ka o ta yɔrɔ sɔrɔ ka ban, o bɛɛ ni o ta yɔrɔ; Manase ta gba tarancɛ kelen fana k’a ta yɔrɔ sɔrɔ.

¹⁵O gba fla ni Manase ta gba tarancɛ kelen ka o ta yɔrɔ sɔrɔ Zuridɛn ba fan dɔ ra, terebɔyanfan na, k’a ɲasin Zeriko dugu ma.»

¹⁶Matigi Ala kumana Musa fɛ tuun, ko:

¹⁷«Mɔgɔ minw bɛna jamana taran Izirayɛlimɔgɔw ra, o mɔgɔw tɔgɔw flɛ nin ye: sarakalasebaga Elehazari, ani Nuni dencɛ Yosuwe.

¹⁸Aw ye kuntigi kelen kelen bɔ gbaw bɛɛ ra fana, ka o fara o kan ka jamana taran.

¹⁹O kuntigiw tɔgɔw flɛ nin ye: Yefune dencɛ Kalɛbu, o bɛ Zuda ta gba ra.

²⁰Amihudi dencɛ Samawilu, o bɛ Simeyɔn ta gba ra.

²¹Kisilɔn dencɛ Ɛlidadi, o bɛ Boniyaminu ta gba ra.

²²Yogili dencɛ Buki, kuntigi lo Dan ta gba ra.

²³Efodi dencɛ Haniyɛli, kuntigi lo Yusufu dencɛ Manase ta gba ra.

²⁴Sifitan dencɛ Kemuhɛli, kuntigi lo Yusufu dencɛ Efirayimu ta gba ra.

²⁵Parinaki dencɛ Elisafan, kuntigi lo Zabulɔn ta gba ra.

²⁶Azan dencɛ Palitiyɛli, kuntigi lo Isakari ta gba ra.

²⁷Selomi dencɛ Ahudi, kuntigi lo Asɛri ta gba ra.

²⁸Amihudi Pedahɛli, kuntigi lo Nɛfitali ta gba ra.»

²⁹Ayiwa, Matigi Ala k’a fɔ ko o mɔgɔw le bɛna Kanaana jamana taran Izirayɛlimɔgɔw ra.