Read Jula Nahɔmu ta kitabu 1 Bible Online

Nahɔmu ta kitabu 1 - Jula bible

Nahɔmu ta kitabu 1

¹Cirayakuma min fɔra Ninive dugu ta ko ra, Ala ka o ko minw yira Elikɔsikacɛ Nahɔmu na, o kow kitabu le ye nin ye. [1]

²Ala min t’a fɛ mɔgɔ ye ale ni batofɛn wɛrɛ kanu ɲɔgɔn fɛ, ani Ala min bɛ kojugu juru sara, o le ye Matigi Ala ye. Matigi Ala bɛ hakɛ sara; a ta dimi ka jugu kosɛbɛ. A bɛ a kɛrɛbagaw ta kojuguw sara, a bɛ a ta dimi mara a juguw kama.

³Matigi Ala tɛ dimi joona, a ta sebagaya ka bon; a fana tɛ kojugukɛbaga to ni a ma a ta kojugu hakɛ bɔ a ra. Matigi Ala bɛ a tɛmɛsira bɔ folonkonto ni sanfɔɲɔ cɛ ma; sankabaw ye a sennabuguri le ye.

⁴A bɛ sɔngɔ kɔgɔji ra, k’a ji ja, a bɛ bajiw bɛɛ ji ja. Basan ni Karimɛli kuruyɔrɔw bɛ ja, Liban yirifiyerenw bɛ fɔsɔnfɔsɔn.

⁵Kuruw bɛ yɛrɛyɛrɛ a ɲa kɔrɔ, kongoriw bɛ yeele; dugukolo bɛ yuguyugu a ɲa kɔrɔ, ani dunuɲa ni a kɔnɔfɛnw bɛɛ.

⁶Jɔn le bɛ se ka lɔ k’a ta dimiba makɔnɔ? Ni a jusu bɔra, jɔn bɛ se ka lɔ k’a kɔnɔ? A ta dimi bɛ jigi i ko tasuma, a bɛ jigi ka faraw pɛrɛnpɛrɛn.

⁷Matigi Ala ka ɲi. Jusukasilon na a bɛ kɛ mɔgɔ dogoyɔrɔ ye. Minw bɛ o yɛrɛ karifa a ma, a b’a janto olugu ra.

⁸Nka a bɛna jiwoyobaw kɛ ka Ninive dugu ban pewu! A bɛna a juguw nɔgbɛn fɔ ka taga o bla dibi ra.

⁹Aw bɛ dabari juman le sirira Matigi Ala kama? Ale le bɛna aw halaki ka aw ban pewu. Ɲagban tɛna se aw ma k’a se siɲaga fla.

¹⁰Hali ni o melegenin bɛ ɲɔgɔn na i ko ŋaniyiriw, hali ni o minna ka fa, a bɛna o jɛni ka ban, i ko binjalan.

¹¹Miiriyajuguw tun bɛ mɔgɔ min jusu ra Matigi Ala kama, ani ŋaninyajuguw, o tigi tun bɔra ele Ninive dugu le kɔnɔ.

¹²Matigi Ala ko: «Hali ni Asirikaw ka ca, hali ni o baraka ka bon cogo o cogo, o bɛna tigɛ ka ben le! O bɛɛ bɛna ban pewu. Aw Zuda mɔgɔw, ne ka aw tɔɔrɔ, nka ne tɛna aw tɔɔrɔ tuun.

¹³O ka doni min la aw kunna, ne bɛna o bɔ aw kan; ne bɛna aw ta sirinanw foni.»

¹⁴Matigi Ala ka kuma min fɔ ele Ninive dugu kama, o le ye nin ye: A ko: «Aw tɛna duruja sɔrɔ aw tɔgɔ bɛ la min na. Aw ta jo kabakururamanw, ani aw ka nɛgɛ yeele k’a kɛ batofɛn minw ye, ne bɛna o bɛɛ sama ka bɔ aw ta alaw ta sɔnnikɛbonw kɔnɔ. Ne bɛna aw ta kaburu labɛn k’a bla, sabu aw tɛ foyi ye.»