Read Jula Habakuki ta kitabu 1 Bible Online

Habakuki ta kitabu 1 - Jula bible

Habakuki ta kitabu 1

¹Matigi Ala ka kuma min yira cira Habakuki ra:

²Matigi Ala, i bɛna ne jaabi tuma juman le sa? Ne ka i wele ko i ye an dɛmɛ, nka i ma ne lamɛn! Ne kulera k’a fɔ i ye ko kojuguw warara, nka i ma an kisi.

³Mun kosɔn i b’a to ne ɲa ye nin kojuguw ye? Mun kosɔn i bɛ je ka terenbariya flɛ? Ne ɲa bɛ tɔɲɔri ni benkanni le ra, sɔsɔriw bɛ wuri, kɛrɛ fana bɛ yi.

⁴O kosɔn sariya sira tagama dablara, kiti tɛ tigɛra can kan tuun. Mɔgɔjugu le bɛ se mɔgɔɲuman na, kiti bɛ tigɛ nanbara le kan.

⁵«Aw ye aw ɲa lɔ siyaw ra ka o flɛ, aw ye kabakoya fɔ ka kɔnɔnɔban; sabu ko dɔ bɛna kɛ aw ta wagati ra, ni mɔgɔ tun k’a fɔ aw ye ko a bɛ kɛ, aw tun tɛna la a ra.

⁶A flɛ, ne bɛna Babilɔnikaw lawuri, o mɔgɔ hinabariw, ani o mɔgɔ farimanw, minw bɛ dugukolo yɔrɔ bɛɛ yaala ka mɔgɔw ta sigiyɔrɔw mina; yɔrɔ minw tɛ o ta ye, o bɛ o mina.

⁷Jatigɛmɔgɔw, ani siranyamɔgɔw lo. O yɛrɛ le bɛ o ta sariya sigi, ka o ta fanga sigi.

⁸O ta sow sen ka fiyɛn ka tɛmɛ waraninkala kan. O ka fari ka tɛmɛ hali kongowuru sufɛraman kan. O ta sow bɛ teliyara ka na; o ta sotigiw bɛ nana ka bɔ yɔrɔjan. O bɛ teliyara ka na i ko bɔn min bɛ nana a ta domunifɛn kɔ.

⁹Nin mɔgɔw bɛɛ bɛ nana kojugu le kama; o bɛ girinna ka na ɲa fɛ dɔrɔn. O bɛ mɔgɔw mina ka o lajɛn, caman i ko kɛnkɛn.

¹⁰O bɛ masacɛw dɔgɔya, o bɛ fagamaw mafiyɛnya. Dugu barakamanw tɛ o ɲa na foyi ye; o bɛ yɛlɛnyɔrɔw lɔ ni bɔgɔ ye ka dugu kogo lamini, ka yɛlɛn o kan ka dugu mina.

¹¹O kɔ, o bɛ tɛmɛ i ko fɔɲɔ, ka taga yɔrɔ wɛrɛ. O bɛ kojugu kɛ ka o yɛrɛ jaraki; o yɛrɛ ta baraka le bɛ o ta ala ye.»

¹²Ele le tun tɛ yi kabini fɔlɔfɔlɔ wa? E, Matigi Ala, ne ta Ala saninman, ele min tɛ sa ka ye! E, Matigi Ala, i ka nin mɔgɔw labɛn an ta kiti le kama. E, an ta Ala barakaman, i ka o sigi ko o ye an ta kojuguw hakɛw le bɔ an na.

¹³Ele ɲa saninyanin lo, i t’a fɛ ka kojugu ye i ɲa ra. I t’a fɛ ka mɔgɔw tɔɔrɔtɔ flɛ. Mun na i bɛ je ka mɔgɔjanfabaga flɛ? Mun na i tɛ foyi fɔ, k’a sɔrɔ mɔgɔjugu bɛ mɔgɔ terennin halakira, mɔgɔ min terennin lo ka tɛmɛ ale yɛrɛ kan?

¹⁴I ka adamadenw kɛ i n’a fɔ kɔgɔji jɛgɛw, i n’a fɔ fɛnɲanaman minw bɛ fofo, kuntigi tɛ minw fɛ.

¹⁵O jugu bɛ o bɛɛ mina ni dulen ye; a bɛ o sama ka bɔ ni a ta jɔ ye. A bɛ o kɛ a ta jɛgɛminafɛn kɔnɔ, ka ninsɔndiya fɔ ka ɲagari.

¹⁶O kɔ, a bɛ sarakaw bɔ a ta jɔ ye; a bɛ wusunan sarakaw* bɔ a ta jɛgɛminafɛn ye; sabu o le sababu ra, a ta sɔrɔta cayara, o le sababu ra, a ta domuni bɛ diya.

¹⁷Yala an jugu bɛna to k’a ta jɔ fa k’a labɔ tan wagati bɛɛ wa? A bɛna to ka mɔgɔw halaki tan, hali a tɛ hina o ra wa?