Read Jula Habakuki ta kitabu 2 Bible Online

Habakuki ta kitabu 2 - Jula bible

Habakuki ta kitabu 2

¹Ne bɛna lɔ ne lɔyɔrɔ ra ka yɔrɔ kɔrɔsi; ne bɛna lɔ dugu kogo kunna ka yɔrɔ kɔrɔsi. Ne bɛna ne toro malɔ k’a lɔn Ala bɛna min fɔ ne ye, k’a lɔn ne ta ɲininkari jaabi bɛna kɛ min ye.

²Matigi Ala ka ne jaabi k’a fɔ ko: «I ka min ye, o sɛbɛ; a sɛbɛ k’a gbɛya walakaw kan, janko hali mɔgɔ boritɔ ye se k’a karan.

³Sabu nin fɛn min yirara, o ye wagati dɔ ta ko le ye; a bɛ wagatilabanw ta ko le fɔ; faninyakuma tɛ, hali ni a mɛɛnna, a makɔnɔ, sabu min fɔra, o bɛna kɛ le jate; a kɛwagati tɔ fana man jan.

⁴«Mɔgɔ min bɛ a yɛrɛ bonya, o tigi jusukun tɛ sira terennin ta; nka mɔgɔ terennin bɛ ɲanamanya a ta lanaya le sababu ra.

⁵Naforo bɛ mɔgɔ lafiri [1], mɔgɔ yɛrɛbonyabagaw ta ko si tɛ laban. O bɛ o da yɛlɛ k’a bonya i ko lahara dingaba; o bɛ i ko saya min tɛ wasa mɔgɔdomu na ka ye. O bɛ mɔgɔw mina ka o kɛ o yɛrɛ ta ye, ka mɔgɔw bɛɛ mina ka o lajɛn o yɛrɛ ye.»

⁶«Nka yala lon dɔ nin mɔgɔ minaninw tɛna olugu ta ko fɔ i ko talen wa? Ka o ta ko fɔ i ko zana, k’a kɛ yɛrɛko ko ye wa? Mɔgɔw bɛna a fɔ ko: ‹Mɔgɔ min bɛ walifɛn cɛ ka o kɛ a yɛrɛ ta ye, bɔnɔ bɛna o tigi sɔrɔ. Aw bɛ mɔgɔw ta fɛn minw tara ka o juru caman don aw yɛrɛ kan na, aw bɛna o dabla tuma juman le?›

⁷Lon dɔ, aw ta jurunantigiw bɛna bara ka wuri aw kama; o bɛna wuri ka aw yuguyugu, ka aw borofɛnw cɛ.

⁸I n’a fɔ aw ka siya caman ta fɛnw cɛ, o kosɔn siyaw ta mɔgɔ minw tora, olugu bɛna aw ta fɛnw cɛ fana. O kow bɛna kɛ aw ra sabu aw ka adamadenw faga, aw ka kojuguw kɛ jamana kɔnɔ, aw ka duguw ni dugumɔgɔw halaki.

⁹«Mɔgɔ min bɛ a ta fɛnw sɔrɔ tɔɲɔri ra, janko k’a ta so lɔ, k’a ta so lɔ ka ɲa i ko kɔnɔɲaga min bɛ kuruw kunna, janko kojugu kana ale sɔrɔ, bɔnɔ bɛna o tigi sɔrɔ.

¹⁰«Aw ka siya caman faga minkɛ, o kosɔn aw ka maroya ben aw yɛrɛ ta so le kan, aw ka kojugu kɛ aw yɛrɛ le ra.

¹¹Hali aw ta bon kabakuruw bɛna to kogo ra ka kule aw kama; bonlɔyiriw fana bɛna to bon san fɛ ka kabakuruw lamina.

¹²«Mɔgɔ min bɛ mɔgɔw faga k’a ta dugu lɔ ni o jori ye, bɔnɔ bɛna o tigi sɔrɔ; mɔgɔ min bɛ a ta dugu sindi ni kojugu ye, bɔnɔ bɛna o tigi sɔrɔ.

¹³Mɔgɔw bɛ baara kɛ, nka o tɔnɔ bɛɛ bɛ taga tasuma ra, siyaw bɛ o yɛrɛ sɛgɛ, nka o ta sɛgɛ tɛ foyi ɲa; o kow bɛɛ bɛ bɔra Fangatigi Ala le ra.

¹⁴Sabu dugukolo bɛɛ bɛna fa Matigi Ala ta nɔɔrɔ lɔnniya ra, i n’a fɔ ji ka kɔgɔji fa cogo min na.

¹⁵«Ele min bɛ dɔrɔ di i mɔgɔɲɔgɔn ma ko a y’a min, bɔnɔ bɛna ele sɔrɔ. Ele min bɛ fɛnjugu di i mɔgɔɲɔgɔn ma, k’a to a b’a min ka ɲanamini, janko k’a lebu flɛ, bɔnɔ bɛna ele sɔrɔ.

¹⁶Sani ele ye bonya sɔrɔ, ele fana bɛna fa maroya le ra; sisan ele fana le bɛna min ka fa, ka i lebu yira. Minnifɛn min bɛ Matigi Ala kininboro ra, o bɛna di ele ma; i ta dawula bɛna yɛlɛma ka kɛ maroya ye.

¹⁷«Aw ka cɛnri min kɛ Liban jamana ra, o juru bɛna sara aw yɛrɛ ra. Kongowara farimanw bɛna ben aw kan, fɔ ka jatigɛ bla aw ra. O kow bɛna kɛ aw ra sabu aw ka adamadenw faga, aw ka kojuguw kɛ jamana kɔnɔ, aw ka duguw ni dugumɔgɔw halaki.

¹⁸«Mɔgɔ bɛ batofɛn minw lɛsɛ, o bɛ se ka mun le ɲa? Mɔgɔ bɛ nɛgɛ yeele k’a kɛ batofɛn minw ye, o fɛn minw bɛ mɔgɔ lafiri dɔrɔn, o bɛ se ka mun le ɲa? Mun kosɔn mɔgɔ b’a jigi la a yɛrɛ boro ta fɛn lalaganin kan, ka o batofɛngbansanw lalaga, o minw tɛ se ka kuma?

¹⁹Ele min b’a fɔ yiri ma ko: ‹I wuri!› Ele min b’a fɔ kabakuru lɛsɛnin ma, nin tɛ min na, ko: ‹I kunu!› Bɔnɔ bɛna ele sɔrɔ. O fɛnw bɛ se ka ele karan mun le ra? Sanin ni warigbɛ dɔrɔn le bɛ o kan; nin foyi tɛ o ra.

²⁰Nka Matigi Ala bɛ a ta batoso saninman kɔnɔ: dunuɲa bɛɛ lajɛnnin ye je a ɲa kɔrɔ.»