Read Jula Habakuki ta kitabu 3 Bible Online

Habakuki ta kitabu 3 - Jula bible

Habakuki ta kitabu 3

¹Cira Habakuki ka daariri min kɛ, ni maɲumankokanw ye, o le ye nin ye; a ko:

²E, Matigi Ala, ne ka i ta kuma fɔnin mɛn; i ta kokɛninw ka siranyaba bla ne ra, Matigi Ala. I ka nin ko min labɛn, a to o ye kɛ nin san nataw kɔnɔ. A to mɔgɔw ye a lɔn san nataw ra. Nka hali ni i dimina, i hakiri to i ta makari ra.

³Ala bɛ nana ka bɔ Teman, Ala Saninman bɛ nana ka bɔ Paran kuruw yɔrɔ ra. [1] A bonya ka sankolo yɔrɔ bɛɛ fa, dugukolo yɔrɔ bɛɛ fara a bonya ra.

⁴A bɛ manamana i ko yeelen. Yeelenw bɛ bɔ a tɛgɛ kɔnɔ; a ta baraka dogonin bɛ o yɔrɔ le ra.

⁵A tagatɔ bɛ banajugu ben jamanaw kan a ɲa fɛ, a tɛmɛnin kɔ, a bɛ farigbanjuguw bla jamanamɔgɔw ra.

⁶Ni a ka lɔ, dugukolo bɛ yuguyaga; ni a ka flɛri kɛ, jamana mɔgɔw bɛ yɛrɛyɛrɛ. Kuru minw tun bɛ yi kabini fɔlɔfɔlɔ, olugu bɛ cici, kongori minw tun bɛ yi kabini wagatijan, olugu bɛ yeele; o yɔrɔw le tun bɛ a tɛmɛyɔrɔ ye kabini fɔlɔfɔlɔ.

⁷Ne ka Kusan mara ta fanibonw ye, jigitigɛ benna olugu kan, ne ka Madiyan mara ta sow ye, kɔnɔnɔfiri benna olugu kan.

⁸E, Matigi Ala, wagati min i yɛlɛnnin tun bɛ nana i ta sow kan, wagati min i tun bɛ nana i ta sowotoro kɔnɔ ka na se sɔrɔ, yala i tun dimina bajiw le kɔrɔ wa? Yala i jusu tun bɔra kɔjiw le kɔrɔ wa? Yala i jusu tun gbanna kɔgɔji le kɔrɔ?

⁹I ka i ta kalan bɔ a forogo kɔnɔ; i ka biɲɛ caman le ta. [2] I ka dugukolo cɛci, ka o kɛ bajiw tɛmɛsiraw ye.

¹⁰Kuruw ka i ye minkɛ, olugu bɛɛ yɛrɛyɛrɛra, jibaw woyora ka tɛmɛ; kɔgɔji ka mankanba bɔ, ka jikurubaw lawuri fɔ san fɛ.

¹¹Tere ni karo lɔnin tora o lɔyɔrɔ ra, i ta biɲɛw tagatɔ ta yeelenba kosɔn, i ta taman manamanatɔ kosɔn.

¹²I jusu gbanninba bɛ dunuɲa yaala, i dimininba bɛ jamanaw dɔndɔn ka tɛmɛ.

¹³I bɔra ka na i ta mɔgɔw kisiri kama, i nana i ta mɔgɔ ɲanawolomaninw kisiri kama. I ka mɔgɔjuguw ta so ɲamɔgɔ halaki ka bɔ yi, ka o ta so halaki pewu, k’a ta dugu ma ka taga a bla fɔ a san fɛ. [3]

¹⁴I ka o ta kɛrɛkɛdenw kuntigi sɔgɔ ni a yɛrɛ ta biɲɛ ye; ale min tun bɛ girinna ka na i ko sanfɔɲɔ, ka na an halaki. O tun bɛ ɲagarira ka ban, ko o bɛna ɲanibagatɔ faga dogo ra.

¹⁵I bɛ yaala kɔgɔjiw kɔnɔ ni i ta sow ye, i bɛ tɛmɛ jikurubaw cɛ ma.

¹⁶Ne ka o mɛn minkɛ, ne kɔnɔnɔfirira; ne dagbolow yɛrɛyɛrɛra. Ne kolow bɛɛ fagara, ne senw bɛɛ magayara ne kɔrɔ. Ne bɛ je ka o tɔɔrɔ nalon makɔnɔ, an juguw bɛna ben an kan ka an kɛrɛ lon min na.

¹⁷Hali ni torosun tɛna fiyerenkura bɔ tuun, hali ni rɛzɛnmɔ tɛna kɛ rɛzɛnsunw na tuun, hali ni oliviyesun tɛna den kɛ tuun, hali ni siman tɛna sɔrɔ forow ra tuun, hali ni sagaw ni baw tɛna sɔrɔ tuun, hali ni misi tɛna kɛ wɛrɛ kɔnɔ tuun,

¹⁸o bɛɛ n’a ta, ne kɔni bɛna ɲagari Matigi Ala baraka ra. Ne bɛna ninsɔndiya ne kisibaga Ala baraka ra.

¹⁹Matigi Ala, ne Matigi, ale le ye ne ta baraka ye. A bɛ ne senw lateliya i ko dagbɛ ta senw, a b’a to ne ye tagama yɔrɔ kɔrɔtaninw san fɛ. Dɔnkirilabagaw kuntigi: dɔnkiri min bɛ la ni gɔni ye.