Read Jula Luka ka Yesu ta Kibaro Diman min sɛbɛ 3 Bible Online

Luka ka Yesu ta Kibaro Diman min sɛbɛ 3 - Jula bible

Luka ka Yesu ta Kibaro Diman min sɛbɛ 3

¹Ayiwa, wagati min na masacɛba Tiberi Sezari tun bɛ a ta masaya san tan ni loorunan na, o y’a sɔrɔ Ponse Pilati le tun ye Zude mara jamanatigi ye, Herodi* tun ye Galile mara jamanatigi ye, a kɔrɔcɛ Filipe tun ye Iture mara ni Tirasoniti mara jamanatigi ye, Lizaniyasi tun ye Abilɛni mara jamanatigi ye.

²O wagati ra fana Ane ni Kayife le tun ye sarakalasebagaw kuntigibaw* ye. Ayiwa, o wagati le ra, Ala ka a ta kuma lase Jakariya dencɛ Yuhana ma, k’a to kongokolon kɔnɔ.

³Yuhana tagara Zuridɛn kɔ yɔrɔw bɛɛ ra; a tun bɛ mɔgɔw waaju ko o ye nimisa o ta jurumunw na ka batize, janko Ala ye o ta jurumunw yafa.

⁴O kow le tun sɛbɛra cira Ezayi ta Kitabu kɔnɔ, ko: «Mɔgɔ dɔ bɛna pɛrɛn kongokolon kɔnɔ k’a fɔ ko: ‹Aw ye siraba labɛn Matigi ye ka siradenninw bɛɛ lateren a ye.

⁵Dingakɔnɔyɔrɔw bɛɛ ye lafa, kuruw ni kongoriw bɛɛ ye dakaɲa. Sira kuturuninw bɛɛ ka kan ka lateren, ka sirajuguw siyan ka o nugu.

⁶Ni o kɛra, adamaden bɛɛ bɛna Ala ta kisiri ko ye .› »

⁷Jama minw tun bɛ nana Yuhana fɛ ka na batize, Yuhana tun b’a fɔra olugu ye ko: «Aw fɔnfɔnnindenw! Jɔn le ka aw karan ko aw ye bori Ala ta kiti nata ɲa?

⁸Aw ta kɛwalew le ka kan k’a yira ko can ra aw jusukun yɛlɛmana; aw kana a miiri dɔrɔn k’a fɔ ko: ‹Anw le ye Iburahima ta durujaw ye!› Sabu ni duruja ko lo, ne b’a fɔ aw ye ko Ala bɛ se ka hali nin kabakuruw yɛlɛma ka o kɛ Iburahima ta durujaw ye.

⁹Jende tara yiriw lilinw tigɛri kama ka ban. Yiri o yiri tɛ denɲuman kɛ, o bɛ tigɛ ka ben, ka firi tasuma ra.»

¹⁰Jama tun bɛ Yuhana ɲininkara, ko: «An ka kan ka mun le kɛ?»

¹¹Yuhana ka o jaabi ko: «Ni derege fla bɛ mɔgɔ min fɛ, dɔ tɛ min fɛ, o ye kelen di o tigi ma; ni domuni bɛ mɔgɔ min fɛ, o fana ye a kɛ ten.»

¹²Ninsaraminabaga dɔw fana nana ka na batize; olugu ko a ma ko: «An karamɔgɔ, an ka kan ka mun le kɛ?»

¹³A ko olugu ma ko: «Warida min fɔra aw ye, aw kana foyi mina ka tɛmɛ o kan.»

¹⁴Sorasiw fana k’a ɲininka ko: «Anw do? Anw ka kan ka mun kɛ?» A ko olugu ma ko: «Aw kana mɔgɔ si ta fɛn mina a ra fanga ra; mɔgɔ ma ko min kɛ, aw kana o faninya la a ra; o bɛ sara min di aw ma, aw y’a to o ye aw wasa.»

¹⁵Mɔgɔw tun bɛ Kisibaga makɔnɔna; o bɛɛ tun bɛ o yɛrɛ ɲininkara ko yala Ala ka Kisibaga* min ko layiri ta ko o tɛ Yuhana yɛrɛ le ye wa?

¹⁶O kosɔn Yuhana ka o jaabi k’a fɔ o bɛɛ ye ko: «Ne kɔni bɛ aw batizera ji le ra dɔrɔn; nka min bɛna na, o fanga ka bon ni ne ta ye. Hali ne tɛ se k’a fɔ ko ne bɛ a ta sanbara juru foni ka bɔ a sen na. Ale le bɛna aw batize ni Nin Saninman* ye, ani tasuma.

¹⁷A ta baarakɛminan b’a boro, a bɛ simankisɛ ni a ɲaga bɔ ɲɔgɔn na. A bɛ simankisɛ kɛ a ta bondo kɔnɔ, nka a bɛna ɲaga jɛni tasuma ra, tasuma min tɛ faga ka ye.»

¹⁸Yuhana ka nin kuma ɲɔgɔn caman wɛrɛ fɔ mɔgɔw ye ka o lasɔmi, ka Ala ta Kibaro Diman* kuma fɔ o ye.

¹⁹Ayiwa, Yuhana ka jamanatigi Herodi* jaraki a balemacɛ muso Herodiyadi ta ko ra. Yuhana ka Herodi jaraki kojugu caman wɛrɛ ra.

²⁰Nka Herodi belen ka kojugu dɔ fara dɔ kan, ka Yuhana mina ka a bla kaso ra.

²¹Ayiwa, mɔgɔ bɛɛ tun batizera ka ban minkɛ, Yesu fana nana batize. Ka Yesu to Aladaari ra, sankolo dayɛlɛra.

²²Nin Saninman* kɛra i n’a fɔ jɛnɛtugani, ka na jigi Yesu kan. Kumakan dɔ bɔra sankolo kɔnɔ, ko: «Ele le ye ne Dencɛ* kanunin ye; i ko ka di ne ye haali.»

²³Ayiwa, Yesu ka a ta baaraw damina ka a si to san bisaba. Mɔgɔw tun bɛ a jatera Yusufu dencɛ le ye. Yusufu facɛ tun ye Heli ye.

²⁴Heli facɛ tun ye Matati ye. Matati facɛ tun ye Levi ye. Levi facɛ tun ye Mɛlɛki ye. Mɛlɛki facɛ tun ye Zanayi ye. Zanayi facɛ tun ye Yusufu ye.

²⁵Yusufu facɛ tun ye Matatiyasi ye. Matatiyasi facɛ tun ye Amɔsi ye. Amɔsi facɛ tun ye Nahɔmu ye. Nahɔmu facɛ tun ye Ɛsili ye. Ɛsili facɛ tun ye Nagayi ye.

²⁶Nagayi facɛ tun ye Maati ye. Maati facɛ tun ye Matatiyasi ye. Matatiyasi facɛ tun ye Semeyini ye. Semeyini facɛ tun ye Yosɛsi ye, Yosɛsi facɛ tun ye Yoda ye.

²⁷Yoda facɛ tun ye Yowanan ye. Yowanan facɛ tun ye Resa ye. Resa facɛ tun ye Zorobabɛli ye. Zorobabɛli facɛ tun ye Salatiyɛli ye. Salatiyɛli facɛ tun ye Nɛri ye.

²⁸Nɛri facɛ tun ye Mɛlɛki ye. Mɛlɛki facɛ tun ye Adi ye. Adi facɛ tun ye Kosamu ye. Kosamu facɛ tun ye Elimada ye. Elimada facɛ tun ye Ɛri ye.

²⁹Ɛri facɛ tun ye Yesu [1] ye. Yesu facɛ tun ye Eliyezɛri ye. Eliyezɛri facɛ tun ye Yorimu ye. Yorimu facɛ tun ye Matati ye. Matati facɛ tun ye Levi ye.

³⁰Levi facɛ tun ye Simeyɔn ye. Simeyɔn facɛ tun ye Zuda ye. Zuda facɛ tun ye Yusufu ye. Yusufu facɛ tun ye Yonamu ye. Yonamu facɛ tun ye Eliyakimu ye.

³¹Eliyakimu facɛ tun ye Mɛliya ye. Mɛliya facɛ tun ye Mɛnna ye. Mɛnna facɛ tun ye Matata ye. Matata facɛ tun ye Natan ye. Natan facɛ tun ye Dawuda ye.

³²Dawuda facɛ tun ye Yese ye. Yese facɛ tun ye Obɛdi ye. Obɛdi facɛ tun ye Boozi ye. Boozi facɛ tun ye Salimɔn ye. Salimɔn facɛ tun ye Naasun ye.

³³Naasun facɛ tun ye Aminadabu ye. Aminadabu facɛ tun ye Adimɛn ye. Adimɛn facɛ tun ye Arini ye. Arini facɛ tun ye Esiromu ye. Esiromu facɛ tun ye Perɛsi ye. Perɛsi facɛ tun ye Zuda ye.

³⁴Zuda facɛ tun ye Yakuba ye. Yakuba facɛ tun ye Isiyaka ye. Isiyaka facɛ tun ye Iburahima ye. Iburahima facɛ tun ye Tera ye. Tera facɛ tun ye Nahɔri ye.

³⁵Nahɔri facɛ tun ye Serugi ye. Serugi facɛ tun ye Rehu ye. Rehu facɛ tun ye Pelɛgi ye. Pelɛgi facɛ tun ye Ebɛri ye. Ebɛri facɛ tun ye Sila ye.

³⁶Sila facɛ tun ye Kayinamu ye. Kayinamu facɛ tun ye Arifazadi ye. Arifazadi facɛ tun ye Sɛmu ye. Sɛmu facɛ tun ye Nuho ye. Nuho facɛ tun ye Lamɛki ye.

³⁷Lamɛki facɛ tun ye Metusala ye. Metusala facɛ tun ye Enɔki [2] ye. Enɔki facɛ tun ye Yɛrɛdi ye. Yɛrɛdi facɛ tun ye Malɛlɛli ye. Malɛlɛli facɛ tun ye Kayinamu ye.

³⁸Kayinamu facɛ tun ye Enɔsi ye. Enɔsi facɛ tun ye Sɛti ye. Sɛti facɛ tun ye Adama ye. Ala le ka Adama dan.