Read Jula Sariya fɔko flanan kitabu 32 Bible Online

Sariya fɔko flanan kitabu 32 - Jula bible

Sariya fɔko flanan kitabu 32

¹Sankolo, i toro malɔ, ne bɛna kuma; dugukolo, ne darakan lamɛn.

²Ne ta lɔnniyakumaw ye jigi i ko sanji, ne ta darakan ye bɔ i ko gɔmiji, i ko sanji ji min bɛ ben binkura kan, i ko sanjiba min bɛ ben bin nuguninw kan.

³Sabu ne bɛna Matigi Ala tɔgɔ fɔ, janko bɛɛ y’a mɛn; bɛɛ ye an ta Ala tando a tɔgɔ bonya kosɔn!

⁴Ale le ye an ta barakatigi ye, a ta kɛwale bɛɛ dafanin lo; a ta siraw bɛɛ terennin lo. Ala kankelentigi lo, a tɛ ko bɛnbari si kɛ; a terennin lo, cantigi Ala lo.

⁵Nka aw le ma teren Ala ye; o kosɔn aw tɛ Ala ta mɔgɔw ye tuun. O maroya le bɛ aw kan, aw mɔgɔ hakirintanw, aw mɔgɔlafiribagaw!

⁶Aw siya naloman, siya hakirintan, aw bɛ se ka nin ko kɛ Ala ra cogo di? Ale le tɛ aw Fa ni aw danbaga ye wa? Ale le ma aw dan, ka baraka don aw ra wa?

⁷Aw ye miiri fɔlɔfɔlɔ wagatiw ra, aw ye miiri wagatijan tɛmɛninw na. Aw ye aw bɛmaw ɲininka, olugu bɛna o kow fɔ aw ye; aw ye cɛkɔrɔbaw ɲininka, olugu bɛna a ɲafɔ aw ye.

⁸Wagati min na Ala kɔrɔtaninba ka dunuɲa jamanaw taran adamadenw na, ka mɔgɔw janjan dugukolo yɔrɔ bɛɛ ra, a ka bɛɛ ta jamana dan yira; a ka yɔrɔ dɔ bla Izirayɛlimɔgɔw ye ka kaɲa ni o hakɛya ye;

⁹sabu Matigi Ala ninyɔrɔ ye a yɛrɛ ta mɔgɔw le ye. Yakuba ta mɔgɔw [1] le ye a ta ye.

¹⁰Matigi Ala ka Izirayɛlimɔgɔw sɔrɔ kongokolon le kɔnɔ, yɔrɔ lakolon dɔ ra yi, kongowuruw kasitɔw cɛ ra yi. A ka o mara, k’a janto o ra, ka o kɔrɔsi, i ko mɔgɔ b’a ɲakisɛ kɔrɔsi cogo min na,

¹¹i ko bɔn bɛ a kamanw lamaga cogo min na a ta denw kunna, janko ka o labɔ ɲaga kɔnɔ; o jigitɔ a b’a kaman yangan, ka o ta ka o la a kamansiw kan.

¹²Matigi Ala kelenpe le tagara ni a ta mɔgɔw ye; ala wɛrɛ si tun tɛ ni a ye k’a dɛmɛ.

¹³A tagara o layɛlɛn jamana kuruyɔrɔw ra, ka o baro ni jamana yiridenw ye. A ka li bɔ faraw cɛ ra k’a di o ma; ka oliviyesunw falen faragbɛlɛnw na ka o turu di o ma.

¹⁴O ka misiw ni sagaw ta nɔnɔ min, k’a nare domu. O ka sagadenw, ani Basan sagajigiw, ani bakɔrɔninw sogo yɔrɔɲumanw domu; o ka mugu tɛntɛnnin ɲumanmanw kɛ o baro ye, ka o ta rɛzɛnmɔ ɲumanmanw ji min.

¹⁵Nka Yesurun [2] fara fɔ ka tɔrɔ minkɛ, a murutira. O fara, ka bonya, ka tɔrɔ minkɛ, o bɔra o danbaga Ala kɔ; o ka o kɔ di o ta barakatigi ma, min kɛra o kisibaga ye.

¹⁶O ka siya wɛrɛw ta alaw bato, k’a to Ala dimina, sabu o ka ale ni ala wɛrɛw kɛ kelen ye; o ka o ko haramuninw kɛ, k’a ta dimi lawuri.

¹⁷O ka sarakaw bɔ jinaw ye, o minw tɛ Ala ye. O ka ala wɛrɛw bato, o tun ma minw lɔn kakɔrɔ; ala minw bɔra kura ye, o bɛmaw tun ma deri ka minw bato.

¹⁸Aw ta barakatigi Ala min baraka ra aw worora, aw bɔra o le kɔ! Ala min baraka ra aw worora, aw ɲinana o le kɔ!

¹⁹Ayiwa, Matigi Ala k’a ye ten minkɛ, a banna o ra, sabu minw ye a dencɛw ni a denmusow ye, olugu k’a ta dimi lawuri.

²⁰A ko: «Ne tɛna ne janto o ra tuun! Ne bɛna a flɛ o laban bɛna kɛ min ye; sabu kumayɛlɛmabagaw lo, mɔgɔ kankelentigiw tɛ.

²¹Fɛn minw tɛ Ala ye, o ka ne ni olugu kɛ kelen ye, k’a to ne dimina. O ka o ta batofɛn gbansanw le bato, fɔ ka ne jusu bɔ. O kosɔn siya min tɛ siya ɲanaman ye, ne bɛna o ɲangboya don o ra; ne bɛna siya hakirintan dɔ le ta, janko ka dimi don o ra.

²²Sabu ne ta dimi wurira, ka mana i ko tasuma; a tasuma bɛ jɛni ka se fɔ lahara; a bɛ dugukolo ni a simanw bɛɛ jɛni, ka kuruw jɛni fɔ o jukɔrɔyɔrɔw ra.

²³Ne bɛna kojuguw caya o kan, ka ne ta biɲɛw bɛɛ kɛ ka o bon.

²⁴Ne bɛna kɔngɔ ben o kan, fɔ ka o baraka ban; ka farigban ni banajuguw bla o ra fɔ ka o faga. Ne bɛna kongowaraw bla o cɛ ra, o ye o kin, ka sajuguw bla o cɛ ra fana, o ye o kin.

²⁵Mɔgɔw bɛna o ta denw faga ni kɛrɛkɛmuru ye kɛnɛ ma, ka o kɛ denntan ye. Ka o to o ta bonw kɔnɔ fana, jatigɛ bɛna kɛ o ra. O bɛna kanbelenw ni sunguruw faga, ka denɲɛninw ni cɛkɔrɔba sigbɛtigiw bɛɛ faga.

²⁶«Ne tun b’a fɛ ka o janjan, ka o lataga fɔ yɔrɔjanw na; k’a to mɔgɔw bɛɛ hakiri ye bɔ o kɔ pewu.

²⁷Nka ne siranna o juguw kosɔn; olugu kana na o yɛrɛ bonya, k’a fɔ ko: Anw yɛrɛ baraka le sera o ra, nin bɛɛ tɛ Matigi Ala nɔ ye.

²⁸«Ayiwa, Izirayɛlimɔgɔw ye siya naloman le ye, hakiri tɛ o fɛ ka ko faamu.

²⁹E, ni hakiri le tun bɛ o fɛ, o tun bɛna a faamu, o laban bɛna kɛ min ye o tun bɛna o lɔn!

³⁰Cɛ kelenpe bɛ kɛ cogo di ka Izirayɛli cɛ waga kelen gbɛn? Cɛ fla dɔrɔn bɛ kɛ cogo di ka Izirayɛli cɛ waga tan labori? Ni a ma kɛ ko Izirayɛli ta Barakatigi le ka o labla o ye, ni a ma kɛ ko Matigi Ala le ka o don o boro?

³¹Sabu o juguw yɛrɛ k’a lɔn ko min ye olugu ta barakatigi ye, o tɛ i n’a fɔ Izirayɛli ta Barakatigi.

³²Olugu bɛ i n’a fɔ Sodɔmu ta mɔgɔw, o bɛ i n’a fɔ Gomɔri ta mɔgɔw; o bɛ i n’a fɔ baga bɛ rɛzɛnsun min denw na, i n’a fɔ rɛzɛn min denw ka kuna.

³³O ta rɛzɛnji bɛ i ko sa baga, a bɛ i ko fɔnfɔnnin min baga bɛ mɔgɔ faga.

³⁴«Ne ka ko dɔ labɛn dogo ra; ne ka ko min dogo k’a mara yi, o flɛ:

³⁵Ni aw juguw benlon nana se, ne le bɛna aw hakɛ bɔ o ra, ka o ta kojugu juru sara. Kojugu bɛna ben o kan lon min na, o lon tɔ man jan tuun; o halakilon bɛ nana yi.

³⁶«Matigi Ala bɛna a ta mɔgɔw ta kiti tigɛ, a bɛna makari a ta jɔnw na, ni a nana a ye ko o bɛɛ baraka banna, jɔn fara hɔrɔn kan.

³⁷A bɛna a fɔ o ma ko: Aw ta alaw bɛ min sisan? Aw tun bɛ aw yɛrɛ karifara ala barakatigi minw ma, o bɛ min?

³⁸Aw tun bɛ aw ta sarakaw fagara, k’a sogo yɔrɔɲumanw di ala minw ma, olugu bɛ min? Aw tun bɛ aw ta rɛzɛnji sarakaw bɔra k’a di ala minw ma, olugu bɛ min? Ayiwa, o ye wuri ka aw kisi sa! O ye wuri ka aw tanga!

³⁹«Aw y’a lɔn ko ne, ne kelenpe le ye Ala ye, Ala wɛrɛ tɛ yi ne kɔ. Ne le bɛ nin don mɔgɔ ra, ne le fana bɛ nin bɔ mɔgɔ ra; ne le bɛ mɔgɔ bana, ne le bɛ mɔgɔ kɛnɛya. Mɔgɔ si tɛ se ka mɔgɔ kisi ka bɔ ne boro.

⁴⁰Ne bɛ ne boro kɔrɔta san fɛ, ka kari, ko sigiya t’a ra, ne le ye Ala ɲanaman ye wagati bɛɛ.

⁴¹Ni ne nana ne ta kɛrɛkɛmuru dabɔ, fɔ a bɛ manamana, ni ne boro nana kɛrɛkɛmuru mina mɔgɔw kama, o tuma ne bɛna ne dimibɔ ne juguw bɛɛ ra, ka ne kɔninyabagaw bɛɛ ta kɛwalew hakɛ bɔ o ra.

⁴²Ne ta biɲɛw bɛna o bɛɛ jori min fɔ ka fa; mɔgɔ mandimininw jori, ani mɔgɔ minaninw jori. Ne ta kɛrɛkɛmuru bɛna ne juguw sogo domu, ka ne juguw ta kuntigiw bɛɛ kun tigɛ.»

⁴³Ayiwa, aw siya wɛrɛ mɔgɔw, aw ye ɲagari ni Ala ta mɔgɔw ye! Sabu Matigi Ala bɛ a ta jɔnw dimibɔ o fagabagaw ra, k’a yɛrɛ mɔnɛbɔ a juguw bɛɛ ra, k’a ta jamana ni a ta mɔgɔw ta jurumunw kafari.

⁴⁴Ayiwa, Musa ni Nuni dencɛ Yosuwe ka nin dɔnkiri kumaw bɛɛ fɔ Izirayɛlimɔgɔw ɲa na.

⁴⁵Musa ka nin kumaw bɛɛ fɔ Izirayɛlimɔgɔw bɛɛ ye ka ban tuma min na,

⁴⁶a k’a fɔ o ye ko: «Ne ka nin kuma minw bɛɛ fɔ aw ye bi Ala ɲa kɔrɔ, aw ye aw hakiri to o ra kosɛbɛ, ka aw denw karan a ra, janko o ye nin sariya ta kumaw bɛɛ sira tagama k’a dafa a cogo ra.

⁴⁷«Aw kana nin kumaw jate k’a kɛ kuma gbansan dɔrɔn ye dɛ! Nin kumaw le bɛna si di aw ma; sabu aw bɛna Zuridɛn ba tigɛ ka taga jamana min mina, nin kumaw le sababu ra aw bɛna sijan sɔrɔ o jamana ra.»

⁴⁸O lon kelen na, Matigi Ala k’a fɔ Musa ye ko:

⁴⁹«Wuri ka yɛlɛn Abarimu kuruw kan, ka taga se fɔ Nebo kuru kunna, Mohabu jamana ra, Zeriko dugu ɲa fɛ, ka Kanaana jamana flɛ; ne bɛna o jamana le di Izirayɛlimɔgɔw ma k’a kɛ o ta ye.

⁵⁰I bɛna yɛlɛn o kuru min kan, i bɛna sa o yɔrɔ le ra, ka taga fara i bɛmaw kan, i n’a fɔ i kɔrɔcɛ Haruna sara Hɔri kuru kan cogo min na, ka taga fara a bɛmaw kan;

⁵¹sabu ka aw to Meriba ta ji yɔrɔ ra, min bɛ Kadɛsi, Zini kongokolon kɔnɔ, aw ma la ne ra ka ne kan mina Izirayɛlimɔgɔw ɲa na; aw ma ne bonya ne ta saninmanya kosɔn Izirayɛlimɔgɔw ɲa na.

⁵²O ra ne bɛna o jamana min di Izirayɛlimɔgɔw ma, i bɛna to yɔrɔjan le dɔrɔn ka o jamana ye i ɲa ra, nka i yɛrɛ tɛna don a ra.»