Read Jula Kititigɛbagaw ta kitabu 5 Bible Online

Kititigɛbagaw ta kitabu 5 - Jula bible

Kititigɛbagaw ta kitabu 5

¹O lon na, Debora ka nin dɔnkiri la, ale ni Abinohamu dencɛ Baraki. O ko:

²«E, an bɛɛ ye Matigi Ala tando! Izirayɛlimɔgɔw kuntigiw sɔnna ka bla o ɲa; Izirayɛlimɔgɔw fana sɔnna ka taga ni o ye kɛrɛ ra.

³Masacɛw, aw ye nin lamɛn, kuntigiw, aw ye aw toro malɔ! Ne bɛna dɔnkiri la, ɔnhɔn, ne bɛna dɔnkiri la Matigi Ala ye; ne bɛna Alatandodɔnkiriw la Matigi Ala, Izirayɛli ta Ala ye.

⁴Lon min Matigi Ala bɔra Seyiri, lon min na a bɔra Edɔmu mara ra, dugukolo yɛrɛyɛrɛra; sankolo bɛɛ kɛra ji ye, sankabaw bɛɛ kɛra ji ye.

⁵Kuruw yɛrɛyɛrɛra Matigi Ala ɲa kɔrɔ, Sinayi kuru ta Ala; o yɛrɛyɛrɛra Matigi Ala, Izirayɛli ta Ala ɲa kɔrɔ.

⁶Anati dencɛ Samugari ta wagatiw ra, Yahɛli ta tere ra, mɔgɔ si tun tɛ tɛmɛ sirabaw kan; dugutagabagaw tun bɛ tɛmɛ sira dogoninw le fɛ.

⁷Baraka foyi tun tɛ Izirayɛli kuntigiw si ra tuun; baraka foyi le tun tɛ o ra, fɔ lon min na, ne wurira, ne Debora; ne wurira ka kɛ Izirayɛlimɔgɔw bamuso ye.

⁸O tun bɛ batofɛnkuraw le bato; o kosɔn o juguw nana o kɛrɛ o ta dugu dondaw ra. I tun bɛ cɛ waga binaani jate Izirayɛlimɔgɔw cɛ ra, i tɛ nɛgɛbɛnnan, walama taman sɔrɔ o si fɛ.

⁹Nka bi, Izirayɛli kuntigiw, ne bɛ ni aw le ye, aw minw sɔnna ka bɔ mɔgɔw cɛ ra ka taga kɛrɛ ra. Aw ye Matigi Ala tando!

¹⁰Aw minw bɛ yɛlɛn falimuso gbɛmanw kan, ka sigi fani dawulamanw kan; aw minw bɛ tagama siraw kan, aw ye miiri nin na!

¹¹«Jitabaga minw bɛ dɔnkiri la kɔlɔndaw ra, olugu bɛ Matigi Ala ta koɲumanw lakari, a ka koɲuman minw kɛ Izirayɛli kuntigiw ye; o tuma ra, mɔgɔw ka dugu dondaw sira ta.

¹²I kunu, i kunu, Debora! I kunu, i kunu ka dɔnkiri kelen la! Baraki, i wuri ka taga ni i ta jɔn minaninw ye! E, Abinohamu dencɛ!

¹³Mɔgɔ dama minw tun tora, olugu tagara se sɔrɔ fangatigiw kan; Matigi Ala ka se di an ma, an ka se sɔrɔ cɛfariw kan.

¹⁴Efirayimu ta mɔgɔw nana ka bɔ Amalɛki ta jamana ra, Boniyaminu ta mɔgɔw nana fara o kan. Kuntigi dɔw fana bɔra Makiri, ɲamɔgɔ dɔw nana ka bɔ Zabulɔn.

¹⁵Isakari ta kuntigiw nana fara Debora kan, Isakari ta mɔgɔw farara Baraki kan; o girinna ka bɔ ka taga a fɛ kɛnɛgbɛ ra. «Nka Rubɛn ta mɔgɔw sigiyara; o ka ɲɔgɔn sɔsɔ ka mɛɛn.

¹⁶Mun kosɔn aw tora wɛrɛw kɔrɔ yi, ka to ka sagakasikanw lamɛn sa? Can ra, Rubɛn ta mɔgɔw sigiyara; o ka ɲɔgɔn sɔsɔ ka mɛɛn.

¹⁷Galadi ta mɔgɔw tora Zuridɛn terebɔyanfan na. Mun kosɔn Dan ta mɔgɔw fana tora o ta jirakurunw kɔrɔ? Asɛri ta mɔgɔw fana siginin tora kɔgɔjida ra; o tora o ta kurunlɔyɔrɔw ra.

¹⁸Zabulɔn ta mɔgɔw le ma siran saya ɲa; Nɛfitali ta mɔgɔw fana tagara fɔ kɛrɛkɛyɔrɔ sanfɛyɔrɔ ra.

¹⁹Masacɛ dɔw nana, ka na kɛrɛ kɛ; Kanaana masacɛ dɔw nana kɛrɛ kɛ Tanaki yɔrɔ kɔrɔ, Megido kɔda ra, nka o ma mɔgɔ si ta borofɛn sɔrɔ, o ma warigbɛ sɔrɔ.

²⁰Lolow tora sankolo ra ka kɛrɛ kɛ, o tɛmɛtɔ o ta siraw kan, o ka Sisera kɛrɛ.

²¹Kisɔn kɔji ka o bɛɛ ta, o kɔ min bɛ woyo kabini fɔlɔfɔlɔ, Kisɔn kɔ ji. Aw ye taga, ka taga cɛfariw kɛrɛ!

²²«E, o ta sow senw bɛ dugukolo gbasi ni baraka ye! O bɛ bori, ka bori i ko socɛ barakamanw!

²³Aw ye Merozi dugu danga, Matigi Ala ta mɛlɛkɛ le ko ten. Aw ye a danga, aw ye a dugumɔgɔw bɛɛ danga! Sabu o ma sɔn ka na Matigi Ala dɛmɛ, o ma sɔn ka fara cɛfariw kan ka Matigi Ala dɛmɛ.

²⁴Aw ye Yahɛli le tando ka tɛmɛ musow bɛɛ kan, Kenikacɛ Hebɛri ta muso kɔni. Muso minw bɛ sigi fanibonw kɔnɔ, aw ye a tando ka tɛmɛ olugu bɛɛ kan.

²⁵Sisera ka ji daari a fɛ, a ka nɔnɔ di a ma. A ka nɔnɔ narelaman di a ma minan ɲanaman dɔ kɔnɔ.

²⁶A ka nɛgɛbere mina a boro kelen na, ka baaradenw ta nɛgɛkuru mina ni a kininboro ye; ka bere turu Sisera kun na, k’a kun sɔgɔ; a k’a taman sɔgɔ k’a cɛci.

²⁷Sisera kurura Yahɛli sen kɔrɔ; a benna ka la yi. A kurura a sen kɔrɔ, a benna; a kurura yɔrɔ min na, a benna ka sa yi.

²⁸I b’a sɔrɔ Sisera bamuso bɛ so, a bɛ flɛri kɛra finɛtiriwow fɛ, k’a fɔ ko: ‹Mun le kosɔn a ta sowotoro mɛɛnna tan bi? Mun le kosɔn o ta sowotorow sumayara tan?›

²⁹A tɔɲɔgɔnmusow bɛɛ ra hakiritigiw ka min fɔ, a fana bɛ o le fɔra a yɛrɛ kɔnɔ, ko:

³⁰‹O ka fɛn minw mina o juguw boro, a bɛ o le taranna! Cɛ bɛɛ kelen kelen ta sunguru kelen, walama fla; faniɲuman ɲɛgɛnɲɛgɛnmanw ye Sisera ta ye; faniɲuman ɲɛgɛnɲɛgɛnman sɔgɔninw, faniɲuman ɲɛgɛnɲɛgɛnman kelen, fani sɔgɔnin fla, o bɛ don sesɔrɔbaga kan na.›

³¹«E, Matigi Ala, i juguw bɛɛ ye halaki nin cogo ra! Nka minw bɛ i kanu, olugu ye manamana i ko tere bɛ manamana cogo min na teregban fɛ.» Ayiwa, o kɔ, Izirayɛli jamana tora ɲasuma ra, fɔ san binaani.