Read ebira Oyinyima 14 Bible Online

Oyinyima 14 - ebira bible

Oyinyima 14

¹Ịnị ụmẹ ọnya â nyị ohinọyị ẹẹna ẹnyị aanị. Ẹnịnị ẹ vị Amịrahwẹrị ohinọyị Ịbabịrọnị, Ariyoki ohinọyị ẹkụra Erasa, Ikedoromeri ana vị ohinọyị ẹkụra Erami ne beri Itidari ana vị ohinọyị anẹkụra Igoyimi.

²Ẹkụhị ọnya di ohinọyị ẹẹna ẹnẹẹ vabẹ dị ẹ kụ́ ịrẹkụ ne tù ohinọyị ẹẹhị ọsa nị. Ohinọyị ẹẹhị ẹnẹẹ ẹ vị Ibera ohinọyị Isodọmị, Ibirisa ohinọyị Igomora, Isinabi ohinọyị Adima, Isemeberi ohinọyị Izeboyimi ne beri ohinọyị Ibera. Ibera a rẹẹ̄ hị́ Izowa.

³Ohinọyị ẹẹhị ẹnẹnị ẹnị ẹ rẹ vabẹ ini ozi ana aā hị́ Isidimi nị ịzọọ ọ kụkụ aa hị́ òkū anọ-anọ nị.

⁴Ohinọyị ẹẹhị ẹnẹnị ệ vịdị hẹkẹ ohinọyị ana aā hị́ Ikedoromeri mẹ ịrayị ẹwụrẹva. Ịnị ana tụ́ ọ ịrayị ẹwụrẹta dị ẹ ka ẹnị ẹ yị kụkụ hẹkẹ ẹ nị.

⁵Ịnị ana tụ́ ọ ịrayị ẹwụrẹna, di Ikedorayoma ana vị ohinọyị ne beri ohinọyị ana vọ ọnị ọnịrịị vabẹ kụ́ ọkụrẹkụ ẹnịnị, dị ẹ na rị Irehwayimi ene hi ịnị ẹtẹ Asiterọtị-Ikanayimi ọnịrị Izuzimi ene hi ịnị ẹtẹ Ihami beri Emimi ene hi Ịsavẹ-Ikiriyatayimi.

⁶Ẹ rẹ rị Anihori ịnị ataba ịda ẹnịnị ana aā hị́ Ataba Ịsẹyị huu na ngụ Eriparani ana na gụrị ịnị ụnọmị.

⁷Dị ẹ vavọọ vavẹ dị ẹ va ngụ Enisipati ana aā hị́ Ikadesi, dị ẹ vavọọ rị ẹtẹ Anamarẹkị ọnịrị Anamọrị ana ra hi Ihazazoni Ịtama.

⁸Di Ohinọyị Anisodọmị ọnịrị ohinọyị Anigomora ne beri ohinọyị Anibera ana a rẹẹ̄ hị́ Izowa ẹnị rẹ kụ́ ịrẹkụ ẹnịnị di ẹ yaa nọ Isidimi nị. Aza ene e ne

⁹pè kụ̀ ịrẹkụ yị: Ikedoromeri ohinọyị Anerami, Itidari ohinọyị Igoyimi, Amịrahwẹrị ohinọyị Ịbabịrọnị ne beri Ariyoki ohinọyị Erasari. Ohinọyị ẹẹna ee pè ohinọyị ẹẹhị kụ̀ ịrẹkụ avọọ nị.

¹⁰Ini ozi ana aā hị́ Isidimi ịzị ẹ yà aa kụ̀ ịrẹkụ aanị, ọ̀dà dụmẹ-dụmẹ vị ana gwẹtẹ ini imisi ene hi ịzọọ. Óhinọyị Anisodọmị ọnịrị ohinọyị Anigomora mèe zwe, dị ẹ na ngụ imisi ẹnẹẹ dị ẹnị ana vọ sị zwe nọ ịnị ataba nị.

¹¹Dị ọnịvị ẹnịnị hàrà ogu Anisodọmị ọnịrị Anigomora, dị ẹ rẹ kụ́ ịsọyịrị ẹnịnị di e si hu nị.

¹²Aza ẹnẹẹ ẹ rẹ za Ịrọọtị ozi ọyịnyara Abụramị ana ra Isodọmị, dị ẹ kụ́ ogu anị vaka a dị ẹ yaa na nị.

¹³Dị ọza ịnya ana vụrị há ịnị ịrẹkụ ọnọọ va kà a yị Abụramị Anihiburu ọnọọ nị. Ịjọnọọ Abụramị ọnị vị ana ra ọgụrị ọchị aroni. Imamire Anamọrị ọ nyị ọchị ẹnẹẹ nị. Imamire ọnịrị ẹyịnyara anị ana aā hị́ Esikori ọnịrị Aneri ẹnị vị ogu Abụramị.

¹⁴Abụramị mẹ̀ maanị wụ́ ka a raà za ozi ọyịnyara anị ịnị ịrẹkụ dị ọ kụ́ aza anị ọnị ọ raà zụ eyi ịrẹkụ dị ọ kụ́ wa aa na nị. Aza ẹnẹẹ vị ana a ma ini eehi ịda anị. Ẹnịnị vị ịrẹkẹẹchẹhị tụra ẹwụrịhịnta. (318) Dị ẹ dị ụ aza ẹnẹẹ huu na ngụ Ịdaanị nị.

¹⁵O mè tụ́ ịzọọ, ịjị ẹtẹ si hozi dị ọ gà ezi ahụ anị dị e pè aza ẹnẹẹ kụ̀ ịrẹkụ, dị ọ rị wa nị. Dị ọ dị ụ wa na huu na ngụ Ihoba eyi ẹbẹẹba Ịdamasịkọsị.

¹⁶Dị ọ dọ avaba ogu ọnị ọnịvị ẹnẹẹ kụ́ vavẹ nị. Ọ rẹ sị Ịrọọtị ozi ọyịnyara anị beri ogu anị ọnịrị anyẹnẹẹ beri aza ana vọ ana a vịdị za.

¹⁷Abụramị mẹ̀ và hụrị ịrẹkụ aa vẹ ẹ mẹ̀ si Ikedoromeri huna, di ohinọyị Anisodọmị na gẹrị ọ ini ozi ana aā hị́ Ịsavẹ nị (ọnị ọ vị ka ini ozi ohinọyị).

¹⁸Di Imerikizẹdẹkị ohinọyị ẹkụra Ịsarẹmị ọnị rẹ vẹ nị. Ọnị vị ohirẹsụ irehi Ohomorihi ana nẹba hu keekere. Ộ za ịbụrẹẹdị ọnịrị eche.

¹⁹Dị ọ mẹ̀ aduwa yi Abụramị dị ọ ka, “Ohomorihi ọgọdọgọdọ ọnị ụvọ ọza è yi mè tù ana mẹ ẹbẹẹba ọnịrị ẹhẹ ọ̀ navọ ó zee yị Abụramị.

²⁰Ohomorihi ana nẹba hu keekere ana mẹ ka ò huna ọnịvị anị aanị vị ana aza vaa gā.” Dị Abụramị sị agẹẹwụ avaba ịsa ọnị ọ kụ́ aa vẹ dị ọ sị yọ nị.

²¹Di ohinọyị Anisodọmị kà a yi Abụramị dị ọ ka, “Sị aza mị, dị wa kụ́ ogu ẹnịnị.”

²²Dị Abụramị ka: Eyiye, ọnị ộ vịdị raà sị́ Ẹnẹyịmavara Ohomorihi ana nẹba hu keekere ana mẹ ẹbẹẹba ọnịrị ẹhẹ hị́ eku,

²³ka ọnị ẹ yị vaa sị owu ihihine ọnya àa vị obo adava. Ọ kà a yị nyị ịsa anị ikonya ọnị ọnị aa sị. Ọ kà ọ yị va naa kà a ka ọnị mẹ ka Abụramị ọ̀ nyị ụbanyị nị.

²⁴Ọ kà a yi nyị ịsị ọnị aa sị, à yị vị ịsa ana ozwọọmụha ẹnịnị sị rị ọnịrị ịsa ene tù ogu ẹẹta ana saasa ọnị aanị. Ọ kà ọ navọ Aneri ọnịrị Esikori ne beri Imamire ẹ̀ kụ́ ene èe tù wa.