Read ebira Oyinyima 15 Bible Online

Oyinyima 15 - ebira bible

Oyinyima 15

¹Ịjị ịrẹyị ẹnẹnị ta, di Abụramị re ẹtẹ ẹkụhị ọnya nị. Di Ẹnẹyịmavara va kà a yọ ịnị ẹtẹ ọnọọ dị ọ ka, “Abụramị, asị u hí angwa. Ọ kà ọnị ọ yị vaa zẹẹ ka ịsa odivi ò tù ọ, ọgụ ọnị ọnị vaa sị yọ vaa banyị

²Dị Abụramị ka Ẹnẹyịmavara Ohomorihi sị ọnị vị ana aa kụ́ ogu ẹnẹẹ mẹ? Ọ kà ô re ka ọnị ọ yị ma ozi. Eriyaza Anịdamasịkọsị ọnọnị ọ vaa kụ́ ogu anị aanị nị.

³Dị Abụramị rẹ kà Ẹnẹyịmavara ộ yẹ ka ọnị ẹ yị sị ozi yị ọnị ma. Ọrịhị ana a ma yị ọnị aa vaa kụ́ ogu anị aanị nị.”

⁴Di Ẹnẹyịmavara va kà a yị Abụramị dị ọ ka, “Ọnọrụ ọnọọ ọ yị vaa kụ́ ogu awụ; ozi ewu obooro ọ vaa kụ́ ogu awụ nị.”

⁵Di Ohomorihi sị Abụramị jịnẹ nọ ẹhẹ dị ọ kà a yọ ka: Ò Re ẹbẹẹba di a re, ọ̀ọ zụ za ụzọmị ẹnẹẹ ịrịka ọ za a. Dị ọ rẹ kà a yọ ka avọọ ezi anị ịrẹma-ịrẹma mẹ̀ vaa rụrụ nị.

⁶Abụramị ọ sị ayị anị tụra Ẹnẹyịmavara vavọọ vaa mẹ̀ ẹ nị. Di Ẹnẹyịmavara kà Abụramị mẹ̀ vavọọ dọ aanị, ọnịzẹyịza ọ vị nị.

⁷Di Ohomorihi re kà a yị Abụramị dị ọ ka: Ọnị vị Ẹnẹyịmavara ana sị ọ hụrẹ ẹkụra Ọọrị ịnị ẹtẹ Anikaridi vẹ ka ọnị ọ̀ va sị ẹtẹ ọnọnị yị ọ dị ọ̀ kụkụ vị aanị nị.

⁸Dị Abụramị ka: Ẹnẹyịmavara ana nyị mị ọnị mẹmẹ vaa yẹ ka ọnị ọ vaa nyị ẹtẹ ọnọnị nị?

⁹Di Ohomorihi kà a yị Abụramị dị ọ ka: Ọ̀ Sị imaaru ọnya ana vị ịrayị ẹẹta, ọnịrị ọnyị ẹvụ ana vị ịrayị ẹẹta ne beri ịdẹba ịrayị ẹẹta ọnịrị arekuku beri ozi arekuku dị ọ̀ kụ́ ọ va yị ọnị.

¹⁰Ịzẹyịza dị Abụramị vavọọ kụ́ ọ va yọ nị. Ọ mẹ̀ kụ́ ọ vẹ dị ọ há wa ẹvẹẹva, dị ọ kụ́ ahẹva-ahẹva ọzọza và eyi kà ẹngụ nị. Ama ọ yị há inomi ẹnẹẹ ẹẹva.

¹¹Ịjị ụba ee gono uye ẹnẹẹ, dị Abụramị dụ wa nị.

¹²Ọ́yị maa naa ngụ ẹtẹ, dị ara ụtọ aa dọ Abụramị nị. Kẹnẹ dị angwa ee hi Abụramị ẹtẹẹtẹrẹ di ivóvò sị ọ za nị.

¹³Dị Ẹnẹyịmavara va kà a yị Abụramị dị ọ ka: Ọnị ee sì ka ọ yẹ kaakara ka ezi anị ịrẹma-ịrẹma va naa vị ọzọga ịnị ẹtẹ ẹnẹ ẹ̀ yị vị ẹtẹ ẹnịnị. Ẹ vaa vị ọrịhịị tụ́ ịzọọ dị aa mẹ ẹvayaa yị wa pooro dị ọ mẹ ịrayị akava.

¹⁴Ama ọnị vaa mẹ̀ ọkarẹyị yị anẹkụra ẹnị ẹ vavọọ vaa hẹkẹ anka ọrịhị. Ịrẹma ọnọọ di ezi ewu jịnẹ hụụnị ẹkụra ọnọọ dị ẹ hara ogu za.

¹⁵Ọ kà ọnị ụvọta vee kú orubo ẹtẹẹrẹ di ò ve sú ịnị ẹngwọọrọ di e ne e.

¹⁶Ọ rẹ ka ẹ vaa mẹ ẹhụụ ịrayị akava avọọ dị ẹ vavẹ ịzẹnị, agụvị ka Anamọrị nịnị ệ yị za ebira odivi ẹnịnị ịrẹsụ ne tụ̀ ụmẹ avọọ.

¹⁷Ịjị ọyị sị ngụ ẹtẹ, dị ẹtẹ si hozi, di o vene re ka ụgụga ana nyị ịra ọnịrị ọchị ene e si hū ịra ệ zi oze ịnị akakana uye ẹnẹẹ aa parahu nị.

¹⁸Ịhị ọnọọ Ẹnẹyịmavara ô pè Abụramị kà ịrẹyị tịtẹ dị ọ kà a yọ ka: Ezi anị ịrẹma-ịrẹma ọnị sị ẹtẹ ọnọnịị yị nị. Ẹnị ẹ nyị hụrẹ ụtọ okuha ana ya ẹhwị Ijipiti na ngụ irehu Iyuhwuretisi nị, ẹnị ẹ nyị nị.

¹⁹Aza ana ra ịnị ẹtẹ ọnọọ booro aanị yị: Anikeeni, Anikenizi, Anikadimoni

²⁰Anihiti, Aniperizi, Anirehwayimi,

²¹Anamọrị, Anikenaani, Anigirigasi ne beri Anijebusi.