Read ebira Oyinyima 2 Bible Online

Oyinyima 2 - ebira bible

Oyinyima 2

¹Avọọ a mẹ tụ́ avaba ẹhẹ saka-saka dị ọ ta tụ́ nị.

²Ịhị ẹ tụ́ ọ ẹkụhị ịhịnọnyị, Ohomorihi ộ sị avaba ụkọrọ anị mẹ ta. Ịhị ẹ tụ ọ ẹkụhị ịhịmba Ọ yị kụkụ mẹ̀ ụkọrọ.

³Ohomorihi ka ẹkụhị ọhụhịmba vị ẹkụhị ọbanyị, dị ọ nyị ọ ẹkụhị ọ tụ́ irenyi nị, agụvị ka ịhị ọnọọ ẹhẹ ọọ ta a mẹ, dị ọ̀ yị kụkụ mẹ̀ ụkọrọ nị.

⁴Aani a mẹmẹ tụ́ avaba ẹhẹ vị nị. Ohomorihi ộ sị ọza ọnị ọ mẹ tụ́ ịnị Ụbazị Edẹnị. Ụmẹ ọnị Ẹnẹyịmavara Ohomorihi sị mẹ̀ ẹhẹ,

⁵ịnị ụmẹ ọnọọ ẹ yị nyị ọchị à vị avị ana chị tụ́ ịrẹsụ ẹtẹ, agụvị ka Ẹnẹyịmavara Ohomorihi ọ́ yị mẹ ka orihi ọ̀ zụ̀ụ hi ịnị ẹtẹ, ẹ yị rẹ nyị ọza ana vọrọ ka ọ̀ dà aarẹ tụ́ ịnị ẹhẹ.

⁶Ama enyi eteesū tụ́ iruvo vaa hịrẹ dị ọ mẹ ka avaba ẹtẹ ò hunẹnẹ.

⁷Di Ẹnẹyịmavara Ohomorihi va dà èzi hụụnị eteesu dị ọ sị mẹ ọza nị. Ịjị ọ sị ọ mẹ, dị ọ tụ́ ụhwẹ hi ọ aahị nị. Ịjọnọọ dị ọza ọnọọ kụkụ aa tụ́ ụhwẹ dị ọ yàra nị.

⁸Di Ẹnẹyịmavara Ohomorihi va dà ụbazị ọnya aanị tụ́ ịzị aā hị́ Edẹnị ózee ọnị ọyịị̄ zịị vẹ, dị ọ sị ọza ọnị ọ mẹ dị ọ sị tụ́ ịzọọ nị.

⁹Ẹnẹyịmavara Ohomorihi ộ mẹ̀ ka ọchị ozoza-ozoza irenyi-irenyi è nyị hi ịzọọ, dị ẹ̀ẹ tụ́ ẹtụtụ ozoza. Ịnị akakana ụbazị ọnọọ a rẹ nyị ọchị ẹnyị ana jẹẹ ịzọọ. Ọnya vị ọnị ẹtụtụ anịị̄ mẹ ka ọza ọ̀ yàra pooro, dị ẹtụtụ ọsaa mẹ ka eyi ọza ò hweyi tù ịsa ozoza ọnịrị ịsa odivi nị.

¹⁰A rẹ nyị okuha enee sìi hụrẹ Edẹnị. Okuha ọnọọ̄ mẹ ka ụbazị Edẹnị òo hunẹnẹ. Ọ mẹ sị para Edẹnị hu, dị ọ há hi okuha ẹẹna nị.

¹¹Ịpaapa aā hị́ okuha Ipisoni nị. Ô sì jesi kara ẹkụra ana aā hị́ Ihavira. Ịzọọ ộ nyị igooru obooro, eturare ozoza ọnịrị ịrẹta ozoza ana katarihi.

¹³Okuha ọhụva aā hị́ Igihoni nị. Oni ve ene sì jesi kara ẹkụra ana aā hị́ Ikusi.

¹⁴Okuha ọhụta aā hị́ Itigirisi, oni vi ene sì zi oze ọnị ọyịị̄ zịị vẹ ẹkụra Asiriya. Okuha ọhụna aā hị́ Iyuhwuretisi nị.

¹⁵Ẹnẹyịmavara Ohomorihi ộ sị ọza ọnọọ, dị ọ sị tụ́ ịnị ụbazị Edẹnị nị. Ọ kà òo tenyii hi ọ, di òo sere e.

¹⁶Di Ẹnẹyịmavara Ohomorihi va mẹ ọda yị ọza ọnọọ dị ọ ka, “Avaba ọchị ene hi ịnị ụbazị aanị, ẹnị ẹtụtụ anị òo zee wu eyi, wa nyẹngụ aa rị ọ.

¹⁷Ama we éē re ọchị anaā mẹ ka eyi ọza ò hweyi tù ịsa ozoza ọnịrị odivi aanị wẹ yị nyayịnẹ rị ẹtụtụ anị. Ịhị wàa rị ọ, ịhị ọnọọ u wee sù nị.”

¹⁸Di Ẹnẹyịmavara Ohomorihi va ka, “O yi zoza ka ọnọrụ ọnọọ ọ̀ vị ọnịnya. Maa mẹ ọnọgụvọ ọnya ene reri ọ yọ.”

¹⁹Ẹnẹyịmavara Ohomorihi ộ vịdị raà si ezi mẹ avaba uye ọnịrị inomi nịnị. Dị ọ kụ́ wa ve tù ọnọrụ ọnọọ ka ọnị ò re ịrẹha ọnị ọ vaa hị́ wa nị. Ịrẹha ọnị ọnọrụ ọnọọ ọọ hị́ uye ẹnẹẹ ọ vaa vị ịrẹha ẹnịnị nị.

²⁰Ọnọrụ ọnọọ ộ sị ịrẹha yị avaba uye ịnị avị ọnịrị ịsụpa ini eehi beri inomi nịnị. Ama ẹ yị nyị ikonya ini uye ẹnẹẹ ana rụra vị ọnọgụvọ yị ọnọrụ ọnọọ.

²¹Ẹnẹyịmavara Ohomorihi ộ mẹ̀ ka ara ụ̀tọ̀ ọ̀ dọ ọnọrụ ọnọọ nị. Ịjị aa sụ ara, dị ọ sị ẹchụkụ agịga anị ọnya, dị ọ sị uye kú ịzọọ nị.

²²Dị Ẹnẹyịmavara Ohomorihi sị agịga ọnọọ dị ọ sị mẹ ọnyẹnẹẹ ọnya nị. Dị ọ sị ọnẹẹ ọnọọ ve tù ọ nị.

²³Dị ọnọrụ ọnọọ ka: ịhịn dê, evere amị yị. Ẹchụkụ amị ọnịrị Ochẹtẹẹngụ amị ọ vị nị. Aamị ọ vị nị agụvị ka ịnị Ochẹtẹẹngụ amị a sị ọ hụrẹ nị. A vaa hị́ ọ ọnyẹnẹẹ agụvị ka ịnị ẹngụ ọnọrụ a sị ọ hụrẹ nị.

²⁴Agụvị avọọ ọnọrụụ̄ sịị navọ ada anị ọnịrị ọnyị anị, dị ọnịrị ose anị vabẹ, dị ẹ kụkụ sị vị ọnya nị.

²⁵Ịnị ụmẹ ọnọọ ọnọrụ ọnọọ ọnịrị ose anị vi ene hi ịnị ahwaahụ, ama ụhị ẹ yị nyị wa.