Read ebira Oyinyima 21 Bible Online

Oyinyima 21 - ebira bible

Oyinyima 21

¹Ẹnẹyịmavara ô nyị Isera iyi anka ọ mẹ̀ vịdị kà a. Ịsị ọ ka ọnị aa mẹẹ yọ dị ọ mẹ̀ ẹ yọ ịzẹyịza nị.

²Isera ô zyẹẹ, dị ọ ma ozi ọnọrụ ọnya yị Abụrahamị nị. Ịjọnọọọ Abụrahamị o si bo. Ụmẹ ana Ẹnẹyịmavara jị, ọ sị ma ozi ọnọọ nị.

³Di Abụrahamị yị ozi anị oni Isera ma yọ aanị Ayiziiki nị.

⁴Ịjị ozi anị ọnọọ sị gụ ẹkụhị ịhịnta ana a ma a, dị Abụrahamị jị ọ ụvẹvẹnẹ nị. Avọọ Ohomorihi mẹ̀ mẹ̀ ẹ ọdaa yọ nị.

⁵Abụrahamị vị ịrayị ẹchẹhị di a va ma Ayiziiki.

⁶Isera ka, “Ohomorihi ọ raà mẹ ka oni ò nyinyi. Avaba aza ana àa wụ́ vee pe onii nyinyi.”

⁷Dị ọ rẹ ka, “Ẹnẹ yaanị zụ kà a yị Abụrahamị ka Isera vaa kà ozi ịrẹva? Ọ kà ọnị ọ vị va si ozi ọnọrụ maa yọ ini unobo anị.”

⁸Ịjị ozi ọnọọ sị vịra dị a dụ ọ hụụnị ịrẹva nị. Ịhị ana Ayiziiki vavọọ hụụnị ịrẹva aanị, dị Abụrahamị nyayịnẹ rị eche anị nị.

⁹Ẹkụhị ọnya Isera ô re ka ozi Ihaga rị Anijipiti ọnị ọ ma yị Abụrahamị aa mẹ aahẹ.

¹⁰Ọ mẹ̀ vavọọ re e dị ọ kà a yị Abụrahamị dị ọ ka, “Dụ ọnẹẹ ọrịhị ọnọnị ọnịrị ozi anị jịnẹ! Ọ kà Ozi ọrịhị ọnịrị Ayiziiki ozi anị ẹ yị vaa gà ogu Abụrahamị.”

¹¹Ịrẹyị ọnọnị ộ zị Abụrahamị ẹngụ agụvị ozi anị.

¹²Di Ohomorihi va kà a yị Abụrahamị dị ọ ka: Asị ịrẹyị ozi anị ọnịrị ose anị ana vị ọrịhị avọọ du ọ ayị. Ọ kà Ịsị Isera ọ̀ọ ka ọ̀ mẹ, ọ vavọọ mẹ̀ ẹ, agụvị ka Ayiziiki a vaa sị hị́ ịrẹha irima anị nị.

¹³Ohomorihi rẹ ka ọnị rẹ vị vaa mẹ ka ozi ọnẹẹ ọrịhị ọnọọ ọ̀ vi anẹkụra ọbanyị agụvị ka ịpa Abụrahamị ọ chị hụrẹ nị.

¹⁴Abụrahamị ộ kwẹẹtẹ ẹnẹnẹ viri-viri, dị ọ sị ịsọyịrị dị ọ sị ịsa dà enyi dị ọ sị tụra Ihaga ịza nị. Dị ọ sị ọnịrị ozi anị tụ́ ẹhẹ nị. Di Ihaga si hu, di aa ngụ ịnị ụnọmị Ịbẹẹsẹba zị nị.

¹⁵Ịjị enyi ẹnị ẹ dà tụ́ ịnị ịsa ta, di Ihaga si ozi anị na tụ́ iruvo ọchị ọnya nị.

¹⁶Dị ọ kà na huu, ẹhụụ ahụ ịrẹkẹẹchẹhị, dị ọ na yaayịtẹ dị ọ và a chire nị. Ọ kà ọnị ọ yị zụ jẹẹ re ozi ọnọọ, èe sú. Ihaga mẹ̀ vavọọ yaayịtẹ ịzọọ, di ee sụ ùnè vavavaa nị.

¹⁷Ohomorihi ộ wụ́ ozi ọnọọ mèe nowu, di anggẹẹrị Ohomorihi yà ẹbẹẹba dị ọ va hị́ Ihaga dị ọ ka, “Ihaga, u mè re? Ọ kà Asị o rè hí angwa, ka Ohomorihi ộ wụ́ owu ozi ọnọọ ịzị ọ yà.

¹⁸Ọ kà kwẹẹtẹ dị ọ̀ na sị ozi ọnọọ rị ụvọ. Ọ rẹ anẹkụra ọbanyị ọnị vaa mẹ̀ ẹ nị.”

¹⁹Ịjọnọọ ọgọnị di Ohomorihi va ha a eyi, di o re ịkangga ọnya ana nyị enyi nị. Dị ọ na dà enyi tụ́ ịnị ịsa ọnị ọ za, dị ọ ka enyi yi ozi ọnọọ nị.

²⁰Ohomorihi ô sere ozi ọnọọ, dị ọ vịra nị. Dị ahịka ịnị ụnọmị ọ ra nị. Ọ yara ne ọpa ẹnẹmẹhị.

²¹Ọ mè yà ịnị ụnọmị ịzị aā hị́ Ịparanị, dị ọnyị anị nọ ẹkụra Ijipiti dị ọ na nyị ọnẹẹ hụụ ịzọọ va yọ nị.

²²Ịnị ụmẹ ọnọọ di Abimẹrẹkị ọnịrị Ipikori ọga isoja anị na kà a yị Abụrahamị dị ẹ ka, “Ịsa tụra ịsa ana àaa mẹ, Ohomorihi vị ana aa sị ụvọọ tụ́ ọ yọ.

²³Ọ kà ọ̀ hị́ eku yị ọnị ịzẹnị booro aanị ka o yi vee vene ọnị, àa vi ezi anị pooro na ngụ ezi anị ịrẹma-ịrẹma. Ọ kà ọ̀ hị́ eku ka ịzẹyịza ọnị ọnị ee sii pè e mẹ̀ ọnị re ve sii pè ọnị mẹ ne beri anẹkụra ịzị ọ ra aanị.”

²⁴Di Abụrahamị ka, “Ọnị ộ vavọọ hị́ eku.”

²⁵Ụmẹ ọnya Abụrahamị ộ sị ịrẹyị ezi ahụ Abimẹrẹkị na tụ́ Abimẹrẹkị ịrẹka. Ezi ahụ Abimẹrẹkị ẹ raà sị ụkata dọ ịkangga ana aza Abụrahamị chị.

²⁶Di Abimẹrẹkị ka: Ọnị ọ yị yẹ ọza ana vavọọ mẹ. Ọ yị vịdị kà a yị ọnị, agụvị ka ọnị ọ yị vịdị wụ́ pooro ve tù ajịnị.

²⁷Di Abụrahamị kụ́ atẹmẹ ọnịrị ụnọ, dị ọ kụ́ ọ yị Abimẹrẹkị nị. Dị ẹnị ẹyịva hị́ eku yị ẹngụ nị.

²⁸Abụrahamị ộ kụ́ ozi atẹmẹ ịhịmba hụụnị atẹmẹ anị tụ́ aha irenyi.

²⁹Di Abimẹrẹkị họ̀ Abụrahamị dị ọ ka, “Sị ẹ vi iruvo ozi atẹmẹ ịhịmba ọnị ọ kụ́ tụ́ irenyi aanị?”

³⁰Di Abụrahamị ka, “Ọ̀ọ kụ́ ozi atẹmẹ ịhịmba hụụnị ụvọ anị. Ọnị ọ vaa sị zụ̀ ka ộ dọ ivenu tụ́ ọ ka ọnị ọ chị ịkangga ọnọnị nị.”

³¹Avọọ a sịị hị́ ịzọọ Ịbẹẹsẹba nị, agụvị ka ịzọọ ẹnị ẹyịva yà hị́ eku nị. Ịbẹẹsẹba: Iruvo ịrẹha ọnọọ ọ vị ịkangga (atẹmẹ) ịhịmba. A rẹ zụ kà a ka iruvo anị ọ vị Ịkangga ịzị a hị́ eku.

³²Ẹ mẹ̀ vavọọ sị eku hị́ yị ẹngụ Ịbẹẹsẹba, di Abimẹrẹkị ọnịrị Ipikori ana vị ọga isoja anị varẹma aa nọ Anihwirisiti nị.

³³Di Abụrahamị chire ọchị ana aā hị́ Ịtamasiki tụ́ Ịbẹẹsẹba nị. Dị ọ yà ịzọọ mẹ̀ aduwa yị Ẹnẹyịmavara, Ohomorihi ana yà ịzọọ pooro zịna-zịna nị.

³⁴Abụrahamị ộ ra ịnị ẹtẹ Anihwirisiti nị ịzọọ ku ẹtẹẹtẹrẹ.