Read ebira Oyinyima 24 Bible Online

Oyinyima 24 - ebira bible

Oyinyima 24

¹Abụrahamị o si bo ẹtẹẹtẹrẹ. Ẹnẹyịmavara vị ana mẹ ka ọ̀ nyayịnẹ zee yị Abụrahamị ini oze tụra oze.

²Ẹhụhị ọnya di Abụrahamị kà a yị ozi ahụ anị ana vị ọzọkụ ana sị eyi pè avaba ịsa ọnị ọ nyị dị ọ ka, “Ọ̀ Sị ụvọ chire ọnị agada,

³dị ò sị Ẹnẹyịmavara Ohomorihi ana mẹ ẹbẹẹba ọnịrị ẹhẹ hị́ eku yị ọnị. Ọ kà ọ̀ hị́ eku ka ọnị ẹ yị vaa nyị ezi Anikenaani ịzị ọnị yà aanị yi ozi anị, ka ọ̀ vi ose anị.

⁴Ọ kà ọ̀ kà a ka ẹkụra anị ọnịrị ịda anda anị ọ va naa nyị ọnẹẹ hụrẹ vaa yi Ayiziiki ozi anị nị.”

⁵Di ozi ahụ anị ọnọọ ka, “Ọnẹẹ ọnọọ ọ̀ yị na dọ ka ọnị aa saasa ọnịị vẹ ịzẹnị yọ? Ọ kà ọnị ọ́ọ́ si ozi anị varẹma nọ ẹkụra ọnị ọ hụrẹ vẹ?”

⁶Di Abụrahamị tụ́ o ohi dị ọ ka: Asị a nyị ịsị ẹ mẹ̀ ka ọ̀ sị ozi anị varẹma nọ ịzọọ.

⁷Abụrahamị rẹ ka Ẹnẹyịmavara Ohomorihi ana mẹ ẹbẹẹba ọnị ọ sị ọnị hụụ ịda ada anị ọnịrị hụụnị ẹtẹ ịzị a yà ma ọnị nị. Ọ kà ọnị ọ hị́ eku dị ọ kà a yị ọnị ka ozi anị ịrẹma-ịrẹma ọnị vaa sị ẹtẹ ọnọnịị yị nị. Abụrahamị Ọ vaa tụ́ anggẹẹrị anịị saasa a, dị ọ̀ na nyị ọnẹẹ hụụ ịzọọ va yị ozi anị.

⁸Ọ kà ama àa vi ọnẹẹ ọnọọ ọ ka ọnị ọ yị saasa a vẹ nị, Ọ sị há hụụnị eku ọnọnị. Ama asị ọ si ozi anị varẹma nọ ịzọọ.

⁹Ịzẹyịza di ozi ahụ ọnọọ sị ụvọ chire Abụrahamị ọga anị agada dị ọ vavọọ hị́ eku nị.

¹⁰Di ozi ahụ ọnọọ kụ́ ịnyaakụmị ọga anị ẹẹwụ, dị ọ rẹ kụ́ ogu akàaka beri ọ, di o si hu aa nọ akẹbẹẹba Imesopotamiya dị ọ nọ ẹkụra Ịnahọ̀ nị.

¹¹O mè tù ịzọọ, dị ọ kụ́ ịnyaakụmị anị kú ẹtẹ ọgụrị ịkangga ịrẹma ẹkụra nị. Ụmẹ oruva ọ vị nị. Ụmẹ ọnọọ anyẹnẹẹ nịnị sị naa dà enyi nị.

¹²Di ozi ahụ Abụrahamị mẹ̀ aduwa dị ọ ka, “Ẹnẹyịmavara Ohomorihi ana Abụrahamị ọga anị aa hẹkẹ, ọ̀ navọ ọ̀ mẹ ụsẹ anị zoza ajịnị. Ọ kà ọ̀ mẹ ọyịza yị Abụrahamị ọga anị anka ọ mẹ̀ vịdị kà a.

¹³Dị ọ ka ọnị vaa jẹẹ ụtọ ịkangga ịzẹnị, ezi anẹẹ anẹkụra ọnọnị vaa vẹ vaa dà enyi.

¹⁴Ọnị vaa kà a yị ọnya ka aarịhịnị ò chị ụnọkọ anị di ò ká enyi yị ọnị hu. Ọ̀ ka ọ̀ọ kà a ka ọnị ò hu, dị ọ rẹ ka ọnị aa ká enyi yị ịnyaakụmị anị nị, dị ọnị yẹ ka ọnị o sì ka ọnị ọ̀ nyị na yị Ayiziiki ozi ahụ Abụrahamị nị. Ọ kà ọnọọ vaa sị zụ̀ ka ô mẹ ọyịza yị ọga anị anka ọ mẹ̀ vịdị kà a.”

¹⁵Ọ mẹ̀ maanị aa yịị mẹ̀ aduwa kẹnẹ, di o vene re ka ozi ọnẹẹ ọnya ọ̀ sị ụnọkọ tụ́ ịza aa vẹ nị. Ozi ọnẹẹ ọnọọ ọ rị Irebeka nị Irebeka vị ozi Ibetuwẹrị ọnị ọnyị anị rị Imirika, ana vi ose Ịnahọ̀. Ịnahọ̀ ọnọọ vị ọyịnyara Abụrahamị.

¹⁶Wèe re Irebeka, ô zoza ẹtẹẹtẹrẹ. Ozwoorihi ọ vị nị, ộ yị yẹ ọnọrụ. Dị ọ nọ ịnị oswe, dị ọ sị ụnọkọ anị na dà enyi di aa vẹ nị.

¹⁷Di ozi ahụ Abụrahamị zwe na gẹrị ọ dị ọ ka, “Aarịhịnị ọ̀ ká enyi chee hụụnị ụnọkọ anị yị ọnị ọnị o hú de.”

¹⁸Di Irebeka wụsẹ sị ụnọkọ anị hụụnị ịza rị ụvọ, dị ọ ká enyi yọ dị ọ ka, “Nda, dọ we hú.”

¹⁹Irebeka mẹ̀ raà ká enyi yọ dị ọ ka, “Ọ̀ jẹẹ ọnị ọ̀ dà enyi yị ịnyaakụmị anị di ẹnị è re hú dị ọ̀ hụ wa.”

²⁰Dị ọ wụsẹ và enyi anị ana vọ hi ịnị okunsere yị ịnyaakụmị ẹnẹẹ, di o re zwe và nọ ịnị ịkangga dị ọ naa dà enyi va yị avaba ịnyaakụmị ẹnẹẹ nị.

²¹Di ozi ahụ Abụrahamị tangwa ee re e ka àa vị Ẹnẹyịmavara maanị sị ụ̀sẹ anị mẹ zoza nị.

²²Ịjị ịnyaakụmị ẹnẹẹ sị enyi hú, dị ozi ahụ ọnọọ sị ochirigege aahị ọkatarihi ọnya ana a sị igooru mẹ ne beri ịsụvọ ẹẹva ana a rẹ si igooru mẹ yọ nị. Ẹnya ẹnẹẹ vị ẹkẹhị-ẹkẹhị.

²³Dị ọ ka, “Ọ̀ kà a yị ọnị de, ẹnị ẹ vị ada anị. Dị ọ rẹ ka Áá nyị aku ịda anị ịzị ẹnị nyẹngụ chị́?”

²⁴Di Irebeka tụ́ ọ òhi dị ọ ka, “Ozi Ibetuwẹrị ọnị vị nị. Ọnyị Ibetuwẹrị ọnọọ ọ rị Imirika nị, ọnị ọ ma Ibetuwẹrị yị Ịnahọ̀ nị.”

²⁵Dị ọ rẹ ka, “Ẹnị ệ nyị avị ọnịrị ịsa rụrụ ana vọrọ ka ịnyaakụmị ọ̀ rị. Ọ kà ẹnị ẹ rẹ nyị irehi ịzị a vọrọ ka è chí.”

²⁶Di ozi ahụ ọnọọ kụ́ ẹtẹ, dị ọ kụ́ Ẹnẹyịmavara avọ nị.

²⁷Dị ọ ka, “Ẹnẹyịmavara Ohomorihi Abụrahamị ọga amị, ọnị ộ kụ́ ọ avọ. Ọ kà o yi hi ayị ịsa ọyịza ọnị ọ ka ọnị aa mẹẹ yị Abụrahamị ọga anị. Ộ ka ọ mẹ ka ọnị o re oze va ngụ ini eehi anda ọga anị.”

²⁸Di ozi ọnẹẹ ọnọọ zwe nọ ini eehi ọnyị anị dị ọ kà ịrẹyị ẹnẹẹ yị wa nị.

²⁹Irebeka ộ nyị ẹnẹbẹnị ọnya ana aā hị́ Ịrabanị. Ịrabanị ò re ochirigege ịnị aahị ọnyara anị ọnịrị ịsụvọ ẹnẹẹ ịnị ụvọ anị. Ọ rẹ wụ́ ịrẹyị oni Irebeka ọyịnyara anị kà ka aanị ọnọrụ ọnọọ mẹ̀ kà yị ọnị nị. Di Ịrabanị zwe nọ ịnị ikangga di o ne tù ọnọrụ ọnọọ nị. Di Ịrabanị ne tù ọnọrụ ọnọọ, di o ne tù ka ộ jẹẹ pè ịnyaakụmị anị ụtọ ịkangga nị.

³⁰

³¹Di Ịrabanị ka, “Ọ́ọ́ dahi? Ọ kà ọnị ee re ka Ẹnẹyịmavara ọ raà mẹ ka ò zee yọ. Ọ rẹ ka, sị ọ jẹẹ ẹhẹ aa mẹ? Ọ̀ vẹ vị ẹnị ẹ nọ ini eehi. Ọ kà ọnị e reè tenyi irehi tịtẹ yị ọnịrị ịzị a vọrọ ka ịnyaakụmị anị è hi.”

³²Ịzẹyịza dị ọnọrụ ọnọọ ngụ eehi, di Ịrabanị ka è chi ẹnya ịnyaakụmị ẹnẹẹ hi ẹtẹ nị. Dị a rẹ sị avị ọnịrị ịsa yị ịnyaakụmị ẹnẹẹ. Di a ká enyi yị ọnọrụ ọnọọ ọnịrị aza ana saasa a vẹ ka ẹ̀ sị nyịna ahụ.

³³Dị ẹ sị ịsọyịrị yọ ka ọ̀ rị ọ nị. Di ozi ahụ Abụrahamị ka, “Ọnị ọ yị rị ịsa à yị vị ọnị kà ụtụ ana a tụ́ ọnị.” Di Ịrabanị ka, “Ọọ kà a.”

³⁴Dị ọnọrụ ọnọọ ka, Ozi ahụ Abụrahamị ọnị vị nị.

³⁵Ẹnẹyịmavara ọ raà mẹ ka ò zee yị ọga anị ẹtẹẹtẹrẹ. Ọ kà ọga anị ọ sị vara ọzọbanyị. Ohomorihi ộ kụ́ ịsụpa mẹ̀ ẹ ẹyịza: atẹmẹ, ẹvụ ọnịrị imaaru. Ọ rẹ nyị ịnyaakụmị ọnịrị ịkẹrịkẹtẹ. Avọọ ọ mẹ̀ rẹ nyị igooru, isiriva, ezi ahụ ọnọrụ ọnịrị anẹẹ vị ọnị ọ rẹ nyinyi.

³⁶Ọ rẹ ka Isera ose ọga anị mè si bo, ộ ma ozi ọnọrụ ọnyaa yọ. Ozi ọnọrụ ọnọọ ọ kụ́ ogu avaba ịsa ana Abụrahamị nyị nị.

³⁷Ọ kà Ọga anị ộ mẹ̀ ka ọnị ọ hị́ eku yọ ka ọnị ẹ yị va naa nyị Anikenaani ịzị ọnị ra vaa yị ozi anị ka ọ̀ ọnyị ọ ọnẹẹ.

³⁸Ọ kà ọ ka ọnị ọ nọ ini eehi ịda ada anị ọnịrị ịda anda anị dị ọnị ọ̀ na nyị ọnẹẹ hụụ ịzọọ va yị ozi anị.

³⁹Ọ kà Dị ọnị kà a yị ọga anị ka ọnẹẹ ọnọọ ọ̀ọ ka ọnị ọ yị saasa ọnị vẹ yọ?

⁴⁰Dị ọ ka ọga anị Ẹnẹyịmavara ọnị ọnịị̄ wụ́ ịrẹyị anị vaa tụ́ anggẹẹrị anịị saasa anị, dị ọ mẹ ụsẹ anị zoza. Ọ kà ọnị ọ̀ nyị ọnẹẹ hụụnị eehi ada anị ịda anda anị va yị ozi anị.

⁴¹Ọ kà ọnị ọ̀ọ vẹ ịda anda anị, dị ẹ̀ yị si ọnẹẹ ọnọọ mị, ịjọnọọ ọnị sị ha hụụnị eku ọnọọ nị.

⁴²Di o re ajịnị ọnị mẹ̀ va ngụ ịnị ịkangga ịzọọ, dị ọnị mẹ̀ aduwa dị ọnị ka; Ẹnẹyịmavara Ohomorihi Abụrahamị ọga anị, ọ̀ navọ ọ̀ mẹ ụsẹ anị zoza.

⁴³Dị ọ rẹ ka ọnị vaa jẹẹ ụtọ ịkangga ka, ezi anẹẹ vaa vẹ vaa dà enyi. Ọ kà ọnị vaa kà a yị ọnya ka aarịhịnị ká enyi chee hụụnị ụnọkọ anị yị ọnị oni ò hú.

⁴⁴Dị ọnị ka Ọ̀ọ kà a ka oni ò hú, dị ọ rẹ ka ọnị aa ká enyi yị ịnyaakụmị anị nị, dị ọnị yẹ ka ọnị Ẹnẹyịmavara sì ka ò nyị na yị ozi ọga anị nị.

⁴⁵Dị ọ rẹ ka ọnị mẹ̀ maanị aa yịị mẹ̀ aduwa ịnị ayị anị kẹnẹ, di oni re ka Irebeka ộ sị ụnọkọ anị tụ́ ịza aa jịnẹẹ vẹ nị. Dị ọ nọ ịnị ịkangga dị ọ na dà enyi nị. Dị ọnị ka aarịhịnị ọ̀ ká enyi yị ọnị dị ọnị ò hú de.

⁴⁶Ọ kà ọ wụsẹ chi ụnọkọ anị dị ọ ka ọnị ọ dọ dị oni ò hu nị. Dị ọ ka ọnị raa ká enyi yị ịnyaakụmị anị bẹẹ. Ịzẹyịza dị ọ ká enyi yị ọnị hú, dị ọ rẹ ká enyi yị ịnyaakụmị anị nị.

⁴⁷Dị ọnị va họ̀ ọ ka ẹnị ẹ ma a? Dị ọ ka ozi Ibetuwẹrị ọnị vị nị. Ibetuwẹrị vi ozi Ịnahọ̀ oni Imirika ma yọ. Dị mị va sị ochirigege ọnọọ tụ́ ọ aahị, dị mị rẹ kụ́ ịsụvọ ọnọọ hị́ ọ ụvọ nị.

⁴⁸Ọ kà Di oni ku ẹtẹ, dị ọnị kụ́ Ẹnẹyịmavara Ohomorihi Abụrahamị ọga anị avọ nị, ka ô sị oze zụ̀ ọnị ka ọnị ọ̀ va nyị ozi ọyịnyara ọga anị dị ẹnị ọ̀ sị na yị ozi anị.

⁴⁹Di ozi ahụ ọnọọ ka ọ mẹ̀ sị wụ́ aanị, aarịhịnị ọ̀ kà a yị ọnị ọ̀ọ vaa dọ ka ọnị mẹ ịrẹma ọga anị. Ọ kà ọ yị vaa mẹ ịrẹma anị ọ̀ kị kà a yị ọnị dị ọnị ọ̀ yẹ ịzị à a vọrọ ka ọnị ọ̀ zị.

⁵⁰Di Ịrabanị ọnịrị Ibetuwẹrị tụ́ ohi dị ẹ ka, Ẹnẹyịmavara ọ mẹ ịrẹyị ọnọnị nị. Ẹnị ẹ yị nyị irenu ọha kà ịrẹyị ọnyọọnyị ịnị anị.

⁵¹Dị ọ ka Irebeka yị, ọ̀ sị ọ àa na dị ọ̀ na vị ose ozi ọga anị anka Ẹnẹyịmavara mẹ̀ kà a.

⁵²Ịjị ozi ahụ Abụrahamị maanị wụ́, dị ọ tana tụra ẹtẹ, dị ọ kụ́ Ẹnẹyịmavara avọ nị.

⁵³Di ozi ahụ ọnọọ kụ́ ịsa ọ̀vị hị́ ẹhẹ, igooru ọnịrị ọmọ beri ịta dị ọ kụ́ ọ yị Irebeka nị. Dị ọ rẹ kụ́ ịsa akàaka dị ọ kụ ọ mẹ Ịrabanị ọnịrị ọnyị Irebeka ẹyịza nị.

⁵⁴Dị ọnịrị aza ana saasa a va rị ịsa, di e hú eche, dị ẹ na sụ ịzọọ nị. Ẹ mẹ̀ sị ha ẹnẹnẹ, di ozi ahụ ọnọọ ka: Ẹ jẹẹ ọnị o ne tù ọga anị.

⁵⁵Dị ọyịnyara Irebeka ọnịrị ọnyị anị ka, Ọ Navọ Irebeka tụ́ ịda ẹnịnị mẹ ẹhụ ẹkụhị ẹẹwụ, dị ọ̀ vaa na.

⁵⁶Di ozi ahụ ọnọọ ka asị ẹ za ọnị kù agụvị ka Ẹnẹyịmavara ọ raà mẹ ụsẹ anị zoza. Ọ kà aarịhịnị ọ̀ navọ ọnị ọ̀ varẹma ne tù ọga anị.

⁵⁷Dị ẹ ka: Ọ̀ jẹẹ ẹnị ẹ̀ hị́ ana vi ozi dị ẹnị ẹ̀ họ̀ ọ kẹ.

⁵⁸Dị ẹ hị́ Irebeka dị ẹ họ̀ ọ ka, ọ wáá saasa ọnọrụ ọnọnịị na? Dị ọ ka, “Hịịn, maa saasa a.”

⁵⁹Dị ẹ navọ Irebeka ọnịrị ọnẹẹ ana kà a ịrẹva ọnya ana da vịra ka ẹnịrị ozi ahụ Abụrahamị ọnịrị aza ana saasa a ka ẹ̀ẹ na nị.

⁶⁰Dị anda Irebeka mẹ̀ aduwa yọ dị ẹ ka, “Ọyịnyara ayị, ọza ọ yị va zụụ za ozi ewu ịrịka. Ozi ewu ẹ vaa nyị ẹbẹẹba ọnịvị ẹnịnị dị ẹ dọ wa ẹkụra ẹnịnị.”

⁶¹Di Irebeka ọnịrị ezi ahụ anị kwẹẹtẹ, dị ẹ hịrẹ ịnyaakụmị dị ẹ yaa dụ ọnọrụ ọnọọ na nị. Avọọ ozi ahụ Abụrahamị mẹ̀ sị Irebeka di aa na nị.

⁶²Ayiziiki ộ hụrị ịnị ụnọmị ọgụrị ịzị aā hị́ “Ịbẹẹrị-Ịraha-Ịrọyị” (ịkangga ọza ana yàrà eneē re mị), dị ọ na yà eyi ụvẹtẹ ịnị ẹtẹ Ikanaani nị.

⁶³Ụmẹ oruva dị ọ nọ ịnị aarẹ ka ọnị ọ̀ na tana ahụ nị. Ọ mẹ kana eyi tụ́ ẹba, di o re ka ịnyaakụmị nịnị aa vẹ nị.

⁶⁴Ịjị Irebeka ọnị rẹ kana eyi, dị ọ re Ayiziiki, dị ọ wụsẹ chi hụụ ịrẹsụ ịnyaakụmị anị nị.

⁶⁵Dị ọ họ̀ ozi ahụ Abụrahamị use dị ọ ka, “Ẹnẹ vị ọsọọ ana aa zị ụsẹ ịnị aarẹ vẹ avọọ?” Di ozi ahụ ọnọọ kà ọga anịị yọ nọ. Di Irebeka si ubobo anị kú eyi anị nị.

⁶⁶Di ozi ahụ ọnọọ kà a yị Ayiziiki ọ mẹmẹ zị ụsẹ bemi nị.

⁶⁷Dị Ayiziiki sị Irebeka nọ ịnị ajẹngụ Isera ọnyị anị, dị ọ sị ọ mẹ ose anị nị. Ayiziiki ô sì ịrẹyị anị. O yi kuku sụ ùnè agụvị ọnyị anị ene sú.