Read ebira 2 Ịsamụwẹrị 1 Bible Online

2 Ịsamụwẹrị 1 - ebira bible

2 Ịsamụwẹrị 1

¹Ịnị ụmẹ ọnya Idevidi ộ kụ́ ịrẹkụ ne tù Anamarẹkị, dị ọ wụ̀ wa nị. Ọ mẹ̀ sị wa wụ dị ọ vavẹ dị ọ va yà Izikiragi mẹ ẹkụhị ẹẹva nị. Ịjọnọọ Ịsọọrụ ọnị ô wusu,

²dị ahịka eyinẹhẹ oni Idevidi vavọọ vẹ ọ́za ịnya zwe hụrẹ ịnị isoja Ịsọọrụ di o ve tù Idevidi nị. Ọ màa vẹ, awuru anị vị ọnị ọ na, dị ọ ká ezi và hi ịrẹsụ ana si zụ̀ ka ayị anị vị ana nyayịnẹ du nị. O mè ve tù Idevidi dị ọ tana tụra ẹtẹ dị ọ kụ́ ọ nị.

³Di Idevidi va họ̀ ọ ka ịzị ọ hụrẹ vẹ? Dị ọza ọnọọ ka ini isoja Anisirẹrị ọnị zwe hụrẹ vẹ nị.

⁴Di Idevidi ka, “kà a mị a vị à yị nyị ịrẹyịị?” Dị ọnọrụ ọnọọ ka, “Anda ayị vi ene zwe hụrẹ ọvịdị ịrẹkụ. A kụ́ ọrụrụ-ọrụrụ ẹnịnị wụ̀. Ịsọọrụ ọnịrị Ijonatani ozi anị ệ hyakụ wusu bẹẹ.”

⁵Di Idevidi va họ̀ ozi ọnọrụ ọnọọ ana maanị va kà enube yọ dị ọ ka, “Ụ mẹmẹ yẹ ka Ịsọọrụ ọnịrị Ijonatani ozi anị ê wusu?”

⁶Di ozi ọnọrụ ọnọọ ka ẹnị va na yà ịnị ataba Igibiya ịhị ọnọọ. Di oni re ka Ịsọọrụ ộ jẹẹ vàrịrẹ ụhwọ ọbanyị anị nị. Di oni re ka isoja ọnịrị ẹnịnị ana tụra ịkẹkẹ oni umaata ee tura ọnịrị isoja anaā tụra umaata nịnị maa dụ Ịsọọrụ, ẹ yaa vaa za a nị.

⁷Ọ kà Ịsọọrụ mẹ̀ kana eyi di o re ọnị, dị ọ hị́ ọnị nị. Dị ọnị zẹẹ, dị ọnị ka ọ́ mẹ kà nị?

⁸Di ozi ọnọrụ ọnọọ ka dị Ịsọọrụ va họ̀ ọnị use ka ẹnị ọnị vị nị? Dị ọnị ve tù ohi dị ọnị ka Anamarẹkị ọnị vị nị.

⁹Dị ọ ka Ịsọọrụ ọ va kà a yị ọnị ka aarịhịnị ọnị ọ̀ vẹ dị ọnị ọ̀ wụ̀ ọnị Ịsọọrụ, ka ọnị aa tịị tụ́ ụhwẹ, ama a sị ọnị tụ̀ ụnava odivi, oni ee vee sú.

¹⁰Di ozi ọnọrụ ọnọọ ka dị ọnị va na, dị ọnị wụ ọ nị, agụvị ka ọnị ộ yẹ ka ọ mẹ̀ nọ ẹtẹ avọọ, ọ yị kụkụ va zụụ rị ọ, vi ee sú nị. Ọ kà dị ọnị kụ́ amu ohinọyị ọnị Ịsọọrụ kú ne beri ịsị ọ kụ́ hi ụvọ, dị ọnị kụ́ wa va yị Idevidi aanị nị.

¹¹Di Idevidi ọnịrị aza ene hi ịzọọ pè e za awuru ẹnịnị dị ẹ na a, áyị màa kụ́ wa nị.

¹²Dị ẹ jị òrèrè Ịsọọrụ ọnịrị Ijonatani ozi anị pooro nị. Avọọ ẹ mẹ̀ re jị òrèrè agụvị isoja Ẹnẹyịmavara ọnịrị agụvị avaba Anisirẹrị ene sú éyi ịrẹkụ nị. Ẹnịnị ẹ yị rị ịsa hụrẹ ẹnẹnẹ pooro na ngụ oruva.

¹³Di Idevidi va hị́ ozi ọnọrụ ana va kà enube yọ aanị dị ọ ka ịzị ụ hụrẹ vẹ? Di ozi ọnọọ ka ọnị vị ọzọga Anamarẹkị ọnị vị nị.

¹⁴Di Idevidi ka, “Wâ kụ̀rà ụvọ awụ wâ wụ̀ ọza ọnị Ẹnẹyịmavara nyị mẹ ohinọyị angwa ọ yị daba hi wu?”

¹⁵Di Idevidi hị́ isoja anị ọnya dị ọ ka ọ̀ kà pè e dị ọ wụ̀ ọ nị. Ịzẹyịza dị ọ kà pè e, dị ọ và ịsa hị́ ọ ẹngụ, dị ọ wụ̀ ọ nị.

¹⁶Di Idevidi ka, “Wèe sú, ẹwa rị ịvị ẹngụ awụ nị. Ịrẹyị ọnị ẹwụ ụvọta kà vi ivenu, ka ẹwa wụ̀ ọza ọnị Ẹnẹyịmavara nyị mẹ ohinọyị nị.”

¹⁷Ahẹ ọnọnị Idevidi jị ọnị ọ sị jị òrèrè Ịsọọrụ ọnịrị Ijonatani ozi anị nị.

¹⁸Ahẹ ọkịta aā hị́ ahẹ ọnọnị nị. Idevidi ka à sị kọ Anijuda. Â chẹrẹ ahẹ ọnọnị tụ́ ini iwe Ijasari.

¹⁹Anisirẹrị oo! a kụ́ ọdọvịdị awụ wụ ịrẹsụ ataba Isoja ayị ọkọọka ê wusu

²⁰Asị a zẹẹ ka à wụ ọ Igati Asị eyi ha ọza na kà a ịnị ubooro Asikeroni oo! Wàa kà a di ezi anẹẹ Anihwirisiti wụ́ nị vị ẹ vaa jẹ nị. Mị ka ezi anẹẹ anị ẹẹ mẹ kẹnẹ-kẹnẹ nị, ẹ̀ẹ wụ vị ẹ yaa jẹ nọ!

²¹Ẹwụ ataba Igibiya eguhi o mē vene chire hi wu di ò ve si tù orihi oo. Ẹwụ ataba Igibiya, wẹ mā vana mẹ̀ ịsa ana aā sị ịnị anị naa yị Ohomorihi pàá. Ịzọọ a yà du ogonto ọka isoja ayị ẹngụ nị, asị a kụkụ nyị ọza ana aa sị angwẹ sisi ogonto Ịsọọrụ oo!

²²Ijonatani, wàa sị ọkịta awụ, ọnịvị ệ yẹ ka isu ộ vẹ Ịsọọrụ wàa sị ụhwọ awụ, wẹ ma vayị ọza Ọnịvị ana kata vị ọnị ụ maanịị wụụ vaa ha.

²³Ịsọọrụ oo! Ijonatani oo! Ẹ́ mè yi yà ẹhẹ ệ sị̀ ayị yị ẹngụ Dị ẹ daka yi sú, ẹ yị hụrẹ ẹngụ ụvọ. Ệ rẹ huna irepe, ẹnịnị ệ nyị ụkata huna idu

²⁴Ẹwụ anyẹnẹẹ Anisirẹrị, waā jị òrèrè Ịsọọrụ nịnị, Ịsọọrụ anaā kụ́ ịta ozoza va wụ nịnị, dị ọ rẹ kụ́ igooru ọnịrị iweyi yị wụ ka wa sịị mẹ ọvị nịnị.

²⁵Nda o! Isoja ayị ọkọọka ê wusu éyi ịrẹkụ. Ijonatani o, ịrẹkụ ọ sị ọ rị ịnị ataba.

²⁶Ijonatani, ọhụva amị, isu awụ ộ zị mị Ewee re sì ịrẹyị amị pooro, ọnị ọza ọ̀ yị zụ ka. Wâ hyakụ sì ịrẹyị amị hụụnị ọnẹẹ mè zụ sì ịrẹyị ọza

²⁷Isoja ayị ọkọọka ê wusu Ohirẹkụ ayị nịnị ê wusu va ha.