Read ebira 2 Ịsamụwẹrị 18 Bible Online

2 Ịsamụwẹrị 18 - ebira bible

2 Ịsamụwẹrị 18

¹Idevidi ộ kụ́ isoja ana yà pè e gụ, dị ọ nyị ẹnyị dị ọ sị mẹ ọga nị. Aza ẹnyị ệ sị eyi pè aza ẹnị akawụ dị aza ẹnyị sị eyi pè aza ẹnị ẹchẹhị nị.

²Idevidi ộ gà isoja anị hí oze ọnya aa na, dị Abisayi ọyịnyara Ijowabi ọnị rẹ kụ́ oze ọnya di Itayi Anigiti ọnị rẹ kụ́ oze ọnya ana vọ nị. Di Idevidi va ka ọnị ụvọta aa saasa waa nọ ịrẹkụ nị.

³Di isoja ẹnẹẹ ka eyiye, asị ọ jịnẹ tụ́ ẹhẹ. Ẹ ka àa vị a sị ẹnị dụ nị, ẹ yị nyị ịzị ịrẹyị ẹnịnị gẹ aza ẹnẹẹ. Ẹ ka achẹva ẹnịnị ọ̀ọ daka sú, e yi rẹ ịrẹyị. Ama àa vị ẹwụụ yọ, yàa maanị yà akawụ-akawụ oze ẹẹhị wê huna yị. Ẹwàa vana yà ịnị ẹkụra dị ụ sị ọtụ kà yị ịrẹma nị, ọnị ọ mẹ hu nị.

⁴Di ohinọyị kà ọnị vaa mẹ̀ ịsa tụra ịsa ọnị ẹ̀ẹ kà ô zee ẹnị eyi huu kẹnẹ. Di ohinọyị jẹẹ akaha ukere oze ẹkụra, di isoja ẹnẹẹ tara aa jịnẹ tụ ẹhẹ ịnị ogu ọnị ẹnyị vị ẹnị ẹchẹhị, dị ẹnyị vị ẹnị akawụ nị.

⁵Di ohinọyị va hị́ Ijonatani ọnịrị Abisayi ne beri Itayi di o hú wa ụvọ nị dị ọ ka Áarịhịnị navọ wa hụ agụvị amị asị a nyị ịsị ụ sị mẹ Abịsarọmị nịnị o! Avaba isoja ẹnẹẹ ệ wụ́ ohinọyị mèe hú ọga ẹnịnị ụvọ ini oze ịrẹyị Abịsarọmị.

⁶Di isoja Idevidi si hu aa nọ ịnị avị ịzị e gụ̀ ịrẹkụ tụ́ ka ẹnịrị isoja Anisirẹrị ẹ̀ na kụ̀ ịrẹkụ nị. Ịrẹkụ vị ẹnị ẹ kụ̀ ịzị aa hị́ iriku Ehwireemi.

⁷Dị ahịka isoja Idevidi o huna isoja Anisirẹrị nị. Isoja Idevidi vị ana nyayịnẹ wụ̀ isoja Anisirẹrị ẹnẹmẹhị. Aza ẹnị akawụ-akawụ oze ẹẹwụ isoja Idevidi vavọọ wụ nị.

⁸Nyị ịzị ịrẹkụ ọnọọ ò yi tù ịhị ọnọọ ịnị ẹtẹ ọnọọ. Aza ene sù và hi ini iriku kẹnẹ ọ rụrụ hu aza ana a wụ̀ éyi ịrẹkụ nị.

⁹Abịsarọmị ọnị vị ana tụra ịkẹrịkẹtẹ anị dị ọ na gẹrị isoja Idevidi nịnị. Ịkẹrịkẹtẹ anị mẹ̀ zi oze iruvo ọchị ọbanyị ọnya aanị na para hu. Ọchị ọnọọ vị ọnị ịsavị-ịsavị para za avọ anị, dị ọ tịtẹ nyahii aanị. Ịkẹrịkẹtẹ Abịsarọmị mẹ̀ ka ọnị ọ̀ zị oze iruvo ọchị ọnọọ na para hu, dị ọchị si jị chire Abịsarọmị ẹyị nị. Dị ọ vavọọ gẹ ịzọọ dị ịkẹrịkẹtẹ ọnị ọ tụra ọnị aa nịị na nị.

¹⁰Isoja Idevidi ọnya ô re Abịsarọmị, dị ọ na kà a yi Ijowabi ka oni ô re Abịsarọmị mè zù gẹ ọchị ọbanyị ọnya aanị nị.

¹¹Ijowabi ọ̀ tụ́ ọza ana maanị va kà a yọ aanị ohi, dị ọ ka, “Ụ mẹ̀ kà kẹ, dị ịsa awụ ẹyị ngụ ọ za ẹtẹ ịzọọ? Ọ̀ọ yaanị wụ̀ ọ, ọnị yaanị sị ẹkẹhị enyusẹ-enyusẹ ẹẹwụ yọ, dị ọnị rẹ yaanị sị ọvẹntẹ ịrẹkụ vaka a yọ.”

¹²Dị ọnọrụ ọnọọ ka ọ̀ọ daka kụ́ ẹkẹhị enyusẹ-enyusẹ oze akahị yị ọnị, ọnị ọ yị nyayịnẹ sị ụvọ kanyị ozi ohinọyị. Ọ kà ọnị ộ wụ́ óhinọyị mèe hú ọnịrị Abisayi ne beri Itayi ụvọ ka ẹ̀ hụ ụvị anị asị ẹ zẹẹ ka à nyị ịsị ẹ mẹ̀ Abịsarọmị oo!

¹³Dị ọ rẹ ka ọnị ọ̀ọ na mẹ apẹ, dị ọnị na wụ Abịsarọmị nị, ohinọyị vaa yẹ. Ẹ yị nyị ịsị ẹẹ tẹ ọnị ọ̀ yị yẹ. Ọ kà ịjị ọ̀ọ vavọọ si tù, vi Ijonatani aa navọ ọnị ịnya nị.

¹⁴Di Ijowabi ka ọnị ọ yị vavọọ zụ jẹẹ zi ọ pooro. Dị ọ sị ọha ẹẹta, dị ọ kà wa ngụ Abịsarọmị ịrachị ọ mẹ̀ vavọọ zù ọ gẹ ọchị ireyi-ireyi nị.

¹⁵Dị ẹnị ẹẹwụ ịnị ẹnị ana aā za ẹnya ịrẹkụ gụ Ijowabi wụsẹ tara kara Abịsarọmị, dị ẹ và ịsa hí ọ ẹngụ, di o sú nị.

¹⁶Di Ijowabi hú ọpanyị ka isoja ẹnẹẹ ẹ̀ jẹẹ nị. Ịzẹyịza di isoja jẹẹ dị ẹ̀ yị kụkụ dụ Anisirẹrị nị.

¹⁷Dị ẹ sị Abịsarọmị di e ne e ngụ imisi ọbanyị ọnya ana yà ini iriku ọnọọ, dị ẹ hara ịrẹta kú ọ nị. Ịjọnọọ avaba isoja Anisirẹrị e kú zwe zị nọ eehi ẹnịnị.

¹⁸Abịsarọmị mẹ vịdị yà ẹhẹ, ộ jị ọhẹ ọnya aanị jẹẹ ịzị aā hị́ ini ozi ohinọyị ka a sịị̄ tamayị anị. Iruvo ọnị ọ vavọọ sị mẹ ọ vị ka ô ro ka ọnị ọ yị ma ozi ana a va sii tamayị anị. Dị ahịka ịrẹha anị ọ sị yị ọhẹ ọnọọ nị. Ọhẹ Abịsarọmị a vana hụrẹ aa hị́ ọ ve tù ajịnị nị.

¹⁹Ịjị a vavọọ sị Abịsarọmị wụ, dị Ahimaazị ozi Ịzadọkị va kà a yị Ijowabi dị ọ ka vị ọnị ka ọnị ọ̀ na kà ịsị ẹ mẹ aanị yị ohinọyị nọ, ka Ẹnẹyịmavara ọ sị ọ dọ tụ́ hụụnị ụvọ ọnịvị anị.

²⁰Di Ijowabi ka ẹ yị vị ọnị a vọrọ ka ọ̀ na kà enube ọnọọ ajịnị. Ọ kà Ahimaazị ọ zụ na ịhị ọsa, ama ẹ yị vị ajịnị, agụvị ka ozi ohinọyị o sú aanị nị.

²¹Di Ijowabi va hí Anikusi dị ọ ka ọ̀ na kà a yị ohinọyị ịsị o re aanị nị. Di Anikusi kú ẹtẹ kụ́ Ijowabi di ee zwee na nị.

²²Di Ahimaazị ozi Ịzadọkị rẹ hị́ Ijowabi dị ọ ka ịsa tụra ịsa ana àa ka ọnịị mẹ, aarịhịnị ọ̀ navọ ọnị ò zwee dụ Anikusi na. Di Ijowabi ka ozi emi, sị ẹ vẹ di wee sì ka wa na? Wáá yẹ ka wẹ yị nyị enube ana vọrọ ka wa sị dọ ọgụ.

²³Di Ahimaazị ka ịsị ẹ̀ẹ ka ọnịị me, ọ̀ navọ ọnị ò zi zwee na. Di Ijowabi ka òo zwee na kẹ. Ịzẹyịza dị Ahimaazị zị oze ini ozi Ijodani, di ee zwee na nị. Ó mèe zwee na, ọ na sị para Anikusi hu.

²⁴Idevidi ọnị vị ana yaayịtẹ ịnị akakana oze ẹẹva ene e si gù oze ana ngụ ịnị ẹkụra. Di oserẹtẹ ọnị zi oze ịnị ọvọ dị ọ hịrẹ nọ ịrẹsụ irehi nị. Oserẹtẹ mẹ̀ kana eyi, di o re ka ọza ịnya ee zwee vẹ nị.

²⁵Di oserẹtẹ ọnọọ wụsẹ hị́ ohinọyị, dị ọ kà a yọ nị. Di ohinọyị ka àa vị ọnị ịnya aa vẹ nị, ẹ yị nyị ka ẹ yị vị enube ozoza ọ sị aa vẹ. Dị ọza ọnọọ aa gịị gụrị wa nị.

²⁶Oserẹtẹ ọnọọ o re ka ọza ẹnẹsa ọnị ịnya ree zwee vẹ. Dị ọ rẹ hụ́ ọza ana si eyi pè oze ẹkụra dị ọ ka ọza ẹnẹsa ọnị ịnya o ree zwee vẹ avọọ nọ. Di ohinọyị rẹ ka ẹ yị zụ nyị ka ẹ yị vị enube ozoza ọnị rẹ za aa vẹ.

²⁷Di oserẹtẹ ọnọọ ka ọnịpaapa ana aa vẹ ịsọọnị vi ene ee zwe echi anka Ahimaazị ana vị ozi Ịzadọkị. Di ohinọyị ka aa vị ọnịị yọ, ebira anị ô zoza. Enube ozoza ọ za aa vẹ nị.

²⁸Di Ahimaazị ka Taarụ Ohinọyị, ẹ yị nyị ịrẹyị. Dị ọ va kụ́ ẹtẹ kụ́ ohinọyị dị ọ ka, “Yâ kụ́ Ẹnẹyịmavara Ohomorihi awụ avọ. Aza ana ka ịrẹyị ohinọyị o tù ẹnị nị, Ohomorihi ọ sị wa za.”

²⁹Dị ohinọyị ka, “Abịsarọmị yọ kẹ, a vị ẹ̀ yị nyị ịsị ẹ mẹ̀ ẹ? Di Ahimaazị ka ọnị ộ wụ́ ẹtẹ màa sụ́ puuru ịnị ụmẹ oni Ijowabi aa sịị tụ́ ọnịrị ozi ahụ ohinọyị ụtụ, ama ọnị ọ yị yẹ ịsị ẹ vẹ.”

³⁰Di ohinọyị ka ọ̀ jẹẹ óboka ịzẹnị kẹ. Ịzẹyịza dị ọ nọ oboka dị ọ na jẹẹ ịzọọ nị.

³¹Kẹnẹ di Anikusi ọnị rẹ vẹ nị. Dị ọ ka, “Taarụ, ohinọyị, jẹẹ ma kà enube ozoza wụ́! Ẹnẹyịmavara ọ sị wụ dọ tụ́ hụụnị ụvọ avaba aza ana kwẹẹtẹ tù wu ajịnị.”

³²Di ohinọyị họ̀ Anikusi dị ọ ka Abịsarọmị yọ kẹ, a vị ẹ̀ nyị ịsị ẹ mẹ̀ ẹ? Di Anikusi ka ịsị e tù Abịsarọmị aanị, avọọ o mè vee tù avaba aza ana ka sị ọnị ee re ohinọyị aa mẹ nị.

³³Ẹngụ ohinọyị ọ sị sụ ẹgahị ọ mẹ̀ vavọọ wụ́, di o zi oze ini ukere oze ịnị ẹkụra hịrẹ nọ ini eehi anị, di o nee sụ́ ùnè nị. Ó mèe sụ́ ùnè dị ọ ka, “Abịsarọmị ozi emi, oo! Abịsarọmị ozi emi, àa yẹ ahịka ẹmị ụvọta ọ yaanị maanị sú nị. Abịsarọmị oo, ozi emi oo!”