Read ebira 2 Ịsamụwẹrị 24 Bible Online

2 Ịsamụwẹrị 24 - ebira bible

2 Ịsamụwẹrị 24

¹Ịnị ụmẹ ọnya Ẹnẹyịmavara raa kụ́ ayị tu Anisirẹrị. Dị ọ kụ́ ọ hi Idevidi ayị dị ọ ka ọ̀ kwẹẹtẹ dị ọ̀ na za Anisirẹrị ọnịrị Anijuda ịrịka nị.

²Ịzẹyịza di Idevidi ohinọyị na hí Ijowabi ana vị ọga isoja dị ọ kà a yọ nị. Ijowabi vị ana yà pe Idevidi. Dị Idevidi kà a yị Ijowabi dị ọ ka, “Aarịhịnị ngụ avaba ovwoovu Anisirẹrị hụrị ịnị ẹtẹ Ịdaanị ẹbẹẹba na ngụ ịnị ẹtẹ Ịbẹẹsẹba eyi ụvẹtẹ, dị wa za aza ẹnẹẹ ịrịka dị ma yẹ ẹ yà.”

³Dị Ijowabi tụ́ ohinọyị ohi dị ọ ka, “Ẹnẹyịmavara Ohomorihi ohinọyị vị ana vaa nyị tụ́ ịnị aza ẹnẹnẹ oze ẹchẹhị. Taarụ, ịhị eyi awụ ọ vaa vị nị. Sị ẹ vẹ dị wee si ka wa maanị mẹ?”

⁴Ama ohinọyị vị ana za ịrẹyị anị geri-geri ka Ijowabi ọnịrị ọga isoja anị ẹ̀ na mẹ̀ ẹ. Ịzẹyịza di Ijowabi ọnịrị ọga isoja ana vọ jịnẹ huu ịda ohinọyị ka ẹnị ẹ̀ na za Anisirẹrị ịrịka nị.

⁵Ẹ mẹ̀ kwẹẹtẹ, ệ jịnẹ Okuha Ịjọdanị, e mè tù ẹkụra ana aā hị́ Arumeri eyi ụvọrị ẹkụra ana ya ịnị akakana ini oze Igadi àa na ngụ Ijazeri; dị ẹ kụ́ udi tụ́ ịzọọ chee nị.

⁶Ẹ mẹ̀ hụụ ịzọọ, dị ẹ na ngụ Anigiriyadi ọnịrị Ikadesi ịnị ẹtẹ Anihiti-Ihadasayi nị. Ẹ rẹ na ngụ Ịdaanị-Ijaani ọnịrị ẹkara-ẹkara Ịsịdọnị.

⁷Ẹnịnị ẹ rẹ na ngụ Ịtaya ịzị a dà irehi aha ọyịtẹ̀ tụ́. Avọọ ẹ mẹ̀ rẹ na ngụ ịnị avaba ẹkụra Anihiti ọnịrị Anikenaani nị. Ẹ mẹ̀ jịnẹ hụụ ịzọọ, dị ẹ nọ eyi ụvẹtẹ ịnị ẹtẹ Ijuda ana aā hị́ Ịbẹẹsẹba nị.

⁸Ệ vavọọ ngụ avaba ẹtẹ Anisirẹrị zị, dị ahịka ọtaha ụhwẹ ịhịịna tụra ẹkụhị oohu ẹ vavẹ va ngụ Ijerusarẹmị nị.

⁹Ẹ mẹ̀ vẹ, di Ijowabi sị ịrịka aza ọnị ọ za ịrịka yị ohinọyị nị. Avaba Anisirẹrị vị ẹnị akawụ-akawụ oze akana. Ẹnị ẹnẹẹ ẹnị vị isoja ana aā sị ụhwọọ kụ̀ ịrẹkụ. Anijuda ẹnị vị ẹnị akawụ-akawụ oze ịrẹkẹẹchẹhị.

¹⁰A mẹ̀ vavọọ sị aza ẹnẹẹ za ịrịka kẹnẹ, dị ayị Idevidi mẹ kì nị. Dị Idevidi kà a yị Ẹnẹyịmavara dị ọ ka, “Ogwoo, Ma sị akụvị ọbanyị mẹ ịnị ịrẹyị ọnị mị mẹ aanị. Aarịhịnị Ẹnẹyịmavara navọ wa vagu mị ka ma sị ụra odivi mẹ ịnị ịrẹyị ọnị mị mẹ aanị.”

¹¹Ẹkụhị ọnya dị Ẹnẹyịmavara kà a yị ọnịsẹ ana aā hị́ Igadi eneē re ẹtẹẹ yị Idevidi ka,

¹²ọ̀ kwẹẹtẹ dị ọ na kà ịrẹyị ọnya yị Idevidi nị. Ọ kà ọ̀ kà a yọ ka ọnị Ẹnẹyịmavara ộ sị ịrẹyị ẹẹta tụ́ ọvịdị ọnị Idevidi, ọ ka ọ̀ nyị ọnya ịnị anị, dị ọnị ọ̀ mẹ̀ ẹ yọ. Ẹnẹnẹ Idevidi mẹ̀ yị kwẹẹtẹ kẹnẹ,

¹³di Igadi ne tù ọ dị ọ kà a yọ ka, “Wéé sì ka ụngwẹ ịrayị ịhịmba ọ̀ kụ̀ ịnị ẹtẹ awụ, à vị ka dị ọnịvị awụ ọ̀ dụ wụ di wee zwee pooro ịnị ụhwẹ ịhịmba, à yị vị avọọ dị ụkụ odivi ọ̀ wụ̀ aza ịnị ẹtẹ awụ mẹ ẹkụhị ẹẹta? Zama a dị wa nyị ịnị ịrẹyị ẹẹta ẹnẹnị dị ma yẹ ohi ọnị maa sị naa yị ọza ana tụ́ mị.”

¹⁴Di Idevidi tụ́ Igadi ohi dị ọ ka ịrẹyị ẹnẹnị vị ana kata ọnị ẹngụ ẹnẹmẹhị. Ọ kà ọọ sị chọmọ, Ẹnẹyịmavara ọnị ụvọta ọ̀ kụkụ vana tana ụvọ za ọnị. Ọ kà ọnị ộ yẹ ka ọọ̄ vayị ọza ẹtẹẹtẹrẹ ọ ka oni o yi sì ka ahịka ọza ọ tana ụvọ za ọnị nị.

¹⁵Ịzẹyịza dị Ẹnẹ ẹ̀ yị mā sị ụkụ za Anisirẹrị hụrị ẹnẹnẹ na ngụ ụmẹ ọnị ọ nyị nị. Avaba aza ene sú hụrị Ịdaanị ẹ́bẹẹba huu na ngụ Ịbẹẹsẹba eyi ụvẹtẹ vị ẹnị akawụ-akawụ oze ẹtarẹwụ.

¹⁶Ịjị anggẹẹrị ana aa wụ̀ ọza tù Ijerusarẹmị, dị ọ za ụvọ jẹẹ nị. Dị Ẹnẹyịmavara jesi ayị hụụnị ịrẹyị odivi ọnị ọ kụ́ tù aza ẹnẹẹ nị. Dị Ẹnẹyịmavara kà a yị anggẹẹrị ana aa wụ̀ ọza dị ọ ka ọ̀ za ụvọ jẹẹ asị ọ kụkụ wụ̀ wa nị. Ịjọnọọ anggẹẹrị ọnọọ ọ sị tù aha ọnya aanị ịzị a yàa tụ́ ayị, ọnọrụ ana aā hị́ Arawuna ana vị Anijebusi ọ nyị ịzọọ nị.

¹⁷Idevidi mè re anggẹẹrị anaā wụ̀ ọza, dị ọ kà a yị Ẹnẹyịmavara dị ọ ka, “Te, ịzẹyịza ẹma mẹ̀ akụvị, ẹma mẹ̀ ebira odivi nị. Ama ịrẹyị ọọhẹ aa rị aza ẹnẹnị ana aa rị ụya aanị nị. Navọ wa va eyi ka ẹmị ịnya kẹnẹ ne beri ovwoovu amị.”

¹⁸Ịhị ọnọọ dị Igadi ne tù Idevidi dị ọ ka ọ̀ kwẹẹtẹ dị ọ̀ na mẹ ụta ịsọvọ tụ́ ayị avọọ.

¹⁹Ịzẹyịza di Idevidi kwẹẹtẹ dị ọ hịrẹ nọ ịzọọ anka Ẹnẹyịmavara mẹ̀ tụ́ ka ọ̀ kà a.

²⁰Arawuna ộ kana eyi, di o re ka ohinọyị ọnịrị ezi ahụ anị aa vẹ ịda anị nị. Dị Arawuna jịnẹ ne tù ohinọyị, dị ọ tana tụra ẹtẹ kụ́ ọ nị.

²¹Dị Arawuna ka, “Taarụ Ohinọyị, u mè re di u si hu aa vẹ ịda amị?” Dị Idevidi ka, “Vị ọnị ka ọnị ọ̀ va hị́ ẹtẹ ịzị ọ yàa tụ́ akụ dị ọnị o hi ụta ịzị a vaa yaā mẹ̀ ịsọvọ nị. Màa vavọọ mẹ̀ ẹ, ịsavọọ ị̀kụ̀ ene tu aza ẹnẹnị aanị ọ̀ za jẹẹ.”

²²Di Arawuna kà a yi Idevidi dị ọ ka, “Taarụ, éē re imaaru ẹnẹẹ, Ene eè ze e eyi ẹnị ẹnịnị, ọ̀ sị ọ dị ọ̀ sị na mẹ̀ ịsọvọ ọnọọ. Ịsị e siī tụ́ ayị ọnịrị ọchị ana a sị tụ́ imaaru ẹnẹẹ ọrọkọ yị, ọ̀ kụ́ ọ dị ẹ vị ọkụ ana a va sịị̄ kà ịra.

²³Taarụ, avaba mị kụ́ yị wụ ọọhẹ nị. Ẹnẹyịmavara Ohomorihi awụ ọ̀ navọ ò tụ́ wu ohi ọyịza.”

²⁴Di ohinọyị tụ́ Arawuna ohi dị ọ ka, “Eyiye, jẹẹ ma hị̀ ọ hụụnị ụvọ awụ. Ụ wàa mẹ̀ kị ka waa ná a kẹnẹ. Mẹ yị zụ sị ịsa ọọhẹ na mẹ̀ ịsọvọ yị Ẹnẹyịmavara ana vị Ohomorihi amị.” Ịzẹyịza, dị Idevidi hị́ ẹtẹ ọnọọ ọnịrị imaaru ịnị ẹkẹhị ẹnịnị ana aā hị́ ịsẹkẹrị nị. Dị ahịka ịsẹkẹrị akahị o si nị.

²⁵Di Idevidi hi ụta ịsọvọ tụ́ ịzọọ yị Ẹnẹyịmavara, dị ọ mẹ̀ ịsọvọ ana aā rị ịra ọnịrị ịsọvọ ẹngwọọrọ ịzọọ nị. Dị Ẹnẹyịmavara va wụ́ ịpẹ agụvị ẹtẹ ọnọọ dị ọ za ụkụ ọnọọ jẹẹ kwooze yị Anisirẹrị nị.