Read ebira 2 Ịsamụwẹrị 5 Bible Online

2 Ịsamụwẹrị 5 - ebira bible

2 Ịsamụwẹrị 5

¹Ẹkụhị ọnya dị avaba Anisirẹrị ve tù Idevidi Íhebirọnị nị. Ẹ́ mẹ̀ vẹ dị ẹ ka, “Wâ yẹ ka anda awụ ị vị nị.

²Ịyẹẹyẹ Ịsọọrụ mẹ̀ vịdị vị ohinọyị ayị, ẹwaā kụ́ Anisirẹrị nọ ịrẹkụ nị. Ẹnẹyịmavara ọ sị ọ kà ka ẹwa vaa tẹsị aza anị ana vị Anisirẹrị nị. Ọ rẹ ka ẹwa vaa vị ohinọyị ẹnịnị nị.”

³Dị ọdọvịdị Anisirẹrị ne tù Idevidi ohinọyị Íhebirọnị ịzọọ, dị ẹnịrị Idevidi hị́ eku yị ẹngụ éyi Ẹnẹyịmavara ịzọọ nị. Dị ẹnịnị sị Idevidi dị ẹ sị ọ rị ohinọyị avaba Anisirẹrị nị.

⁴Idevidi vị ozi ịrayị ohurẹẹwụ dị a sị ọ rị ohinọyị. Ộ mẹ ohinọyị mẹ ịrayị ẹbẹẹva.

⁵Ọ mẹ́ yà Ihebirọnị, ộ mẹ̀ ohinọyị Anijuda ịrayị ịhịmba tụra ụhwẹ ịhịnọnyị. Ọ mẹ̀ va na yà Ijerusarẹmị, ọ rẹ mẹ ohinọyị avaba Anisirẹrị ẹnịrị Ijuda ịrayị ohurẹẹwụ tụra ẹẹta.

⁶Ẹkụhị ọnya ohinọyị ẹnịrị aza anị ệ nọ Ijerusarẹmị, dị ẹ kụ́ ịrẹkụ ne tù Anijebusi ana ra ịzọọ nị. Anijebusi ene hi ịzọọ vi ene ro ka Idevidi ọ yị va zụụ rị ẹkụra ọnọọ. Dị ẹ kà yị Idevidi ka, “Wẹ yị va zụụ ngụ ịzẹnị. Ogu eyi ọnịrị oswahụ ayị, ệ hyakụ zụ dụ wụ varẹma.”

⁷Ama Idevidi ọ va sị ịzị isojaā tẹ̀ rị. Ịzọọ aā hị́ Ẹkụra Idevidi nị.

⁸Ịhị oni Idevidi maanị kụ́ ịrẹkụ na rị aanị, dị ọ ka ọza ana àa wụ Anijebusi, ọ̀ tụ́ wa ụvọ wọrọ ọba ịzị enyi eē zii sìi hi ẹtẹ. Ọ kà ẹẹmẹ ẹnẹẹ ana sị mẹẹ ogu eyi ọnịrị oswahụ avọọ vị ọnị ọnị Idevidi nyị ịhyẹrẹ anị. Agụvị avọọ a sịị̄ kà a ka, “Ogu eyi ọnịrị oswahụ ẹ yị vaa ngụ ini irehi Ẹnẹyịmavara.”

⁹Idevidi mẹ̀ raà sị ịrẹkụ rị aha oni isoja tẹ, di ọ kụkụ ra ịzọọ, dị ọ hị́ ịzọọ “Ẹkụra Idevidi.” Dị Idevidi jị ọvọ kara ẹkụra ọnọọ dị ọ dà irehi ịzị isojaā tẹ̀ hi ịnị anị nị.

¹⁰Idevidi vị ana a yịị nyị ụkataa hu avọọ agụvị ka Ẹnẹyịmavara ana vị Ohomorihi Ochẹtẹẹngụ vị ana jẹẹ ịrẹma anị.

¹¹Ẹkụhị ọnya á nyị ohinọyị Ịtaya ọnya aanị ana aā hị́ Ihirami. Ộ tụ́ ezi ahụ anị dị ọ ka ẹ̀ kụ́ ọchị ẹbanyị, ẹbanyị ne beri ikahunta ọnịrị aza anaā sịị ịrẹtaa dà irehi nọ ịda Idevidi nị. E mè tù ịzọọ dị ẹ sị dà irehi ohinọyị yị Idevidi nị.

¹²Idevidi ọ sị yẹ ịjọnọọ ka Ẹnẹ ẹ yị mā vara ọ raà sị ọnị jẹẹ anka ohinọyị Anisirẹrị. Ộ yẹ ka Ẹnẹyịmavara ọ raà hụ agụvị Anisirẹrị mẹ ka ohinọyị ọnị ọnị aa mẹ ọ̀ nyị ụbanyị.

¹³Ộ dà kụ di Idevidi hụrẹ Ihebirọnị nị. Ọ́ mẹ̀ sị hụụ ịzọọ, dị ọ rẹ varẹma nyị onyeehi ọnịrị ọnẹẹ hu avọọ ọ́ mẹ̀ yà Ijerusarẹmị nị. Anẹẹ ẹnẹẹ ẹ vana ma ezi anọrụ ọnịrị anẹẹ tụ́ ini ezi anịị yọ.

¹⁴Ịrẹha ezi ana a ma yọ ịzọọ yị: Isamuwa, ọnịrị Isobabi ne beri Inatanị ọnịrị Isoromọnị.

¹⁵Dị ọsa ẹnị rị Ibihari ọnịrị Eriyada ne beri Erisuwa ọnịrị Ihepegi nị.

¹⁶Ana vọ ẹ rị Erisama ọnịrị Eriyada ne beri Eripereti nị.

¹⁷Anihwirisiti mẹ̀ wụ́ ka a raà si Idevidi rị ohinọyị Anisirẹrị, dị ẹ nyayịnẹ hara ẹnya ịrẹkụ di e si hu ee nee sì ọ nị. Idevidi ộ wụ́ ka ẹ yaa vẹ, dị ọ na tẹ̀ ịzị isoja naa tẹ nị.

¹⁸Anihwirisiti mè tụ́ ịzọọ, dị ẹ̀ chaka hi ini ozi Irehwayimi nị.

¹⁹Di Idevidi va họ̀ Ẹnẹyịmavara use ka ọnị ọ́ọ́ kụ́ ịrẹkụ na dụ Anihwirisiti nịnị? Dị ọ rẹ họ̀ ọ ka ọ́ọ́ vaa sị waa yị ọnị ka oni ò huna wa. Dị Ẹnẹyịmavara kà ọ̀ọ na ka Anihwirisiti vị ọnị ọnị aa sị yọọ hú ẹtẹ.

²⁰Di Idevidi ne tù Anihwirisiti Ịbaarị-Iperazimi nị. Di o hú Anihwirisiti nịnị ẹtẹ éyi ịrẹkụ ịzọọ nị. Di Idevidi ka éyi mẹ̀ẹ chakaa kú aha avọọ, avọọ Ẹnẹyịmavara mẹ̀ ya eyi anị chaka kú ọnịvị anị nị. Agụvị avọọ dị a kụkụ aa hị́ ịzọọ “ọga ộ chaka kú wa” nị.

²¹Di Anihwirisiti navọ ori ẹnịnị hi ịzọọ, di Idevidi ọnịrị aza anị kụ́ wa aa na nị.

²²Ẹkụhị ọnya di Anihwirisiti nịnị rẹ vẹ, dị ẹ rẹ chaka hi ini ozi Irehwayimi nị.

²³Di Idevidi rẹ họ̀ Ẹnẹyịmavara kà ọnị ọ́ọ́ kụ́ ịrẹkụ ne tù wa nị. Dị Ẹnẹyịmavara kà asị ọ vavọọ ne tù wa ọvịdị-ọvịdị ama ọ̀ kụ́ aza anị di è jesi kara wa, dị ahịka oze ọvịdị ọchị ịbarịsamị ẹ zị nyima ịrẹkụ nị.

²⁴Dị Ẹnẹyịmavara kà ẹ̀ẹ maanị wụ́ kẹnẹ ka aa nyị ịsaa zị ụsẹ ịrẹsụ ọchị ịbarịsamị ọnọọ, ẹ wụsẹ hu ahụ hụrẹ ẹtẹ ka Ẹnẹyịmavara ọ raà dọ ọvịdị ẹnịnị aa na wụ̀ isoja Anihwirisiti nịnị.

²⁵Dị ahịka Ẹnẹyịmavara mẹ̀ kà Ídevidi rẹ mẹ nị. Dị ọ vavọọ wụ̀ Anihwirisiti nịnị huu hụrẹ Ịgẹba na ngụ Ịgẹzẹrị nị.