Read ebira 1 Ohinọyị 10 Bible Online

1 Ohinọyị 10 - ebira bible

1 Ohinọyị 10

¹Ịnị ụmẹ ọnya, â nyị ohinọyị ọnẹẹ ọnya ana vị ohinọyị tụ́ ẹkụra ana aā hị́ Iseva. Ộ (zị oze ịnị ụvọ Ẹnẹyịmavara) wụ́ ụgụụgụ Isoromọnị. Dị ọ vẹ ka ọnị ọ̀ sị ụhịrẹyị zama Isoromọnị re nị.

²Ọ maà vẹ Ijerusarẹmị, dị ọ hara aza otomiroku saasa ẹngụ vẹ nị. Ọ kụ́ ịnyaakụmị oni o kune eturare ana nyị agụ ozoza tụra ọnịrị otomiroku igooru ne beri ịrẹta ọkatarihi. Ọ mẹ̀ vavọọ vẹ ịda Isoromọnị, dị ọ kà avaba ịrẹyị ana yà ịnị ayị anị yị Isoromọnị nị.

³Di Isoromọnị rẹ vavọọ tụ́ ohi avaba ịrẹyị anị nị. A yi nyị ịrẹyị ọnya oni ohinọyị ọ̀ yị rẹ vaa zẹẹ ka ọnị ò tụ́ ohi anị.

⁴Ohinọyị Iseva ọnọọ ô re avaba ịrẹyọyẹ Isoromọnị ọnịrị irehi ọnị ọ dà.

⁵O re re aza ana aā rị ịsa aha ịsọyịrị Isoromọnị ọnịrị ezi ahụ anị ene hi ẹtẹ kara a ọnịrị ana jẹẹ pè e ana aa zị ụtụụ yọ. Dị ọ re re awuru ẹnịnị, ne beri a mẹ̀ mẹẹ sị eche yi Isoromọnị nị. O re re ịsọvọ ana aā rị ịra ọnị ọọ̄ mẹ ini irehi Ẹnẹyịmavara. Ịjị ọ maanị nee re avaba ẹsẹnịị ta, atẹ ọ sị wụ́ hị́ ọ irenu.

⁶Dị ọ kụkụ kà a yị ohinọyị dị ọ ka, “Ịzẹyịza yọ ọ! M mẹ mẹ́ mẹ kà a ka wâ yẹ ịrẹyị, avọọ ọ mẹ yị vị nị,

⁷mẹ yị vịdị dọ ịrẹyị ẹnẹẹ wụ́ pooro dị mị va maanị vẹ, dị mị va sị eyi amị re e aanị. Ma sị yẹ ka ọza yị hyakụ vịdị ka achẹva ịrẹyị awụ yị mị. Ịrẹyọyẹ awụ ọnịrị ụbanyị awụ ô huna ọpa ana a vịdị kà yị mị.

⁸Ese ewu ẹnịrị ezi ahụ awụ ệ dà jẹ kẹnẹ! Dị ẹnịnị maanị hi ịda awụ pooro, dị ẹ maanị aa wụ́ ịrẹyọyẹ awụ.

⁹Ò zee yi Ẹnẹyịmavara ana vị Ohomorihi awụ ana maanị sì wu. Ọ sị wụ ka wa vị ohinọyị Anisirẹrị, agụvị ka ô sì ịrẹyị Anisirẹrị pooro zịna-zịna. Ộ sị wụ rị ohinọyị ka waa mẹ̀ ọkarẹyị, dị wa rẹẹ mẹ̀ ịsa ana vọrọ.”

¹⁰Di ohinọyị ọnẹẹ ọnọọ kụ́ igooru ikirogirami akawụ-akawụ oze ẹẹva, dị ọ kụ́ mẹ Isoromọnị ohinọyị ẹyịza nị. Dị ọ rẹ hara eturare tatarata ana agụ anị zoza tụ́ ọ yọ nị, ne beri ịrẹta ọkatarihi. Â yị nyị ọza ana vịdị vavọọ hara eturare va yị Isoromọnị ohinọyị da anka ẹngụ oni ohinọyị Iseva kụ́ va yọ.

¹¹Dị ẹpa Ihirami ọnị rẹ kụ́ igooru hụrẹ Ohwiri va yị Isoromọnị ohinọyị nị. Ọ rẹ kụ́ ọchị arimugi tatarata ne beri ịrẹta ọkatarihi va yọ.

¹²Di Isoromọnị ohinọyị sị ọchị arimugi ẹnẹẹ dị ọ sị mẹ ọtụ hi ini irehi anị ụvọta nị. Dị ọ rẹ sị ọchị arimugi ẹnẹẹ mẹ igita ana a sịị jị ahẹ ọnịrị ịsa ọsa ana aā hị́ ihapu, dị ọ vavọọ mẹ yị ọjahẹ nịnị nị. Â yị vịdị vavọọ nyị ọchị arimugi ana a vịdị vavọọ kụ́ vẹ da, ẹ yị rẹ vana vavọọ nyị hụrẹ ụmẹ ọnọọ ve tù ajịnị.

¹³Di Isoromọnị ohinọyị kụ́ avaba ịsa oni ohinọyị Iseva ọnọọ họ̀ use anị ọnịrị avaba ịsị ee sì yọ nị. Di Isoromọnị varẹma rẹ hara ogu hụụnị ogu anị tụ́ ịnị ịsa ẹnẹẹ yọ nị. Ịjị a vavọọ raà hara ogu yọ, dị ọnịrị ezi ahụ anị và tụ́, dị ẹ yaa nọ eehi ẹnịnị nị.

¹⁴Igooru ana aa kụ́ va yị Isoromọnị ịnị ịrayị ọnya kẹnẹ ô tù ikirogirami akawụ-akawụ oze ẹwụrọnya ộ tụra akahị.

¹⁵Ịrẹma ẹsẹnị a rẹ nyị igooru oni osohu ẹbanyị-ẹbanyị irenyi-irenyi aa kụ́ vaa yọ. Avọọ avaba ohinọyị Anarabi ọnịrị Ịgọvọnọ ẹtẹ ọnọọ ẹnị mẹ̀ raa kụ́ igooru vaa yọ nị.

¹⁶Isoromọnị ô sị igooru di o si tù ogonto ẹbanyị-ẹbanyị ịrẹka nị Igooru ọnị ọ sị mẹ ọnya-ọnya ộ gụ ikirogirami ịhịmba.

¹⁷Ọ rẹ si igooru tụ́ ogonto ọsa. Ẹnẹẹ ẹnị vị ịrẹkẹẹchẹhị Igooru ọnị o si kú ọnya-ọnya ộ gụ ikirogirami ẹẹva. Di ohinọyị kụ́ wa hi ini eehi ọnị ọ sị ọchị ini iriku Ịrẹbanọnị dà nị.

¹⁸Isoromọnị ohinọyị ọ rẹ mẹ aga ọbanyị ọnya aanị. Ike ọ sị mẹ aga ọnọọ dị ọ sị igooru obooro kú ọ nị.

¹⁹Ịzị a zịị̄ hịrẹ nọ ịnị aga ọnọọ ộ gụ ahụ ịhịnọnyị. Ịrẹsụ aga ọnọọ vị ana maanị yà kooro aanị tụ́ ịrẹma anị, dị ọ nya ịzị aā sị ụvọ tụra tụ́ eyi ẹyịva nị. Di idu ẹẹva jẹẹ pè ụvọ ẹyịva ẹnẹẹ nị.

²⁰A rẹ nyị idu ẹwụrẹva ana jẹẹ ịnị ahụ ịhịnọnyị ịzị a zịị̄ hịrẹ na ngụ ịnị aga ọnọọ. Idu ọnya-ọnya vị ana jẹẹ eyi ọnyị eyi ọsa ini ịzị a zịị hịrẹ nọ ịnị aga ọnọọ. Â yị nyị ẹkụra ohinọyị ọnya ana a vavọọ mẹ̀ ịsa hi da.

²¹Avaba ako Isoromọnị vị ana a si igooru mẹ. Avaba ẹnya ene re hi ini eehi ana a sị ọchị ini iriku Ịrẹbanọnị dà vị ana a rẹ sị igooru ọkụmị-ọkụmị mẹ. Ịnị ụmẹ Isoromọnị ẹ yị nyị ọza ene ro ka enyusẹ ẹkẹhị vị ịsọnyịsọnyị.

²²Enyusẹ ẹkẹhị ộ vavọọ gụ ẹtẹ agụvị ka ohinọyị vị ana nyị ẹpa Anitasisi gụ ẹtẹ ini òkū kẹnẹ. Avọọ ẹpa Ihirami ẹnị mẹ̀ rẹ gụ nị. Ịnị akakana ịrayị ẹẹta ẹpa Anitasisii hara igooru ọnịrị enyusẹ ẹkẹhị ne beri ike ọnịrị ọnchẹrẹ beri inomi ana aā hi igonggo, va a yi ohinọyị ụpẹ ọnya.

²³Isoromọnị ohinọyị ọ nyị ẹkẹhị, dị ọ rẹ yẹ ịrẹyị huna avaba ohinọyị ịnị ẹtẹ ọnọọ nị.

²⁴Avaba ohinọyị ịnị ẹtẹ ọnọọ vi ene ee sì ka ẹnị ẹ̀ wụ́ ịrẹyị irenu Isoromọnị, dị ẹ wụ́ ịrẹyị ịrẹyọyẹ oni Ohomorihi si tụ́ ịnị ayị anị.

²⁵Ẹ̀ẹ vavọọ aa vẹ, dị ọzọza kụ́ ịsị a sị ẹkẹhị enyusẹ mẹ ọnịrị ịsị a si igooru mẹ va mẹ Isoromọnị ẹyịza. Ẹ rẹ ẹẹ̄ kụ́ awuru, ẹnya ịrẹkụ, eturare ozoza, umaata ọnịrị ịkẹrịkẹtẹ, dị ẹ vavọọ aa kụ́ ọ vaa yọ ịrayị-ịrayị.

²⁶Isoromọnị ộ hara ịkẹkẹ umaata gụ ọnịrị umaata. Avaba ịkẹkẹ umaata ọnị ọ nyị vị akawụ-akawụ oze akana, di umaata anị ẹnị vị akawụ-akawụ oze ịhịnọnyị nị. Dị ọ kụ́ wa hi ini ẹkụra ọnị ọ kụ́ ịkẹkẹ hi ana vi ịda ohinọyị, Ijerusarẹmị nị.

²⁷Ohinọyị ộ mẹ̀ ka enyusẹ ẹkẹhị ọ̀ gụ ẹtẹ Ijerusarẹmị anka ịrẹta avọọ. Dị ọchị isida ẹnị gụ anka ọchị ịharịha mẹ̀ gụ hi Isepara nị.

²⁸Isoromọnị vị ana aā hị́ umaata anị hụrẹ Ijipiti ọnịrị Ikuve. Osohu ohinọyị vị ana aā hị́ wa Ikuve.

²⁹Ệ na, dị ẹ na hị́ ịkẹkẹ ịrẹkụ ọnịrị umaata hụrẹ Ijipiti nị. Ịkẹkẹ ọnya ộ gụ ẹkẹhị achuchu ẹẹta, di umaata ọnị vị ẹkẹhị ẹchẹhị tụra ẹvarẹwụ nị. Di osohu ohinọyị varẹma ná wa yị ohinọyị Anihiti ọnịrị ohinọyị Anarami nị.