Read ebira 1 Ohinọyị 2 Bible Online

1 Ohinọyị 2 - ebira bible

1 Ohinọyị 2

¹Ụmẹ oni Idevidi ve sii sú ee vee tù. Di ọ mẹ ọda yị Isoromọnị ozi anị. Ọ kà

²“Ee vee tù ka ma nọ ịda ohiku amị. Re ka wâ nyị ụkata dị wa vị ọnọrụ.

³Sị eyi pè ọda ẹnị Ẹnẹyịmavara Ohomorihi awụ ka à sị eyi pè, dị wa va tụra oze anị, dị wa sị eyi pè ọda anị ọnị ọ mẹ ọnịrị ọ mẹmẹẹ mẹ̀ ọkarẹyị ọnịrị avaba ịsa ọnị ọ sị mẹ ivenu anka a mẹ̀ chẹrẹ wa tụ́ ini iwe Imosiisi ana aā si oze zụ̀ ọza. Vavọọ sị ụvọ za a agụvị aha tụra aha ọnị wàa nọ, ịsị waa na mẹ ịzọọ ò zụ zoza; dị Ẹnẹyịmavara ọ̀ zụ sị ịrẹyị anị jẹẹ anka ọ mẹ̀ ka ẹ yị mị.

⁴Ộ kà a mị ka, ‘Ezi ewu ẹ̀ẹ zẹẹ di e si eyi pè oze amị nị, dị ẹ yaa sị avaba ayị ẹnịnị ọnịrị ivehu ẹnịnị mẹ̀ ebira ịzẹyịza ini eyi amị nị, ọ ka ọza ana vaa vị ohinọyị Anisirẹrị vị ana vaa yà ini ovwoovu amị pooro.’ ”

⁵Waa hyakụ yẹ ịsa oni Ijowabi ozi Izeruya mẹ mị. Waa tamayị ịsị ọ mẹ̀ Abịna ozi Ineri ọnịrị Amasa ozi Ijeteri ana vị ọga Isoja Anisirẹrị. Ẹnị ẹẹva vị ọnị Ijowabi wụ̀ ịnị ụmẹ ẹnẹ ẹ̀ yị nyị ịrẹkụ agụvị ò si sí atọ ịsa ana mẹ̀ ịnị ụmẹ ịrẹkụ. Aza ẹnẹ ẹ̀ yị nyị ịsị ẹ mẹ̀, ọ sị wa wụ. Ẹma kụkụ va za ẹnya ịrẹyị ọnọọ dị maa rị ụya anị nị. Anya ẹnịnị yị ịrẹsụ anị.

⁶Sị họ̀ ọ anka ịrẹyọyẹ awụ mẹ yà. Re ka wẹ yị zẹẹ ka ò sú isu ozu anị.

⁷Rẹ tamayị ezi Ibiraziriya ana vị Anigiriyadi. Navọ dị wa vayị ayị. Ẹwụrị ọ ọ̀ọ rị ịsa aha ọnya, agụvị ka vị ọ nyayịnẹ sị ẹngụ gụrị mị m mèe zwe agụvị Abịsarọmị ọyịnyara awụ nị.

⁸“Re tamayị Isimeyi ozi Igera Anịbẹnjamịnị ana vi anẹkụra Ibahurimi nịnị. Vị ọ nyị ọ nyayịnẹ mẹ mị isiya ịhị ọnị maa nọ Imahanayimi nị. Ama ọ mẹ̀ va gẹrị ẹmị Ijodani, mâ sị ịrẹha Ẹnẹyịmavara hị́ eku ka mẹ yị vaa sị ụhwọọ wụ̀ ọ.

⁹Ama wẹ yị vaa zẹẹ ka ịsị ọ mẹ avọọ, ọ̀ sị rị kẹnẹ. Mâ yẹ ka wâ yẹ ịrẹyị para avọọ hu, wâ yẹ ịsị a vọrọ ka wa mẹ̀ ẹ. Re ka waa wụ ọ.”

¹⁰Ịjị Idevidi maanị sị ịrẹyị kà, di o sú nị, di e ne e ịnị ẹkụra Idevidi nị.

¹¹Idevidi ọ vị ohinọyị Anisirẹrị mẹ ịrayị ẹbẹẹva. Dị ọ rẹ vị ohinọyị Anihebirọnị mẹ ịrayị ịhịmba nị. Ọ rẹ vị ohinọyị tụ́ Ijerusarẹmị mẹ ịrayị ẹtarẹwụ tụra ẹẹta.

¹²Isoromọnị ọ sị yaayịtẹ ịrẹsụ ode Idevidi ada anị anka ohinọyị. Di o re ka ọnị ộ mẹ̀ ka ohinọyị ọnị ọnị rị ộ jẹẹ ẹtẹẹrẹ nị.

¹³Ẹkụhị ọnya Adonija ozi Ihagiti o ne tu Ịbẹẹsẹba ọnyị Isoromọnị. O mè tù ịzọọ di ọnyị Isoromọnị ka, “Nyaasẹ, a vị â yị nyị ịrẹyịị?” Di Adonija kà, “Eyiye ẹ yị nyị ịrẹyị,

¹⁴ama â nyị ịsa ọnya ọnị ọnị ka ọnị ọ̀ yaanị pè e kà.” Di Ịbatịsẹba ka, “Sị ẹ vẹ ọnọọ kẹ?”

¹⁵Di Adonija ka, “Waa yẹ ka ẹma yaanị vị ohinọyị nị. Ẹmị avaba Anisirẹrị si eyi tụ́ ka ọ vaa vị ohinọyị nị. Ama ohinọyị ọnọọ ọ va sị para mi hu, dị ahịka adẹnyara amị ọ vana rị ọ nị. Mâ yẹ ka Ẹnẹyịmavara ọ vavọọ sì ọ nị.

¹⁶Ama ọyaanị, â nyị ịsa ọnya oni mee họ̀ use anịị hụụnị ụvọ awụ. Navọ asị u yi.” Di Ịbẹtịseba ka ọ̀ọ kà ịrẹyị anị nị.

¹⁷Di Adonija ka, “Aarịhịnị kà a yị Isoromọnị ohinọyị ka ọ̀ navọ ịsị maa dá ịpẹ anị aanị, asị o yi. Ọ̀ navọ ọ̀ sị Abisagi ana vị Anisunami mị dị ma nyị ọ.”

¹⁸Di Ịbatịsẹba ka, “ô zoza, mị vaa kà ụtụ awụụ yị ohinọyị.”

¹⁹Ịzẹyịza di Ịbatịsẹba ne si tù Isoromọnị ohinọyị ka ọnị ọ̀ na kà ụtụ Adonija yọ nị. Di ohinọyị kwẹẹtẹ, ka ọnị ọ̀ na gẹrị ọ nị. Ọ mẹ̀ na sị gẹrị ọ, di ohinọyị tana tụra ẹtẹ dị ọ kụ́ ọ nị. Ịjị ọ sị ọ kụ́ dị ọ varẹma na yaayịtẹ ịnị aga anị nị. Dị ọ rẹ sị aga yị Ịbatịsẹba ọnyị ohinọyị, dị ọnị yaayịtẹ éyi ụvọrị ohinọyị nị.

²⁰Di Ịbatịsẹba ka, “Aarịhịnị ịsa ọnya chee aanị mị ka me họ̀ use anị hụụnị ụvọ awụ nọ. Navọ asị u yị.” Di ohinọyị ka, “Ịnya we họ̀ use de, ka me yi vee yi.”

²¹Di Ịbatịsẹba ka, “Navọ à sị Abisagi ana vị Anisunami yị Adonija adẹnyara awụ dị ọ̀ nyị ọ.”

²²Di Isoromọnị ohinọyị tụ́ ọnyị anị ohi dị ọ ka, “Ho, si ẹ vẹ dị ahịka Abisagi Anisunami kẹnẹ ụ ka à sị yị Adonija nị? Wẹ rẹ kụkụ kà a ka à sị ohinọyịị yọ dị ọ̀ rị ọ; wáá yẹ ka ọnị ọ vị ọzọkụ mị nị? Ẹ yị vị ọnọọ kẹnẹ, wa rẹ yẹ ka Abiyata ana vi ohirẹsụ irehi Ohomorihi ọnịrị Ijowabi ozi Izeruya vị ana sị ọtụ kà a ịrẹma.”

²³Di Isoromọnị ohinọyị va sị Ẹnẹyịmavara hị́ eku dị ọ ka, “Aà vị ka ẹ yị vị ịrẹyị ana Adonija kà aanị ọ vaa vị isu ịrẹsụ anị, asị Ohomorihi zẹẹ ka ò zoza yị mị.

²⁴Ẹnẹyịmavara ọ sị mị jẹẹ, dị ọ mẹ ka ma vị ohinọyị di Idevidi ada amị ịrẹsụ nị. Ọnị ọ sị irehi mi anka ọ mẹ̀ kà a yi Idevidi nị. Ẹnẹyịmavara ọnọọ ọ̀ọ yà ịzọọ, ajịnị Adonija ee sú nị.”

²⁵Ịzẹyịza di Isoromọnị ohinọyị wụsẹ tụ́ Ịbẹnaya ozi Ijehoyada, dị ọ na và ịsa hi Adonija ẹngụ, dị ọ wụ̀ ọ nị.

²⁶Di ohinọyị kà a yị Abiyata ana vi ohirẹsụ irehi Ohomorihi dị ọ ka, “Kwẹẹtẹ wa nọ Anatọtị ịzị ẹtẹ awụ yà, ka vị a vọrọ ka we sú nị. Ama mẹ yị vaa wụ̀ wụ ajịnị agụvị ka ẹwa za apoti ị́zẹzẹ Ẹnẹyịmavara ana nyị yị dị ụ sị tụ́ ọvịdị Idevidi ada amị nị. Avaba ụya ana ada amị rị, vị oni u re pè e rị ọ.”

²⁷Di Isoromọnị dụ Abiyata hụụ ịzọọ ka asị ọ kụkụ vị ohirẹsụ irehi Ohomorihi yi Ẹnẹyịmavara nị. Ịrẹyị ọnọnị ộ mẹ̀ ka ịrẹyị ẹnị Ẹnẹyịmavara kà tụ́ ịrẹsụ irehi Eri ịnị ẹkụra Isiro ọ̀ sẹ.

²⁸Ịnị ịrẹyị ẹnẹnị, Ijowabi vị ana sị ọtụ kà Adonija ịrẹma, ọ yị jẹẹ pè Isoromọnị. Ịjị enube ve si tù Ijowabi ịrẹyị mẹ̀ va zi, di Ijowabi si zwe na ngụ ịnị ajẹngụ Ẹnẹyịmavara, dị ọ na ta ụvọ kú ọpanyị ụta ịsọvọ ana yà ịzọọ nị.

²⁹Dị a na sị ọ kà yị Isoromọnị ohinọyị dị kà Ijowabi o si zwe nọ ịnị ajẹngụ Ẹnẹyịmavara ọ! Ini ụta ịsọvọ ọ hyakụ yà nị. Di Isoromọnị ohinọyị tụ́ Ịbẹnaya ozi Ijehoyada ka ọ̀ na, dị ọ̀ na và ịsa hị́ ọ ẹngụ nị.

³⁰Ịzẹyịza di Ịbẹnaya nọ ịnị ajẹngụ Ẹnẹyịmavara, dị ọ kà yị Ijowabi dị ọ ka, “Ohinọyị ka wa jịnẹ̀ tụ́ ẹhẹ”. Di Ijowabi ka, “Eyiye, ịzẹnị m mee su tụ́ nị”. Di Ịbẹnaya sị ohi varẹma ne tụ́ ohinọyị, dị ọ ka aanị-aanị Ijowabi mè tụ́ mi ohi nọ.

³¹Di ohinọyị ka, “Ộ mẹ̀ kà, wụ vavọọ mẹ̀ ẹ. Và ịsa hi ọ ẹngụ, di we ne e. Ijowabi ộ wụ̀ aza ẹnẹ ẹ̀ yị nyị ịsị ẹ mẹ̀. Wàa vavọọ mẹ̀ ẹ, oponu isu aza ẹnẹẹ sị hụụnị ịrẹsụ amị ọnịrị ịrẹsụ ada amị.

³²Ẹnẹyịmavara va họ̀ ọ oponu aza ọnị ọ wụ. Aza ẹnẹẹ ọnị ọ wụ̀ ọ vị ọnịzẹyịza, dị ẹ rẹ nyị ebira ozoza huna a nị. Ijowabi vị ana sị ụ̀hwọ̀ wụ̀ aza ẹnẹẹ, ama Idevidi ada amị ẹ yị yẹ. Aza ẹnẹẹ ọnị ọ vavọọ wụ ẹ vị Abịna ozi Ineri ana vị ọga isoja Anisirẹrị ọnịrị Amasa ozi Ijeteri ana vị ọga Isoja Anijuda.

³³Ijowabi ọnịrị ezi anị ịrẹma-ịrẹma vị oni oponu aza ẹnẹẹ vaa yà ịrẹsụ ẹnịnị pooro zịna-zịna. Ama Ẹnẹyịmavara vị ana vaa sị ẹngwọọrọ yi Idevidi ọnịrị ezi anị ịrẹma-ịrẹma ne beri aneehi aanị ọnịrị ohinọyị ọnị ọ rị, pooro zịna-zịna.”

³⁴Ịzẹyịza di Ịbẹnaya ozi Ijehoyada ne tù Ijowabi, dị ọ va ịsa hi ọ ẹngụ dị ọ wụ̀ ọ, di o ne tụ́ ini eehi anị ana yà ịnị ọpaapara nị.

³⁵Di ohinọyị si Ịbẹnaya ozi Ijehoyada mẹ ọga isoja dọ Ijowabi ịrẹsụ nị. Di ohinọyị rẹ sị Ịzadọkị mẹ ohirẹsụ irehi Ohomorihi tụ́ udi Abiyata nị.

³⁶Ẹkụhị ọnya di ohinọyị tụ́ na hị́ Isimeyi nị. Ọ mẹ̀ vẹ, di ohinọyị ka, “Na dà irehi tụ́ Ijerusarẹmị, dị wa ra ịzọọ. Asị a nyị ịrayị ọnị u sị jịnẹ hụụ ịzọọ o!

³⁷Ịhị àa vị ka wâ jịnẹ tụ́ ẹhẹ, dị wụ para okuha Ikidironi hu, yẹ o ka vi wee sú nị! Wèe sú, ẹwa vaa rị ịvị ẹngụ awụ.”

³⁸Di Isimeyi tụ́ ohinọyị ohi dị ọ ka, “Taarụ Ohinọyị, ịrẹyị awụ ô zoza. Ụ mẹ̀ yị kà a avọọ, taarụ, avọọ m maa mẹ̀ nị.” Di Isimeyi varẹma nọ Ijerusarẹmị, dị ọ na yà ịzọọ ku ẹtẹẹtẹrẹ nị.

³⁹Ịjị ọ sị gẹ ịrayị ẹẹta ọnị Isimeyi maanị yà Ijerusarẹmị, di ezi ahụ Isimeyi ẹẹva si zwe, di e ne tụ́ ohinọyị Igati ana aā hị́ Akisi ozi Imaka. Di a na kà a yi Isimeyi dị a ka, “Wáá yẹ ka ezi ahụ awụ hi Igati?”

⁴⁰Di Isimeyi kwẹẹtẹ, di o tenyi ịkẹrịkẹtẹ anị di o si hu aa nọ Igati ịda Akisi ka ọnị ò ne sì ezi ahụ anị nị. Isimeyi mẹ̀ vavọọ na, dị ọ na kụ́ ezi ahụ hụrẹ Igati vẹ nị.

⁴¹Dị a va kà a yị Isoromọnị ka Isimeyi ộ hụrẹ Ijerusarẹmị nọ Igati, dị ọ rẹ vavẹ nị.

⁴²Di ohinọyị va tụ́ na hị́ Isimeyi dị ọ ka, “Wáá tamayị ka mâ mẹ ka wa sị Ẹnẹyịmavara hị́ eku dị mị ka wa yẹ ka ịhị wàa jịnẹ tụ́ ẹhẹ dị a nyị ịzị ụ nọ nị, ka vi wee sú ịhị ọnọọ nị? Á vi di wụ kà a mị ịhị ọnọọ ka ịrẹyị ọnị mị ká ô zoza, ka wâ wụ́?

⁴³Sị ẹ vavẹ di wè yi jẹẹ pè eku ọnị ụ sị Ẹnẹyịmavara hị́, di wẹ̀ yị rẹ mẹ ịrẹyị ọnị mị ka wa mẹ?

⁴⁴Ẹwụ ụvọta ộ yẹ ịnị ayị awụ avaba ịsa odivi ọnị ụ mẹ Idevidi ada amị. Avaba ịsa odivi ọnị ụ mẹ avọọ Ẹnẹyịmavara va sị họ̀ wụ.

⁴⁵Ama Ẹnẹyịmavara vị ana vaa mẹ ka ò zee yi emi Isoromọnị ohinọyị. Ọ yị vaa zẹẹ ka ohinọyị oni Idevidi rị ọ nyị ịrẹyị pooro zịna-zịna.”

⁴⁶Di ohinọyị mẹ ọda yị Ịbẹnaya ozi Ijehoyada, dị ọ jịnẹ na dị ọ va ịsa hi Isimeyi ẹngụ, dị o sú nị. Ẹnẹyịmavara ộ mẹ̀ ka ohinọyị oni Isoromọnị rị ọ nyayịnẹ jẹẹ ẹtẹẹtẹrẹ.