Read ebira 1 Ohinọyị 20 Bible Online

1 Ohinọyị 20 - ebira bible

1 Ohinọyị 20

¹Ịnị ụmẹ ọnya â nyị ohinọyị Anasiriya ọnya aanị ana aā hị́ Ịbẹnịhadadị, ụmẹ ọnya dị ọ kụ́ avaba isoja anị gụ nị. Dị a nyị ohinọyị ọsa, ẹnị ohurẹẹwụ tụra ẹẹva ana na vaka a nị. Ẹnịnị ệ nyị umaata ịrẹkụ, dị ẹ na dị ẹ na kara ẹkụra Ịsamarịya, di eyee pè wa kụ̀ ịrẹkụ nị.

²Dị Ịbẹnịhadadị tụ́ ọnụtụ nọ ịnị ẹkụra ne tù Ahabị ana vị ohinọyị Anisirẹrị nị.

³Dị ọ ka ọ̀ na kà a yi Ahabị ka, “Ịbẹnịhadadị ka ma kà a wụ ka wa kụ́ ẹkẹhị ọnịrị igooru awụ va yị ọnị. Ọ rẹ ka wa kụ́ ese ọnịrị ezi ewu ene zoza rẹ va yị ọnị bẹẹ.”

⁴Ịjị a vavọọ sị ọ ka yị Ahabị, dị ọ ka, “Taarụ Ohinọyị, ụ mẹ̀ yị kà a avọọ yọ, ẹmịrị avaba ịsị mị nyị vị awụ.”

⁵Dị ọnụtụ rẹ và nọ ịda Ahabị dị ẹ ka, “Ịbẹnịhadadị ka ma kà a wụ ka ọnị ộ vịdị tụ́ ka wa kụ́ ẹkẹhị, igooru ne beri ese ewu ọnịrị ezi awụ va yọ nị.

⁶Ọ rẹ ka ọnị vaa tụ́ ezi ahụ anị ve tù wụ ụhwọ ẹ vaa gara irehi awụ ọnịrị irehi ezi ahụ awụ re. Ịsa tụra ene èe zee wa eyi, vị ẹnị ẹ vaa kụ́.”

⁷Ịjị ohinọyị Anisirẹrị maanị wụ́ dị ọ va na hị́ ọdọvịdị anẹkụra nị, dị ọ ka è re o, dị ẹ̀ rẹ yẹ ka Ịbẹnịhadadị ee sì ịrẹyị. Ọ kà ộ vịdị tụ́ ka ọnị ọ̀ kụ́ ese anị ne beri ezi anị na vaka ẹkẹhị ọnịrị igooru na yọ nị, ọnị ộ dọ ooho, oni o yi yi.

⁸Dị ọdọvịdị ẹnẹẹ ẹnịrị avaba aza ana vọ tụ́ ohi dị ẹ ka, “Asị u tụ́ ọ ohi, asị a nyị ịsị wu sị naa yọ.”

⁹Di Ahabị va na kà a yị ọnụtụ Ịbẹnịhadadị dị ọ kà, “Na kà a yị ada ayị ohinọyị ka avaba ụtụ ọnị ọ vịdị tụ́ hị́ mị ịpaapa avọọ, mị vaa mẹ, ọnọọ. Ama ụtụ ụpẹ ọhụva ọnọnị, ọ ka hịịn, mẹ yị zụ mẹ̀ ẹ.” Ịzẹyịza dị ọnụtụ ẹnẹẹ varẹma, dị ẹ na kà ụtụ yị Ịbẹnịhadadị nị.

¹⁰Di Ịbẹnịhadadị rẹ tụ́ varẹma ne tù Ahabị, dị ọ ka, “Isoja ọnị maa kụ́ vẹ, àa vị ka aza ịnya-ọza ịnya vee re ezi ká ịnị ẹtẹ Ịsamarịya ene hi ọ ụvọ, asị ori nịnị zẹẹ ka ò zoza mị.”

¹¹Di ohinọyị Anisirẹrị tụ́ ohi dị ọ ka, “Kà ẹ yị wa ka ẹ yị vọrọ ka ọza ana hara ụhwọ ọ̀ọ nyị irenu anka ọza ana vaa ngwa a.”

¹²Ịbẹnịhadadị ọnịrị ohinọyị ọsa vị ene hi ịnị ajẹngụ ee hụ́ eche dị a maanị va kà ụtụ yị wa. Di Ịbẹnịhadadị hí ezi ahụ anị dị ọ ka, “Ọza-ọza ọ̀ jẹẹ aha anị òo zị.” Ịzẹyịza dị ọzọza jẹẹ aha anị kara ẹkụra ọnọọ di eyee zi nị.

¹³Kẹnẹ dị ọnịsẹ ọnya vana kà pe Ahabị ohinọyị Anisirẹrị dị ọ ka, “Ẹnẹyịmavara kà ma kà a wụ ka wẹ́ẹ́ re otomiroku ẹnẹnị? Ọ kà wa yẹ ka ọnị ọ raà kụ́ wa chire wụ ụvọ ajịnị. Ọ kà ẹwụ vaa yẹ ka ọnị ọ vị Ẹnẹyịmavara nị.”

¹⁴Di Ahabị ka, “Ẹnẹ vaa kụ́ aza nọ ịrẹkụ? Dị ọnịsẹ ọnọọ ka Ẹnẹyịmavara kà ezwọọmụha ene hi ịda Ịgọvọnọ ana sị eyi pè okokooro ẹ vaa kụ́ aza nọ ịrẹkụ nị. Di Ahabị re họ̀ use dị ọ ka Ene vịdị vee nyima ịrẹkụ?” Dị ọnịsẹ ọnọọ ka, “Ẹwụụ yọ.”

¹⁵Ịzẹyịza dị Ahabị kụ́ ezwọọmụha ana yà pè Ịgọvọnọ okokooro gụ nị. Ẹnịnị vị ịrẹka tụra ohurẹẹwụ tụra ẹẹva. Ịrẹma ẹnẹẹ, dị Ahabị rẹ kụ́ avaba aza ẹnẹẹ gụ nị, avaba Anisirẹrị nịnị. Ẹnịnị vị akawụ-akawụ oze ẹẹta tụra akahị.

¹⁶Ịnị ụmẹ ọọdụ, di isoja ẹnẹẹ nyima ịrẹkụ nị. Ịjọnọọ, Ịbẹnịhadadị ọnị yà ịnị ajẹngụ o si eche hú, eche aa mẹrị ọ. Ọnị beri ohinọyị ohurẹẹwụ tụra ẹẹva ana aa gụ ọ ụvọ ẹ vavọọ hú eche nị.

¹⁷Ezwọọmụha ene hi ịda Ịgọvọnọ okokooro ẹ vịdị jịnẹ nọ ịrẹkụ nị Ịbẹnịhadadị ộ tụ́ ụtụ, dị a vavẹ va kà a yọ ka, “A nyị isoja ẹnyị ana hụrẹ Ịsamarịya vẹ o!”

¹⁸Di Ịbẹnịhadadị ka, “Aà vị ụsẹ ẹngwọọrọ ẹ yaa zị nị, za wa ireyi-ireyi. Àa rẹ vị ịrẹkụ ẹ kụ́ aa vẹ nị, zị za wa ireyi-ireyi.”

¹⁹Ịjọnọọ ezwọọmụha ene hi ịda Ịgọvọnọ okokooro ẹnị ẹ sị hụụnị ịnị ẹkụra beri isoja ana aa dụ wa ịrẹma.

²⁰Dị ọzọza za ọza ọnị ọnịrịị gẹ ịrẹvụ, dị ọ wụ̀ ọ nị. Di Anisiriya si zwe, dị Anisirẹrị aa dụ wa nị. Di Ịbẹnịhadadị ohinọyị Anịsamarịya hịrẹ umaata anị, di o si zwe beri isoja anị anaā si umaataā kụ̀ ịrẹkụ nị.

²¹Di ohinọyị Anisirẹrị jịnẹ na, dị ọ na wụ umaata ọnịrị aza anaā tụra umaata ẹnẹẹ nị. Vị a nyayịnẹ wụ Anisiriya ẹtẹẹtẹrẹ nị.

²²A mẹ̀ maanị sị ịrẹkụ ọnọnị kụ̀ kẹnẹ, dị ọnịsẹ ọnọọ re tere pè ohinọyị Anisirẹrị dị ọ kà a yọ ka, “Ne tenyi ẹngụ awụ o, di wa yẹ ịsị a vọrọ ka wa mẹ. Yẹ o ka ụmẹ aanị ụpẹ ọsa, ohinọyị Anisiriya aa kụ́ ịrẹkụ vaavẹ ve tù wụ.”

²³Ẹkụhị ọnya di ezi ahụ ohinọyị Anisiriya kà a yọ dị ẹ ka, “Wáá yẹ ka ori Anisirẹrị vị ori ịnị ataba, agụvị avọọ ẹnịnị huna ayị nị. Ama ẹyịrị wa ẹ̀ẹ kụ̀ ịrẹkụ ini ozi, vi yee huna wa nị.

²⁴Ịsị ị vaa mẹ yịị kụ́ ohinọyị ẹnẹnị, dị ọzọza ọ̀ hụrẹ aha anị. Dị ụ kụ́ ọga isoja hi udi ẹnịnị.

²⁵Varẹma kụ́ isoja gụ dị ẹ̀ rụrụ anka ọpa isoja awụ ene sú. Dị ụ rẹ nyị umaata anka ọpa ọnị ụ vịdị nyị ne beri aza ana aa tụra wa dị ẹ̀ rụrụ anka ẹ mẹ̀ vịdị yà. Wàa vavọọ sị mẹ, di ye ne pè wa kụ̀ ịrẹkụ ini ozi di we re, yè yi rè vee huna wa.” Ịzẹyịza Ịbẹnịhadadị ộ dọ ịrẹyị ẹnị ẹ kà dị ọ vavọọ mẹ nị.

²⁶Ịzẹyịza ọ mẹ̀ sị mẹ ịrayị ọnya, di Ịbẹnịhadadị kụ́ Anasiriya, dị ẹ hịrẹ nọ ẹkụra ana aā hị́ Ahwẹkị ka ẹnịrị Anisirẹrị ẹ̀ na kụ̀ ịrẹkụ nị.

²⁷Di a rẹ kụ́ Anisirẹrị gụ nị. Ịjị a sị wa kụ́ gụ, dị ẹ sì ịsọyịrị yị wa di e si hu ka ẹnịrị Anasiriya ẹ̀ na gẹ nị. Anisirẹrị vi ene gù ịrẹkụ ẹnịnị dị ẹ và eyi ka Anasiriya. Dị ahịka vị Anisirẹrị sị mẹẹ anka ozi ẹvụ eweyi ẹẹva avọọ nị. Ama Anasiriya ẹnị vị ana gụ ẹtẹ rụ̀ụ́ kẹnẹ.

²⁸Dị ọza Ohomorihi ọnya aanị kà pè ohinọyị Anisirẹrị, dị ọ kà, “Ẹnẹyịmavara kà ọnị ka Anisiriya ee ro o ka Ẹnẹyịmavara vi ori ịnị ataba, a yi vi ori ini ozi ọ vị. Ọ kà avaba aza otomiroku ẹnẹnị, ọnị vaa kụ́ wa chire wụ ụvọ. Ọ kà ẹwụ nịnị vaa yẹ ka ọnị ọ vị Ẹnẹyịmavara nị.”

²⁹Dị ẹnịnị gù ịrẹkụ và eyi kà ẹngụ, dị ẹ vavọọ hi ịzọọ mẹ ẹkụhị ịhịmba nị. Ịhị ẹ tụ́ ọ ẹkụhị ịhịmba, dị ịrẹkụ nyima nị. Di Anisirẹrị wụ Anisiriya ẹnị akawụ-akawụ oze ẹvarẹwụ ịnị ẹkụhị ọnya nị. Ẹnị ẹnẹẹ vi isoja ahụ.

³⁰Dị Anisiriya ana vọ si zwe nọ ịnị ẹkụra Ahwẹkị nị. Di ugene ọnị re wu za aza ẹnị akawụ-akawụ oze ẹwụrẹta tụra akahị ana vọ nị. Di Ịbẹnịhadadị oni re zwe, dị ọ ne sì aha tẹ ịnị ẹkụra nị.

³¹Di ezi ahụ Ịbẹnịhadadị va kà a yị Ịbẹnịhadadị dị ẹ ka, “wáá yẹ de, ka yâ wụ́ ọ ka ohinọyị Anisirẹrị nịnị vị anaā vayị ọza. Jẹẹ vị ya kụ́ ịta kú ẹngụ anka ọza oni oku sú di ee sụ ùnè anị avọọ. Di ya rẹ kú obo sụ́ ịrẹsụ ayị. Yàa vavọọ sị mẹ, di ye ne tù ohinọyị Anisirẹrị, ịsavọọ asị ẹ wụ̀ wụ.”

³²Ịzẹyịza dị ẹ kụ́ ịta kú ẹngụ anka ọza oni oku sú ene ee sụ ùnè avọọ, dị ẹ rẹ kụ́ obo sụ́ ịrẹsụ, dị ẹnịnị ve tù ohinọyị Anisirẹrị nị. E mè ve si tù ọ dị ẹ ka, “Ozi ịda awụ Ịbẹnịhadadị ka aarịhịnị wa dọ yị tụ́ de!” Di ohinọyị Anisirẹrị ka, “Aanị ka ọ yị yà ịzọọ? Ọyịnyara amị ọ vị nọ!”

³³Aza ẹnẹẹ vị ene vịdị ee si ịsị ẹ vaa sị ụvọ za. Ẹ mẹ̀ wụ́ ka ộ hị́ Ịbẹnịhadadị ọyịnyara anị, dị ẹ wụsẹ ka, “Hịịn, Ịbẹnịhadadị vị ọyịnyara awụ.” Di ohinọyị Anisirẹrị ka na wa na sị ọ vẹ nịnị. Ịzẹyịza di Ịbẹnịhadadị jịnẹ ne tù ọ, dị ọ ka a sị ọ hịrẹ ne tù ọnị ịnị ụkẹkẹ umaata nị.

³⁴Di Ịbẹnịhadadị ka, “Ẹkụra ana ada amị dọ hụụnị ụvọ ada awụ maa và wa ịrẹma wụ. Wa zụ nyị aha ohu tụ́ Ịdamasịkọsị anka ada amị ọnị mẹ̀ rẹ vịdị nyị tụ́ Ịsamarịya.” Di ohinọyị Anisirẹrị ka, “Maa jẹẹ tụ́ ịrẹsụ ịrẹyị ọnị ụ kà aanị, dị ma hụrẹ wụ ụvọ dị waa na.” Ịzẹyịza dị ọnịrị ọ hị́ eku yị ẹngụ, dị ọ hụrẹ ẹ ụvọ ka ọ̀ọ na nị.

³⁵Ẹkụhị ọnya dị ọza ịnya aanị ana vị ọnya ịnị ọnịsẹ nịnị kà a yị ọhụva anị dị ọ ka, “Ẹnẹyịmavara kà ma kà a wụ ka wa nya mị ịsa.” Ama ọza ọnọọ ô yi, ọ yị nya ịsa.

³⁶Dị ọnịsẹ ọnọọ kà a yị ọza ọnọọ dị ọ ka, “Wẹ yị wụ́ ịrẹyị ẹnị Ẹnẹyịmavara kà, agụvị avọọ yẹ ka ụ màa hụụ ịda amị di waa na aanị, idu vị ana aa wụ.” Ịzẹyịza dị ọza ọnọọ hụụ ịda ọnịsẹ ọnọọ dị aa na nị. Ọ màa na, dị idu re e, dị ọ wụ̀ ọ nị.

³⁷Ọnịsẹ ọnọọ o re re ọza ẹnẹsa, dị ọ re ka, “Aarịhịnị nya mị ịsa de!” Ịzẹyịza dị ọza ọnọọ nya a ịsa, dị ọ tụ̀ ọ ụnava nị.

³⁸Dị ọnịsẹ ọnọọ na, dị ọ na jẹẹ enoze ịdị ohinọyị, dị ọ sị ịta kú eyi ka asị a yẹ ọnị nị.

³⁹Ịjị ohinọyị aa paraahu, di ọnịsẹ ọnọọ nowu hị́ ohinọyị, dị ọ ka, “Ẹmị ozi ịda awụ vị ana jịnẹ na kụ̀ ịrẹkụ. Di a nyị isoja ọnya aanị ana si ọza ịnya zwe ve tù mị nị. Dị ọ ka ma sị eyi pe ọza ọnọọ nị. Ọ kà òo vú, ụhwẹ amị a vaa sị dọ ụhwẹ anị ịrẹsụ nị, à yị vị avọọ a vaa dà mị ẹkẹhị enyusẹ akawụrakahị.

⁴⁰A va nyị ịsa ẹnyị-ẹnyị aanị ana dọ mi oro, dị ọza ọnọọ si vu nị.” Di ohinọyị Anisirẹrị tụ́ ohi dị ọ ka, “Ọkarẹyị awụ ọ vị vị ọnọọ nị, wa sị ọkarẹyị ẹngụ awụ mẹ.”

⁴¹Dị ọnịsẹ ọnọọ wụsẹ ngwara ịsa hụụnị eyi anị, dị ohinọyị Anisirẹrị sị yẹ ka ọnya ịnị ọnịsẹ nịnị yọ nị.

⁴²Dị ọnịsẹ ọnọọ ka, “Ẹnẹyịmavara kà ọza ọnị ọnị ka a wụ̀, wa raà hụrẹ ẹ ụvọ ka ọ̀ọ na, agụvị avọọ ụhwẹ awụ a vaa sị dọ ụhwẹ anị ịrẹsụ nị. Aza awụ vị ana a rẹ vaa sị dọ aza anị ịrẹsụ.”

⁴³Di ohinọyị Anisirẹrị si hu aa nọ eehi anị Ịsamarịya, dị ahịka vị ayị anị nyayịnẹ du nị.