Read ebira 1 Ohinọyị 21 Bible Online

1 Ohinọyị 21 - ebira bible

1 Ohinọyị 21

¹Ọ mẹ̀ dà kù ịrẹma ịsa ana vavọọ mẹ aanị a rẹ vana nyị ịrẹyị ọsa. Ịnị ụmẹ ọnya, â nyị ụbazị ọnya aanị. Ọnọrụ ana aā hị́ Ịnabọtị ana vị Anijezirẹrị ọ nyị ụbazị ọnọọ nị. Ụbazị ọnọọ vị ana yà Ijezirẹẹrị ọgụrị irehi Ahabị ana vị ohinọyị Anịsamarịya.

²Ẹkụhị ọnya di Ahabị va kà a yị Ịnabọtị dị ọ ka ọ̀ sị ụbazị ịvayịnị ọnọọ yị ọnị dị ọnị ọọ kụ́ ịsẹpẹẹ tụ́ ọ, ka agụvị ka ộ gụrị irehi anị. Ahabị ka ọnị vaa sị ụbazị ene zoza hu avọọ yọ, à yị vị avọọ òo sì, dị ọnị si ọ ụta.

³Di Ịnabọtị tụ́ Ahabị ohi dị ọ ka asị Ẹnẹyịmavara zẹẹ ka ọnị ọ̀ sị ogu ohiku anị dị ọnị ọ̀ sị yọ.

⁴Ahabị mẹ̀ vavọọ wụ́ ịrẹyị ọnị Ịnabọtị Anijezirẹrị kà, ka ọnị ọ yị zụ si ogu ohiku anị yọ, ayị anị o si du, di o si hu aa nọ ini eehi nị. Ahabị mè tù ini eehi, dị ọ na hụtụ ịnị ịbẹẹdị anị, dị ọ và eyi kà aha ọsa, dị ọ ka ọnị ọ yị rị ịsa nị.

⁵Di Ijezebẹrị ose anị vavẹ ve tù ọ nị, dị ọ ka, “Sị ẹ vẹ dị wụ maanị vara eyihi, dị wụ wẹ́ yị rị ịsa?”

⁶Di Ahabị kà a yị ose anị dị ọ ka, “Mâ kà a yị Ịnabọtị Anijezirẹrị ka ọ̀ sị ụbazị anị mị di me si ọ ụta, à yị vị avọọ òo sì di ma si ụbazị ọsa dọ ọ ịrẹsụ yọ, ama ọ ka ọnị ọ yị sị ụbazị anị yị mị.”

⁷Di Ijezebẹrị ose anị tụ́ ohi dị ọ ka, “Wáá yẹ ka ẹwa vị ohinọyị tụra avaba Isirẹrị nị? Kwẹẹtẹ dị wa rị ịsa, dị wa sị ayị awụ nẹtẹ. Ẹmị vaa sị ụbazị Ịnabọtị Anijezirẹrị ọnọọ wụ.”

⁸Di Ijezebẹrị chẹrẹ iwe, dị ọ sị ịrẹha Ahabị tụ́ ọ, dị ọ sị ịsa ana Ahabị sịị̄ sị ụvọ tụ́ ini iwe tụ́ ọ nị. Dị ọ si iwe ọnọọ tụ́ hi ọdọvịdị Anisirẹrị ana vị aza ẹnị eyi yẹ ịnị ẹkụra ẹnịnị ana ra pè Ịnabọtị nị.

⁹Dị ọ chẹrẹ ẹ tụ́ ini iwe ọnọọ ka, “Kà a ka ọzọza ọ̀ sị awẹ, dị wa sị Ịnabọtị yaayịtẹ udi ohirẹsụ aza ẹnẹẹ.

¹⁰Dị ụ kụ́ aza kẹnẹ-kẹnẹ ẹẹva pè Ịnabọtị, dị aza ẹnẹẹ è cheeche kú ọ ka ộ kụ̀ Ohomorihi ọnịrị ohinọyị ụhụ nị. Di ụ sị ọ jịnẹ tụ́ ẹhẹ, di è ne e ịrẹta dị à wụ ọ.”

¹¹Ịzẹyịza dị ọdọvịdị ịnị ẹkụra eni eyi yẹ ana ra pè Ịnabọtị vavọọ mẹ anka Ijezebẹrị mẹ̀ tụ́ hi wa nị.

¹²Ẹ ka avaba aza ẹ sị awẹ, dị ẹ sị Ịnabọtị yaayịtẹ udi ọdọvịdị.

¹³Di aza kẹnẹ-kẹnẹ ẹyịva ẹnẹẹ vẹ, dị ẹ va yaayịtẹ pè Ịnabọtị nị. Dị ẹ yà eyi aza ana gụ, di e yee cheeche kú Ịnabọtị ka ộ kụ̀ Ohomorihi ọnịrị ohinọyị ụhụ nị. Di a sị Ịnabọtị jịnẹ hụụnị ẹkụra, di e ne e ịrẹta, di o sú nị.

¹⁴Ịjị ẹ sị ọ wụ, dị ẹ tụ́ ne tù Ijezebẹrị dị ẹ ka a si Ịnabọtị ne ịrẹta, o wusu.

¹⁵Ijezebẹrị mẹ̀ wụ́ ka a si Ịnabọtị ne ịrẹta, ô wusu, dị ọ na kà a yi Ahabị dị ọ ka, “kwẹẹtẹ dị wa na sị ụbazị Ịnabọtị Anijezirẹrị oni o yi ka ọnị ọ yị ná wu. Ịnabọtị ọ yị kụkụ yà ịzọọ, ô wusu.”

¹⁶Ahabị mẹ̀ wụ́ ka Ịnabọtị ô wusu, dị ọ kwẹẹtẹ di o si hu ee chi nọ ịnị ụbazị Ịnabọtị Anijezirẹrị ka ọnị ọ̀ na sị ọ nị.

¹⁷Ịnị ụmẹ ọnọọ dị Ẹnẹyịmavara na kà a yi Erija ana vi Anitisibi dị ọ ka

¹⁸“Kwẹẹtẹ, di we chi na gẹrị Ahabị ana vi ohinọyị Anisirẹrị ana ra Ịsamarịya. Ọ na sị ngụ ịnị ụbazị Ịnabọtị, o si hu aa naa sị ụbazị ọnọọ, dị ọ̀ sị mẹ aanị.

¹⁹Wèe tù ịzọọ dị wụ kà a yọ ka, ‘Ẹnẹyịmavara kà wa kà a yọ ka ọ sị ọza wụ̀, ọ rẹ raà kụ́ ogu anị. Rẹ kà a yọ ka Ẹnẹyịmavara kà ịzị irezi yà rèé anya Ịnabọtị avọọ, ịzọọ irezi rẹ vaa yàa rèé anya anị bẹẹ nị.’ ”

²⁰Ịjị Erija maanị na kà ụtụ yị Ahabị, dị Ahabị tụ́ ohi dị ọ ka, “We re si mi ree, ẹwụ ọnịvị amị?” Di Erija ka, “Hiin, me si wu re, agụvị ka wa sị ẹngụ awụ ná tụ́ ini ebira odivi ọnị waa mẹ ini eyi Ẹnẹyịmavara.

²¹Ẹnẹyịmavara kà wa yẹ ka ọnị aa kụ́ ịrẹyị odivi vee kú wu ịrẹsụ, dị ọnị sị wụ hụrẹ oze. Ọ kà avaba ezi ọnọrụ awụ vị ọnị vaa wụ̀ hụrẹ Isirẹrị, hi ozi, hi ọrịhị.

²²Irehi awụ vị ọnị ọnị vaa mẹ anka irehi Ijerobowami ozi Ịnabọtị ọnịrị irehi Asa ozi Ahaya. Ọ kà ọnị vavọọ vaa mẹ agụvị ayị ọnị wụ mẹ kụ́ ọnị ọnịrị ebira odivi ọnị Anisirẹrị mẹ.

²³Ẹnẹyịmavara rẹ ka ma kà a yi Ijezebẹrị bẹẹ ka irezi ọ vaa rị oku Ijezebẹrị ini ozi Ijezirẹẹrị nị.

²⁴Ọ kà aza Ahabị ene èe sú ịnị ẹkụra, vi oni irezi vaa rị oku anị. Ene èe ve ne sú hi ịnị avị vị ọnị ụba vaa rị oku anị.”

²⁵Ịzẹyịza ẹ yị nyị ẹngụ Ahabị ana ahịka ộ ná ẹngụ anị tụ́ ini ebira odivi ini eyi Ẹnẹyịmavara. Ijezebẹrị ose anị ọ vavọọ aa tụ́ ọ ịrẹyị ka ọ̀ọ mẹ̀ ebira odivi nị.

²⁶Ahabị ộ mẹ̀ ebira odivi ẹnẹmẹhị, ọnị ọ hyakụ hẹkẹ ori huna Anamọrị ẹnị Ẹnẹyịmavara dụ kwooze yị Anisirẹrị.

²⁷Ahabị mẹ̀ maanị wụ́ ịrẹyị ẹnẹnị, dị ọ za ịta anị dị ọ nà a nị. Dị ọ sị ịta kú ẹngụ ọ́za oni oku sú avọọ, dị aa ba awẹ, dị ọ hụtụ tụ́ ịnị atịtọ nị. Di ahịka vị ọ kụkụ aa zi siisii nị.

²⁸Ẹnẹyịmavara mẹ̀ vavọọ re e, dị ọ va na kà a yị Erija Anitisibi

²⁹dị ọ ka, “Me re ka Ahabị ộ kà ẹngụ anị chi. Ka ộ maanị kà ẹngụ anị chi, mẹ yị kụkụ vaa kụ́ ịrẹyị odivi vee kú ọ ịrẹsụ ịnị ụmẹ aanị, ama ịnị ụmẹ ozi anị mị vaa kụ́ ịrẹyị ọnọọ vee kú irehi anị ịrẹsụ nị.”