Read ebira 1 Ohinọyị 22 Bible Online

1 Ohinọyị 22 - ebira bible

1 Ohinọyị 22

¹Anisirẹrị ọnịrị Anisiriya ê hi ẹtẹ pooro mẹ ịrayị ẹẹta, e yi pè ẹngụ kụ̀ ịrẹkụ

²Ịnị ịrayị ọnya kẹnẹ, ọnọọ ọ tụ́ ọ ịrayị ọhụta ẹnị ẹ vavọọ hi ẹtẹ nị, di Ijehosahwati ana vị ohinọyị Anijuda ne tù ohinọyị Anisirẹrị nị.

³Ọ mẹ̀ vavọọ ne si tù ọ, di ohinọyị Anisirẹrị va hị́ ezi ahụ anị dị ọ ka, “Wáá va na yẹ nịnị ka ẹya nyị Ịramọtị-Igiriyadi nị? Mê ro ka â vọrọ ka ya na dọ ẹtẹ ọnọọ hụụnị ụvọ ohinọyị Anisiriya.” Di ohinọyị Anisirẹrị va kà a yi Ijehosahwati dị ọ ka, “Ụ wáá va saasa mị dị ya kụ́ ịrẹkụ ne tù Ịramọtị-Igiriyadi?”

⁴Di Ijehosahwati tụ́ ohinọyị Anisirẹrị ohi dị ọ ka, “Ẹmịrị ẹwụ vị ọnya, aza ayị, vị ọnya, umaata ayị rẹ vị ọnya.”

⁵Di Ijehosahwati va kà a yị ohinọyị Anisirẹrị dị ọ kà, “Aarịhịnị we rè vịdị họ̀ use da, dị à yẹ Ẹnẹyịmavara mẹ̀ kà.”

⁶Ịzẹyịza dị ohinọyị Anisirẹrị hara ọnịsẹ nịnị gụ nị, Ẹnịnị ê tù akava. Ohinọyị Anisirẹrị mẹ̀ vavọọ raà kụ́ wa gụ, dị ọ họ̀ wa dị ọ ka, “Máá nọ Ịramọtị-Igiriyadi, di me ne pè wa kụ̀ ịrẹkụ, à vị asị mị nọ?” Dị avaba ẹnịnị ka, “Wa na de, ka Ẹnẹyịmavara va sị wa chire wu ụvọ.”

⁷Di Ijehosahwati ve họ̀ use dị ọ ka, “Aanị ka ẹ yị kụkụ nyị ọnịsẹ Ẹnẹyịmavara ọsa ịzẹnị, dị à rẹ họ̀ ọ use?”

⁸Di ohinọyị Anisirẹrị kà a yị Ijehosahwati dị ọ ka, “A nyị nyị ọza ịnya ana vọ ọnị ị zụ họ̀ use ka Ẹnẹyịmavara mẹ̀ kà. Ama ayị ọnọrụ ọnọọ vị anaā kụ́ mị, agụvị ka ọ mā kà ịsẹ ọyịza mị, à yị vị odivi. Ọnọrụ ọnọọ ọ vị Imikaya ana vi ozi Imira nị.” Di Ijehosahwati va kà a yị ohinọyị dị ọ kà, “Asị ụ vavọọ kà dè, ohinọyị.”

⁹Di ohinọyị va hị́ ọga isoja ọnya dị ọ ka ọ̀ wụsẹ na hị́ Imikaya ozi Imira vẹ nị.

¹⁰Ịjọnọọ ohinọyị Anisirẹrị ọnịrị Ijehosahwati ana vi ohinọyị Anijuda vi ana yaayịtẹ, di ọzọza yà ịnị aga anị nị. Ọza-ọza vi ene chire awuru di e hi ịzị eē tụ́ ayị ini enoze ana na ngụ ịnị ẹkụra. Dị avaba ọnịsẹ hí ọvịdị ẹnịnị dị ọzọza aa kà ịsẹ nị.

¹¹Di Izedekaya ozi Ikenaana ọnị sị enyusẹ ọnya aanị, dị ọ sị mẹ ọpanyị nị. Ọ mẹ̀ sị ọ mẹ dị ọ ka, “Ẹnẹyịmavara kà ọpa ọnọnị wụ vaa sị tụ́ Anịsamarịya pooro di we vú wa ẹtẹ nị.”

¹²Dị avaba ọnịsẹ ana vọ ẹnị rẹ vavọọ kà ịsẹ dị ẹ ka, “Waa nọ Ịramọtị-Igiriyadi ka Ẹnẹyịmavara vaa mẹ ka we huna aza ẹnẹẹ.”

¹³Ịjị ọnụtụ ana a tụ́ ka ọ̀ na hị́ Imika tù ịzọọ dị ọ kà a yị Imika dị ọ ka, “Batọ ma kà ịrẹyị ọnya wụ o! Avaba ọnịsẹ e ne hi ịzẹnị vị ana sị irenu tẹ ọnya ka ohinọyị ọ vaa nyị ehuna ịnị ịrẹkụ ọnọnị nị. Aarịhịnị ẹwụrị wa ọ̀ sị irenu tẹ ọnya, dị ẹwa rẹ kà ọyịza yị ohinọyị.”

¹⁴Di Imikaya ka, “Mâ sị Ẹnẹyịmavara hị́ eku ka ịsa tụra ịsa ẹnị Ẹnẹyịmavara ọ̀ọ kà mị kẹnẹ, mị vaa kà nị.”

¹⁵Ịzẹyịza dị Imika ve si tù ohinọyị nị. Di ohinọyị kà, “Imikaya, ahẹ, yáá nọ Ịramọtị-Igiriyadi di ye ne pe wa kụ̀ ịrẹkụ, à vị asị ị nọ?” Di Imikaya ka, “Wa na, ka ẹ yị vaa nyị ịrẹyị. Ẹnẹyịmavara vaa sị waa chire wụ ụvọ.”

¹⁶Di ohinọyị ka, “Hóò, ụpẹ ịrịka yà u wee si ka ma sị Ẹnẹyịmavara tụra wụ ka wa kà ịzẹyịza kẹnẹ mị?”

¹⁷Di Imikaya va ka, “Mê re ka avaba Anisirẹrị ẹ sị gara hi ịnị ataba anka atẹmẹ ẹnẹ ẹ̀ yị nyị ọza ene ee sere wa avọọ. Ẹnẹyịmavara kà ẹnịnị ẹ yị nyị ohirẹsụ. Ọ kà ẹnịnị ẹ̀ varẹma ẹ̀ẹ nọ eehi ẹnịnị ịnị ẹngwọọrọ.”

¹⁸Di ohinọyị Anisirẹrị kà a yi Ijehosahwati dị ọ ka, “Mâ vịdị sị sị ọ kà wụ ka ọnọrụ ọnọnị ọ mā ka ịsẹ ọyịza mị pàá à yị vi odivi.”

¹⁹Di Imikaya aa kịị kà ịrẹyị anị dị ọ ka, “Batọ ọ dị wụ́ ịrẹyị ẹnị Ẹnẹyịmavara kà. Ụmẹ ọnya mê re Ẹnẹyịmavara kà ộ yaayịtẹ ịnị aga anị, di avaba anggẹẹrị anị ẹbẹẹba jẹẹ pè e eyi ụvọrị ọnịrị eyi ụvọha anị nị.

²⁰Dị Ẹnẹyịmavara ve họ̀ use ka eni e ve nee vene Ahabị ka ọ̀ hịrẹ nọ Ịramọtị-Igiriyadi di o ne sú ịzọọ. Dị anggẹẹrị ọzọza aa kà a ka aanị, aanị ẹnị mẹ vaa kà nị.

²¹Dị ụhwẹ ọnya va jịnẹ vẹ dị ọ va jẹẹ ọvịdị Ẹnẹyịmavara, dị ọ ka ọnị ve ne vene Ahabị nị. Dị Ẹnẹyịmavara va họ̀ ọ ka ọ mẹ mẹ vaa mẹ̀ ẹ?

²²Dị ọ ka ọnị vaa jịnẹ tụ́ ẹhẹ, dị ọnị na mẹ ka avaba ọnịsẹ Ahabị ee cheeche. Dị Ẹnẹyịmavara kà ọ̀ jịnẹ na dị ọ vavọọ na mẹ, ka ụsẹ anị vee zoza.

²³Wéē re aanị ka Ẹnẹyịmavara ọ mẹ ka avaba ọnịsẹ awụ ẹnẹnị ee cheeche nị. Ẹnẹyịmavara ọnị ụvọta ọ kà a ka ịrẹyị odivi e vee tù wu nị.”

²⁴Di Izedekaya ozi Ikanaani tere pè Imikaya, dị ọ kụ́ arụhwọtọ hi ọ eyi nị. Dị ọ ka, “Ụhwẹ Ẹnẹyịmavara mẹmẹ zụ para mị hu, dị ọ̀ va kà ịrẹyị wụ?”

²⁵Di Imikaya ka, “Ịhị wèe si nyima ee zwe hụụnị aku ọnyị naa tẹ ịnị aku ọsa, u vee re.”

²⁶Di ohinọyị Anisirẹrị ka, “Za Imikaya ọnọọ nịnị, dị wa sị ọ varẹma nọ Amọnị ịda Ịgọvọnọ ana sị eyi pe ẹkụra ọnịrị ịda Ijowasi ana vị ozi ohinọyị.

²⁷Wèe tù ịzọọ dị ụ kà a ka mị ka à sị ọ tụ́ ịnị ẹngwa, dị waa dà ịsa kiiki yọ, dị wa rẹẹ sị enyi chee yọ. Ọ̀ vavọọ yà ịzọọ pooro dị ma vavẹ ịnị ẹngwọọrọ.”

²⁸Di Imikaya ka, “Àa vị ka wa raà vavẹ ịnị ẹngwọọrọ, yẹ ka ẹ yị vị Ẹnẹyịmavara ọ kà ịrẹyị mị.” Dị ọ rẹ ka, “Avaba ẹwụ nịnị aza ẹnẹnị ẹ̀ wụ́ o!”

²⁹Ịzẹyịza dị ohinọyị Anisirẹrị ọnịrị Ijehosahwati si hu aa nọ Ịramọtị-Igiriyadi nị.

³⁰Di Ahabị ka Ijehosahwati ọ̀ mẹ apẹ ka ọza ẹnẹsa ọnị vị nị, di ò chire awuru anị dị ọ̀ọ nọ ịrẹkụ. Di ohinọyị Anisirẹrị ọnị rẹ mẹ ẹngụ anka ọza ẹnẹsa kẹnẹ di o si hu aa nọ ịrẹkụ nị.

³¹Ohinọyị Anisiriya ọnị ọ nyị aza ẹnị ohurẹẹwụ tụra ẹẹva anaā sịị umaata kụ̀ ịrẹkụ. Dị ọ vịdị sị ọ ka yị ọga isoja anị ẹnẹẹ ka asị a nyị ọza ẹnẹsa ẹnị ẹmịrịị kụ̀ ịrẹkụ à yị vị ohinọyị Anisirẹrị ọnị ịnya kẹnẹ.

³²Ọga isoja anaā sịị umaata kụ̀ ịrẹkụ ọnị mè yi re Ijehosahwati kẹnẹ, dị ẹ ka mba, ohinọyị Anisirẹrị yị, dị ẹ yaa dụ ọ ka ẹnịrị ọ ẹ̀ gẹ ịrẹkụ nị. Ẹ mẹ̀ vavọọ aa dụ ọ, di Ijehosahwati ọnị nowu za ẹtẹ nị.

³³Ịjị ọga isoja anaā si umaata kụ̀ ịrẹkụ re ka ẹ yị vị ohinọyị Anisirẹrị ọ vị, dị ẹ và ịrẹma anị nị.

³⁴Di ọza ịnya aanị maanị yi ne ọpa anị araara kẹnẹ nị, dị ahịka avọọ o mè yi ne che ohinọyị Anisirẹrị ịnị akakana ịzị awuru ịrẹkụ anị ọnịrị okurachị anị na gẹ nị. Dị ohinọyị Anisirẹrị wụsẹ ka ẹ yị ọza ana aa sị ụkẹkẹ anịị zị dị ọ kà, “Wụsẹ vara eyi, wa sị mị jịnẹ hụụnị udi ịrẹkụ ịzẹnị ka a sị mụ tụ̀ ụnava.”

³⁵Ịhị ọnọọ ịrẹkụ vị ene nyị anyị. Ohinọyị ọnị vị ana jẹẹ pè ụkẹkẹ dị ọ và eyi kà Asiriya nị. Ini ụmẹ oruva, ohinọyị ô wusu, dị anị maanị sì và kú ọchị ahụ ụkẹkẹ ọnọọ nị.

³⁶Ịnị ụmẹ oruva, ọyị màa ngụ ẹtẹ, di e vene nowu udi ịrẹkụ dị a ka, “Ọza-ọza ọ̀ọ nọ ẹkụra anị oo, dị ọzọza òo nọ eehi anị!”

³⁷Ohinọyị mẹ̀ vavọọ wusu, dị a sị ọ vẹ Ịsamarịya nị. Dị ahịka Ịsamarịya ịzọọ e ne e tụ́ nị.

³⁸E mè si o ne, dị a sị ịkẹkẹ anị ka à na nyịna a ịnị adagu Ịsamarịya nị. Di irezi hi ịzọọ, di eyee rèé ohinọyị nị. Dị ọsẹrẹka nịnị ẹnị aa nyịna ẹngụ ẹnịnị ịzọọ nị. Avọọ Ẹnẹyịmavara mẹ̀ kà a ka ọ vaa yà nị.

³⁹Avaba ịrẹyị Ahabị ana vọ ọnịrị avaba ịsa ọnị ọ mẹ ọnịrị irehi ọnị ọ kụ́ ike dà ne beri ẹkụra ọnị ọ dà, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ini oze ohinọyị Anisirẹrị.

⁴⁰Ahabị ô sú di e ne e pè ohiku anị nị, di ozi anị Ahaziya rị ohinọyị dọ ọ ịrẹsụ nị.

⁴¹Ịnị ịrayị ana tụ́ ọ ịrayị ẹẹna ana Ahabị sị vị ohinọyị tụ́ Isirẹrị, ịnị ịrayị ọnọọ Ijehosahwati sị rị ohinọyị Anijuda nị.

⁴²Ijehosahwati vị ịrayị ohurẹẹwụ tụra ẹẹhị dị ọ va rị ohinọyị. Ọ mẹ ohinọyị Ijerusarẹmị gụ ịrayị ẹwụrẹhị. Ịrẹha ọnya anị ọ rị Azuba nị. Azuba vi ozi Isirahi.

⁴³Avaba ebira ana Asa ada anị mẹ, ọnị rẹ mẹ nị, ọ yị jesi hụrẹ oze ada anị. Ộ mẹ̀ ebira ana vọrọ ini eyi Ẹnẹyịmavara.

⁴⁴Ama ọ yị kụ́ aha ọnẹba ẹnẹẹ kwooze, aza vị ana aa nị nọ ịzọọ naa mẹ̀ ịsọvọ, dị ẹ yaa rị eturare ịra.

⁴⁵Nyị ịrazị ịnị akakana Ijehosahwati ọnịrị ohinọyị Anisirẹrị.

⁴⁶Ịrẹyị Ijehosahwati ana vọ ọnịrị ọ mẹ mẹ nyị ụkata ne beri ịrẹkụ ọnị ọ kụ̀, vị ana a chẹrẹ tụ̀ ini iwe ịsị ẹ mẹ ẹkụhị-ẹkụhị ini oze ohinọyị Anijuda.

⁴⁷Avaba ọsẹrẹka ọnọrụ ene hi ini irehi Ohomorihi ịnị ụmẹ ana Asa ada Ijehosahwati sị yà ẹhẹ vị oni Ijehosahwati kụ́ hụụnị ẹtẹ ọnọọ.

⁴⁸Ịnị ụmẹ ọnọọ, ẹ yị nyị ohinọyị tụ́ Edomi. Ọgụ ọhụva ohinọyị kẹnẹ aa mẹ ohinọyị nị.

⁴⁹Ẹkụhị ọnya dị Amaziya va hị́ Ijehosahwati dị ọ ka, “jẹẹ ezi ahụ amị ọnịrị ezi ahụ awụ è dudu ngụ ẹpa ẹnẹẹ na.” Di Ijehosahwati yi nị. Ijehosahwati ộ mẹ̀ ẹpa Itasisi, ka ẹ̀ẹ nọ Ohwiri na kụ́ igooru. Ama ẹpa ẹnẹẹ ẹ rẹ vaa nọ Ohwiri agụvị ka ẹ mẹ̀ tù ịzị aā hị́ Engeberi, ịzọọ ẹ chaka va hi nị.

⁵⁰Ijehosahwati ô sú, di e ne e pè ohiku anị ịnị ẹkụra Idevidi ada anị nị. Dị ahịka Ijehorami ozi anị ọ rị ohinọyị dọ ọ ịrẹsụ nị.

⁵¹Ahaziya ozi Ahabị ộ rị ohinọyị ịnị ịrayị ẹwụrịhịmba ọnị Ijehosahwati vị ohinọyị ẹtẹ Ijuda. Ahaziya vị ana mẹ̀ ohinọyị ịrayị ẹẹva Ịsamarịya.

⁵²Ộ mẹ ịvị hi Ẹnẹyịmavara agụvị ka ọ saasa ebira odivi ada anị Ahabị, ọnyị anị Ijezebẹrị ọnịrị Ijerobowami ana kụ Anisirẹrị nịnị mẹ ịvị.

⁵³Ọ́ hẹkẹ ori Ịbaarị anka ada anị mẹ vịdị mẹ̀ ana mẹ ayị kụ́ Ẹnẹyịmavara Ohomorihi Anisirẹrị.