Read ebira 1 Ohinọyị 3 Bible Online

1 Ohinọyị 3 - ebira bible

1 Ohinọyị 3

¹Ịnị ụmẹ ọnya Isoromọnị ọ na nyị ozi ohinọyị Ijipiti ana aā hí Ihwarawo, dị ọ kụkụ sị vi ọyẹ ohinọyị ọnọọ nị. Di Isoromọnị si ozi Ihwarawo ọnọọ vẹ ịnị ẹkụra Idevidi nị. Ộ sị ọ vẹ ka ọ̀ yà ịzọọ di irehi anị ọnịrị irehi Ẹnẹyịmavara ne chire ọvọ ana kara Ijerusarẹmị ọ̀ ta dà.

²Ama aza ẹnẹẹ vị ana a mịị mẹ̀ ịsọvọ aha ọnẹba agụvị ka ịnị ụmẹ ọnọọ ọza ộ yị dà irehi yị Ẹnẹyịmavara.

³Isoromọnị vị ana nyayịnẹ sì ịrẹyị Ẹnẹyịmavara dị ọ saasa ọda anị anka Idevidi ada anị mẹ̀ mẹ. Ama aha ọnẹba ọnị raa mịị mẹ̀ ịsọvọ, dị aa rị eturare ịra ịzọọ nị.

⁴Ẹkụhị ọnya ohinọyị ộ nọ Igibiya ka ọnị ọ̀ na mẹ̀ ịsọvọ ịzọọ. Igibiya ọnọọ ọ vị aha ọnẹba hu keekere nị. Uye oni Isoromọnị sị mẹ̀ ịsọvọ ọnị ọ rị ịra ịrẹsụ atakuji, ịsọvọ ọnọọ vị akahị.

⁵Isoromọnị mẹ̀ yà Igibiya ịzọọ ẹkụhị ọnya, dị Ẹnẹyịmavara sị ẹngụ zụ̀ ọ ịnị ụra ịrahụ nị. Di Ohomorihi ka, “Huse ịsị wee si ka ma sị wụ!”

⁶Di Isoromọnị ka, “Wa raà vayị Idevidi ada amị ana vị ozi ahụ awụ ẹtẹẹtẹrẹ anka ọnị ịnyẹmba mẹ̀ mẹ̀ ebira ini eyi awụ. Wâ yẹ ka ộ mẹ̀ ịzẹyịza ọnịrị ịsa ana vọrọ, dị ọ rẹ nyị ayị ana vọrọ ini eyi awụ nị. Avọọ ẹwụ mẹ̀ rẹ nyayịnẹ vayị anị dị u si ozi yọ ka ọ̀ rị ohinọyị tụ́ udi anị ajịnị nị.

⁷Ẹnẹyịmavara Ohomorihi amị, ẹwa mẹ ka ẹmị ozi ahụ awụ ọ rị ohinọyị dọ ịrẹsụ Idevidi ada amị nị. Ama ẹmị vị ozweyi. Ẹ yị nyị ịsị mị yẹ.

⁸Ẹmị ozi ahụ awụ vị ana yà ini akakana aza awụ ọnị ụ nyị ka ẹ̀ vị awụ. Aza ẹ rụrụ ẹ vị nị. Ọza ọ yị hyakụ zụ za wa ịrịka ẹ mẹ rụrụ pooro.

⁹Aarịhịnị navọ wa sị ịrẹyọyẹ yị mị dị ma zụ yẹ irenyi ana yà ịnị akakana ọyịza ọnịrị odivi. À yị vị avọọ ẹnẹ zụ mẹ̀ ọkarẹyị aza awụ ana maanị dẹngụ aanị?”

¹⁰Ayị Ẹnẹyịmavara ô hine ka Isoromọnị ô họ̀ use ịrọọyẹ.

¹¹Di Ohomorihi kà a yi Isoromọnị dị ọ kà, “Ka wâ maanị họ̀ use ẹngụ ịrẹyị ọnọnị, dị wẹ̀ yị kà a ka ma mẹ wụ kú orubo, à vị ka ma vara wụ ọnyẹkẹhị, à vị ka me hu ọnịvị awụ ẹtẹ wụ, ama ụ ka ma sị ịrẹyọyẹ wụ dị wa zụ mẹ̀ ọkarẹyị ana vọrọ.

¹²Re! Ịsị u họ̀ use aanị, maa mẹ̀ ẹ wụ. Mị vaa sị ịrẹyọyẹ ọnịrị eyohweyi yị wụ. Ụ vaa yẹ ịrẹyị ana ahịka ẹ yị nyị ẹngụ awụ da. Ịrẹma awụ, ẹ yị mā rẹ vana nyị ẹngụ awụ.

¹³Ịsị wẹ̀ yị hyakụ họ̀ use anị bẹẹ vị ọnị maa sịị tụ́ ọ wụ. Wụ vaa nyị ẹkẹhị, dị ụ nyị ụbanyị ana ahịka ẹ yị nyị ohinọyị ana vaa vị ẹngụ awụ pooro dị wa hụrị ẹhẹ.

¹⁴Huni ẹsẹnị, wàa và tụra oze amị, ka wa sị eyi pè ọda amị ọnịrị ịsị mị ka à mẹ anka Idevidi ada awụ mẹ̀ mẹ, mị vaa mẹ ka we kú orubo.”

¹⁵Di Isoromọnị vana ha giri, dị ọ sị yẹ ka ụra ọnị aa ra nị. Dị ọ kwẹẹtẹ dị ọ vẹ Ijerusarẹmị, dị ọ va jẹẹ ọvịdị apoti Ịzẹzẹ Ananyị yị dị ọ mẹ̀ ịsọvọ ana aā rị ịra ọnịrị ịsọvọ ẹngwọọrọ, dị ọ mẹ̀ ịsọyịrị yị avaba ezi ahụ anị nị.

¹⁶Ẹkụhị ọnya aa nyị anyẹnẹẹ ẹẹva ana vọ ọsẹrẹka ana kụ́ ẹngụ vẹ ịda ohinọyị.

¹⁷E mè ve si tù ohinọyị, dị ọnya ịnị anẹẹ ẹnẹẹ ka, “Ada ayị taarụ, Ẹmịrị ọnẹẹ ọnọnị vi ene dudu ra ini eehi ọnya, dị mị vaa ma ozi ọnọrụ ini eehi ọnọọ nị.

¹⁸Ịhyẹgwẹta ọnị mị ma ozi ọnị rẹ ma ozi ọnọrụ nị. Ẹyịva ọnọnị kẹnẹ ọ ra vabẹ nị. Ẹ yị nyị ọza ẹnẹsa ana ra vaka yị.

¹⁹Ịrahụ ẹkụhị ọnya, ọnẹẹ ọnọnị ô nyeeyi mẹrẹ ara vaya ozi anị, di ó su nị.

²⁰Ịjị ọ ha kwẹẹtẹ agẹvịrahụ, dị ọ sị ozi emi vara aanị ene su, dị ọ sị na hụtụ pè ẹngụ anị, dị ọ sị ani va hụtụ pè mi nị.

²¹Eyi mẹ̀ sị nị ẹnẹnẹ, dị ẹmị ha ka ma sị ịrẹva yi ozi emi, dị mị vee tu oku ozi ene su ni. Dị mị va zama oku ozi re, di mi re ka ẹ yị vi ozi emi nị.”

²²Dị ọnẹẹ ọsa ka, “Eyiye, ozi ana yara vị ozi emi, ene su ọ vị awụ nị.” Dị ọnịpaapa va ohi yọ ka, “Ireche, ozi ene su ọ vị awụ, ozi ana yara ọ vị amị nị.” Avọọ ẹnịnị maa kụ ọ ku ẹngụ ụvọ ọvịdị ohinọyị nị.

²³Di ohinọyị ka, “Waa nyị ahankata nịnị, ọzọza kà ozi ana yara ọ vị anị, di ene sú vị ọsa nị.”

²⁴Di ohinọyị ka à sị ụhwọ va yị ọnị nị. Ịzẹyịza dị a sị ụhwọ va yọ nị.

²⁵Dị ohinọyị ka, “che ozi ana yara avọọ tụ́ hi ẹẹva. Sị achẹva anị yị ọnya, dị wa rẹ si achẹva anị yị ọsa.”

²⁶Ọnẹẹ ana vị ọnyị ozi ana yara aanị vị ana nyayịnẹ sì ịrẹyị ozi anị. Agụvị avọọ dị ọ kà a yi ohinọyị, dị ọ kà “Ada ayị taarụ, aarịhịnị sị ozi ana yara avọọ yị ọnẹẹ ọnọnị, asị ụ wụ̀ ọ.” Ama dị ọnẹẹ ọsa ọnị ka, “É che e ẹẹva, asị a nyị ọza ana a sị ozi ọnọnị yị.”

²⁷Di ohinọyị tụ́ ohi dị ọ kà, “sị ozi ana yara avọọ yị ọnẹẹ ana ka asị a wụ̀ ọ, ka ọnị ọ vị ọnyị ozi ọnọọ nị. Asị ụ wụ̀ ozi ọnọọ.”

²⁸Avaba Anisirẹrị mẹ wụ̀ ọkarẹyị ọnị ohinọyị mẹ̀, di o hi wa eyi agụvị ka ê re ka Ohomorihi ọ sị ịrẹyọyẹ yọ ana aā sịị mẹ̀ ọkarẹyị nị.