Read ebira 1 Ohinọyị 4 Bible Online

1 Ohinọyị 4 - ebira bible

1 Ohinọyị 4

¹Isoromọnị ọ vị ohinọyị tụ́ ịrẹsụ avaba Anisirẹrị nị.

²Aza ọnị maa vaa hị́ ịrẹha ẹnịnị aanị ee pè e mẹ ịjọva nị. Azariya ozi Ịzadọkị ọ vị ohirẹsụ irehi Ohomorihi nị.

³Erihorehwi ọnịrị Ahija ezi Isisa e si eyi pè iwe nị, di Ijehosahwati ozi Ahirudi ọnị vị ọchẹrịsa nị.

⁴Ịbẹnaya ozi Ijehoyada ọnị vị ọga isoja, di Ịzadọkị ọnịrị Abiyata ẹnị vị ohirẹsụ irehi Ohomorihi nị.

⁵Azariyahụ ozi Inatanị ọnị vị ọga Ịgọvọnọ ẹkụra eweyi-eweyi. Ohirẹsụ ịrẹsụ irehi Ohomorihi ana aā hị́ Izabudi ana vi ozi Inatanị ọnị vị ọta ohinọyị.

⁶Ahisa ọnị vị ana sị eyi pè ohweje ohinọyị. Di Adorami ozi Avida ọnị o si eyi pè aza ana aā kụ́ aza naa mẹ̀ ụkọrọ nị.

⁷Isoromọnị ọ nyị Ịgọvọnọ ẹwụrẹva ana si eyi pè avaba Isirẹrị. Ẹnị ẹ yaa kụ́ ịsọyịrị hụrẹ okokooro ẹnịnị vaa yị ohinọyị ọnịrị aneehi anị nị. Ụhwẹ ọnya ọza ịnya ọza ịnya aa sịị kụ́ isaa vẹ ịnị ịrayị nị.

⁸Ịrẹha ẹnị ana vavọọ vaa kụ́ ịsọyịrịị vẹ m maa vaa hị́ aanị nị: Ịbẹnị-Ihuri ọnị vị ana jẹẹ yị ẹkụra ini ataba Ehwireemi.

⁹Ịbẹnị Ịdẹkẹrị, ọnị vị ana jẹẹ yị ẹkụra Imakazi ọnịrị Isaaribimi ne beri Ịbẹtị-Isemesi ọnịrị Ẹrọnị ne chire Ịbẹtị Ihanani.

¹⁰Ịbẹnịhẹsẹdị, ọnị rẹ vị ana jẹẹ yị ẹkụra Aruboti. Ọnị ọ rẹ nyị Isoko ne beri avaba ẹtẹ Ihehwa.

¹¹Ozi Abinadabị ọ vị ọga ene sị eyi pe avaba okokooro Inapati ini ẹtẹ Ịdọọ. Ọnị ọ nyị Itahwati ozi Isoromọnị nị.

¹²Ibaana ozi Ahirudi. Ọnị vị ana jẹẹ yị okokooro Itaanaki ọnịrị Imegido ne beri avaba Ịbẹtị Isini oze eyi Izaretani oze eyi ụvẹtẹ Ijezirẹẹrị, huu hụrẹ Ịbẹtịsani pooro na ngụ Ẹba Imehora dị à na para Ijokimimi hu.

¹³Ịbẹnịgẹbẹrị ô sị eyi pe ẹkụra Ịramọtị-Igiriyadi ẹnịrị ẹkụra eweyi-eweyi Anigiriyadi ana vị ịrẹsụ Ịjarị ọnị ohiku ẹnịnị vị Ịmanasẹ. Ịbẹnịgẹbẹrị ọnọọ ọ rẹ si eyi pè okokooro Arigobi ana yà Ịbasanị nị. Ẹkụra anị vị ẹbẹẹta, dị ẹ banyị, dị a jị ọvọ kara wa, dị ahịka oze enyusẹ ọbanyị e si gù oze ana na ngụ ọ nị.

¹⁴Ahinadabi ozi Ido. Ọnị vị ana jẹẹ yị Imahanayimi.

¹⁵Ahimaazi ana nyị ozi Isoromọnị ana aā hị́ Ibasemati ô sị eyi pe ẹtẹ Inahwitari nị.

¹⁶Ibaana ozi Ihusayi ọ jẹẹ yị okokooro Aseri ini ẹtẹ Aroti.

¹⁷Ijehosahwati ozi Iparuwahi. Ọnị vị ana jẹẹ yi okokooro Iisaka.

¹⁸Isamayi oze Era. Ọnị vị ana jẹẹ yị okokooro Ịbẹnjamịnị.

¹⁹Igeberi ozi Uri. Ọnị vị ana jẹẹ yị okokooro Anigiriyadi. Isihoni ohinọyị Anamọrị ọnịrị Ọgị ohinọyị Anibasanị ẹ vịdị aa mẹ ọda tụ́ ịrẹsụ ẹtẹ ọnọọ nị. Ịgọvọnọ ọnya o si eyi pè ẹtẹ ọnọọ nị.

²⁰Anijuda ọnịrị Anijerusarẹmị ệ rụrụ anka ààrẹ ụtọ ókụ̄. Ẹnịnị vị ana aa rị, di eyee hú, dị ẹ yaa mẹrị.

²¹Isoromọnị aa mẹ ohinọyị tụ́ ịrẹsụ avaba aha hụrị okuha Anihwirisiti huu na ẹhụ ẹtẹ Anijipiti. Pooro di Isoromọnị va hịrẹ ẹnịnị vị ana aa kụ́ ẹyịza vaa yọ, dị ọ rẹ yà dụụ anị.

²²Ịsa ọyịrị ana aa kụ́ va yị Isoromọnị ịnị ẹkụhị ọnya kẹnẹ yị. Ayị ana a kwọ di o zoza ẹtẹẹtẹrẹ vị ẹhụụ ịgarụwa akana tura ohurẹẹhị. Di apaapa ana a kwọ ẹhụụ ịgarụwa akava tụra ẹwụrẹva rị ẹjịjị.

²³Imaaru ana a pa dị ẹ ta banyị ẹnị vị ẹẹwụ, dị imaaru ana aa rị avị ẹnị vị oohu nị. Atẹmẹ ọnịrị ẹvụ ẹnị vị ẹchẹhị. Ùnè ne beri ịkẹrịkẹtẹ ọnịrị ịpẹpẹyẹ ẹbanyị-ẹbanyị vị ana gụ.

²⁴Â maanị kụ́ ịsa ẹnẹnị va yi Isoromọnị agụvị ka ọnị aa mẹ ohinọyị tụra avaba anẹkụra ene hi akẹnẹ okuha Iyuhwuretisi huu na ngụ Igaza ọnịrị avaba anẹkụra ene hi akẹnẹ okuha Iyuhwuretisi. Ẹngụ Isoromọnị vị ana rọ. Ẹ yị nyị ikonya ịnị avaba anẹkụra ana kara a ana kụ́ ọ kata a ẹngụ.

²⁵Ịnị ụmẹ ọnọọ Anijuda ọnịrị Anisirẹrị vi ene hi ịnị ẹngwọọrọ, ẹ yị nyị ayịhụrịnẹ, dị ọzọza maanị hi ẹtẹ ịnị ẹngwọọrọ iruvo ọchị ịvayịnị anị ọnịrị iruvo ọchị Ihwigi anị. Huu hụrẹ Ịdaanị ẹbẹẹba na ngụ Ịbẹẹsẹba ụvẹtẹ, ẹ yị nyị ụmẹ ana a sị nyị ịrẹyị pooro di Isoromọnị hụrẹ ẹhẹ.

²⁶Aha ịsọyịrị ịzị umaata Isoromọnị yà aa rị ịsa vị akawụ-akawụ oze oohu. Aha ịsọyịrị umaata ịrẹkụ ọnị vị akawụ-akawụ oze ẹwụrọnya.

²⁷Avaba ẹnị Ịgọvọnọ okokooro ẹnẹẹ vị anaā kụ́ ịsọyịrị vaa yi Isoromọnị ohinọyị, ọnịrị aza ana aa rị ịsa ịda anị. Ọza-ọza vi ana aa kụ́ ịsa anịị vẹ ịnị ụhwẹ anị. Ẹ yị nyị ọza ana jị aanị ha.

²⁸Ẹnịnị vị ana rẹẹ̄ kụ́ ibaari ọnịrị avị vaa yị umaata ohinọyị ịzị aā kụ́ wa hi. Ụmẹ ọzọza òo si tù, dị ẹ vavọọ kụ́ ọ vẹ.

²⁹Ohomorihi ộ sị ịrẹyọyẹ yi Isoromọnị ẹtẹẹtẹrẹ. Ộ yẹ ịrẹyị obodaasụ ana ahịka ẹ yị nyị ẹngụ anị.

³⁰Isoromọnị ộ yẹ ịrẹyị huna avaba ọnị ene hi ịzị ọyịị̄ zịị hụrẹ. Ọ rẹ yẹ ịrẹyị huna avaba Anijipiti.

³¹Isoromọnị ọ rẹ yẹ ịrẹyị hu avaba aza ene hi ịnị ẹhẹ, Ộ yẹ ịrẹyị huu Etaanị Anizira. Ọnị ọ rẹ yẹ ịrẹyị huna ezi Imahọrị ẹyịta: Ịhẹmanị ọnịrị Ikakori ne beri Idarida. Ịrẹha Isoromọnị ộ ngụrẹyị na ngụ ịnị avaba anẹkụra ana kara a.

³²Avaba ụhịrẹyị oni Isoromọnị che vị akawụrakahị. Ahẹ ọnị ọ jị vị akawụ-akawụ oze ẹẹva tụra akahị.

³³Isoromọnị ộ kà ịrẹyị ịnị ịpa ọchị irenyi-irenyi. Ọchị ọbanyị ana aā hị́ Isida ene hi Ịrẹbanọnị na ngụ ịnị avị oweyi ene eē nyii hi ini ugene ana aā hí ihisopu vị ọnị ọ sị kà ịrẹyị. Uye, inomi ọnịrị avaba ịsa eē tura ịrẹsụ ẹtẹ ne chire ivovo nịnị vị ọnị ọ sị sị kà ịrẹyị.

³⁴Avaba anẹkụra vị ana aa vẹ ka ẹnị va wụ́ ịrẹyị ịrẹyọyẹ Isoromọnị. Ohinọyị nịnị hụrẹ avaba ẹhẹ ệ wụ́ ọ mẹ̀ mẹ yẹ ịrẹyị, dị ẹ tụ́ aza ka ẹ̀ va wụ́ ịrẹyị ọnị ọ kà nị.