Read ebira 1 Ohinọyị 7 Bible Online

1 Ohinọyị 7 - ebira bible

1 Ohinọyị 7

¹Isoromọnị ộ sị ịrayị ẹwụrọnya dà irehi anị ụvọta, dị ọ va dà avaba anị ta.

²Ọchị ini iriku Ịrẹbanọnị Isoromọnị sị dà irehi ọnọọ nị. Irehi ọnọọ ộ gọdọ tù ahụ ịrẹka tụra ẹvarẹwụ. Ọ rẹ gana tù ahụ ẹtarẹwụ tụra ẹẹhị, dị ọ rẹ nẹba tù ahụ ẹbẹẹva tụra ẹẹhị nị. Ọchị isida ọ sị mẹ ọ̀tụ̀ oni irehi ọnọọ tụra nị. Ọ̀tụ̀ ẹnẹẹ vị ọrọ ẹẹna. Dị ọ rẹ sị ọchị isida mẹ oporipo irehi ọnọọ nị.

³Dị ọ sị ọchị isida di o si gu itu aku ẹnẹẹ ana nyị ọtụ ẹbẹẹva tụra ẹẹhị nị. Ọrọ ọnya ọnya vị ana nyị ọtụ ẹwụrẹhị.

⁴Ozokete ẹẹta o hi ịnị ọrọ ẹnẹẹ nị. Ẹnị ẹyịta vị ana và eyi kà ẹngụ.

⁵Avaba oze ọnịrị ọhẹ ẹnẹẹ vị ana nyị ọgọgọ ẹẹna. Ẹnịnị vị ọrọ ẹẹta dị ẹ vavọọ vá eyi kà ẹngụ nị.

⁶Isoromọnị ộ mẹ̀ ikatamba ọnị ọhẹ hi ịnị anị. Ịkatamba ọnọọ ộ gọdọ tù ahụ ẹtarẹwụ tụra ẹẹhị. Ọ rẹ gana tụ̀ ahụ ẹbẹẹva tụra ẹẹhị. Ọ rẹ nyị ịkatamba ọsa tụ́ ọvịdị anị ana nyị ọhẹ. Dị ọ nyị ọ̀tụ̀ ọbanyị ọnya tụ́ ọvịdị nị.

⁷Irehi ọnọọ ộ nyị ịkatamba ịzị aga yà ịzị Isoromọnị vaa yàa mẹ̀ ọkarẹyị. Ộ mẹ ịkatamba ịzị ọ vaa yàa mẹ̀ ọkarẹyị dị ọ si ọchị isida kú avaba eteesu anị nị.

⁸Irehi oni Isoromọnị ọnị ụvọta vaa ra vị ana yà ịrẹma ịkatamba. Ụvọ ọnya ọnya ọ sị da wa nị. Irehi oni Isoromọnị dà yi ozi Ihwarawo ọnị ọ nyị vị ana rẹ yà anka ikatamba ọnọọ.

⁹Avaba ịrẹta ẹnẹẹ vị ana nyayịnẹ katarihi. Ịrẹta ẹnẹẹ vị ana dà anka a mẹ̀ vịdị mọ wa. Anyụ a vavọọ sị dà wa nị. Ịrẹma ọnịrị ọvịdị vị ana a dà ọnya-ọnya. Ẹ́ngụ ịrẹta ọnọọ a sị dà irehi ọnọọ hụrẹ a mẹ kà a ẹtẹ pooro dị ọ jị nị. Ọnị a rẹ sị dà a hụrẹ ẹhẹ na ngụ ini ohweje ọbanyị nị.

¹⁰Ịrẹta ana sị ka irehi ọnọọ ẹtẹ vị ịrẹta ana katarihi, dị ẹ banyị. Ịrẹta ẹnyị ệ gọdọ tù ahụ ẹwụrẹhị, dị ẹnyị tù ahụ ẹwụrẹva nị.

¹¹A rẹ nyị ịrẹta ọkatarihi ene hi ẹbẹẹba irehi ọnọọ Ịrẹta ẹnẹẹ ọnịrị ọchị isida vị ana a dà anka a mẹ̀ vịdị mọ wa.

¹²Ohweje ọbanyị vị ana a sị ịrẹta kara. Ịrẹta ẹnẹẹ vị ọrọ ẹẹta, dị ahịka ịrẹta ọkatarihi ẹ vị nị. Dị a va sị ọchị isida ọrọ nya tụra a na para hu nị. Ịnị ịnẹ ohweje irehi Ẹnẹyịmavara ọnịrị ajẹhẹ irehi Isoromọnị vị ọnya-ọnya.

¹³Ẹkụhị ọnya di Isoromọnị tụ́ na hị́ Ihirami hụrị Ịtaya, dị ọ vẹ nị.

¹⁴Ihirami ọnọọ vị ozi osoku ọnya aanị, dị ahịka ịpa ịrẹsụ Inahwitari ọ vị nị. Ada anị rẹ vị Anitaya, di oō tụ́ enyusẹ ana aā hị́ ịkọpa nị. Ộ yẹ eyi ụkọrọ ẹtẹẹtẹrẹ; avaba ẹngụ ọ sị yẹ eyi ụkọrọ nị. Ọ yara sị enyusẹ ịkọpa mẹ̀ ụkọrọ irenyi-irenyi. Ộ vẹ ịda Isoromọnị ohinọyị, dị ọ va mẹ avaba ụkọrọ anị yọ nị.

¹⁵Ihirami ộ sị enyusẹ ịkọpa mẹ ọhẹ ẹẹva. Ọhẹ ọnya ộ nẹba tù ahụ oohu tụra ịhịmba. Obo ana kara ọhẹ ọhụva ộ gọdọ tù ahụ ẹwụrịhịnta.

¹⁶Dị ọ sị enyusẹ mẹ̀ ịsa poporopo ẹẹva aanị dị ọ kụ́ wa tụra ịrẹsụ ọhẹ ẹnẹẹ nị. Ịsa poporopo ọnị ọ vavọọ mẹ aanị, ọnya ộ nẹba tù ahụ ịhịmba rị ẹjịjị. Dị ọsa ọnị rẹ vị ahụ ịhịmba rị ẹjịjị nị.

¹⁷Ihirami ọ rẹ sị ẹba dị ọ sị mẹ ịsị ẹ yà anka ọha avọọ di o si kú ịsa poporopo ana a si kú ọhẹ ẹnẹẹ ịrẹsụ nị. Ịsị e vene ọhẹ ọnị ọ vavọọ mẹ avọọ ộ banyị. Ọha ẹnẹẹ vị ịhịmba tụ́ ịrẹsụ ịsa poporopo ọnọọ ọnya, dị ịhịmba rẹ vavọọ yà ịrẹsụ ọsa nị.

¹⁸Ihirami ộ mẹ̀ ọhẹ ọrọ ẹẹva. Dị ọ mẹ̀ ịsa ana yà anka ẹtụtụ ọchị ọnya ana aā hị́ Irimoni avọọ nị. Ọha ẹnẹẹ vị oni o si kú ịsa poporopo ene hị́ ịrẹsụ Irimoni ẹnẹẹ. Avọọ ọ mẹ̀ rẹ mẹ tụ́ ịrẹsụ ịsa poporopo ọsa nị.

¹⁹Ịsa poporopo ana a maanị mẹ hi ịrẹsụ ọhẹ ana yà ịnị ịkatamba vị ana yà anka ododo avọọ. Ẹnịnị ệ nẹba tù ahụ ịhịnọnyị.

²⁰Ịsa poporopo hi ịrẹsụ ọhẹ ẹẹva ẹnẹẹ. Dị a va nyị ịsa kooro aanị ana maanị dà jịnẹ tụ́ ẹhẹ akaha ọha nị. Irimoni ana a sị mẹ ọrọ kara wa vị ịrịka ịrẹka. Avọọ ịsa poporopo ọsa ọnị mẹ̀ rẹ yà nị.

²¹Dị ọ hi ọhẹ ọnọọ jẹẹ ịnị ịnẹ ịkatamba irehi ọnọọ nị. Ô hì ọhẹ jẹẹ tụ́ eyi ụvọrị, dị ọ ka ịrẹha ọnọọ ọ rị Ijakini nị. O re hi ọhẹ ọsa tụ́ eyi ụvọha dị ọ ka ọnọọ ọ rị Ibowazị nị.

²²Dị ọ mẹ ododo hi ịrẹsụ ọhẹ ẹnẹẹ nị. Avọọ a mẹ̀ mẹ ọhẹ ẹnẹẹ dị ẹ ta mẹ nị.

²³Di Ihirami rẹ sị ịsa mẹ onyi nị. Enyi ọnọọ vị ahụ ẹwụrẹhị hụrẹ ụtọ ẹnyị na ngụ ụtọ ọsa, dị ahịka vị ọ yà kooro aanị nị. Ộ nẹba tù ahụ ịhịmba rị ẹjịjị. Obo ana nyẹngụ gọdọ jesi kara a ô tù ahụ ẹbẹẹva tụra ẹẹhị.

²⁴Dị a va nyị ịsa ọgọdọ pata-pata aanị ene e si kú ụtọ-ụtọ enyi ọnọọ jesi kara nị. Ọnya-ọnya vị ahụ ẹwụrẹhị, dị ẹ vavọọ kara enyi ọnọọ nị.

²⁵Ịsa pata ẹnẹẹ vị ọrọ ẹẹva dị ahịka ịnị ịra a yà tụ́ wa nị. Ịsa ẹnẹẹ ene e tù vị ana yà ịrẹsụ ịsa ẹnyị aanị ana a mẹ anka imaaru avọọ. Imaaru ẹnẹẹ vị ẹwụrẹva. Ẹẹta ô và eyi kà eyi ẹbẹẹba, dị ẹẹta và eyi kà eyi ụvẹtẹ, dị ẹẹta ọsa ẹnị và eyi kà eyi ọnị ọyị zịị hụrẹ nị. Di enyi ọnọọ ọnị yà ịrẹsụ anị nị. Avaba ahụ ịrẹma imaaru ẹnẹẹ vị ana và eyi kà ịnị ịnẹ irehi.

²⁶Ụtọ-ụtọ ịzị a mẹ enyi ọnọọ tụ́ ộ rata ụpọ tù ụvọ ọnya. Ụtọ-ụtọ anị vị ana sị mẹẹ anka ako avọọ, dị ahịka vị ọ maanị yá nọ ẹhẹ anka ododo avọọ nị. Aha enyi ọnọọ ộ dọ enyi ịgarụwa akawụ tụra ịrẹkẹẹchẹhị.

²⁷Ihirami ọ rẹ sị ịkọpa mẹ ịkẹkẹ ẹẹwụ. Ịkẹkẹ ọnya-ọnya ộ gọdọ tụ́ ahụ ịhịnọnyị ọnya-ọnya ọ rẹ gana tù ahụ ịhịnọnyị, dị ẹ rẹ nẹba tù ahụ ẹẹna rị ẹjịjị nị.

²⁸Aanị Ihirami mẹmẹ mẹ ịkẹkẹ ẹnẹẹ nị. Ẹnịnị ệ nyị ihweremi, di ihweremi ẹnẹẹ hi ịnị akakana ẹ̀gẹ́ ẹnịnị nị.

²⁹Ini ihweremi ene hi ịnị ẹgẹ ịkẹkẹ ọnọọ, â nyị idu, imaaru ẹmịrị ikerubi ana a mẹ hi ọ. Akẹbẹẹba ọnịrị akẹtẹ idu ọnịrị imaaru ẹnẹẹ vị ana a maanị mẹ̀ ịsa kụnyị-kụnyị aanị hi.

³⁰Ịkẹkẹ ẹnẹẹ ọnya-ọnya ộ nyị ahụ ana a sị ịkọpa mẹ. Dị ahịka ịzị ahụ ẹnẹẹ za vị ịkọpa. Ẹ rẹ nyị ẹtụpa ẹẹna dẹrẹ-dẹrẹ aanị. Hụrẹ ụvẹtẹ na ngụ agadaaba ẹnịnị, a mẹ̀ ịsa anka akamava ọza avọọ gẹ wa.

³¹Â nyị oze tụ́ ịnị ịsa poporopo ana yà ịnị ịkẹkẹ ọnọọ. Ộ nẹba tù ahụ ọnya rị ẹjịjị. Oze ọnọọ vị ana a mẹ kooro aanị, dị ahịka ahụ ẹẹva rị ẹjịjị ọ vị nị. Oze anị ọnọọ vị ana a bẹ ịsa hị́, dị ahịka ọgọgọ ẹẹva ihweremi anị vị nị, ẹ yị vị ọ yà kooro.

³²Ahụ ẹyịna ịkẹkẹ ẹnẹẹ vi ene hi akẹtẹ ihweremi anị. Ịzị a sụ́ ahụ ịkẹkẹ ẹnẹẹ za vị ịsa pata-pata ana a mẹ tịtẹ. Ahụ ịkẹkẹ ọnya ộ nẹba tù ahụ ẹẹna rị ẹjịjị.

³³Ahụ ịkẹkẹ ẹnẹẹ vị ana a mẹ anka ahụ ịkẹkẹ ịrẹkụ avọọ. Ịzị e kuru ahụ anị gẹ ọnịrị enyusẹ ana kara a ne beri isipoku ọnịrị ịhọvụ anị vị ene e sị́ enyusẹ tụ́ ịnị ẹngụhị.

³⁴Akamava ẹyịna ịkẹkẹ ọnya-ọnya vị ana na ngụ ịnị ọgọgọ ẹyịna ịkẹkẹ ọsa.

³⁵Ịsa kooro ana maanị jesi kara ịrẹsụ ịkẹkẹ ẹnẹẹ vị ana jị ha chee ịnị ahụ ọnya, vị ọ maanị jẹẹ ịzị a sị ọ jẹẹ nị. Akaha anị ọnịrị ihweremi anị vị enyusẹ ọnya.

³⁶Avaba ịsị ẹ sị ịkẹkẹ ẹnẹẹ jẹẹ ọnịrị avaba ẹhẹẹhẹ anị ne beri ihweremi anị vị oni Ihirami mẹ ikerubi ọnịrị idu ne beri ọsọchị hị́. Vị ẹ sị mẹẹ ọza ana tụ́ ahwaahụ avọọ nị, dị ẹ vavọọ gẹ ẹngụ jesi kara nị.

³⁷Avọọ Ihirami mẹ̀ mẹ ịkẹkẹ ẹẹwụ ọnọọ nị. Ẹnịnị vị ọnị ọ sị ụvọ ọnya mẹ, dị ẹ vị ọnyọọnya, dị ẹ rẹ vị ẹbẹẹbẹ nị.

³⁸Ihirami ộ sị ịkọpa mẹ ịchacha ẹbanyị-ẹbanyị ẹẹwụ. Ịchacha ọnya-ọnya ọ rẹ dọ enyi ịgarụwa ẹchẹhị.

³⁹Dị ọ sị ịkẹkẹ ẹẹhị tụ́ eyi ụvọrị ini irehi Ohomorihi, dị ọ rẹ sị ẹẹhị ana vọ tụ́ eyi ụvọha nị. Dị ọ sị ịsị, ọ mẹ anka enyi avọọ dị ọ sị tụ́ ụvọrị eyi ọnị ọnị zịị hụrẹ ini irehi Ohomorihi nị. Dị ahịka vị ọ và eyi kà eyi ụvẹtẹ nị.

⁴⁰Ihirami ộ mẹ̀ aha ịra, dị ọ rẹ mẹ ịchọvịrị oweyi ọnịrị ako ana a sịị̄ kụ́ enyi và ha nị. Ịjị ọ sị ẹnẹẹ mẹ, dị ọ za avaba ụkọrọ ọnọọ ọnị ọ mẹ ini irehi ọnọọ ịrẹsụ nị. Isoromọnị ohinọyị ọ́ mẹ avaba ụkọrọ ọnọọ yị nị.

⁴¹Â nyị ọhẹ ẹẹva ana maanị jẹẹ, dị a nyị ịsa poporopo ana maanị yà ịrẹsụ ọhẹ ẹyịva ẹnẹẹ nị. Dị ọha ẹẹva ẹnị rẹ maanị kú ịsị ẹ dà tụ́ ẹhẹ ịnị ịsa poporopo ene hi ịrẹsụ ọhẹ ẹnẹẹ nị.

⁴²Ọhẹ ẹẹva ẹnẹẹ ệ nyị ẹtụtụ ọchị Irimoni akava. Ọhẹ ọnya ộ nyị Irimoni ọrọ ẹẹva ene kú ịsa poporopo ẹẹva ana dà tụ́ ẹhẹ ene hi ọvịdị ọhẹ ẹnẹẹ.

⁴³A rẹ nyị ịkẹkẹ ẹẹwụ, dị a nyị aha ịra ẹẹwụ ene hi ịnị ịkẹkẹ ẹnẹẹ nị.

⁴⁴Dị a rẹ nyị ịsị a mẹ anka enyi avọọ nị. Dị a va nyị imaaru ẹwụrẹva ana yà iruvo enyi ọnọọ nị.

⁴⁵Â nyị ụnọkọ ọnịrị ịchọvịrị eweyi ne beri ako ana a sịị̄ kú enyi và ha ọnịrị avaba ẹnya ẹnẹẹ oni Ihirami mẹ yị Isoromọnị ohinọyị. Dị ọ kú wa ne hi ini irehi Ohomorihi nị. Avaba anị vị ọnị ọ sị enyusẹ ana aā hị́ ịkọpa ana swa mẹ.

⁴⁶Isoromọnị ohinọyị vi ana kà ka à mẹ avaba ịsa ịnị ẹngụhị ana yà ini ozi Ijodani. Dị ahịka ịnị ẹtẹ ụmọpa ana yà ịnị akakana Isukoti ọnịrị Izaretani a yà mẹ wa nị.

⁴⁷Isoromọnị ọ yị ngọ ẹnya ụkọrọ ẹnẹẹ ana a mẹ agụvị ka ẹ sị rụrụ baaba. Ọza ọ yị yẹ ịngọ enyusẹ ịkọpa ẹnẹẹ.

⁴⁸Avaba ẹnya ụkọrọ ene hi ini irehi Ẹnẹyịmavara ọnọọ, Isoromọnị ọ mẹ wa nị, aha ịsọvọ ana a sị igooru mẹ, itevuru ịzị aā sị Ịbụrẹẹdị ana a sị va yi Ohomorihi tụ́ vị ana a rẹ sị igooru mẹ.

⁴⁹A rẹ nyị ozotupa ana a si igooru obooro mẹ. Ẹẹhị ini ozotupa ẹnẹẹ vi ene hi eyi ụvọrị, dị ẹẹhị ẹnị rẹ hi eyi ụvọha ịnị ịnẹ aku ọdịrẹma keekere. Ododo ọnịrị ozotupa ne beri apụka vị ana a rẹ sị igooru mẹ.

⁵⁰A rẹ nyị ako ọnịrị ịzị aā và aremi ozotupaa hi ne beri ẹnya ana a sịị̄ rị eturare ịra ọnịrị ịchacha ana a sịị̄ sị akịna. Dị a rẹ nyị ịsị ẹ si ukere gẹ oze ana na ngụ aha ọnịnị keekere ne beri ukere oze ajẹhẹ irehi ọnọọ nị. Avaba ịsa ẹnẹnị vị ana a sị igooru obooro mẹ.

⁵¹Avaba ụkọrọ oni Isoromọnị ohinọyị ka ọnị aa mẹ ini irehi Ẹnẹyịmavara ộ ta a mẹ. Ịjị Isoromọnị si irehi ọnọọ mẹ ta, dị ọ kụ́ avaba ẹnya oni Idevidi ada anị vịdị sị yị Ohomorihi, dị ọ kụ́ wa ne hi ịzị aā kụ́ ogu tẹ ini irehi Ẹnẹyịmavara nị. Ẹkẹhị ọnịrị igooru vi ene hi ịnị ẹnya ẹnẹẹ.