Read ebira 2 Ohinọyị 4 Bible Online

2 Ohinọyị 4 - ebira bible

2 Ohinọyị 4

¹Ẹkụhị ọnya, osoku ịnya ịnị ọnịsẹ nịnị ô ve tu Erisa, dị aa jị òrèrè nị. Ọ kà, ọva anị ô wusu, dị Erisa yẹ ka ộ hí angwa Ẹnẹyịmavara ẹtẹẹtẹrẹ. Ama â nyị ọnọrụ ọnya ọnị ọva rị ụta ẹkẹhị. Ọza ọnọọ ộ vẹ ka ọnị aa vaa kụ ezi ọnọrụ anị ẹyịvaa sị́ ụta, dị ẹ̀ kụkụ na vị ọrịhị anị.

²Erisa ộ họ̀ ọ use ka: Si ee sì ka ọnị ọ̀ mẹ yị ọnị? Ọ̀ ka ọ kà a yị ọnị, ịsị ọ nyị tụ́ ini eehi anị? Dị ọnẹẹ ọnọnị tụ́ ohi ka, ẹnẹ vị ẹmị, ẹ yị nyị ịsị mị nyị tụ́ ini eehi, ẹ̀ yị vị angwẹ ijonggo ọnya kẹnẹ.

³Dị Erisa kà a yọ ka, ọ̀ nọ ẹhẹ, dị ọ̀ na dọ ọnọhụva anị nịnị ịgarụwa osusu-osusu rere. Ò re ka ọnị ọọ dọ ọ rụrụ.

⁴Ọ kà ọ̀ọ vavọọ sị ọ dọ, ọnịrị ezi anị ẹ̀ ngụ ini eehi, di ee gù oze. Èe sị oze gù, ọọ và angwẹẹ hi ịnị ịgarụwa ẹnẹẹ. Ene èe si hí, dị ọ̀ sị ọ tụ akaha.

⁵Ịzẹyịza, dị ọ hụụ ịdị Erisa, dị ọnịrị ezi anị ne gù oze hi ẹngụ nị. E si oze gù, di ezi anị aa kụ́ ịgarụwaa vẹ, dị ọnị aa và angwẹẹ hi ọ nị.

⁶Ịjị ịgarụwa ẹnẹẹ si hi, dị ọ hị́ ozi anị ka ọ̀ rẹ sị ọsa vẹ nị. Ama ozi anị ô tụ́ ọ ohi ka, ịgarụwa ệ ta. Ịjọnọọ dị angwẹ anaa và ọnị rẹ ta nị.

⁷Ọnẹẹ ọnọnị ộ vẹ dị ọ va kà a yị ọza Ohomorihi nị, ọza Ohomorihi ọ́ kà a yọ ka, ọ̀ na ná angwẹ ọnọọ, dị ò sí ụta anị. Ana àa vọ, dị ọnịrị ezi anị ẹ̀ sị naa mẹ̀ ẹhẹ.

⁸Â nyị ẹkụra ọnya ana aā hị́ Isunemi. Ẹkụhị ọnya, di Erisa zị oze avọọ aa parahu nị. Â nyị ọnẹẹ opisa ana ra ịzọọ, ana hị́ Erisa ka ọ̀ va rị ịsa, ịzẹyịza ụmẹ tụra ụmẹ ene Erisa ọ zị avọọ aà parahu, dị ộ há ịzọọ, dị ọ rị ịsa.

⁹Ẹkụhị ọnya, ọnẹẹ ọnọọ ộ kà a yị ọva anị ka, ọnị ộ yẹ ka ọza ọnọnị anaā zị oze ịdị ẹnịnịị paraahu aanị vị ọza Óhomorihi obooro.

¹⁰Ọ kà, ọva anị ọ̀ jẹẹ dị ẹnị ẹ̀ da aku ọnya tụra ịrẹsụ irehi ẹnịnịị yọ; ẹnị ẹ̀ sị ịvẹẹdị, itevuru, ọnịrị aga beri ozotupa tụ́ ịzọọ yọ. Ịhị tụra ịhị ọnị ọ̀ọ vẹ ịdị ẹnịnị, dị ọ yà ịzọọ.

¹¹Ẹkụhị ọnya, Erisa ộ vẹ, dị ọ vahịrẹ nọ ịnị aku anị, dị ọ na hụtẹtẹ nị.

¹²Ộ kà a yị Igehazi ozi ahụ anị ka ọ̀ hị́ ọnẹẹ Anisunami ọnọnị vẹ nị. Ộ hị́ ọ vẹ, dị ọnẹẹ ọnọọ va jẹẹ ọvịdị anị nị.

¹³Erisa ộ kà a yị Igehazi ka, ọ̀ họ̀ ọnẹẹ ọnọnị ka, ẹnị ệ yẹ avaba ịsị ọ sị ẹngụ dọ, dị ọ́ maanị aa tẹsị ẹnịnị. Sị́ o sì ka ẹnị ẹ̀ mẹ yị ọnị? Vị́ ọ ka ẹnị ẹ̀ hụ agụvị anị na kà ịrẹyị yị ohinọyị nị; à vị ẹnị è ne pe ọdọvịdị isoja ẹnịnị kà ịrẹyị? Dị ọnẹẹ ọnọnị ka, Eyiye! Ẹ yị nyị ịsa ọnị ọnị ee sì, ana aza anị ẹ̀ yị mẹ yị ọnị.

¹⁴Erisa ộ vana họ̀ Igehazi ka: Sị́ ẹnị zụ mẹ̀ ẹ yọ da? Dị Igehazi tụ́ ohi ka, ọnẹẹ ọnọnị ẹ yị ma ozi, dị ọva anị re sì bo nị.

¹⁵Erisa ka ọ̀ varẹma na hị́ ọ vẹ. Ộ vẹ, dị ọ jẹẹ enoze nị.

¹⁶Dị Erisa kà a yị ọnẹẹ ọnọnị ka ụmẹ aanị ụpọsa, ọ vaa sị ozi ọnọrụụ rị ụvọ nị. Ọnẹẹ ọnọnị ô nowu zẹtẹ ka, aarịhịnị, a sị Erisa vene ọnị dị, agụvị ka ọza Ohomorihi ọ vị̀ nị.

¹⁷Ama anka Erisa mẹ̀ kà a, ịjị ụmẹ ọnọọ nee tu ịnị ịrayị anaa vanaa vẹ, ọnẹẹ ọnọọ ô zyẹẹ, dị ọ́ ma ozi ọnọrụ nị.

¹⁸Ịjị ozi ọnọnị da vịra chee, ẹkụhị ọnya dị ọ nọ ịnị aarẹ ne tu ada anị nị. Ada anị vị ana yà ịnị aarẹ pe aza anaa kụ ịsị ịnị aarẹ gụ.

¹⁹Ụmẹ ọnya kẹnẹ ozi ọnọnị ô vene nowu hị́ ada anị ka ịrẹsụ anị! Ịrẹsụ anị o! Dị ada anị kà a yị ozi ahụ anị ọnya ka, ọ̀ sị ọ na yị ọnya anị nị.

²⁰Ịzẹyịza ộ sị ọ na yị ọnya anị, dị ọnya anị sị ọ tụra ahụ nị. Ịjị ọọdụ nee tu, di ozi ọnọọ wusu nị.

²¹Ọnyị anị ộ sị ozi ọnọnị vahịrẹ na tụ aku ọza Ohomorihi, dị ọ sị ọ hụtẹtẹ ịnị ịvẹẹdị anị, dị ọ jịnẹ tụ ẹhẹ, di o gù oze nị.

²²O sị oze gù, dị ọ tụ́ ne tu ọva anị ka, ọ̀ tụ́ ozi ahụ anị ọnya beri ịkẹrịkẹtẹ ọnya va yị ọnị. Ọnị ee si ka oni ò zwe nọ ịdị ọza Ohomorihi dị ọnị ọ̀ vavẹ.

²³Dị ọva anị ka: Sị aa naa mẹ ịdị ọza Ohomorihi ajịnị? Ajịnị ẹ yị vị ụhwẹ ọwọọwa, ẹ yị rẹ vị ẹkụhị ụhwọtụ. Dị ọnẹẹ ọnọnị ka, ẹ yị nyị ịrẹyị nị.

²⁴Ộ tụ́ ịsa tụra ịkẹrịkẹtẹ ọnọọ, dị ọ tụra a nị. Ọ sị ọ tụra, dị ọ kà a yị ozi ahụ ọva anị ka, ọ̀ mẹ ka ịkẹrịkẹtẹ ọnọnị ọọ zị ụsẹ eyiha-eyiha. Ẹ̀ yị vị ọnị kà a yọ ka ọ̀ jẹẹ, asị ọ zẹẹ ka ọ̀ jẹẹ.

²⁵Ịzẹyịza, dị ọ vẹ ịnị ataba Ịkamẹẹrị ịzị Erisa, ọza Ohomorihi yà nị. Erisa ô ré ka aa vẹ ẹnẹẹnẹ, dị ọ kà a yị Igehazi ozi ahụ anị ka, ré, ọnẹẹ anisunẹmị ọnọnị aa vẹ avọọ nị.

²⁶Erisa ộ tu ozi ahụ anị ka ò zwe na gẹrị ọ, dị ọ̀ họ̀ ọ ka, á vị ẹ yị nyị ịrẹyịị? Ọva anị ọnịrị ozi ẹ́ẹ́ dahi? Dị ọnẹẹ ọnọnị ka, ẹ yị nyị ịrẹyị nị.

²⁷Ama ịjị o ve si tu Erisa, dị ọ kú ẹtẹ ọvịdị anị, dị ọ sị ụvọ ngụ ọ ahụ nị. Igehazi ô sì ka ọnị ọ̀ tụ ọ ọ ụvọ kwooze, ama Erisa ka ọ̀ ná a vọ. Ọ kà aanị ka e yi re e ka, ọnịrị ayodu ọ vị̀ nịị? Ama Ẹnẹyịmavara ẹ yị kà a yị ọnị.

²⁸Ọnẹẹ ọnọnị ộ kà a yị Erisa ka: Ịnda, vị́ ọnị wa da ịpẹ yọ ka ọ̀ sị ozi yị ọnị nị? Ọnị ọ́ọ́ vịdị kà a yọ ka à sị o vene ọnị?

²⁹Dị Erisa kà a yị Igehazi ka, ọ̀ da awuru anị sụ́, dị ọ̀ sị okutẹ anị, dị ọọ nọ ịdị ọnẹẹ ọnọnị booro aanị. Ọ kà asị ọ jẹẹ oze kụ́ ọza ọnyọọnyị. Ọza ọ̀ọ kụ́ ọ, a sị o tụ́ ohi. Ọ̀ vavọọ sị okutẹ anị na tụra ozi ọnọọ ẹyịrẹsụ.

³⁰Dị ọnyị ozi ọnọọ kà a yị Erisa ka, ọnị ộ sị Ẹnẹyịmavara ana yara ọnịrị Erisa ọnị ọnị aa sị ayị ọnyaa saasa hị́ eku ka, ọnị ẹ yị yaa para a hu. Ịzẹyịza, dị Erisa kwẹẹtẹ dị ọ saasa varẹma nị.

³¹Igehazi ộ dọ ọvịdị, dị ọ sị okutẹ Erisa na tụra ozi ọnọọ nị. Ama ẹ̀ yị wụ́ ịsa ọnyọọnyị ịrẹyị. Ẹ yị rẹ nyị ịsị ẹ sị zụ ka ozi ọnọọ yara. Dị ọ va gẹrị Erisa, dị ọ ka, ozi ọnọọ ẹ yị ha kwẹẹtẹ o.

³²Ịjị Erisa va sị ngụ ịzọọ, dị ọnịnya nọ ịnị yara, dị o re ka oku ozi ọnọọ tịtẹ ịnị ịvẹẹdị nị.

³³Ô ngụ ịnị aku ịzị ọnịrị ozi ọnọọ anava yà, dị gù oze, dị ọ mẹ̀ aduwa hi Ẹnẹyịmavara nị.

³⁴Erisa ộ na vayị ku ozi ọnọọ ịrẹsụ ịvẹẹdị, dị ọ sị irenu ku ọ irenu nị, dị ọ ha eyi ku ọ eyi, dị ọ rẹ sị ụvọ tụra a ụvọ nị. Ọ mẹ̀ vavọọ hụtẹtẹ tụra a, dị ẹngụ ozi ọnọọ vanaa ngụra nị.

³⁵Erisa ộ kwẹẹtẹ, dị ọ zị ụsẹ vachi vahịrẹ ngụ ịnị akụ ịzọọ zị, dị varẹma na hụtẹtẹ tụra ozi ọnọọ nị. Ozi ọnọnị ộ mẹ̀ echiho ụpẹ ịhịmba, dị ọ há eyi anị nị.

³⁶Erisa ộ hị́ Igehazi, dị ọ ka ọ̀ hị́ ọnyị ozi Anisunami ọnọnị vẹ nị. Ịjị ọ ngụ eehi na, dị Erisa kà a yọ, ka ozi ewu yị.

³⁷Ọnyị ozi ọnọnị ộ vaku ẹtẹ, dị ọ si ibe ka ẹtẹ ọvịdị Erisa ọ maa kụ́ ọ nị. Dị ọ sị ozi anị ọgọnị dị ọ hụụ ịzọọ nị.

³⁸Â nyị ụmẹ ọnya, Erisa ọ zị varẹma nọ Igirigari ụmẹ ọnọọ, dị ụngwẹ aa kụ̀ avaba aha nị. Â nyị ogu ẹnị ọnịsẹ ọnị Erisa aa zụ̀ ịsa. Ọ maa zụ wa ịsa, dị ọ vana kà a yị ozi ahụ anị ka, ọ̀ na sị ụnọkọ ọbanyị hii ịra, dị ọ̀ mẹ̀ ịsa yị ẹnị nị.

³⁹Ọnya ịnị ẹnịnị ộ nọ ịnị avị na ká avị. Ọ maa kà avị, dị o re ọchị ịvayịnị ịnị avị nị. Ộ há ẹtụtụ hụụnị anị o mee zee eyi, dị ọ kụ wa nya vẹ nị. Ộ vẹ, dị ọ jị ẹtụtụ ẹnẹnị, dị ọ va wa hi ịnị ụnọkọ nị. Ẹ yị yẹ ịsị ẹ vị.

⁴⁰Â ka ịsọyịrị yị wa ka ẹ̀ rị ọ. Ama ẹnịnị maa rị ọ kẹnẹ, di e nowu za ẹtẹ ka: tee! Ẹwụ ọza Ohomorihi, ịsị ẹẹ wụ̀ ọza yà ịnị ụnọkọ ọnọnị o. Agụvị avọọ, dị ẹnịnị ẹ̀ yị kụkụ rị ọ nị.

⁴¹Dị Erisa ka, ẹ̀ ká ayị ọyịkwọ va yị ọnị nị. Dị ọ và hí ịnị ụnọkọ, dị ọ kà a ka ịsọyịrị yị aza dị ẹ̀ rị ọ. Dị ẹ yị nyị ịsị ẹ kụkụ zụ zama ọza ịnị anị nị.

⁴²Â rẹ nyị ẹkụhị ọsa, dị a nyị ọza ana hụrẹ ẹkụra ana aā hị́ Ịbaarị-Isarisa vẹ nị. Ộ kụ ịbụrẹdị va yị Erisa. Ibaari ịpaapa ana a kụ hụụnị aarẹ ịnị ịrayị ọnọọ a sị mẹ̀ ịbụrẹdị ọnọọ nị. Â rẹ há apaapa ohwoohu vaka a va yọ. Dị Erisa kà ozi ahụ anị ọ gà ẹ yị ọnịsẹ nịnị ene hi ịdị anị, dị ẹ̀ rị ọ nị.

⁴³Ama ozi ahụ anị ộ họ̀ ọ ka, ô ro ka ịsa ọnọnị vaa hụ́ aza ẹnị ẹchẹhị ẹnẹnị? Di Erisa ka, ọ̀ sị yị wa vẹẹ rị ọ, agụvị ka Ẹnẹyịmavara ộ kà a ka ẹnịnị vaa rị ịsa, dị ọ vọ hi ẹtẹ.

⁴⁴Ịzẹyịza dị ozi ahụ Erisa kụ ịsa hi ẹtẹ yị wa nị. Anka Ẹnẹyịmavara mẹ̀ kà a gẹdẹ-gẹdẹ, ẹnịnị ệ rị ịsa, dị ọ vọ hi ẹtẹ nị.