Read ebira 2 Ohinọyị 9 Bible Online

2 Ohinọyị 9 - ebira bible

2 Ohinọyị 9

¹Ẹkụhị ọnya, Erisa ana vị ọnịsẹ, ộ hị́ ọnya ịnị ẹnị ọnịsẹ nịnị, dị ọ kà a yọ ka, “Tenyi ẹngụ awụ; sị ijonggo ana sị angwẹ tụ aanị, dị wa nọ Ịramọtị-Igiriyadi.

²Wèe tu ịzọọ, sì Ijehu ozi Ijehosahwati, aazị Inimisi. Wèe si o re, sị ọ hụụnị akakana ogu anị, dị wa sị ọ ngụ ịnị ịnẹ aku.

³Wàa sị ngụ ịnị aku, dị ụ sị ijonggo angwẹ ọnọnị dị ụ và angwẹ anị hi ọ ịrẹsụ.” Kà a yọ ka, “Ẹnẹyịmavara kà, ọ nị ộ nyị ọ ka ọ̀ vị ohinọyị Isirẹrị. Wàa vavọọ sị ọ mẹ, hụụ ịzọọ we zwe b”.

⁴Ịzẹyịza, ọzwọọmụha ana vị ọnịsẹ aanị, ộ nọ Ịramọtị-Igiriyadi.

⁵Ụmẹ ọnị ọ sị na ngụ ịzọọ vị ọnị ẹnị ọdọvịdị isoja nịnị gụ aa gẹ eyi, dị ọ ka, â tụ ọnị hi wu ọdọvịdị. Di Ijehu họ̀ ọ ka, “Ẹnẹ ọ vị ịnị ẹngụ ayị?” Dị ọnịsẹ ọnọnị ka, “Ẹwụụ yọ nị.”

⁶Ịzẹyịza Ijehu ộ kwẹẹtẹ, dị ẹ ngụ ịnị aku nị. Ọnịsẹ ọnọnị ộ va angwẹ ọnọọ hi ọ ịrẹsụ, dị ọ kà a yọ ka, “Ẹnẹyịmavara, Ohomorihi Anisirẹrị nịnị ka, ọnị ộ nyị wụ ka wa vị ohinọyị aza anị, Anisirẹrị nịnị o.

⁷Ọ kà wa wụ̀ ọga awụ, ohinọyị ana vị ozi Ahabị, agụvị ọnị ọ̀ sị ụya rị Ijezebẹrị agụvị ọnụtụ anị ọnịsẹ nịnị ọnị ọ wụ, ọnịrị agụvị ezi ahụ Ẹnẹyịmavara ana vọ ọnị ọ wụ.

⁸Ẹnẹyịmavara kà avaba ovwoovu Ahabị beri ezi anị vị ọnị ee vu ẹtẹ. Avaba ọnọrụ ini ovwoovu anị vị ọnị ọnị vaa wụụ ha, ẹ̀ẹ vị ozweyi, ẹ̀ẹ vị ọzọkụ.

⁹Ọ kà ịsị ọnị mẹ ovwoovu Ijerobowami ọnịrị ovwoovu Ibaasa ohinọyị Isirẹrị ẹyịva, ọnị rẹ vaa mẹ ovwoovu Ahabị nị.

¹⁰Ọza e yi vee ne oku Ijezebẹrị, irezi ẹ vaa rị oku anị ịnị ẹtẹ Ijezirẹẹrị nị.” Ịjị ọnịsẹ ọnọnị maanị sị ọ ka kẹnẹ, dị ọ jịnẹ hụụnị aku ọnọọ, dị o zwe nị.

¹¹Ịjị Ijehu varẹma ne tu ogu anị, dị ẹnịnị họ̀ ọ use ka, á vị ẹ̀ yị nyị ịrẹyị? Sị onuvu ọnọọ ee si wu aà mẹ? Dị Ijehu tu wa ohi ka: Vị́ ụ wàaa yẹ ịsị e si nịnị nị.

¹²Dị ẹnịnị ka, “Eyiye, yẹ yị yẹ! Kà ẹ yị ịsị ọ kà wụ.” Dị Ijehu ka ộ kà a yị ọnị ka Ẹnẹyịmavara kà: “Ọnị ộ nyị ọnị ka ọnị ọ̀ vị ohinọyị Isirẹrị.”

¹³Ịzịịzọọ, dị ẹnị ọdọvịdị isoja ana vị ogu Ijehu aanị tụ ịta ẹnịnị tịtẹ ka Ijehu ọ̀ jẹẹ ịrẹsụ anị nị. Ẹnịnị ê hú ịkakanchị, di e nowu ka: Ijehu ọ vị ohinọyị nị.

¹⁴Hụrị ụmẹ ọnọọ, dị Ijehu ozi Ijehosahwati, aazị Inimisi nyima ee sì iruvo Ijorami nị. Ijorami ọnịrị avaba Anisirẹrị ẹ vịdị nọ Ịramọtị-Igiriyadi ne zi Ihazayẹrị ohinọyị Ísiriya nị.

¹⁵Ama ohinọyị Ijorami ọ zị vavẹ va yà Ijezirẹẹrị. Ộ va yà ịzọọ ka ụnava ọnị Anisiriya nịnị tọ̀ ọnị ọ̀ vị. Ọ mẹ̀ nọ ịrẹkụ Ihazayẹrị ohinọyị Ísiriya a tọ̀ ọ ụnava ọnọọ nị. Ijehu ộ kà a yị ẹnị ọga isoja ana vọ ka: ẹ̀ẹ maanị dọ yị ọnị, a sị a nyị ọza ana hụụ Ịramọtị-Igiriyadi na kà aza ene hi Ijezirẹẹrị ọnọ o.

¹⁶Dị Ijehu hịrẹ ụkẹkẹ-ịrẹkụ anị, dị aa nọ Ijezirẹẹrị nị, agụvị ka Ijorami yị sụtẹtẹ tụ ịzọọ. Ahaziya ohinọyị Íjuda ộ ve ịzọọ ve he e eyi.

¹⁷Â nyị oserẹtẹ ana yà ịrẹsụ irehi ọgọdọ Ijezirẹẹrị. Ô re Ijehu ọnịrị aza ana saasa a aa vẹ, dị ọ ka: Ọnị ee re ka aza ệ wara aa vẹ. Di Ijorami ka ọ̀ kà a ka ọza ịnya ọ̀ sị umaata dị ọ̀ na gẹrị wa. Ọ̀ọ na gẹrị wa, ọ̀ họ̀ wa ka: ẹngwọọrọ ẹ̀ẹ sị aa vẹ nị?

¹⁸Ịzẹyịza dị ọza ịnya sị umaata dị ọ na gẹrị Ijehu nị. Ọ́ mẹ̀ na gẹrị ọ, dị ọ ka, ohinọyị ka, ẹngwọọrọ ọ̀ọ sị aa vẹ? Dị Ijehu ka, ịzị o re ẹngwọọrọ? Ọ̀ vareyi ọọ dụ ọnịị vẹ nị. Oserẹtẹ ọnọọ ộ varẹma kà a yị ohinọyị ka, ọza ọnị ọ tụ ụtụ ộ na, ama ẹ yị vavẹ o.

¹⁹Dị ohinọyị varẹma rẹ tụ ọnụtụ ọsa ka ò ne tu wa nị ộ na, dị ọ ka, ohinọyị ka ọnị ọ̀ họ̀ wa ka, ẹngwọọrọ ẹnịnị wáá sị aa vẹ nị? Dị Ijehu ka, “Ịzị u re ẹngwọọrọ? Vara eyi wa dụ ọnịị vẹ.”

²⁰Oserẹtẹ ọnọọ ộ varẹma rẹ kà a yị ohinọyị ka, ọnụtụ ọnọọ ộ na, ama ẹ yị vavẹ o. Ọ kà ọdọvịdị aza anaa vẹ aanị vị anaa vẹ anka ọnụra avọọ; vị ọ sị mẹẹ anka Ijehu avọọ nị.

²¹Ohinọyị Ijorami ộ kà a yị ezida anị ka, è tenyi ịkẹkẹ anị tịtẹ yị ọnị, dị ẹnịnị tenyi ọ tịtẹ yọ nị. Ọnịrị ohinọyị Ahaziya ệ kwẹẹtẹ aa na gẹrị Ijehu. Ọzọza vị ana sị ịkẹkẹ anị. Ẹnịnị ệ gẹrị ọ ịnị ẹtẹ ọnọrụ ana aā hị́ Ịnabọtị.

²²Ijorami ộ họ̀ Ijehu use ka: ẹngwọọrọ ọọ sị aa vẹ nị? Dị Ijehu ka, “á mẹmẹ zụ nyị ẹngwọọrọ ịrẹma ọnị ọpọchị ọnịrị ori ọnị ọnyị awụ Ijezebẹrị nyima anị yi hi ẹtẹ?”

²³Ịjị Ijorami maanị wụ kẹnẹ, ộ vareyi, dị ọ hị́ Ahaziya dị ọ ka, ọsọnị vị apẹ. Dị ọ kụ ahụ kụ echi nị.

²⁴Ijehu ộ sị avaba ụkata anị kụ́ ọpa anị, dị o che Ijorami ọpa anị. Ọpa ọnọọ ộ zị oze ịrẹma ngụ Ijorami ẹngụ na za ayị, dị o sú tụ ịnị ịkẹkẹ anị nị.

²⁵Â nyị ozi ahụ Ijehu ọnya ana aā hị́ Ibidika Ijehu ộ hị́ ọ, dị ọ kà a yọ ka, ọ̀ sị oku Ijorami, di ò ne e ta ịnị ẹtẹ Ịnabọtị ana vị Anijezirẹrị nị. Ọ kà ọ̀ tamayị ịrẹyị ọnị Ẹnẹyịmavara kà vàka Ahabị ada Ijorami na, ụmẹ ẹnẹ ẹnị â sịị dụ ịrẹmaa zị.

²⁶Ẹnẹyịmavara ộ kà a ka; oni ô re a mẹ̀ wụ Ịnabọtị ọnịrị ezi anị ẹẹrị. Avọ ọ, ịnị ẹtẹ ọnọnị gẹdẹ-gẹdẹ ọnị rẹ vaa yaa sị ụyaa rị wụ nị. Ịzẹyịza, dị Ijehu kà a yị ozi ahụ anị ka, ọ̀ sị oku Ijorami di ò ne e ta ịnị ẹtẹ Ịnabọtị nị, agụvị ịrẹyị ọnị Ẹnẹyịmavara kà ọ̀ sẹ.

²⁷Ịjị Ahaziya ohinọyị Ijuda maanị re ịsị ẹ mẹ, dị o zwe zi oze ẹkụra ana aā hị́ Ịbẹtị-Ịhaganị nị. Ijehu ộ kà a yị aza anị ka ẹ̀ dụ ọ, dị ẹ̀ rẹ wụ ọnị bẹẹ. Ẹnịnị ệ tọ̀ ọ ụnava ọ mẹ̀ sị ịkẹkẹ anị zị oze ịzị aā hị́ Iguri, ọ̀ sị gụrị ẹkụra ana aā hị́ Ibireemi: Ama ộ yị sị vụrị zwe na ngụ ịzị aa hị́ Imegido, dị ahịka ịzọọ o ne sú tụ nị.

²⁸Aza anị ệ sị ịkẹkẹ anị sị oku anị varẹma nọ Ijerusarẹmị, dị ẹnịnị ne ne e, ịzị eē ne ohinọyị nịnị, ẹkụra Idevidi nị.

²⁹Ana tụ ọ ịrayị ẹwụrọnya ọnị Ijorami ozi Ahabị rị ohinọyị Ísirẹrị, Ahaziya rị ohinọyị Íjuda nị.

³⁰Ijehu ộ va ngụ Ijezirẹẹrị, Ijezebẹrị ộ vịdị raà wụ ịsị ẹ mẹ, dị ọ mẹ ọvị nị. Ộ da ịsa sisi eyi anị, di o tenyi ẹyị anị ẹtẹẹtẹrẹ nị. Ini irehi ohinọyị ọnị ọ yà, dị o zi oze ini ozokete ee re ịsị aa na oze nị.

³¹Ijehu maanị aa ngụ oze ọbanyị ị vẹ kẹnẹ, dị Ijezebẹrị hị́ ọ, dị ọ ka, ẹwụ Izimiri, ana wụ ọga awụ, sị u wéé si ịzẹnị?

³²Ijehu ộ kana eyi vahịrẹ di o nowu ka: ẹnẹ jẹẹ pe aanị? Dị osuretu ene hi idi ohinọyị ẹẹva a vị ẹẹta da eyi gẹ re e nị.

³³Ộ kà a yị wa ka, ẹ̀ tụ Ijezebẹrị ụvọ hụrị ẹbẹẹba va nyẹtẹ nị. Ẹnịnị ệ tụ ọ ụvọ va nyẹtẹ ịzẹyịza, dị anị che ku ugene ọnịrị umaata ana jẹẹ nị. Di Ijehu ộ sị umaata anị ọnịrị ịkẹkẹ anị hịrẹ oku anị para hu nị.

³⁴Ộ ngụ ini irehi ohinọyị, dị ọ ya ịzọọ rị ịsa nị. Ọ sị ịsa rị, dị ọ va kà a ka à na sị oku ọnẹẹ ọhịmị ọnọọ dị è ne ne e nị, agụvị ka ozi ohinọyị ọ vị nị.

³⁵Ama ịjị ẹ ka ẹnị ee nee ne oku anị, dị ahịka ẹchụkụ ịrẹsụ anị ọnịrị ahụ beri ụvọta anị kẹnẹ e kuku ne tu nị.

³⁶Ịjị ẹnịnị vavẹ va ka ụtụ yị Ijehu, dị ọ ka: Ịrẹyị Ẹnẹyịmavara ọnị Erija ana vị Anitisibi kà ịhị ọnọọ yọ. Ộ kà a ka irezi nịnị ẹ vaa rị oku Ijezebẹrị ịnị ẹtẹ Ijezirẹẹrị nị.

³⁷Ộ kà a ka oku Ijezebẹrị vị ana vaa sị mẹẹ anka ịhyẹrẹ avọọ ịnị ẹtẹ Ijezirẹẹrị, dị ẹ yị nyị ọza ana va zụụ kà a ka, Ijezebẹrị yọ.