Read ebira 1 Ịtọpa 18 Bible Online

1 Ịtọpa 18 - ebira bible

1 Ịtọpa 18

¹Â nyị ụmẹ ọnya ộ varẹma kụ ịrẹkụ ne tu Anihwirisiti nịnị, dị ọ nyị ẹbẹẹba ẹnịnị nị. Dị ọ dọ wa ẹkụra ana aā hị́ Ịgaatị ọnịrị avaba ẹkụra ana kara a ọnị Anihwirisiti nịnị vịdị aa mẹ ịjọvaa tụra nị.

²Idevidi ộ rẹ nyị ẹbẹẹba Animowabi nịnị, dị ẹnịnị kụkụ yà ahụ anị, dị ẹyaa tu ẹkẹhị irehii yọ nị.

³Idevidi ộ vana rẹ kụ́ ịrẹkụ ne tu Ihadadeza, ohinọyị Anisiriya ịnị ẹtẹ Izoba. Ịzọọ vị ana gụrị ẹhwị ẹtẹ Ihamati. Ịhadadeza vị ene vịdị eè sì ka ọnị ọ̀ọ mẹ ịjọva tụra ẹhwị ẹtẹ ana yà eyi ẹbẹẹba Iyuhwuretisi.

⁴Idevidi ộ dọ wa ụkẹkẹ ịrẹkụ akahị, dị ọ za aza ẹnị akawụ-akawụ oze ẹẹta tụra akahị ana aā sị umaata kụ̀ ịrẹkụ nị. Ọ rẹ za aza ẹnị akawụ-akawụ oze ẹẹwụ ini isoja ana aā sị ahụụ kụ̀ ịrẹkụ. Ộ kụ ẹhụ umaata ẹchẹhị hi ẹtẹ ana a vọrọ ka ọ̀ sị na kụ̀ ịrẹkụ, dị o che ana vọ ahụ và hi ẹtẹ nị.

⁵Anisiriya nịnị ene hi Ịdamasịkọsị ệ tụ isoja ka ẹ̀ va gụ Ihadadeza ụvọ. Idevidi ô pe wa kụ̀ ịrẹkụ, dị ọ wụ ẹnị akawụ-akawụ oze ẹwụrọnya nị.

⁶Ộ jị udi tụ ẹhwị ẹtẹ ẹnịnị ọnị ọ kụ isoja hi. Dị Idevidi vana aà mẹ ohinọyịị tụra wa ịrẹsụ, dị ẹyaa tụ ẹkẹhị irehii yọ nị. Avaba aha ọnị Idevidi ọ̀ọ nọ, vị ọnị Ohomorihi sị ọ nyị ẹbẹẹba.

⁷Aza Ihadadeza ệ za ogonto ana a sị igooru mẹ. Dị Idevidi dọ wa dị ọ kụ ọ ne hi Ijerusarẹmị nị.

⁸Idevidi ộ rẹ kụ́ enyusẹ ozoza-ozoza ọsa hụrị ẹtẹ Itibihati ọnịrị ẹtẹ Ikuuni. Ọ rụrụ ẹtẹẹtẹrẹ. Enyusẹ ẹnẹnị Isoromọnị vana sị jị uruku, dị ọ rẹ sị mẹ ọhẹ ọnịrị ẹnya ọrụrụ-ọrụrụ tụ ịnị Irehi Ohomorihi nị.

⁹Â nyị ohinọyị ọnya ana aā hị́ Ịtọyi. Ohinọyị ẹkụra ana aā hị́ Ihamati ọ vị nị. Ộ wụ ọ ka Idevidi o reè huna avaba isoja Ihadadeza ana vị ohinọyị Izoba.

¹⁰Dị ọ tụ́ ozi anị ana aā hị́ Ijorami ka ọ̀ na kụ́ ohinọyị Idevidi nị. Ọ na ọ̀ kụ ọ nyarị ịrẹsụ ọyịza ka ộ nyị ehuna Ihadadeza. Ụmẹ ọrụrụ-ọrụrụ Ịtọyi ọnịrị Ihadadeza vịdị sị kụ́ ịrẹkụ nị. Ijorami ộ kụ ịsa ana a sị igooru, isiriva ọnịrị enyusẹ ozoza ọsa mẹ va mẹ Idevidi ẹyịza.

¹¹Ohinọyị Idevidi ộ kụ ẹyịza ẹnẹẹ tụ́ irenyi ka à sịị hẹkẹ Ẹnẹyịmavara. Avọọ ọ mẹ̀ rẹ mẹ isiriva ọnịrị igooru ọnị ọ kụ̀ hụrẹ ẹtẹ Edomi, Imowabi, Amọnị, Ihwirisiti ọnịrị ẹtẹ Anamarẹkị ọ̀ mẹ huna wa ịnị ịrẹkụ nị.

¹²Â nyị ọnọrụ ana aā hị́ Abisayi. Ọnyị anị ọ rị Izeruya nị. Ô pe Anedomi kụ̀ ịrẹkụ ínozi anọ-anọ, dị ọ nyị ẹbẹẹba ẹnịnị nị. Ộ wụ ẹnị akawụ-akawụ oze ịhịịna (18,000).

¹³Ộ jị udi irenyi-irenyi ịzị ọ kụ́ isoja hi avaba ẹtẹ Edomi, dị Idevidi kụkụ aa mẹ ohinọyị tụra avaba aza ene hi ịzọọ ịrẹsụ nị. Avaba aha ọnị Idevidi ọ̀ọ nọ, vị ọnị Ẹnẹyịmavara sị ọ nyị ẹbẹẹba.

¹⁴Idevidi ộ mẹ̀ ohinọyị tụra avaba Anisirẹrị ịrẹsụ, dị ọ mẹ ka aa mẹ̀ ebira ene zoza dị ọ rẹ vọrọọ hi aza anị nị.

¹⁵Ọyịnyara Abisayi ana aā hị́ Ijowabi ọ vị ọdọvịdị isoja Idevidi nị. Ijehosahwati ozi Ahirudi o si eyi pe ịsa ọ̀yị chẹrẹ nị.

¹⁶Ịzadọkị ozi Ahitubi ọnịrị Ahimẹrẹkị ozi Abiyata ẹ̀ vị ohirẹsụ irehi Ohomorihi nị. Dị Iseraya ọnị vị ọchẹrịsa ịsa nị.

¹⁷Ịbẹnaya ozi Ijehoyada o si eyi pe aza ene ee sere Idevidi nị. Dị ezi Idevidi ẹnị rẹ sị ụvọ za udi ẹbanyị-ẹbanyị yị aza ana aa mẹ ụkọrọọ yọ nị.