Read ebira 2 Ịtọpa 19 Bible Online

2 Ịtọpa 19 - ebira bible

2 Ịtọpa 19

¹Ịjị Ijehosahwati hụrẹ oze ịrẹkụ va ngụ Ijerusarẹmị ịnị ẹngwọọrọ,

²dị ọnịsẹ Ijehu ozi Ihanani jịnẹ ne tu ọ nị. Dị ọ họ̀ ọ ka sị ẹ vẹ dị ọ na gụ ọza odivi ụvọ, di o sì ịrẹyị aza anaā nyị ịhyẹrẹ Ẹnẹyịmavara? Ịsị ọnị ọ mẹ aanị ọ raà mẹ ka Ẹnẹyịmavara ọọ kụ́ ayị hi ọ.

³Ama ẹ yị vị avaba ebira ọnị ọ mẹ o divi, â nyị ebira ọyịza ọnị ọ vịdị mẹ. Ộ kụ́ avaba ọchị ori ọnẹẹ anaā hị́ Asẹra hụụnị avaba ẹtẹ, dị ọ sị avaba ẹngụ anị a sị dụ ịrẹyị Ẹnẹyịmavara nị.

⁴Ijehosahwati mẹ daka ra Ijerusarẹmị, ụmẹ tụra ụmẹ ọọ̄ sị ngụ ọ zịịzị hụrẹ Ịbẹẹsẹba na ngụ ẹkụra ene hi ịrẹsụ ataba Ehwireemi agụvị ọnị ọ hị́ aza varẹma vẹ ịda Ẹnẹyịmavara Ohomorihi ohiku ẹnịnị.

⁵Ộ nyị aza anaā mẹ̀ ọkarẹyị tụ́ ịnị avaba ẹkụra ana a jị ọvọ kara nị.

⁶Ô kà yị wa ka ee ro ịrẹyị dị ẹ vaa kà a. Asị e re ẹgọgọ ọza mẹ̀ ọkarẹyị agụvị ka Ẹnẹyịmavara ọ si wa tụ́ udi ọnọọ nị ọ vaa ya wa ịrẹma ịnị ọkarẹyị ẹnịnị.

⁷Avọọ ẹnịnị ee hí angwa Ẹnẹyịmavara, di e si eyi pe ẹtẹ. Ẹnẹyịmavara e yi si irikiti, a vị dị ọza ọ dọ ochirerenu.

⁸Ijehosahwati ộ nyị Anireevi, ọnịrị ohirẹsụ irehi Ohomorihi ẹnyị ne beri aza ọkọọka hụrẹ ịrẹsụ-ịrẹsụ ka ẹẹ mẹ̀ ọkarẹyị Ijerusarẹmị. Ẹnịnị ee tụ́ ohi ịrẹyị aza anaa nyị ahankata, a vị ọza anaa sị ahụ jịnẹ ọda Ẹnẹyịmavara nị.

⁹Ộ kà a yị wa ka ẹnịnị ẹ nyị angwahi Ẹnẹyịmavara, dị ẹẹ sị ayị ọnya mẹ ịzẹyịza hi.

¹⁰Àa nyị Anijuda ana a sị hụrẹ ẹkụra ẹnẹẹ nyị ve tụ́ wa ka ọ́ wụ̀ ọza a vị ka ộ sị ahụ jịnẹ ọda, ka ọ ọnọ ka ọ hụụnị ebira odivi agụvị asị Ẹnẹyịmavara du ayị hi wu nịnị. Wa vavọọ mẹ agụvị asị u rị ịvị nịnị.

¹¹Amarịya ana vị ohirẹsụ Irehi Ohomorihi ọbanyị ọ vaa nyị ọda tụra ịrẹyị ana kanyị ọda Ẹnẹyịmavara nị. Avọọ Izebadiya ozi Isimẹrị ana vị Ịgọvọnọ Ijuda ọ vaa nyị ọda ọkarẹyị aza ana zyaazị nị. Anireevi nịnị ẹ vaa mẹ ịsị ọda kà a mẹ̀ ọza ana aa rị ịvị nị ọ ka asị e hí angwa ka Ẹnẹyịmavara vaa ya pè aza ana mẹ ẹtẹẹtẹrẹ.