Read ebira Inehemaya 6 Bible Online

Inehemaya 6 - ebira bible

Inehemaya 6

¹Ịsanbaratị, Itobaya ọnịrị Ịgẹsẹmị Anarabi neberi ọnịvị ayị ana vọ ệ wụ́ ka me reè tenyi ọvọ ọnọnị tụra ta, ama mệ yị kụ ukere chire oze ọbanyị nịnị ve tu ụmẹ avọọ,

²dị Ịsanbaratị ọnịrị Ịgẹsẹmị tụ́ hị́ mị ka ẹmịrị ẹnị ẹ̀ na gẹ ịnị ẹkụra ọnya ana aā hị́ Ikehirimi ana vị ọnyara ịnị ẹkụra eweyi-eweyi ini ozi ẹtẹ Ono. Ama mâ yẹ ka vị́ ẹnịnị ee si oze ọnị ẹ vaa zị mẹ mị ọnyara nị.

³Agụvị avọọ, mị tụ́ aza hi wa ka mâ nyị ụkọrọ obooro ọnị maa mẹ̀. Mẹ yị zụ za ụkọrọ ọnọọ jẹẹ, di me ve tu wa.

⁴Ẹnịnị ệ vavọọ tụ ụtụ ọnọọ ụpẹ ẹẹna ve tu mị ịhị ọnọọ. Dị mị va ohi ọnyọọnya na yị wa nị.

⁵Ana tụ ọ ụpẹ ọhụhị, dị Ịsanbaratị chẹrẹ iwe tụ ozi ahụ anị ka ọ sị ụvọ sị ọ chapaa va yị mị nị.

⁶Ịnị iwe ọnọọ, Ịsanbaratị ka Ịgẹsẹmị ộ kà yị ọnị ka ọ sị ngụrẹyị ka ẹmịrị Aniju nịnị ẹ sị eyi gẹ ka yaa jẹẹ yị ẹngụ ayị, dị ma vị ohinọyị ẹnịnị. Agụvị avọọ ị yaa tụra ọvọ nị.

⁷Dị ọ rẹ ka ẹma raà nyị ọnịsẹ ka ẹ̀ nọ̀ọ Ijerusarẹmị ka ẹma vị ohinọyị Ijuda nị. Ọ kà ohinọyị Ipesiya vaa wụ̀ ọ. Agụvị avọọ me ve tu ẹnị, dị ẹmịrị ẹnị ẹ̀ gẹ eyi ịrẹyị ọnọnị.

⁸Dị mị và ohi naa yị ọ ka ẹ yị nyị ịzẹyịza ịnị ịrẹyị ọnị ọ kà aanị. Ịreche kẹnẹ ô che nị.

⁹Ẹnịnị vị enee chire yi angwa kẹnẹ. Ẹnịnị ê ro ka ẹnị ẹ̀ẹ ha ayị hí yị ịnẹ, mị vaa va ụkọrọ hi ẹtẹ. Ama dị mị mẹ̀ aduwa ka Ohomorihi ọ̀ sị ụkata yị yị mẹ̀ ụkọrọ ọnọọ nị.

¹⁰Ẹkụhị ọnya dị mị ne heyi Isemaya ana vị ozi Ideraya, ana ada anị vị Imehetaberi nị. Isemaya vị ana a jị ẹngwa tụ ịnị eehi anị. Dị Isemaya kà a yị mị ka ọnịvị ka ẹnị aa vaa wụ̀ mị ịrahụ nị. Agụvị avọọ ẹmịrị ọnị ọ̀ na tẹ̀ ịnị irehi Ohomorihi, di ye chire oze hi ẹngụ tụ ịzọọ.

¹¹Dị mị tụ ọ ohi ka sị ẹ vẹ dị ẹngụ ẹmị ọnọnị ee zwe na tẹ̀? Óó ro ka mị maa na tẹ̀ ịnị irehi Ohomorihi agụvị ụhwẹ amị? Mẹ yị nọ!

¹²Ịzịịzọọ mị yẹ ka Ohomorihi ẹ yị ka avọọ. Ama Ịsanbaratị ọnịrị Itobaya ẹ sị ẹkẹhị yị ọ ka o vene mị nị.

¹³Â sị ẹkẹhị yị ọ ka o chire mi angwa dị ma sụ ụba na mẹ odivi agụvị ẹnịnị e re oze du mị.

¹⁴Dị mị da ịpẹ yị Ohomorihi ka ọ sị ụya rị Itobaya ọnịrị Ịsanbaratị ịnị ịsa odivi ọnị ẹ yaa mẹ̀. Dị ọ rẹ sị ụya rị Inodaya, ọnẹẹ ana vị ọnịsẹ ọnịrị ọnịsẹ nịnị ana vọ ana sị vụrị ka ẹnị ẹ tụ mị angwahi.

¹⁵Ẹkụhị ẹvarẹwụ tụra ẹẹva a sị tụra ọvọ ọnọọ, dị ụkọrọ ta ịhị ẹ tụ ọ ẹkụhị ohurẹẹhị ịnị ụhwẹ ana aā hị́ Eruri nị.

¹⁶Ịjị ọnịvị ayị nịnị ọnịrị avaba ẹkụra ana kara wa wụ́ ka ọvọ ọ sị jị, dị angwahi ngụ wa ẹngụ agụvị ka ệ yẹ ka Ohomorihi ộ gụ yị ụvọ da a nị, dị ụhị kụkụ aa nyị wa nị.

¹⁷Ịnị avaba ụmẹ ọnọọ, ọdọvịdị Anijuda nịnị ọnịrị Itobaya vị anaa chẹrẹ iwe tu hi ẹngụ pooro dị ọvọ ta tụra.

¹⁸Aza ọrụrụ-ọrụrụ ene hi Ijuda ee hị́ eku ka ẹnị a saasa Itobaya agụvị ka ọ nyị ozi Isekaniya ana vị ozi Ara. Dị ozi Itobaya ana rị Ijehohananị rẹ nyị ozi Imesurami ana vị ozi Ịbẹrẹkiya nị.

¹⁹Aza vị ana ya eyi amị aa kà ebira ọyịza Itobaya, dị ẹ raà ka avaba ịsa ọnị mi kà yị Itobaya nị. Dị Itobaya chẹrẹ iwe ọrụrụ-ọrụrụ ka ọnị ọ sị chire mị angwa nị.