Read ebira Ẹsịta 5 Bible Online

Ẹsịta 5 - ebira bible

Ẹsịta 5

¹Ịhyẹgwẹta ọnị Ẹsịta vavọọ tụ́ ụtụ hi Imodekaya, dị ọ kụ́ ẹnya ose ohinọyị, dị ọ ngụ ohweje ohinọyị ana ya ịnị ịnẹ na jẹẹ ọvịdị ode ohinọyị nị. Ohinọyị vi ana yaatẹ và eyi kà oze ana aā zịị ngụ ini ohweje ọnọọ.

²Ịjị ohinọyị re ka Ẹsịta ose anị ộ jẹẹ ịnị akakana ohweje, ayị anị o hine tù ọ, dị ọ tana okutẹ igooru anị hi ọ nị. Di Ẹsịta kà pè e, dị ọ sị ụvọ kanyị ịrẹsụ okutẹ ọnọọ nị.

³Dị ohinọyị họ̀ Ẹsịta ose ani ka ò mè re? Dị ọ kà Ẹsịta ò họ̀ use ịsa tụra ịsa ọnị ee sì ka ọnị vaa sị́ yọ, ọ̀ọ daka vị achẹva ogu ẹtẹ ịjọva anị.

⁴Dị Ẹsịta tụ́ ọ ohi ka, “Taarụ Ohinọyị! wàa nyị ẹngụ awụ iyi, mee sì ka ẹwụrị Ịhamanị ò ve chi yị mị oruva ajịnị. Maa mẹ̀ ịsa tẹ̀ ẹwụ nịnị”.

⁵Ịzịịzọọ Ohinọyị tụ́ hị́ Ịhamanị ka ọnịrị ọ ò ne chi yị Ẹsịta nị. Dị ẹnị ẹyịva dudu zị nọ ịda Ẹsịta na rị ịsa ọnị ọ́ mẹ tẹ wa nị.

⁶E mè hì ẹtẹ e hụ́ eche dị ohinọyị tenyi họ̀ Ẹsịta use ka ọ̀ kà a yị ọnị ịsa tụra ịsa ene ee si hụụnị ụvọ anị nị. Ọ kà ò họ̀ use ka ọnị vaa sii yọ ọ̀ọ daka

⁷vị achẹva ụkata ịjọva ẹtẹ anị, Ẹsịta ô tụ́ o

⁸ohi ka, “Taarụ! ịsa mee sì yị. Wàa nyị ẹngụ awụ iyi ka wa mẹ ịsị mee sì yi mi, navọ ẹwụrị Ịhamanị ọ̀ vavẹ ve chi yị mị ụhwọọ. Mị vaa sị ohi yị wụ, Taarụ!”

⁹Ịhị ọnọọ di Ịhamanị jịnẹ huu ịzọọ di ayị anị ee hine, dị aa mẹrị saada kẹnẹ nị. Ọ màa jịnẹ hụụnị ikatamba ohinọyị, di Ịhamanị re Imodekaya ka ộ yaatẹ ịnị oze ovwoovu nị. Ama Imodekaya ọ yi kwẹẹtẹ di ò kụ́ ọ. Ịhamanị mè re e dị ayị a kụ́ ọ ẹtẹẹtẹrẹ nị.

¹⁰Ama Ịhamanị ẹ yị sị zụ̀ ka ayị aa kụ́ ọnị, dị aa nọ ịnị eehi anị nị. Ò mè tù ini eehi, dị ọ tụ́ na hí ọta anị nịnị ne beri ose anị ana aā hị́ Ịzẹrẹsị ni.

¹¹Ẹ mẹ̀ vẹ, ộ kà a yị wa ọnị mẹmẹ nyị ogu irenyi-irenyi, ọpa ezi ọnị ọnị ma, ohinọyị mẹmẹ sị ụbanyị yị ọnị dị ọ́ kà ọnị hịrẹ huna ezi ahụ ohinọyị ana vọ.

¹²Dị ọ rẹ ka ẹ yị vị ọnọọ kẹnẹ, ọnị ịnyara kẹnẹ Ẹsịta ose ohinọyị hị́ ka ọ̀ saasa ọva anị va rị ịsa ịda anị nị. Ọ rẹ ka ộ hị́ ọnị ka ọnị ọ̀ saasa ohinọyị va rị ịsa ụhwọọ.

¹³Dị Ịhamanị ka, “avaba ẹsẹnị e yi vene ịrẹyị eyi amị mèee yi re Imodekaya ana vị Aniju avọọ ka ọ yaayịtẹ enoze ohinọyị.”

¹⁴Di ose anị ana aā hị́ Ịzẹrẹsị ọnịrị ọta anị nịnị jị iwee yọ nị. Dị ẹ ka o hì ọchị ana nẹba ẹhụ ahụ ẹtarẹwụrito ẹẹhị, dị Ịhamanị ọ̀ dọ oze hụụnị ụvọ ohinọyị, di ò zù Imodekaya obo gẹ ọchị ọnọọ di ò sú nị. Wàa maanị sị ọ mẹ, dị wa saasa ohinọyị haara na rị ịsa, dị ayị awụ oo hine. Ajuwe ọnọnị ộ ngụ Ịhamanị eyi dị ọ vavọọ ne hi ọchị nị.